Rau tiko o Mary kei watina o John a ena dua na vanua e rawa ni rau vunautaka kina na itukutuku vinaka vei ira mai na Yatu Filipaini era gole yani vakacakacaka. Ena gauna ni matedewa na COVID-19 e tekivuna rawa o Mary e levu na vuli iVolatabu ena vanua e tiko kina kei na so tale na vanua e veiyasa i vuravura. E cakava vakacava?

E dau tarogi ira nona vuli iVolatabu o Mary: “O kila e dua ena via vulica na iVolatabu?” Ke vakaio, ena kerea me veikilaitaki koya kei na tataleitaki qori. Ni tarogi eso na taro rawarawa va qori e yaga vakalevu. Na vuna? Ni o ira na taleitaka na Vosa ni Kalou, era na via wasea na ka era vulica vei ira nodra vuvale kei na nodra itokani. Sala cava e yaga kina na taro qo?

E dua na vuli iVolatabu nei Mary o Jasmin, e veikilaitaki koya kei na le va tale era via vuli iVolatabu. Dua vei ratou qori o Kristine, na levu ni nona taleitaka nona vuli e kerea me vuli vakarua ena dua na macawa. Ni taroga o Mary ke kila e dua tale ena via vuli iVolatabu, e kaya sara o Kristine: “Io, au na veikilaitaki iko vei ira noqu itokani.” Ena loma ni vica ga na macawa e veikilaitaki Mary o Kristine kei na va nona itokani era via vuli. Oti qori e veikilaitaki Mary vei ira eso tale na itokani, era qai cakava tale ga qori na itokani nei Kristine.

E vinakata tale ga o Kristine mera vulica na iVolatabu na nona vuvale mai na Yatu Filipaini. E mani tukuna vua na luvena yalewa o Andrea. Ni se qai tekivu, e dau nanuma o Andrea: ‘O ira na iVakadinadina i Jiova era matalotu qaravi tamata, era sega ni vakabauti Jisu, era vakayagataka ga na veiyalayalati makawa.’ Ni oti ga na imatai ni nona vuli, e veisau sara ga nona rai. Ena gauna kece ni nona vuli, e dau kaya tu ga: “Ke sa volai tu ena iVolatabu, kena ibalebale e dina!”

Toso na gauna, e veikilaitaki Mary o Andrea vua na rua nona itokani kei na dua rau cakacaka vata, eratou tekivu vuli sara. Ni dau vuli o Andrea, e dau vakarogoci rau tiko o nona Nei na yacana o Angela, e mataboko. Dua na siga e kerei Andrea me veikilaitaki koya vei Mary ni via vuli iVolatabu. E taleitaka o Angela na ka sa vulica tiko. Ena loma ni dua ga na vula, e cavuqaqataka rawa e levu na tikinivolatabu, e vinakata tale ga me vuli vakava ena dua na macawa! Ena veivuke i Andrea, e tiko rawa kina o Angela ena soqoni e veimacawa ni sema ena vidio.

 Ni kila o Mary ni dau varorogo tale tiko ga o Joshua na wati Kristine ena gauna ni nodrau vuli, e tarogi koya o Mary ke via vuli tale ga. E kaya sara o Joshua: “Au na vakarorogo tu ga, kua ni tarogi au ena dua na ka; ke o cakava qori, au na biubiu.” Ena loma ni lima na miniti ni se qai tekivu na vuli, e levu sara nona taro o Joshua ni vakatauvatani kei Kristine qai via veivosakitaka tiko ga na iVolatabu.

Na taro rawarawa e taroga o Mary e levu kina era via vuli iVolatabu. E tuvanaka e vica vei ira qori mera vuli kei ira na mataveitacini. E 28 taucoko na vuli iVolatabu nei Mary mai na va na vanua.

O Jasmin, na imatai ni vuli iVolatabu sa tukuni oti mai, e papitaiso ena Epereli 2021. E papitaiso o Kristine ena Me 2022, sa lesu tale vei ratou nona vuvale ena Yatu Filipaini. Rau papitaiso tale ga e rua na vuli iVolatabu a veikilaitaka o Kristine vei Mary. Oti e vica na vula e papitaso tale ga o Angela, sa painia tudei tiko ena gauna qo. Sa vuli iVolatabu tiko o Joshua na wati Kristine, na luvedrau o Andrea kei na so tale, era toso vinaka tale ga vakayalo.

Ena imatai ni senitiuri, e tete totolo na itukutuku vinaka ena loma sara ga ni vuvale kei ira na itokani. (Joni 1:​41, 42a; Caka. 10:​24, 27, 48; 16:​25-33) Vacava mo taroga nomu vuli iVolatabu se o ira na tataleitaki: “O kila e dua ena via vulica na iVolatabu?” Ke o taroga na taro rawarawa qori, de dua o na kunea e levu era na via vulica na iVolatabu.