1, 2. E lomasavu vakacava o Jiova me vakayagataka na ka e bulia?

E KALOU lomasavu o Jiova. Na ka kece e tu vei keda e vu mai vua. E nona kece na koula kei na siliva, okati kina na vo tale ni iyaubula kei vuravura, ni vakayagataka qori me rawa kina nida bula. (Same 104:13-15; Akeai 2:8) E vakamacalataki vakalevu ena iVolatabu na nona vakayagataka vakacakamana o Jiova na veika e bulia me vukei ira kina nona tamata.

² Rauta ni 40 na yabaki nona vakarautaka o Jiova na mana kei na wai vei ira na Isireli nira tiko ena vanua talasiga. (Lako 16:35) E yaga vakacava qori? E “sega na ka me yali vei ira.” (Niem. 9:20, 21) O Jiova e vakayagataka nona parofita o Ilaisa me vakalevutaka vakacakamana na waiwai lailai e vo tiko vua na yada. Na nona lomasavu na Kalou e rawa kina ni sauma na yada nona dinau, me so tale ga nodrau ilavo me vukei rau vakaveitinani. (2 Tui 4:1-7) Ena veitokoni i Jiova, e vakarautaka kina vakacakamana o Jisu na kakana kei na ilavo ena gauna e vinakati kina.—Maciu 15:35-38; 17:27.

3. Na cava ena veivosakitaki ena ulutaga qo?

 ³ E taukena tu o Jiova na ka kece mera bula kina e vuravura na veika e bulia. Ia e sureti ira tale ga nona dauveiqaravi mera vakayagataka na ka era taukena mera tokona kina nona isoqosoqo. (Lako 36:3-7; wilika Vosa Vakaibalebale 3:9.) Na cava e namaka kina o Jiova meda vakayagataka vua na noda iyau? Na cava era cakava na dausokalou ena gauna sa oti mera tokoni kina vakailavo na matataki Jiova? E vakayagataka vakacava na isoqosoqo na ilavo e cautaki nikua? Ena veivosakitaki qori ena ulutaga qo.

4. Na cava eda vakaraitaka nida tokona na cakacaka i Jiova?

⁴ Eda soli ka vei Jiova nida lomani koya, eda dokai koya tale ga. Eda druka nida vakasamataka na ka kece e cakava ena vukuda. Ni vakamacalataka tiko o Tui Tevita na ka e vinakati me taravaki kina na valenisoro, e vakabibitaka sara ni ka kece eda rawata e vu mai vei Jiova, na ka tale ga eda solia vua, e taukena ga o koya.—Wilika 1 Veigauna 29:11-14.

5. E vakaraitaka vakacava na iVolatabu ni bibi ena noda sokalou na noda cau mai vu ni lomada?

⁵ E okati tale ga ena noda sokalou vei Jiova na cau. Ena nona raivotu na yapositolo o Joni, e rogoca na domodra na dauveiqaravi ni Kalou e lomalagi nira kaya: “E ganiti kemuni Jiova, na neimami Kalou, me nomuni na lagilagi, na vakarokoroko, kei na kaukaua, ni oni bulia na ka kece, ena nomuni lewa era bula, era buli kina.” (Vkta. 4:11) Vakacava o vakabauta ni ganiti Jiova na lagilagi kei na vakarokoroko kece, nida solia vua na ka vinaka duadua eda taukena? Ena veiuqeti i Jiova, e vakaroti ira na Isireli o Mosese mera rairai vua na Kalou ena tolu na soqo e dau vakayacori e veiyabaki. E tiki tale ga ni soqo qori me “kua ni dua vei ira me ligalala yani ena mata i Jiova.” (Vkru. 16:16) Nikua, e bibi ena noda sokalou na noda cau mai vu ni lomada meda tokona kina na isoqosoqo i Jiova e vuravura.

6. Na cava e vinaka kina meda soli ka? (Raica na imatai ni iyaloyalo.)

⁶ E vinaka na soli ka. Ena yaga vakalevu na noda dau lomasavu, sega ni noda taura wale ga. (Wilika Vosa Vakaibalebale 29:21.) Eda na rairai vakasamataka kina e dua na gone e soli iloloma vei rau na nona itubutubu ni vakayagataka na ilavo lailai rau solia vua. Dua na ka nodrau vakavinavinakataka na iloloma ya! Ena rairai painia tiko e dua na gonetagane se goneyalewa qai tiko ga e vale vei rau na itubutubu, de dua ena soli ilavo vei rau me yaga e vale. Macala ni rau na sega ni namaka qori, ia rau na taura ga ni rau kila ni qori e dua na sala e vakavinavinakataka kina na ka kece erau dau cakava vua. E kila tale ga o Jiova ni na yaga vei keda na noda solia na ka vinaka e tu vei keda.

7, 8. Era ivakaraitaki vinaka vakacava na dauveiqaravi i Jiova ena gauna vakaivolatabu (a) nira cau ena cakacaka lavotaki? (b) ena tokoni ni so tale na cakacaka yaga?

⁷ E vakamacalataki ena iVolatabu na nodra cautaka eso na ka era taukena. Ena so na gauna, era cau na dauveiqaravi ni Kalou mera tokona na cakacaka lavotaki. Kena ivakaraitaki, e veiuqeti  o Mosese mera cau ena tara ni valeniveitavaki, vaka kina o Tui Tevita ena tara ni valenisoro. (Lako 35:5; 1 Vei. 29:5-9) Ena gauna i Tui Joasi, era vakavinakataka na vale i Jiova na bete ena ilavo e cautaki. (2 Tui 12:4, 5) Nira kila na tacida ena ivavakoso vaKarisito taumada ni vinakati na veivuke ena vuku ni dausiga, era “lomavata . . . me vaka na ka era dui rawata, mera vakauta na ka ni veivuke vei ira na veitacini era tiko mai Jutia.”—Caka. 11:27-30.

⁸ Ena so na ituvaki, era cau vakailavo na dauveiqaravi i Jiova me tokoni ira na liutaka tiko na cakacaka. Ena Lawa e soli vei Mosese, e sega ni dua nodra ivotavota na Livai ni vakatauvatani kei ira na vo ni yavusa. Ia era cautaka na Isireli e dua na ikatini, me vukei ira na Livai mera veiqaravi tiko ga ena valeniveitavaki. (Tiko 18:21) E muri, e yaga tale ga vei Jisu kei ratou na yapositolo nodra lomasavu na yalewa mera “qaravi ratou nira vakayagataka na nodra iyau.”—Luke 8:1-3.

9. E kau mai vei na cau ena gauna sa oti?

⁹ E kau mai vei na cau qori? Era rairai cautaka na Isireli na ka sara ga era kauta mai Ijipita me tara kina na valeniveitavaki ena vanua talasiga. (Lako 3:21, 22; 35:22-24) Ena imatai ni senitiuri, eso na lotu vaKarisito era volitaka na ka era taukena me vaka na qele se vale, mera cautaka na ilavo qori vei ratou na yapositolo. Eratou vota sara na ilavo qori vei ira na vinakata na veivuke. (Caka. 4:34, 35) Eso tale era vakatikitikitaka na ilavo mera tokona vakalevu na cakacaka. (1 Kor. 16:2) Koya gona era dau cau kece na vutuniyau kei na dravudravua.—Luke 21:1-4.

10, 11. (a) Eda na vakatotomuria vakacava na nodra lomasavu na dauveiqaravi ni Kalou ena gauna vakaivolatabu? (b) Cava o nanuma me baleta na noda itavi dokai meda tokona na cakacaka ni Matanitu ni Kalou?

¹⁰ Nikua eda na rairai uqeti meda cau ena cakacaka lavotaki. Kena ivakaraitaki, vakacava e vinakati me tara e dua na Vale ni Soqoni vou me vakayagataka nomudou ivavakoso? Se vakavinakataki tiko? Eda na rairai rogoca ni vinakati na ilavo me vakavinakataki na valenivolavola ni tabana, vakailavotaki na soqo ni veiwasewase eda na tiko kina, se ra tokoni na mataveitacini ni oti na leqa tubukoso. Eda cau tale ga meda tokoni ira na veiqaravi ena itikotiko liu kei na valenivolavola ni tabana e veiyasa i vuravura. Na noda cau e tokoni ira na daukaulotu, painia lavotaki, kei ira na ivakatawa ni tabacakacaka. Ena tiko na inakinaki ni ivavakoso me tokona vakailavo na porokaramu ni tara Vale ni Soqoni kei na Vale ni Soqoni Lelevu, ena yaga vakalevu qori vei ira na tacida e veiyasa i vuravura.

¹¹ Eda rawa ni vakaitavi kece ena tokoni ni cakacaka i Jiova ena iotioti ni veisiga qo. Levu era cau mai e sega tukuni na yacadra. Eda biuta lo ga noda cau ena kena kato ena Vale ni Soqoni, se cau ena Internet na jw.org. Eda na rairai nanuma ni lailai wale ga noda cau. Ia e levu na cau nikua, e rawati ena cau lalai sega ni ilavo levu. O ira mada ga na tacida ena vanua dravudravua, era vakataki ira mai Masitonia nira “dravudravua,” ia era cikeva mera bau cau, era cakava qori mai vu ni lomadra.—2 Kor. 8:1-4.

12. E vakayagataka vinaka vakacava na isoqosoqo i Jiova na cau?

¹² E masulaka qai vakasamataka  vinaka na iLawalawa Dauvakatulewa me yalodina, me vuku tale ga ena sala e vakayagataki kina na cau. (Maciu 24:45) E wasewasei na cau qai vakayagataki ena kena inaki. (Luke 14:28) Ena gauna vakaivolatabu, o ira na digitaki mera kumuna na cau era muria na idusidusi me vakayagataki ga na ilavo ena kena inaki dodonu. Kena ivakaraitaki, e lesu i Jerusalemi o Esera me solia na cau nei tui Perisia, na koula, siliva, kei na so tale na iyau e sivia na 100 na milioni na dola na ilavo ni Merika nikua. E okata o Esera na cau qori me cau e sega ni lavaki vei Jiova, e qarauna me kua ni dua na ka e vakaleqa na kena kau. (Esera 8:24-34) Na yapositolo o Paula e kumuna na cau mera qaravi kina na mataveitacini mai Jutia. E raica sara ga mera “dina ena mata i Jiova ena ka kece” o ira na kauta na cau, mera dina tale ga ena ‘matadra na tamata.’ (Wilika 2 Korinica 8:18-21.) E vakatotomuri Esera kei Paula na isoqosoqo i Jiova nikua, ni muria vinaka na idusidusi me baleta na kumuni ni cau kei na kena vakayagataki.

13. Meda raica vakacava na kena vakalailaitaki eso na ka ena isoqosoqo?

¹³ Ena rairai tuvanaka e dua na vuvale me veisau eso na ka me veiraurau kina na ilavo e rawati kei na ilavo eratou vakayagataka. De dua eratou nanuma me rawarawa ga nodratou bula me ratou qaravi Jiova kina vakalevu. Qori tale ga na ka e cakava na isoqosoqo i Jiova. Ena veiyabaki sa oti, e levu na ka vovou eda vakanamata kina. Eso na gauna sa levu tale na ilavo e vakayagataki, lailai e rawa mai. E saga gona na isoqosoqo me vakalailaitaka na ilavo e vakayagataka kei na cakacaka me qaravi, me rawa ni vakayagataki vinaka kina na noda cau.

14-16. (a) Na cava e rawati ena noda cau? (b) E yaga vakacava vei iko na ka e vakarautaka na isoqosoqo?

¹⁴ Era kaya na tacida era sa dede ena dina ni dua na ka na levu ni isolisoli vakayalo sa vakarautaki tu nikua. Vakasamataka mada! Ena vica na yabaki sa oti, e vakarautaki na jw.org kei na JW Broadcasting. E tabaki na iVolatabu na Vakadewa ni Vuravura Vou ena levu tale na vosa. Ena 2014/2015, e vakayacori ena tolu na siga ena vica na raraniqito lelevu ena 14 na siti e veiyasa i vuravura na soqo ni veimatanitu  e kena usutu “Vakaliuca Tiko ga na Matanitu ni Kalou.” Dua na ka nodra marau na tiko ena soqo qori.

¹⁵ Levu era vakavinavinakataka na yaga ni ka e vakarautaka na isoqosoqo i Jiova. Kena ivakaraitaki, me baleta na JW Broadcasting, rau kaya e dua na veiwatini rau veiqaravi tiko e Esia: “Keirau veiqaravi ena dua na siti lailai. Eso na gauna keirau nanuma ni keirau yawaki ira na mataveitacini, keirau sega ni lai vakasamataka kina na rabailevu ni cakacaka i Jiova. Ia ni keirau sarava na JW Broadcasting, keirau vakadeitaka kina nida lewe ni mataveitacini e vuravura raraba. Era dau vakanamata na mataveitacini eke ena JW Broadcasting. Nira sarava na porokaramu ni veivula, era dau kaya nira veivolekati sara kei ratou na lewe ni iLawalawa Dauvakatulewa. Era sakitaka tiko nikua nira lewe ni isoqosoqo i Jiova.”

¹⁶ E veiyasa i vuravura, rauta ni 2,500 na Vale ni Soqoni e tuvanaki me tara se vakavinakataki. Nira vakayagataka e dua na ivavakoso mai Honduras na nodra Vale ni Soqoni vou, era vola: “Keimami marau ni keimami lewe ni isoqosoqo i Jiova e vuravura, keimami marautaki ira tale ga na mataveitacini e vuravura raraba, e rawa kina ni tara na neimami Vale ni Soqoni keimami dau diva tu.” Levu tale ga era cavuta qori nira taura na iVolatabu kei na so tale na ivola e vakadewataki ena nodra vosa, nira vukei ena vakacoko, se vuavuaivinaka ni vunau ena salatu se matanalevu.

17. E laurai vakacava ena isoqosoqo i Jiova nikua na nona veitokoni?

¹⁷ Era dau vaqaqa eso se rawa vakacava nida vakayacora noda cakacaka ni vakayagataki ga na cau. E lai sarasara e dua na vakailesilesi ni kabani rogo ena noda vanua ni tabaivola, e kurabuitaka nira veiqaravi ga kina na bolecakacaka ni vakayagataki na cau, e sega na volivolitaki se kumuni ilavo. E kaya ni sa bau dredre dina qori. Eda duavata kei koya! Eda kila ni rawati ga qori ena veitokoni i Jiova.—Jope 42:2.

18. (a) Eda na vakalougatataki vakacava nida soli ka meda tokona na Matanitu ni Kalou? (b) Eda na tuberi ira vakacava na luveda kei ira na ka vou mera soli ka?

¹⁸ E lesi keda o Jiova ena itavi dokai meda tokona na cakacaka lavotaki nikua. E vakadeitaka nida na vakalougatataki ke da tokona na Matanitu ni Kalou. (Mala. 3:10) E yalataka o Jiova ni na rawaka o koya e yalosolisoli. (Wilika Vosa Vakaibalebale 11:24, 25.) E vakamarautaki keda tale ga na noda soli ka, ni “marau vakalevu o koya e solia na ka, vakalailai o koya e taura na ka.” (Caka. 20:35) Ena noda ivakaraitaki kei na ka eda tukuna, meda tuberi ira na luveda kei ira na ka vou mera marautaka nodra soli ka, kei na veivakalougatataki.

19. E uqeti iko vakacava na ulutaga qo?

¹⁹ E nei Jiova na ka kece e tu vei keda. Nida solia lesu vua e vakaraitaka nida lomani koya, eda vakavinavinakataka na ka kece e cakava ena vukuda. (1 Vei. 29:17) Nira cau na lewenivanua me baleta na taravaki ni valenisoro, “era marautaka . . . na nodra soli ka nira soli ka mai vu ni lomadra vei Jiova.” (1 Vei. 29:9) Koya gona, meda marautaka mada ga na noda solia lesu vei Jiova na ka e vakarautaka ena vukuda.