1, 2. Na soqo cava e veivakaduavatataki ena 2018, na vuna? (Raica na imatai ni iyaloyalo.)

NI DROMU na siga ena ika31 ni Maji, 2018, era na soqo vata na tamata ni Kalou kei na levu tale mera vakananuma e veiyabaki na iVakayakavi ni Turaga. Ni veisau na siga, e vica vata na milioni era na vakananuma na mate i Karisito. Qo e dua na soqo e dau veivakaduavatataki e veiyabaki e vuravura!

² Eda rawa ni raitayaloyalotaka nodrau marau na veitamani o Jiova kei Jisu, nira soqoni vata ena veiaua e vica vata na milioni na lewe i vuravura mera tiko ena soqo bibi qo. E tukuni ena iVolatabu ni “dua na isoqosoqo levu, e sega ni dua na tamata e wilika rawa, mai na veimatanitu kece, veiyavusa, veimatatamata, kei na duivosavosa” era na kailavaka: “E vakabulai keimami na neimami Kalou e dabe tiko ena idabedabe vakaturaga, na Lami tale ga.” (Vkta. 7:9, 10) Sa na marautaki mada ga ni rau rokovi o Jiova kei Jisu ena kena soqovi na iVakananumi!

3. Na taro cava ena saumi ena ulutaga qo?

 ³ Ena saumi ena ulutaga qo e va na taro. (1) Sala cava eda na dui vakavakarau kina ena iVakananumi, ena yaga vakacava noda tiko? (2) Ena vakaduavatataki ira vakacava na tamata ni Kalou na iVakananumi? (3) Eda na veitokoni vakacava? (4) E tiko na iotioti ni iVakananumi? Ena gauna cava?

4. Na cava e bibi kina noda tiko ena iVakananumi?

⁴ Meda vakasamataka na bibi ni noda tiko ena iVakananumi. Nanuma ni bibi ena noda sokalou na soqoni ni ivavakoso. E kila vinaka o Jiova kei Jisu na noda sasaga meda tiko ena soqo namaki qo. Eda na via vakaraitaka vei rau nida na sega ni calata, vakavo ke vakaleqai na ituvaki ni yagoda, se yaco e dua na ka e vakadredretaka noda tiko. Nida vakaraitaka ni bibi na noda sokalou, eda sa vakaraitaka tiko vei Jiova na vuna me volai kina na yacada ena nona “ivola ni ivakananumi,” oya na “ivola ni bula” e tu kina na yacadra era na rawata na bula tawamudu.—Mala. 3:16; Vkta. 20:15.

5. Ni bera na iVakananumi, eda na kila vakacava nida ‘tudei tiko ena vakabauta’?

⁵ Ni vo e vica na siga me vakayacori na iVakananumi, eda rawa ni vakatikitikitaka na gauna meda masulaka qai dikeva tale na noda veiwekani kei Jiova. (Wilika 2 Korinica 13:5.) Eda na cakava vakacava? Meda ‘dikevi keda tiko ga se da tudei tiko ena vakabauta se sega.’ E vinaka meda dui taroga: ‘Au vakabauta dina niu sa lewena tiko na isoqosoqo duadua ga e vakadonuya o Jiova me vakayacora na lomana? Au sa gumatua tiko ni vunautaka na itukutuku vinaka ni Matanitu kei na veivakavulici? E laurai ena noqu ivalavala niu vakabauta dei nida sa bula tu ena iotioti ni veisiga, sa vakarau cava tale ga na veiliutaki i Setani? Au se nuitaki Jiova tiko ga kei Jisu me vaka ga na gauna au yalataka kina noqu bula?’ (Maciu 24:14; 2 Tim. 3:1; Iper. 3:14) Nida vakasamataka vakatitobu na taro qori eda na kilai keda vinaka kina.

6. (a) Na sala cava ena rawati kina na bula? (b) E dau vakarautaki koya vakacava ina iVakananumi e dua na qase, o na muria vakacava nona ivakaraitaki?

⁶ Meda wilika da qai vakasamataka vakatitobu na wase ni iVolatabu e vakamacalataka na bibi ni iVakananumi. (Wilika Joni 3:16; 17:3, vmr.) Na sala duadua ga e rawati kina na bula tawamudu oya meda “kilai” Jiova, da qai “vakaraitaka [noda] vakabauti” Jisu, na Luvena duabau ga. Ni o vakavakarau ena iVakananumi, vakacava mo digia eso na ulutaga ena uqeti iko mo toro volekati Jiova kei Jisu? Rogoca mada na ka e dau cakava e dua na tacida sa dede nona veiqaravi vaqase. E dau kumuna na ulutaga ni Vale ni Vakatawa e vakamacalataki kina na iVakananumi kei na loloma erau vakaraitaka vei keda o Jiova kei Jisu. Ni vo e vica na macawa me vakayacori na iVakananumi, e dau wilika tale na ulutaga qori qai vakasamataka vakatitobu na bibi ni soqo qo. Ena so na gauna, e dau kumuna e dua tale se rua na ulutaga vou. E tukuna na qase qo ni dau vulica e levu sara na ka vou e veiyabaki ni taleva na ulutaga qori, e wilika na tikinivolatabu ni iVakananumi qai vakasamataka vakatitobu. Koya e bibi sara, ni sa qai lomani Jiova tiko ga vakalevu kei Jisu e veiyabaki. Na vuli va qori ena rawa ni vakalevutaka nomu loloma kei na nomu vakavinavinakataki Jiova kei Jisu, ena yaga tale ga kina nomu tiko ena iVakananumi.

7. (a) Na cava e masulaka o Jisu ena imatai ni iVakayakavi ni Turaga? (b) Eda kila vakacava ni rogoca o Jiova na nona masu?

⁷ Ena imatai ni bogi ni iVakayakavi ni Turaga, e masulaki ira nona imuri o Jisu mera duavata kece, mera marautaka tale ga na duavata erau mareqeta vakaveitamani. (Wilika Joni 17:20, 21) A rogoca dina o Jiova na masu nei Luvena, nira vakabauta kina e vica vata na milioni nikua ni talai koya mai o Jiova. Na iVakananumi e sega ni tautauvata kei na soqoni tale eso era dau vakayacora na tamata ni Kalou, ni vakavotui kina na noda duavata na iVakadinadina i Jiova. Era soqoni vata e veiyasa i vuravura na duikaikai mai na veivanua. Ena so na vanua, e dau vakawaleni se beci na noda soqo vata na duikaikai ena soqo ni lotu. Ia na noda duavata e talei ena mata i Jiova kei Jisu!

8. Na itukutuku cava me baleta na duavata e vakasavuya o Jiova vei Isikeli?

⁸ E sega ni vou vei keda na tamata ni Kalou na noda duavata, ni sa tukuna makawa tu mai o Jiova. Vakasamataka mada na itukutuku e vakasavuya vua na parofita o Isikeli me baleta na kena semati e rua na kau, na “nei Juta” kei na “nei Josefa.” (Wilika Isikeli 37:15-17.) E vakamacalataki ena “Taro na Dauwiliwili” ena Vale ni Vakatawa ni Julai 2016: “O Jiova e tukuna vei Isikeli e dua na itukutuku marautaki. E yalataka ni na vakaduavatataki na matanitu o Isireli nira sa lesu ina Vanua Yalataki. E parofisaitaki tale ga kina na nodra vakaduavatataki na tamata ni Kalou ena iotioti ni veisiga.”

9. E vakadinadinataki vakacava ena iVakananumi na parofisai ena Isikeli?

⁹ Tekivu mai na yabaki 1919, sa tuvanaki ira vakamalua na lumuti o Jiova, e vakaduavatataki ira tale ga nira vakatakarakarataka na kau “nei Juta.” Nira lewe levu tiko ga na nuitaka na bula e vuravura, era vakatakarakarataka na kau “nei Josefa” mera tokoni ira na lumuti, era sa “dua ga na qelenisipi.” (Joni 10:16; Saka. 8:23) E yalataka o Jiova me semai rau na kau qori me sa dua ga e ligana. (Isik. 37:19) Rau sa veiqaravi tiko ena duavata na ilawalawa qo ena veiliutaki ni dua ga na Tui o Jisu Karisito sa vakalagilagi oti, a cavuti vakaparofisai me o “Tevita.” (Isik. 37:24, 25) E dau laurai e veiyabaki na duavata vakairogorogo e cavuti ena Isikeli nira soqoni vata na ivovo ni lumuti kei ira na ‘so tale na sipi’ mera soqova na iVakananumi ni mate i Karisito! Na cava gona eda na cakava yadudua meda tokona da qai taqomaka na duavata qori?

10. Eda na uqeta vakacava na duavata vakamataveitacini?

¹⁰ Dua na sala eda uqeta kina na duavata, oya nida bucina na yalomalumalumu. Ni se bula e vuravura o Jisu, e vakasalataki ira na nona tisaipeli mera vakamalumalumutaki ira. (Maciu 23:12) Ke da muria qori, ena sega ni rawai keda na yalo ni vuravura na qaciqacia. Ia nida yalomalumalumu eda na talairawarawa vei ira na liutaki keda, ni na uqeta na duavata. Ena marautaka tale ga o Jiova na noda yalomalumalumu, ni “cati ira na viavialevu na Kalou, ia e vakaraitaka nona loloma soli wale vei ira na yalomalumalumu.”—1 Pita 5:5.

11. Ena uqeta vakacava na duavata noda vakasamataka vakatitobu na ibalebale ni madrai kei na waini?

¹¹ Na ikarua ni sala eda uqeta kina na duavata, oya nida vakasamataka na ibalebale  ni madrai kei na waini ena iVakananumi. Ni bera na bogi oya vaka kina ena bogi sara ga ya, vakasamataka na bibi ni madrai sega ni vakaleveni kei na waini damudamu. (1 Kor. 11:23-25) Na madrai e dusia na yago uasivi i Jisu e cabora, na waini e dusia na nona dra e vakadavei. Ia e sega ni vinakati meda kila wale ga na kena ibalebale. Nanuma tiko ni okati ena isoro i Karisito e rua na ivakaraitaki levu ni loloma. Na loloma i Jiova ni solia na Luvena ena vukuda, kei na loloma i Jisu ni yalorawarawa me mate ena vukuda. Nida vakasamataka na nodrau loloma, ena uqeti keda meda lomani rau tale ga. Na noda lomani Jiova kei ira na tacida e vaka na ivau e tauri keda vata, ena vaqaqacotaka tale ga na noda duavata.

12. E vakamatatataka vakacava o Jisu ena nona vosa vakatautauvata ni vinakata o Jiova meda dau veivosoti?

¹² Na ikatolu ni sala eda uqeta kina na duavata, oya nida yalorawarawa meda veivosoti. Nida vosoti ira era vakacudrui keda, e vakaraitaka nida marautaka ni vosoti noda ivalavala ca yadua ena isoro i Karisito. Vakasamataka na vosa vakatautauvata i Jisu ena Maciu 18:23-34. Mo taroga: ‘E gu na lomaqu meu muria na ka e vakavulica o Jisu? Au dau yalovosovoso qai nanumi ira na taciqu vakayalo? Au tu vakarau meu vosoti ira era cala vei au?’ E duidui na ivalavala ca, eso sa bau dredre sara ga meda vosota. Ia eda vulica na rai nei Jiova ena vosa vakatautauvata qori. (Wilika Maciu 18:35.) E vakamatatataka o Jisu ni na sega ni veivosoti o Jiova ke da yalodredre ni vosoti ira na tacida. Qori e dua na ka meda vakasamataka! Eda na taqomaka na noda duavata nida veivosoti me vaka e vakavulici keda kina o Jisu.

13. E uqeta vakacava noda duavata nida guta na veiyaloni?

¹³ Nida dau veivosoti, e vakaraitaka nida guta na veiyaloni. Nanuma na ivakasala ni yapositolo o Paula meda ‘gumatua ni maroroya na duavata e vakavuna na yalo tabu, nida vauci  vata ena veiyaloni.’ (Efeso 4:3) Ena vula ni iVakananumi kei na bogi eda vakananuma kina, e bibi meda vakasamataka na noda ivakarau vei ira eso tale. Mo taroga: ‘E laurai niu dau katona na ca? E kilai niu dau guta na veiyaloni kei na duavata?’ Qo na taro bibi meda vakasamataka ena gauna qori.

14. Eda na vakaraitaka vakacava nida ‘dauveivosoti ena loloma’?

¹⁴ Na ikava ni sala eda uqeta kina na duavata, oya nida dau loloma me vakataki Jiova, na Kalou dauloloma. (1 Joni 4:8) Eda sega ni via cavuta qo me baleti ira na tacida, “Io au na lomani ira, ia au sega ga ni taleitaki ira”! Qori e veibasai kei na ivakasala i Paula me “laurai tale ga na nomuni loloma ena nomuni dauveivosoti.” (Efeso 4:2) E sega ni tukuna wale ga meda “dauveivosoti.” E tukuna ga ni dodonu meda cakava qori ena “loloma.” E tiko na kedrau duidui. Ena ivavakoso era tiko kina na duikaikai e vagolei ira mai o Jiova ni lomani ira. (Joni 6:44) Ni vagolei ira mai mera qaravi koya, kena ibalebale ni mareqeti ira. Ena rawa vakacava meda tukuna nida sega ni lomani ira na tacida? Me kua gona nida bureitaka na loloma e vakarota o Jiova meda vakaraitaka vei ira!—1 Joni 4:20, 21.

15. Gauna cava sa na sega tale kina ni vakayacori na iVakananumi?

¹⁵ Dua na gauna sa na sega tale ni vakayacori na iVakananumi. Eda kila vakacava? E vola o Paula na imatai ni nona ivola vei ira na lotu vaKarisito lumuti e Korinica nira vakananuma na mate i Jisu e veiyabaki, era “vakatakila tiko kina na mate ni Turaga me yacova nona lako mai.” (1 Kor. 11:26) Na vosa “lako mai” e cavuti eke e tautauvata ga kei na “lako mai” e cavuta o Jisu ena nona parofisai me baleta na gauna ni icavacava. E kaya me baleta na veivakararawataki levu sa tu qo e matada: “Ena qai basika mai lomalagi na ivakatakilakila ni Luve ni tamata, era na qai tavimabu ena vakaisaisa na yavusa kece e vuravura, era na raica tale ga na Luve ni tamata ni lako mai ena o kei lomalagi ena lewa kei na lagilagi e sega ni tukuni rawa. Ena qai talai ira nona agilosi ena domo ni biukila rogo levu, era na kumuni ira vata na nona digitaki mai na matanicagi vava, mai na iyalayala ni lomalagi e dua ina iyalayala ni lomalagi adua.” (Maciu 24:29-31) Na nodra ‘kumuni na digitaki’ e dusia na gauna era na rawata kina na nodra icovi ni bula vakalomalagi na lumuti kece era se bula tiko e vuravura. Ena yaco qori ni cava na itekitekivu ni veivakararawataki levu, ni bera toka ga na ivalu na Amaketoni. Era na qai tomani Jisu na le 144,000 mera vakamalumalumutaki ira na tui ni vuravura. (Vkta. 17:12-14) Ena vakayacori na iotioti ni iVakananumi ni bera toka ga nodra kumuni na lumuti i lomalagi, sa kena iotioti tale ga ni sa na “lako mai” o Jisu.

16. Na cava mo kua ni calata kina na iVakananumi ena yabaki qo?

¹⁶ Meda vakadeitaka gona me yaga noda tiko ena iVakananumi ena ika31 ni Maji, 2018. Meda masuti Jiova tale ga me vukei keda meda uqeta tiko ga na noda duavata! (Wilika Same 133:1.) Nanuma, dua na gauna sa na sega tale ni vakayacori na iVakananumi. Ena gauna mada ga qo, meda saga meda tiko kina da qai mareqeta na talei ni noda duavata ena iVakananumi.