ENA mataka ni Vukelulu na ika24 ni Janueri 2018, era marau na lewe i Peceli e Merika kei Kenada ni kacivaki ni sa dua tale na lewe ni iLawalawa Dauvakatulewa ni iVakadinadina i Jiova, o Brother Kenneth Cook, Jr.

E sucu o Brother Cook e Pennsylvania, Merika, e susu tale ga kina. E vulica na ka dina vua e dua nona lewenikalasi ni bera na tuvaitutu ena sekeneri, mani papitaiso ena ika7 ni June, 1980. E tekivu painia tudei ena imatai ni Seviteba, 1982. Oti e rua na yabaki nona painia, e sureti sara i Peceli me veiqaravi e Wallkill, Niu Yoka, ena ika12 ni Okotova 1984.

Ena 25 na yabaki e tarava, e duidui na itavi e qarava o Brother Cook ena Vanua ni Tabaivola kei na Tabana e Qaravi ira na Lewe i Peceli. Rau vakamau kei Jamie ena 1996 qai tomani koya ena veiqaravi e Wallkill. Ena Tiseba 2009, rau toki o Brother kei Sister Cook ena vanua ni vuli na Watchtower Educational Center e Patterson, e veiqaravi o Brother Cook ena tabana e sauma na taro vakaivolatabu (Writing Correspondence Department). Ena Epereli 2016, ni rau lesu mai Wallkill, rau toki sara o Brother kei Sister Cook i Brooklyn. Oti e lima na vula, rau mani toki ina itikotiko liu e Warwick, Niu Yoka. Ena Janueri 2017, e lesi o Brother Cook me dauveivuke ena Komiti ni Volavola ni iLawalawa Dauvakatulewa.