1-2. (a) Eda kila vakacava ni na rawarawa ga na nona vakananuma o Jisu nona mate? (b) Na itovo cava i Jisu eda na vulica?

O RAWA ni vakamacalataka na ka e dau caka e veiyabaki ena iVakananumi ni mate i Karisito? Levu vei keda eda kila na ka e vakayacori ena iVakayakavi ni Turaga, ni rawarawa ga. Ia e soqo bibi duadua. Eda na taroga, ‘Na cava e rawarawa kina na kena ituvatuva?’

² Ena nona cakacaka vakaitalatala o Jisu e vuravura, e kilai ni vakavulica na ka dina ena sala e rawarawa qai matata. (Maciu 7:28, 29) E va sara ga qori na nona vakarautaka na ivakananumi * ni nona mate, e rawarawa, ena yaga tale ga. Meda dikeva mada na iVakayakavi qo, kei na so na ka e cakava qai tukuna o Jisu. Eda na kila kina na levu ni nona yalomalumalumu, yaloqaqa kei na loloma. Eda na vulica tale ga na sala meda muri koya kina vakavoleka.

3. Me vaka e volai ena Maciu 26:26-28, e rawarawa vakacava na soqo ni iVakananumi e tauyavutaka o Jisu? Na cava e vakatakarakarataka na madrai kei na waini?

³ E tiko o Jisu kei ratou na 11 nona yapositolo yalodina ena gauna e tauyavutaka kina na iVakananumi ni nona mate. E rawarawa ga na kena icakacaka ni vakayagataka o Jisu na ka e vo mai na kanavata ni Lakosivia. (Wilika  Maciu 26:26-28.) E vakayagataka o Jisu na madrai sega ni vakaleveni kei na waini sa tu rawa. Sa qai tukuna vei ratou na nona yapositolo ni vakatakarakarataka qori na yagona uasivi kei na nona dra e vakarau cabora ena vukudratou. E bibi dina vei ratou na ivakayakavi qori, e kena imatai tale ga. Ia ratou sega ni kurabuitaka na kena rawarawa. Baleta?

4. Eda kila vakacava ena ivakasala i Jisu vei Marica ni na rawarawa ga na iVakananumi?

⁴ Vica na vula yani e liu, ena ikatolu ni yabaki ni cakacaka vakaitalatala i Jisu, a gade ena nodratou vale na nona itokani voleka—o Lasarusa, Marica kei Meri. E tekivu veivakavulici sara o Jisu. A tiko tale ga o Marica, ia e ogataka e dua na kakana levu vua nona vulagi dokai. E raica qori o Jisu qai vakadodonutaki Marica ena yalololoma me kila ni sega ni tukuni sara me dua na kakana levu. (Luke 10:40-42) Ni vo e vica na aua me mate vakaisoro, e muria sara ga o Jisu na ka e vakavulica. Ena sala cava? E vakadeitaka me rawarawa ga na iVakananumi. Na cava eda vulica vei Jisu?

5. Na cava eda vulica vei Jisu ni rawarawa ga na soqo ni iVakananumi? E veisemati vakacava qori kei na Filipai 2:5-8?

⁵ E laurai na yalomalumalumu i Jisu ena nona itovo kei na ka e tukuna. Sa rauta me vakaraitaka na itovo qori ena bogi me mate kina. (Maciu 11:29) E kila tu o Jisu ni sa vakarau cabora e dua na isoro e duatani duadua, ena vakaturi koya o Jiova ena itutu lagilagi e lomalagi. Vakacava, qori ena uqeti Jisu me cakava e dua na soqo levu ni nona ivakananumi me rawa ni vakacerecerei? Sega. E kaya ga vei ratou na nona tisaipeli me ratou vakananuma vakadua e veiyabaki na nona mate, me rawarawa tale ga. (Joni 13:15; 1 Kor. 11:23-25) Eda vulica vei Jisu ni sega ni dau dokadoka ni rawarawa ga na ka e vakarautaki qai veiganiti. Eda marau ni dua nona itovo na noda Tui vakalomalagi na yalomalumalumu.—Wilika Filipai 2:5-8.

6. Eda na muria vakacava na yalomalumalumu i Jisu nida vakatovolei?

⁶ Eda na muria vakacava na yalomalumalumu i Jisu? Nida kauaitaka na ka e baleti ira eso tale qai muri o keda. (Fpai. 2:3, 4) Vakasamataka mada na iotioti ni nona bogi e vuravura. E kila o Jisu ni sa vakarau vakamatei vakaloloma, ia dua na ka nona kauaitaki ratou na  nona yapositolo yalodina ni ratou na rarawataka na nona mate. E vakavulici ratou ena iotioti ni bogi, e veivakayaloqaqataki qai vakadeitaki ratou. (Joni 14:25-31) E yalomalumalumu o Jisu ni sega ni kauaitaka ga na ka e baleti koya. Sa dua dina na ivakaraitaki vinaka!

7. E vakaraitaka vakacava o Jisu na yaloqaqa ni tauyavutaka oti na iVakayakavi ni Turaga?

⁷ Ni tauyavutaka oti o Jisu na iVakayakavi ni Turaga, e vakaraitaka vakacava na yaloqaqa? E kila ni na beitaki qai vakamatei ena dua na cala vakamadua ni vosabeca na Kalou. Ia e vosota kece qori me cakava na loma i Tamana. (Maciu 26:65, 66; Luke 22:41, 42) E yalodina tiko ga o Jisu me vakarokorokotaka na yaca i Jiova, tokona nona veiliutaki cecere, e vakarautaka tale ga na sala mera bula tawamudu kina na veivutuni. E vakarautaki ratou tale ga nona imuri ena ka eratou na sotava.

8. (a) Na cava e tukuna o Jisu vei ratou nona yapositolo yalodina? (b) Ni sa oti e vica na yabaki nona mate, eratou muria tiko ga vakacava nona tisaipeli na nona yaloqaqa?

⁸ E vakaraitaka tale ga o Jisu na yaloqaqa ni sega ni vakasamataka vakalevu na ka ena rawa ni vakanuiqawaqawataki koya, ia e kauaitaka na ka eratou gadreva na nona yapositolo yalodina. Ni sa vakatalai Jutasa, e tauyavutaka sara na iVakayakavi. Na soqo rawarawa qori era na nanuma kina na nona imuri era na qai lumuti na yaga ni kena dave na dra i Jisu, kei na nodra okati ena veiyalayalati vou. (1 Kor. 10:16, 17) E tukuna o Jisu vei ratou nona imuri na ka rau vinakata vakaveitamani me ratou yalodina tiko ga kina, qai veiliutaki kei koya i lomalagi.  (Joni 15:12-15) E tukuna tale ga me ratou namaka na veivakatovolei. E uqeti ratou me ratou vuli ena nona “yaloqaqa!” (Joni 16:1-4a, 33) Oti e vica vata na yabaki, eratou se muria tiko ga na nona tisaipeli na nona ivakaraitaki ni vakuai koya kei na yaloqaqa. Ratou a vakacacani, ia ratou veitokoni tiko ga.—Iper. 10:33, 34.

9. Eda na muria vakacava na yaloqaqa i Jisu?

⁹ Eda muria tale ga vakacava nikua na yaloqaqa i Jisu? Ena vinakati na yaloqaqa meda vukei ira na tacida era vakacacani ena vuku ni nodra vakabauta. Nira vesu vakatawadodonu na tacida, meda cakava na ka kece eda rawata me baleti ira, okati kina noda vosa ena vukudra. (Fpai. 1:14; Iper. 13:19) Eda na yaloqaqa tale ga nida vunau tiko ga ena “doudou.” (Caka. 14:3) Me vakataki Jisu, eda na vunautaka tiko ga na itukutuku vinaka ni Matanitu ni Kalou ke da tusaqati mada ga se vakacacani. Ia eda dau rere ena so na gauna. Na cava meda cakava?

10. Na cava meda cakava ni se vo e vica na macawa me caka na iVakananumi? Na vuna?

¹⁰ Eda na yaloqaqa tiko ga nida vakasamataka na inuinui e rawati ena ivoli. (Joni 3:16; Efeso 1:7) Ni vo e vica na macawa me caka na iVakananumi, na cava meda cakava meda vakavinavinakataka kina vakalevu na ivoli? Meda muria na ituvatuva ni wili iVolatabu ni iVakananumi, masu, qai vakasamataka vakatitobu na veika e yaco ni bera ni mate o Jisu. Ena bogi ni iVakananumi, ena matata sara vei keda na ibalebale ni madrai kei na waini, kei na bibi ni isoro e vakatakarakarataka. Ni matata vei keda  na ka rau cakava o Jiova kei Jisu, na kena yaga vei keda kei ira na wekada, ena dei na noda inuinui da qai vosota ena yaloqaqa me yacova na icavacava.—Iper. 12:3.

11-12. Na cava eda sa vulica mai me baleta na iVakayakavi ni Turaga?

¹¹ Na cava eda sa vulica mai me baleta na iVakayakavi ni Turaga? Oya na talei ni isoro i Jisu, nona yalomalumalumu kei na yaloqaqa. Eda marau vakalevu ni se vakaraitaka tiko ga nikua na itovo qori o Jisu na noda Bete Levu, e vakamamasu ena vukuda! (Iper. 7:24, 25) Eda na vakavinavinakataka vakacava na ka e cakava? Meda tiko ena iVakananumi me vaka ga e vakarota. (Luke 22:19, 20) Ena vakayacori qori ena siga e veidonui kei na Naisani 14, na siga bibi duadua ena loma ni yabaki.

¹² Dua tale na itovo i Jisu eda vulica ena iVakayakavi ni Turaga. E kilai tani ena itovo qori ni se bula e vuravura, e uqeti koya tale ga me mate ena vukuda. Meda dikeva mada.

13. E vakamacalataki vakacava ena Joni 15:9 kei na 1 Joni 4:8-10 na loloma i Jiova kei Jisu? E yaga vei cei na nodrau loloma?

¹³ E ucui Jiova vinaka o Jisu ena nona lomani keda ena ka kece e cakava. (Wilika Joni 15:9; 1 Joni 4:8-10.) O koya e bibi duadua ni vu mai lomana me solia nona bula ena vukuda. Ke da lumuti se ‘so tale na sipi,’ e yaga kece vei keda na nodrau loloma na veitamani ena vuku ni isoro. (Joni 10:16; 1 Joni 2:2) E laurai tale ga vakacava ena ka e vakayagataki ena iVakananumi na nona lomani ratou nona tisaipeli o Jisu kei na nona veinanumi?

14. E vakaraitaka vakacava o Jisu ni lomani ira nona tisaipeli?

¹⁴ E rawarawa ga na iVakananumi e tauyavutaka o Jisu ni lomani ira nona imuri lumuti. Ni toso na gauna, e dodonu mera vakananuma e veiyabaki na nona tisaipeli lumuti na iVakananumi, ena ituvaki cava ga, wili kina e valeniveivesu. (Vkta. 2:10) Vakacava era muria tiko ga na ka e vakarota o Jisu? Io!

15-16. Rawa vakacava nira vakananuma eso na iVakayakavi ni Turaga ni dredre na ituvaki?

¹⁵ Me tekivu ena imatai ni senitiuri me yacova mai nikua, era saga na lotu vaKarisito dina mera vakananuma na mate i Jisu. Era muria ena nodra vinaka taucoko na ka sara ga e caka ena iVakayakavi ni Turaga, ni dredre mada ga ena so na gauna. Meda dikeva mada e vica na ivakaraitaki. Ni vesu tu o Brother Harold King e Jaina, e vinakati me vakananuma na mate i Jisu. E qaseqasetaka nona vakarautaka na waini kei na madrai ni vakayagataka ga na ka sa tu. E saga tale ga me cakacakataka donu na tikinisiga ni iVakananumi. E vakananuma taudua na iVakayakavi ni Turaga e valeniveivesu, e lagasere, masu qai dua nona ivunau vakaivolatabu.

¹⁶ Qo e dua tale na ivakaraitaki. Era vesu ena keba ni veivakararawataki ena iKarua ni iValu Levu eso na tacida yalewa. Era bolemate mera vakananuma na iVakayakavi ni Turaga. Ni rawarawa na ka me vakayagataki, era qaseqasetaka na kena caka na iVakananumi. Era vola: “Keimami duri wavoki, toka e lomadonu e dua na teveli lailai e ubi ena isulu vulavula, e tu e delana na waini kei na madrai. Keimami cina kadrala ni na laurai levu na ka keimami cakava  ke waqa na cina. . . . Keimami sa qai yalataka vua na Tamada ni keimami na tokona na yacana savasava ena neimami kaukaua kece.” E talei dina nodra vakabauta! Ena levu ni loloma i Jisu, eda se rawa ga ni vakananuma na iVakayakavi ni Turaga ni dredre mada ga na ituvaki!

17. Na cava meda taroga?

¹⁷ Ni sa roro mai na iVakananumi, meda taroga: ‘Sala cava au na muria kina vakavoleka na loloma i Jisu? Au dau kauaitaka na ka e baleti ira na taciqu? Au dau namaka vakasivia na ka vei ira na mataveitacini, seu kila ni vakaiyalayala na ka era rawata?’ Meda muri Jisu mada ga nida dau ‘veikauaitaki.’—1 Pita 3:8.

18-19. (a) Na cava eda vakadeitaka? (b) Cava meda cakava?

¹⁸ Sa vakarau oti noda vakananuma na mate i Karisito. Ni “lako mai” o Jisu ena veivakararawataki levu, ena kumuni ira na nona “digitaki” era vo tiko mera lako i lomalagi. Qori na gauna sa na sega kina na iVakananumi.—1 Kor. 11:26; Maciu 24:31.

¹⁹ Ke sa sega mada ga na iVakananumi, eda vakadeitaka nida na sega vakadua ni guilecava na tamata i Jiova na soqo rawarawa qori. E dusia na levu ni nona yalomalumalumu o Jisu, yaloqaqa kei na nona loloma. Ena gauna qori, era na talanoataka na veika me baleta na iVakananumi o ira na dau tiko kina vei ira na bula ena gauna ya mera vuli kina. Ia me yaga vei keda ena gauna qo, e bibi meda muria na yalomalumalumu i Jisu, yaloqaqa kei na loloma. Nida cakava qori, ena vakaicovitaki keda o Jiova.—2 Pita 1:10, 11.