1-2. (a) Na cava e raica o Jiova nira soqoni e vica vata na milioni ena iVakayakavi ni Turaga? (Raica na iyaloyalo ena waqana.) (b) Cava eda na veivosakitaka ena ulutaga qo?

VAKASAMATAKA mada na ka e raica o Jiova nira soqoni e vica vata na milioni e veiyasa i vuravura ena iVakayakavi ni Turaga. E sega ni raica ga na keda lewe levu, e raici keda yadudua tale ga. Kena ivakaraitaki, e kilai ira na sega ni calata e veiyabaki. De dua era tiko kina o ira na tusaqati kei ira na dau lako vakavudua ena soqoni, ia era okata na iVakananumi me soqo bibi. E raica tale ga o Jiova eso era se qai tiko vakadua ena iVakananumi nira via kila na ka e dau caka kina.

² Io, e marau o Jiova nida tiko vakalewe levu ena iVakananumi. (Luke 22:19) Ia e sega ni kauaitaka ga na keda iwiliwili. E kauaitaka vakalevu na vuna eda tiko kina, io e bibi vei Jiova na noda inaki. Eda na veivosakitaka ena ulutaga qo na taro: Na cava meda tiko kina ena iVakananumi e veiyabaki kei na soqoni e veimacawa e vakarautaka o Jiova vei ira na lomani koya?

3-4. (a) Na cava eda tiko kina ena soqoni? (b) Cava e vakaraitaka nida tiko kina? (c) Nida vakasamataka na 1 Korinica 11:23-26, cava meda kua kina ni calata na iVakananumi?

³ Na vuna levu eda tiko kina ena soqoni ni ivavakoso ni okati ena noda sokalou. Kena ikuri, ni vakavulici keda kina o Jiova. O ira na dokadoka era sega ni vinakata mera vakavulici. (3 Joni 9) Ia eda vinakata me vakavulici keda o Jiova kei na nona isoqosoqo.—Aisea 30:20; Joni 6:45.

⁴ Nida tiko ena soqoni e vakaraitaka nida yalomalumalumu,  eda yalorawarawa tale ga ni vakavulici. Eda tiko ena iVakananumi nida sega wale ga ni raica me soqo bibi, ia eda yalomalumalumu ni muria na ivakaro i Jisu: “Dou cakava tiko ga qo mo dou vakananumi au kina.” (Wilika 1 Korinica 11:23-26.) Ena uqeti keda na soqoni qori me dei na noda inuinui, eda kila tale ga kina na levu ni nona lomani keda o Jiova. Ia e kila o Jiova ni vinakati meda vakayaloqaqataki se vakadeitaki wasoma, sega ni vakadua ga e veiyabaki. Oya na vuna e vakarautaka kina e veimacawa na soqoni qai uqeti keda meda tiko kina. Eda na muria na veidusimaki qori nida yalomalumalumu. Eda vakayagataka e levu na gauna meda vakavakarau da qai tiko ena soqoni.

5. Na cava era ciqoma kina na yalomalumalumu na veisureti i Jiova?

⁵ Levu na lewenivanua yalomalumalumu era ciqoma e veiyabaki na veisureti i Jiova me vakavulici ira. (Aisea 50:4) Era marau nira tiko ena iVakananumi, era tekivu gole tale ga ena vo ni soqoni. (Saka. 8:20-23) Eda duavata kei ira nida marautaka me dusimaki keda o Jiova, me vakavulici keda tale ga ni ‘dau veivukei qai dau veivakabulai.’ (Same 40:17) Io, e bibi qai marautaki dina nida ciqoma na veisureti me rau vakavulici keda o Jiova kei Jisu na Luvena lomani.—Maciu 17:5; 18:20; 28:20.

6. E yaga vakacava nona yalomalumalumu e dua na turaga me tiko ena iVakananumi?

⁶ E veiyabaki eda dau sureta e levu mera tiko ena iVakananumi ni mate i Jisu. Era vakadinata na yalomalumalumu ni yaga dina nodra ciqoma na veisureti. Qo e dua na ivakaraitaki. Ena vica na yabaki sa oti, e taura e dua na turaga na ivola ni veisureti, mani tukuna vua na tacida tagane e veisureti ni na sega ni tiko rawa. Ena bogi ni iVakananumi, e kurabui na tacida tagane qori ni yaco yani na turaga ya. E qoroya na nodra veikauaitaki na mataveitacini, e tekivu gole ina soqoni e veimacawa. E calata ga e tolu na soqoni ena yabaki tarava. Na cava e uqeti koya me dau tiko ena soqoni? Na nona yalomalumalumu me veisautaka nona rai. E qai tukuna na tacida a sureti koya, “E turaga yalomalumalumu.” E macala ni vagolea mai na turaga qori o Jiova me mai qaravi koya, ena gauna qo sa dua na tacida.—2 Sam. 22:28; Joni 6:44.

7. Ena uqeti keda vakacava meda yalomalumalumu na ka eda vulica ena soqoni kei na wili iVolatabu?

⁷ Na ka eda vulica ena soqoni kei na ka eda wilika ena iVolatabu ena uqeti keda meda yalomalumalumu. Ni vo e vica na macawa me vakayacori na iVakananumi, ena vakabibitaki ena noda soqoni na ivakaraitaki i Jisu kei na nona yalomalumalumu ni solia nona bula me ivoli. Ni vo e vica na siga me vakayacori na iVakananumi, eda uqeti meda wilika na veika e cakava o Jisu ni bera nona mate kei na nona vakaturi. Na ka eda vulica ena soqoni qori kei na wili iVolatabu eda na vakavinavinakataka kina vakalevu nona mate ena vukuda. Qori ena uqeti keda meda vakatotomuria na nona yalomalumalumu da qai cakava na loma i Jiova ke dredre mada ga na ituvaki.—Luke 22:41, 42.

8. E vakaraitaka vakacava o Jisu na yaloqaqa?

⁸ Eda vinakata tale ga meda vakatotomuria na yaloqaqa i Jisu. Vakasamataka  mada nona yaloqaqa ni vo e vica na siga me mate. E kila vinaka tu nira na vakamadualaki koya na kena meca, kuitalaki qai vakamatei. (Maciu 20:17-19) Ia e tu vakarau me mate. Ni sa kena gauna, e tukuna vei ratou na nona yapositolo yalodina eratou tiko vata e Kecisemani: “Dou tucake, me datou lako. Raica! Sa voleka mai o koya ena soli au.” (Maciu 26:36, 46) Nira lako yani na ilala era vakaiyaragi mera vesuki koya, e toso i liu, vakatakilai koya qai vakaroti ira na sotia mera biuti ratou na yapositolo. (Joni 18:3-8) E vakasakiti dina na yaloqaqa i Jisu! Nikua, era saga na lotu vaKarisito lumuti kei na so tale na sipi mera yaloqaqa. Ena sala cava?

9. (a) Na cava e rairai vinakati kina na yaloqaqa meda tiko ena soqoni? (b) Ena uqeti ira vakacava na tacida era vesu tu na noda ivakaraitaki?

⁹ Ni dredre na ituvaki, de dua ena vinakati na yaloqaqa meda tiko ena soqoni. Eso na tacida era bikai tu ena rarawa, yalolailai, se tauvimate, ia era gole ga ena soqoni. Eso tale era tusaqati mai vale, se vei ira na vakailesilesi ni matanitu. Vakasamataki ira mada na tacida era vesu tu ena vuku ni nodra vakabauta. Ena uqeti ira vakacava na noda ivakaraitaki? (Iper. 13:3) Nira rogoca nida qaravi Jiova tiko ga nida vakatovolei, ena uqeti ira me dei na nodra vakabauta, yaloqaqa, mera yalodina tale ga. Qori sara ga na ka e sotava na yapositolo o Paula. Ni vesu tu mai Roma, e marau vakalevu ni rogoca nira qaravi Jiova tiko ga ena yalodina na mataveitacini. (Fpai. 1:3-5, 12-14) E volavola o Paula vei ira na Iperiu ni se qai sere ga se ni bera ni sere. E uqeti ira na lotu vaKarisito yalodina mera “veilomani tiko ga,” mera kua tale ga ni biuta na soqoni vata.—Iper. 10:24, 25; 13:1.

10-11. (a) O cei meda sureta ena iVakananumi? (b) Me vaka e tukuni ena Efeso 1:7, na cava eda cakava kina qori?

¹⁰ Eda vakaraitaka na yaloqaqa nida sureti ira na wekada, ira eda cakacaka vata, kei ira eda tiko veitikivi ena iVakananumi. Cava meda sureti ira kina? Nida vakavinavinakataka na ka erau cakava ena vukuda o Jiova kei Jisu. Eda vinakata mera kila tale ga na yaga ni “loloma soli wale” i Jiova ena vuku ni ivoli.—Wilika Efeso 1:7; Vkta. 22:17.

¹¹ Nida yaloqaqa meda tiko ena soqoni, eda vakaraitaka tale ga e dua na itovo erau kilai tani kina o Jiova kei Luvena.

12. (a) Ena uqeti keda vakacava na soqoni meda lomani Jiova kina vakalevu kei Jisu? (b) E uqeti keda vakacava na 2 Korinica 5:14, 15 meda vakatotomuri Jisu?

¹² Na noda lomani Jiova kei Jisu e uqeti keda meda tiko ena soqoni. Na ka eda vulica kina ena uqeti keda meda lomani rau vakalevu. Eda rogoca wasoma ena soqoni na ka erau cakava ena vukuda.  (Roma 5:8) Eda vulica ena iVakananumi na levu ni nodrau lomani keda kei ira na se bera ni kila na yaga ni ivoli. Ena levu ni noda vakavinavinaka, eda na via vakatotomuri Jisu ena noda vakatulewa ena veisiga. (Wilika 2 Korinica 5:14, 15.) Ena uqeti keda tale ga meda vakacaucautaki Jiova ni vakarautaka na ivoli. Dua na sala eda na vakacaucautaki koya kina, oya ni vu mai lomada na noda ivakamacala ena soqoni.

13. Eda na vakaraitaka vakacava na levu ni noda lomani Jiova kei Luvena? Vakamacalataka.

¹³ Eda vakaraitaka na levu ni noda lomani Jiova kei Luvena nida yalorawarawa ni vakuai keda ena vukudrau. Levu sara na ka meda vakuai keda kina meda tiko ena soqoni. Levu na ivavakoso era soqoni ena yakavi ni suka na cakacaka, nida sa rairai oca tu. E dua tale na soqoni e vakayacori ena muanimacawa, na gauna era dau vakacegu kina e levu. Vakacava e kila tu o Jiova nida oca ia eda saga meda tiko ena soqoni? Io, ena mareqeta na levu ni noda sasaga nida vakaraitaka noda lomani koya.—Mari. 12:41-44.

14. Na cava eda vulica ena ivakaraitaki ni loloma i Jisu?

¹⁴ Eda vuli ena nona ivakaraitaki ni loloma o Jisu. E bolemate kina ena vukudratou na nona tisaipeli, e dau kauaitaka tale ga e veisiga na veika me baleti ratou. Kena ivakaraitaki, e lai raici ratou mada ga na nona imuri ni sa oca tu se nuiqawaqawa. (Luke 22:39-46) E kauaitaka na ka e rawa ni cakava ena vukudra eso tale, sega ni ka ga e baleti koya. (Maciu 20:28) Nida lomani Jiova tale ga vakalevu kei ira na tacida, eda na sasaga vagumatua meda tiko ena iVakayakavi ni Turaga kei na soqoni kece ni ivavakoso.

15. O cei eda vinakata meda vukea?

¹⁵ Eda mataveitacini dina vaKarisito, eda marau tale ga ni vakayagataka noda gauna meda sureti ira na ka vou mera tomani keda. Ia eda vinakata tale ga meda vukei ira “eda vakabauta vata” era malumu tu vakayalo. (Kala. 6:10) Eda vakaraitaka noda loloma nida uqeti ira mera tiko ena soqoni, vakabibi na iVakananumi. Me vakataki Jiova kei Jisu, eda marau vakalevu nira lesu vei Jiova  na Tamada dauloloma, e noda iVakatawa tale ga.—Maciu 18:14.

16. (a) Eda na veiuqeti ena cava, cava e bibi kina na soqoni? (b) Na cava e gauna vinaka kina qori meda nanuma na vosa i Jisu ena Joni 3:16?

¹⁶ Ena vica na macawa sa tu qo e matada, meda sureta mada ga e levu mera tiko ena iVakananumi ena yakavi ni Vakaraubuka, na ika19 ni Epereli 2019. (Raica na kato “ O na Sureti Ira?”) Meda veiuqeti mada ga ena loma ni yabaki qo meda kua ni calata na soqoni kece e vakarautaka o Jiova. Ni sa roro mai na gauna me vakarusai kina na ituvaki ca qo, e bibi na soqoni meda yalomalumalumu tiko ga kina, yaloqaqa, meda veilomani tale ga. (1 Ces. 5:8-11) Meda vakavinavinakataka mada ga mai vu ni lomada na levu ni nodrau lomani keda o Jiova kei Jisu!—Wilika Joni 3:16.