1. Eda kila vakacava ni sa yali vei ira e levu nikua na veilomani vakaveiwekani?

E PAROFISAITAKA na iVolatabu ni levu ena “yali vei ira na veilomani vakaveiwekani” ena iotioti ni veisiga. (2 Tim. 3:1, 3) Eda raica sara tu ga qori nikua. Kena ivakaraitaki, dua na iwiliwili levu ni veiwatini era sa veisere, era veicudruvi na itubutubu, ra qai sega ni vakila na gone nira lomani. Era sega mada ga ni veivolekati na vuvale era tiko vata ga ena dua na vale. E kaya e dua na daunivakasala ena bula vakavuvale, “sa sega ni qai veivosaki vakalevu o Ta, Na, kei ratou na gone, sa matadra tiko ga ena kompiuta, tablet, talevoni, se qito ena vidio. “Era tiko vata ga ena dua vale, ia era sega mada ga ni veikilai vinaka.”

2-3. (a) Me vaka e tukuni ena Roma 12:10, meda vakaraitaka vei cei na loloma? (b) Na cava eda na veivosakitaka ena ulutaga qo?

² Eda sega ni via vakataki ira nikua ena nodra sega ni dau loloma. (Roma 12:2) Ia e vinakati meda vakaraitaka na veilomani ena noda vuvale, vakabibi vei ira eda vakabauta vata. (Wilika Roma 12:10.) Na cava na ibalebale ni veilomani e tukuni ena tikinivolatabu qo? Qo na ka era dau vakila na lewenivuvale era veivolekati. E bibi meda vakaraitaka tale ga na loloma qori ena noda vuvale vakayalo, ya o ira na tacida lotu vaKarisito. Nida veilomani, eda sa uqeta tiko na duavata ena noda qaravi Jiova.—Maika 2:12.

³ Me rawa nida bucina qai vakaraitaka na loloma qori,  meda dikeva mada eso na ivakaraitaki vakaivolatabu eda na vuli kina.

4. Eda kila vakacava ena Jemesa 5:11 na levu ni nona lomani keda o Jiova?

⁴ E tukuni ena iVolatabu na itovo talei i Jiova. Kena ivakaraitaki, e kaya “ni Kalou ga na loloma.” (1 Joni 4:8) Na itovo qori e uqeti keda meda toro voleka vua. E kaya tale ga na iVolatabu ni o Jiova e “dau veikauaitaki.” (Wilika Jemesa 5:11.) Qori e vakaraitaka na levu ni nona lomani keda o Jiova!

5. E vakaraitaka vakacava o Jiova na yalololoma? Eda na vakatotomuri koya vakacava?

⁵ Dikeva ena Jemesa 5:11 e dua tale na itovo i Jiova e vakavolekati keda vua, ya na nona yalololoma. (Lako 34:6) Dua na sala e vakaraitaka kina nona yalololoma, ya ni dau vosota noda ivalavala ca. (Same 51:1) Na yalololoma e tukuni ena iVolatabu e sega ni vauca ga na veivosoti. Na yalololoma e vu sara ga mai lomada, nida raica e dua e vakaleqai tu eda na saga sara ga meda veivuke. E kaya o Jiova na levu ni nona kauaitaki keda e uasivia na loloma vakatina. (Aisea 49:15) Nida sotava na leqa, ena uqeti Jiova na nona yalololoma me vukei keda. (Same 37:39; 1 Kor. 10:13) Eda vakaraitaka tale ga na yalololoma vei ira na tacida nida vosoti ira, eda na sega ni katona na ca ke ra vakacudrui keda. (Efeso 4:32) Ia e bibi sara noda vakaraitaka na yalololoma nida tokoni ira na tacida nira sotava na veika dredre. Nida dau yalololoma, eda sa vakatotomuria sara tiko ga na nona dau veikauaitaki o Jiova. E lomani keda sara vakalevu.—Efeso 5:1.

6. Erau vakaraitaka vakacava o Jonacani kei Tevita na veilomani?

⁶ Era talanoataki ena iVolatabu eso na dauveiqaravi i Jiova era sega ni uasivi  me vakataki keda ga, ia era vakaraitaka na veilomani. Dikeva nodrau ivakaraitaki o Jonacani kei Tevita. E kaya na iVolatabu: “Erau duavata sara o Jonacani kei Tevita me rau veitokani voleka, e lomani Tevita sara o Jonacani me vaka ga nona lomani koya.” (1 Sam. 18:1) A lumuti o Tevita me tui, me sosomitaki Saula. E vuvutaki Tevita o Saula qai saga me vakamatei koya. Ia e sega ni tokoni tamana o Jonacani ena sasaga qori. Erau veiyalayalati o Jonacani kei Tevita me rau veitokani tiko ga, me rau dau veivukei tale ga.—1 Sam. 20:42.

7. Na cava e rawa ni tarova na nodrau veitokani o Jonacani kei Tevita?

⁷ E talei dina na nodrau veilomani o Jonacani kei Tevita, vakabibi ni levu sara na ka e rawa ni tarova nodrau veitokani. Kena ivakaraitaki, e qase tiko o Jonacani vei Tevita ena rauta ni 30 na yabaki. E rawa sara ga ni nanuma ni sega ni dua na ka erau tautauvata kina kei Tevita, e lailai tale ga na ka e kila. Ia e sega ni beci Tevita o Jonacani.

8. Na cava eda kaya kina ni itokani vinaka i Tevita o Jonacani?

⁸ A rawa ni vuvutaki Tevita o Jonacani. Me vaka ni luvei Tui Saula, a rawa sara ga ni usuraka me sosomitaki tamana ena veiliutaki vakatui. (1 Sam. 20:31) Ia e yalomalumalumu o Jonacani, e yalodina tiko ga vei Jiova. E tokona gona na vakatulewa i Jiova me tui o Tevita. E yalodina tale ga vei Tevita ni cudruvi koya mada ga o Saula.—1 Sam. 20:32-34.

9. E vuvutaki Tevita o Jonacani? Vakamacalataka.

⁹ E dau lomani Tevita o Jonacani, e sega ni raici koya me kena meca. E dau vanataki dakaititi, e tamata qaqa tale ga ena ivalu. E kilai o Jonacani kei tamana o Saula ni rau “totolo sara vei ira na ikeli,” erau “kaukaua sara vei ira na laione.” (2 Sam. 1:22, 23) E rawa gona ni tukutukuni koya o Jonacani ena veika e rawata. Ia e sega ni veisisivi o Jonacani se veibeci. E qoroi Tevita ga ena nona yaloqaqa kei na nona nuitaki Jiova. Kena ivakaraitaki, ni oti ga nona vakamatei Koliaci o Tevita, e tekivu volekati koya sara ga vakalevu o Jonacani. Eda na vakaraitaka vakacava na loloma qori vei ira na tacida vakayalo?

10. Ni tukuni me “vu sara ga mai lomamuni na nomuni veilomani,” na cava na kena ibalebale?

¹⁰ E kaya na iVolatabu me “vu sara ga mai lomamuni na nomuni veilomani.” (1 Pita 1:22) E ivakaraitaki vinaka vei keda o Jiova, e lomani keda vakalevu. Ke da yalodina vua, ena sega ni dua na ka e tawasei keda mai na nona loloma. (Roma 8:38, 39) Na vosa vaKirisi e vakadewataki ena tikinivolatabu qo me “vu sara ga mai lomamuni,” e kena ibalebale me vakarabailevutaki se me vakalevu sara. Ena rairai vinakati gona meda vakalevutaka noda veilomani me rawa nida lomani ira na tacida. Nida vakacudrui, ena vinakati meda vakaraitaka tiko ga noda ‘loloma ena noda dau veivosoti. Meda gumatua ni maroroya na duavata e vakavuna na yalo tabu, nida vauci vata ena veiyaloni.’ (Efeso 4:1-3) Nida guta meda “vauci vata ena veiyaloni,” eda na raibaleta nodra malumalumu na tacida. Eda na saga ena noda vinaka taucoko  meda raici ira ena rai nei Jiova.—1 Sam. 16:7; Same 130:3.

11. Na cava e sega ni rawarawa kina meda veilomani ena so na gauna?

¹¹ E sega ni dau rawarawa ena so na gauna meda lomani ira na tacida, vakabibi ke da kila tiko na nodra malumalumu. Era rairai sotava tale ga qo eso na tacida ena imatai ni senitiuri. Kena ivakaraitaki o Uotia kei Sainitiki. E kena irairai ni rau dau veimaliwai vinaka ni rau “tokoni [Paula] ena vuku ni itukutuku vinaka.” Ia e dua na ituvaki e vakavuna me rau sega ni veimaliwai vinaka. E uqeti rau gona o Paula me duavata na nodrau rai ena Turaga.—Fpai. 4:2, 3.

12. Eda na bucina vakacava na veilomani meda vakaraitaka vei ira na tacida?

¹² Eda na bucina vakacava na veilomani ena gauna qo? Nida kilai ira vinaka na tacida, ena qai rawarawa meda kila nodra ivakarau ni rai, eda na lomani ira tale ga. Eda rawa ni veitokani ke duidui mada ga noda yabaki ni bula, se ivakarau vakavanua. O Jonacani e qase sara vei Tevita ena rauta na 30 na yabaki, ia erau veitokani voleka sara. Vakacava o rawa ni vakaraitaka ni o kauaitaka e dua e qase se gone vei iko? Ni o cakava qori, o vakaraitaka ni o “lomani ira na mataveitacini kece.”—1 Pita 2:17.

13. Na cava eda na rairai volekati ira kina vakalevu eso ena ivavakoso?

¹³ Nida lomani ira na tacida, vakacava e kena ibalebale qori ni tautauvata noda veivolekati kei ira kece na lewe ni ivavakoso? E sega ni rawa qori. E sega ni cala ke da volekati ira sara vakalevu eso, ni tautauvata na ka eda taleitaka. O Jisu e tukuna ni o iratou kece na yapositolo eratou nona “itokani,” ia e lomani Joni vakalevu. (Joni 13:23; 15:15; 20:2) E sega ni veivakaduiduitaki me tovaki Joni vakalevu. Kena ivakaraitaki, ni rau kerea o Joni kei Jemesa me dua nodra itutu ena Matanitu ni Kalou, e qai kaya vei rau o Jisu: “Au sega ni lewa se o  cei me dabe ena yasaqu imatau se yasaqu imawi.” (Mari. 10:35-40) Nida vakatotomuri Jisu, eda na sega ni tovaki ira na noda itokani voleka. (Jeme. 2:3, 4) Qori ena vakavuna na duiyaloyalo, na ka e sega ni dodonu me yaco ena ivavakoso vaKarisito.—Juta 17-19.

14. Me vaka e tukuni ena Filipai 2:3, eda na qarauna vakacava na yalo ni veisisivi?

¹⁴ Nida lomani ira na tacida, ena sega kina na veisisivi ena ivavakoso. A sega ni vuvutaki Tevita o Jonacani me veiqatitaka na itutu vakatui. Eda rawa ni vuli kece ena nona ivakaraitaki. Meda kua ni vuvutaki ira na tacida ena vuku ni ka era rawata, ia meda ‘yalomalumalumu ga nida okati ira na kena vo mera uasivi keda.’ (Wilika Filipai 2:3.) Kua ni guilecava ni tiko kece na keda yaga na lewe ni ivavakoso. Nida yalomalumalumu, eda na raica na veika era vinaka kina tacida, da qai vuli ena nodra ivakaraitaki ni yalodina.—1 Kor. 12:21-25.

15. Na cava o vulica ena ka e sotava o Tanya kei na nona vuvale?

¹⁵ Nida sotava eso na ituvaki dredre e tawanamaki, ena vakacegui keda o Jiova ni vakayagataki ira na tacida. Ena sala cava? Era na vukei keda, eda na vakila tale ga nodra loloma. Dikeva na ka eratou sotava e dua na vuvale ni oti na porokaramu ena siga Vakarauwai ena dua na Soqo ni Veimatanitu e Merika ena 2019, e kena usutu “E Sega Vakadua ni Seavu na Loloma!” E kaya na tacida yalewa o Tanya e tolu na luvena, “Au a draiva tiko ena motoka me keitou lesu ena otela, e  ceba mai e dua na motoka qai coqai keitou. E sega ni dua e mavoa ia keitou mai duri tu yani e gaunisala ena levu ni neitou domobula. E qai kaci mai e dua ena tai ni gaunisala me keitou lako yani ena nona motoka. Qori e dua na tacida e lesu tale tiko ga mai ena soqo. Eratou kele tale ga yani e lima na tacida mai Suwiteni. Eratou gole mai na tacida yalewa qai mokoti au kei luvequ yalewa, e vakacegui keitou sara ga. Au tukuna vei ira na tacida mera kua ni leqataki keitou, ia era sega ni biubiu. Era tiko ga vata kei keitou me yacova ni gole mai na tabana ni bula. Keitou vakila sara ga na loloma i Jiova ena gauna dredre qori. Keitou sa qai lomani ira ga vakalevu na mataveitacini, dua na ka neitou vakavinavinaka vei Jiova, keitou sa qai lomani koya ga vakalevu.” O se nanuma e dua na gauna o sotava kina na leqa, e qai vakaraitaka e dua na tacida nona lomani iko?

16. Na cava meda dau veilomani kina?

¹⁶ Dikeva na ka e rawati nida veilomani. Eda vakacegui ira kina na tacida nira sotava na veika dredre. Eda uqeta noda duavata na tamata ni Kalou. E kilai kina nida tisaipeli i Jisu, qori ena uqeti ira na yalomalumalumu mera mai tomani keda ena sokalou dina. Koya e bibi sara, eda vakalagilagi Jiova kina “na Tama ni yalololoma, na Kalou e dau vakacegui keda ena ka kece.” (2 Kor. 1:3) Meda bucina mada ga na veilomani da qai vakaraitaka tiko ga e veigauna!