1-3. Na ituvaki cava era dau tagi kina na dauveiqaravi i Jiova?

 NA GAUNA cava o se tagi kina? Eso na gauna eda tagi nida marau. Ia vakalevu ga eda tagi nida rarawa. Kena ivakaraitaki, eda tagi ni takali e dua eda lomana. E vola o Lorilei, e dua na tacida yalewa mai Merika: “Eso na gauna au dau rarawa vakalevu ni sa takali na luvequ yalewa, e sega sara ga ni dua na ka e vakacegui au. Au sega ni kila keu na vosota rawa ena gauna va qori.” *

² Eso tale na ka e rawa ni vakavuna noda tagi. E kaya o Hiromi, e dua na tacida yalewa painia mai Japani: “Eso na gauna au dau yalolailai nira sega ni vakarorogo o ira au vunau kina. E tonawanawa na mataqu ena so na gauna, au dau kerei Jiova me vukei au meu vosa vua e dua e vaqara tiko na ka dina.”

³ Vakacava o dau va tale ga qori ena so na gauna? Io, levu vei keda eda sotava qori. (1 Pita 5:9) Eda vinakata meda “qaravi Jiova ena marau levu,” ia eso na gauna eda dau tagi ni takali e dua eda lomana, nida yalolailai, se nida sotava na ituvaki dredre e vakatovolei kina noda yalodina vua na Kalou. (Same 6:6; 100:2) Eda na vosota vakacava na ituvaki qori?

4. Na cava eda na veivosakitaka ena ulutaga qo?

⁴ Eda rawa ni vuli ena ivakaraitaki i Jisu. Eso na gauna e vusolo na lomana mani “tagi” kina. (Joni 11:35; Luke 19:41; 22:44; Iper. 5:7) Meda veivosakitaka mada na ituvaki qori. Eda na veivosakitaka na ka eda vulica kina. Eda na raica tale ga na ka meda cakava nida sotava na ituvaki e vakavuna meda tagi.

5. Na cava eda vulica vei Jisu ena ka e volai ena Joni 11:32-36?

⁵ Ena vulaibatabata ni 32 G.V., e tauvimate o Lasarusa na itokani vinaka nei Jisu, mani vakacegu. (Joni 11:3, 14) E rua tiko na ganena, o Meri kei Marica, e lomani ratou vakalevu o Jisu. Rau rarawa vakalevu na marama qo ni sa takali na ganedrau erau lomana vakalevu. Ni mate o Lasarusa, e gole sara o Jisu ina koro o Pecani, erau tiko kina o Meri kei Marica. Ni rogoca o Marica ni lako tiko yani o Jisu, e vakusakusa me tavaki koya. Raitayaloyalotaka mada na levu ni nona rarawa ni kaya: “Turaga, ke oni a tiko eke, ke a sega ni mate o ganequ.” (Joni 11:21) Sega ni dede e raica o Jisu ni tagi tiko o Meri kei na so tale, mani “tagi” tale ga.—Wilika Joni 11:32-36.

6. Na cava e tagi kina o Jisu ena gauna ya?

⁶ Na cava e tagi kina o Jisu ena gauna ya? E kaya na ivola Insight on the Scriptures: “Ni sa mate nona itokani o Lasarusa kei na nodrau rarawa na ganena e vakavuna me ‘vusolo na lomana mani tagi kina.’” * E rairai vakasamataka o Jisu na mosi e vakila na nona itokani o Lasarusa ena gauna e tauvimate kina kei na ka e vakila ni sa voleka ni mate. E tagi tale ga o Jisu ni raica na nodrau rarawa o Meri kei Marica ni sa takali na ganedrau. Ke takali e dua nomu itokani voleka se lewe ni nomu vuvale, o na vakila tale ga na rarawa ya. Meda veivosakitaka mada ga qo e tolu na ka eda vulica mai na ituvaki qori.

7. Na cava eda vulica me baleti Jiova ni tagi o Jisu?

⁷ E kila o Jiova na ivakarau ni lomamu. E ‘ucui tamana vinaka’ o Jisu. (Iper. 1:3) Ni tagi o Jisu, e vakaraitaka na ivakarau ni loma i Tamana. (Joni 14:9) Ke takali e dua o lomana, e macala ni kila na lomamu o Jiova, e rarawa tale ga  vakalevu. E vinakata sara ga me vakaceguya na lomamu.—Same 34:18; 147:3.

8. Na cava eda nuidei kina ni na vakaturi ira na wekada lomani o Jisu?

⁸ E vinakata o Jisu me vakaturi ira na wekamu lomani. Ni bera ni tagi o Jisu, e vakadeitaka vei Marica: “Ena tucake tale na ganemu.” E vakabauti Jisu o Marica. (Joni 11:23-27) Ni qaravi Jiova ena yalodina, e kila vinaka na veivakaturi rau vakayacora ena gauna sa oti o Ilaija kei Ilaisa. (1 Tui 17:17-24; 2 Tui 4:32-37) A rairai rogoca tale ga na veivakaturi e vakayacora o Jisu. (Luke 7:11-15; 8:41, 42, 49-56) O rawa ni nuidei tale ga mo na raici ira tale na wekamu lomani era sa mate. Na cava gona eda vulica ena nona tagi o Jisu ni vakacegui rau tiko na nona itokani rau lolosi tiko? Eda vulica kina ni vinakata sara ga me vakaturi ira na mate!

9. Me vakataki Jisu, o na tokoni ira vakacava na lolosi tiko? Tukuna e dua na ivakaraitaki.

⁹ Mo tokoni ira na lolosi tiko. E tagi o Jisu kei rau o Marica kei Meri, e rogoci rau, e vosa tale ga vakayalovinaka vei rau. E rawa tale ga nida cakava qori vei ira na lolosi tiko. E kaya o Dan, e dua na qase ni ivavakoso mai Ositerelia: “Au vinakata sara ga na veitokoni ni takali o watiqu. Eratou tu vakarau e vica na veiwatini me ratou rogoci au ena siga kei na bogi. Eratou vakarorogo niu tukuna na noqu rarawa, ratou sega tale ga ni madua niu tagi. Eratou vukei au ena so na ka au sega ni cakava rawa ena gauna ya, me vaka na kena sava noqu motoka, voli kakana kei na vakasaqa. Keitou masu vata tale ga vakalevu. Eratou noqu itokani dina na taciqu qo ‘ena gauna ni rarawa.’”—Vkai. 17:17.

10. Vakamacalataka na ka e yaco e volai ena Luke 19:36-40.

¹⁰ E yaco yani i Jerusalemi o Jisu ena ika9 ni Naisani, 33 G.V. Ni volekata na koro, era gole mai e levu ra qai tevuka nodra isulu e gaunisala mera vakaraitaka nira ciqomi koya me nodra Tui. E gauna marautaki dina qori. (Wilika Luke 19:36-40.) De dua eratou sega ni namaka na nona tisaipeli na ka e qai yaco tarava. “Ni voleka yani [o Jisu], e tagi ni raica na koro.” E tonawanawa na matana ni parofisaitaka na ka ca sa vakarau yacovi ira na lewe i Jerusalemi.—Luke 19:41-44.

11. Na cava e tagicaki ira kina na lewe i Jerusalemi o Jisu?

¹¹ E levu era marautaki Jisu ena gauna ya, ia e mositi koya ni levu na Jiu era vakaraitaka nira sega ni vakabauta na itukutuku ni Matanitu ni Kalou. Na kena itinitini? Ena vakarusai o Jerusalemi, era na kau vakavesu o ira na Jiu era bula. (Luke 21:20-24) Ka ni rarawa ni a yaco dina na ka e tukuna o Jisu, levu era cati koya. Na cava nodra rai e levu me baleta na itukutuku vinaka ena vanua o tiko kina? Ke vica ga era vakarorogo ni o vakavulici ira ena ka dina, na cava o vulica ena nona tagi o Jisu? Dikeva e tolu tale na ka eda na vulica.

12. Na cava eda vulica me baleti Jiova ena nona tagicaki ira na kainona o Jisu?

¹² Dau kauaitaki ira na lewenivanua o Jiova. Nona tagi o Jisu eda nanuma kina na levu ni nona kauaitaki keda o Jiova. “[E] sega ni vinakata me rusa e dua, e vinakata ga [meda] veivutuni kece.” (2 Pita 3:9) Nikua, eda vakaraitaka nida lomani ira na kainoda nida gumatua  tiko ga meda uqeta na lomadra ena itukutuku vinaka.—Maciu 22:39. *

13-14. E vakaraitaka vakacava o Jisu ni lomani ira na lewenivanua? Eda na vakaraitaka vakacava na itovo qori?

¹³ E gumatua o Jisu ena cakacaka vakaitalatala. E lomani ira na lewenivanua o Jisu ni vakavulici ira tiko ga ena gauna veiganiti kece. (Luke 19:47, 48) Na cava e uqeti koya? Na nona lomani ira. Eso na gauna nira via rogoci Jisu na lewenivanua e “sega mada ga ni kana” kei ratou na nona tisaipeli. (Mari. 3:20) E tu vakarau tale ga ena bogi, na gauna veiganiti vua e dua e via rogoci koya. (Joni 3:1, 2) Levu era rogoci Jisu era sega ni mai nona tisaipeli. Ia e vunau sara vakavinaka vei ira kece na vakarorogo. Nikua, eda vinakata tale ga mera rogoca na itukutuku vinaka na lewenivanua kece. (Caka. 10:42) Me rawa qori, ena rairai vinakati meda veisautaka na iwalewale ni vunau.

¹⁴ Yalorawarawa ni veisau. Ke da sega ni veisautaka na gauna eda cakacaka vakaitalatala kina, de dua eda na sega ni vunau vei ira na taleitaka na itukutuku vinaka. E kaya e dua na tacida yalewa painia o Matilda: “Keirau dau saga vakaveiwatini me keirau vunau vei ira na lewenivanua ena duidui gauna. Ena matakalailai sara, keirau vunau ena yalava ni bisinisi. Ena sigalevu, keirau vunau ena qiqi ni levu era veitosoyaki. Ena yakavi, keirau raica ni levu era tiko e vale.” Na cava eda vulica? Meda kua ni muria na ituvatuva e rawarawa ga vei keda, ia meda yalorawarawa ni veisautaka na noda ituvatuva meda vunau kina vei ira e levu. Ke da cakava qori, eda na vakamarautaki Jiova.

15. Na cava e yaco ena iotioti ni bogi ni bula i Jisu e volai ena Luke 22:39-44?

¹⁵ Ena yakavi ni ika14 ni Naisani, 33 G.V., e gole o Jisu ina were o Kecisemani. E talaucaka e kea na lomana vei Jiova. (Wilika Luke 22:39-44.)  Ena vica na aua dredre qori, e “vakamamasu o [Jisu], . . . salavata na nona tagi vakaukaua kei na wainimatana.” (Iper. 5:7) Na cava e masulaka o Jisu ena iotioti ni bogi ni bera ni mate? E kerea na kaukaua me yalodina tiko ga vei Jiova, me vakayacora tale ga na lomana. E rogoca o Jiova na masu nei Luvena ena vusolo ni lomana, mani tala e dua na agilosi me vakaukauataki koya.

16. Na cava e rarawa kina vakalevu o Jisu ni masu tiko ena were o Kecisemani?

¹⁶ E macala ni a tagi o Jisu ni masu tiko ena were o Kecisemani ni rarawataka vakalevu nona vakasamataka ni rawa ni okati me beca na yaca ni Kalou. E kila tale ga na itavi bibi e vakacolati kina, me vakacerecerea na yaca i Tamana. Ke o rarawataka tiko e dua na ituvaki e vakatovolei kina nomu yalodina vei Jiova, na cava o vulica ena nona tagi o Jisu? Meda veivosakitaka mada e tolu tale na ka eda na vulica.

17. Na cava eda vulica me baleti Jiova ni sauma nona masu mai vu ni lomana o Jisu?

¹⁷ E rogoca o Jiova na nomu vakamamasu. E rogoca o Jiova nona masu mai vu ni lomana o Jisu. Na vuna? Ni kauaitaka vakabibi o Jisu nona yalodina vei Tamana, me vakacerecerea tale ga na yacana. Ke da kauaitaka vakabibi na noda yalodina vei Jiova, meda vakacerecerea tale ga na yacana, ena sauma noda masu ni kere veivuke.—Same 145:18, 19.

18. Ena sala cava e vaka kina na itokani dau veinanumi o Jisu?

¹⁸ E kila o Jisu na ivakarau ni lomamu. Nida rarawa, eda marau ni vakacegui keda e dua noda itokani e kila na ivakarau ni lomada, vakauasivi ni sa sotava oti na ituvaki qori. O Jisu sara ga na itokani qori. E kila na ivakarau ni lomada nida rarawa qai vinakati meda vukei. E kila noda malumalumu, ena raica tale ga meda vukei “ena gauna eda gadreva kina.” (Iper. 4:15, 16) Me vaka ga nona ciqoma o Jisu na veivuke ni agilosi ena were o Kecisemani, meda tu vakarau tale ga ni ciqoma na veivuke i Jiova. Kena ivakaraitaki, de dua ena vakarautaka qori ena ivola ni isoqosoqo, ena vidio, ena  ivunau, se nona veisiko e dua na qase ni ivavakoso se tacida matua me veivakayaloqaqataki.

19. Eda na vakacegui vakacava ni vakatovolei noda yalodina? Tukuna e dua na ivakaraitaki.

¹⁹ Ena vakarautaka vei iko o Jiova “na vakacegu ni Kalou.” Ena vakacegui keda vakacava o Jiova? Nida masu, eda na vakila “na vakacegu ni Kalou e uasivia na vakasama kece.” (Fpai. 4:6, 7) Na vakacegu e vakarautaka o Jiova ena dei kina na lomada, eda na vakasama tale ga kina vakavinaka. Qori na ka e vakadinadinataka e dua na tacida yalewa o Luisa. E kaya: “Au dau galili vakalevu. Eso na gauna, au dau nanuma ni sega ni lomani au o Jiova. Ia ni yaco qori, e totolo ga niu tukuna vei Jiova na ka e tu e lomaqu. E uqeti au na masu meu lewa vinaka na ivakarau ni lomaqu.” Na cava eda vulica ena nona ivakaraitaki? Eda na vakila na vakacegu nida masu.

20. Na cava eda vulica ena nona tagi o Jisu?

²⁰ E veivakacegui na ka eda vulica ena nona tagi o Jisu, e rawa tale ga nida vakatotomuria! Eda uqeti meda tokoni ira noda itokani era lolosi tiko da qai nuitaka na veitokoni i Jiova kei Jisu ni takali e dua eda lomana. Eda uqeti meda vunau qai veivakavulici ena yalololoma, ni rau vakaraitaka sara ga na Kalou o Jiova kei Jisu Karisito na itovo talei qo. Eda lomavakacegu tale ga ni rau kila o Jiova kei na Luvena lomani na ivakarau ni lomada, rau kila na noda malumalumu, erau via vukei keda meda vosota. Meda muria mada ga na ka eda vulica me yacova na siga ena vakayacora kina o Jiova na nona vosa ni yalayala totoka qo me “qusia tani . . . na wainimata kece mai na [matada]”!—Vkta. 21:4.