1. Eda vakayagataka vakacava noda gauna vei Jiova?

 EDA vinakata meda vakayagataka na noda gauna vei ira eda veivolekati. Era dau vinakata vakalevu na veiwatini mamarau na gauna vakanomodi mera tiko taurua ga kina. Era vinakata na gone mera veilasamaki kei na nodra itokani dredre. Eda dau marautaka kece na veimaliwai kei ira na tacida. Koya e bibi sara, eda dau taleitaka meda vakayagataka noda gauna vua na noda Kalou. Oya nida masu, wilika nona Vosa, vakasamataka vakatitobu na nona inaki kei na nona itovo totoka. E talei sara na gauna eda vakayagataka vei Jiova!—Same 139:17.

2. Na cava e sega ni rawarawa kina meda vakayagataka noda gauna vei Jiova?

² Eda marau nida vakayagataka noda gauna vei Jiova, ia eso na gauna ena sega ni rawarawa. Nida dau osooso, ena dredre kina meda tuvanaka na gauna ena veika vakayalo. Kena ivakaraitaki, levu na gauna eda cakacaka saumi kina, eda qarava noda itavi e vale, kei na so tale na itavi, eda nanuma kina ni sega noda gauna meda masu kina, vuli, se vakasama vakatitobu.

3. Na cava e dua tale na ka e rawa ni kania vakalevu noda gauna?

³ E dua tale na ka e rawa ni kania vakalevu noda gauna. Ke da sega ni qarauna, eda na rawa ni vakaogai keda ena so na ka e sega ni cala qai kania vakalevu na gauna meda toro voleka kina vei Jiova. Kena ivakaraitaki, dikeva mada na ka ni veivakamarautaki. E vinaka me tiko na gauna meda vakacegu kina. Ia na ka ni veivakamarautaki mada ga e yaga e rawa ni kania vakalevu noda gauna, ena lailai kina noda gauna ena veika vakayalo. Meda nanuma tiko ni yaga vakalailai  ga na ka ni veivakamarautaki.—Vkai. 25:27; 1 Tim. 4:8.

4. Na cava eda na veivosakitaka qo?

⁴ Eda na veivosakitaka ena ulutaga qo na vuna meda vakatulewataka kina na veika e bibi ena noda bula. Eda na veivosakitaka tale ga na sala meda vakayagataka vinaka kina na noda gauna vei Jiova kei na kena yaga.

5. Na sala cava era na vakatulewa kina vakayalomatua na gone nira vakasamataka na ivakasala ena Efeso 5:15-17?

⁵ Digia na ka vinaka duadua. Era dau kauaitaka na gone na ka mera vakaliuca ena nodra bula. Ia era na rairai veiuqeti na nodra qasenivuli kei na lewenivuvale era sega ni vakabauta mera saga na vuli torocake me rawa ni dua kina nodra cakacaka vinaka se levu nodra ilavo. Na mataqali vuli qori e rawa ni kania vakalevu na nodra gauna. Ia e rawa nira veiuqeti na itubutubu kei ira na mataveitacini ena ivavakoso mera vakaliuca na itabagone na nodra qaravi Jiova. Ena rawa vakacava ni vakatulewa vakavinaka e dua na itabagone e lomani Jiova? Ena yaga vakalevu nona wilika na Efeso 5:15-17 qai vakasamataka vakatitobu. (Wilika.) Ni wilika oti e rawa ni taroga: ‘Na cava na “loma i Jiova”? Na vakatulewa cava ena vakamarautaki koya? Na vakatulewa cava au na vakayagataka vinaka kina noqu gauna?’ Nanuma tiko nida sa bula tu ena “veisiga ca,” sa voleka tale ga ni vakarusai na vuravura e lewa tiko o Setani. E ka vakayalomatua gona meda vakayagataka noda bula ena veika ena vakamarautaki Jiova.

6. Na cava e digia o Meri? Cava e vinaka kina nona vakatulewa?

⁶ Vakaliuca na ka e bibi. Eso na gauna, me rawa nida vakayagataka vinaka noda gauna, ena vinakati meda vakatulewataka e rua na ka e sega sara ga ni ca. Eda raica qori ena italanoa kilai levu ni nona gade o Jisu ena vale nei Meri kei Marica. E marau vakalevu o Marica ni gade yani o Jisu mani vakarautaka e dua na kakana levu. Ia o Meri e vakayagataka vinaka na gauna qori me dabe volekata na nona Turaga me rogoca na ka e vakavulica. E sega ni ca na ka e cakava o Marica, e vinaka na nona inaki, ia e tukuna o Jisu ni “digia o Meri na ivotavota vinaka.” (Luke 10:38-42) Toso na gauna, ena rairai guilecava o Meri na kakana e vakarautaki ena gauna ya, ia eda vakadeitaka ni sega vakadua ni guilecava na ka e vulica vei Jisu. Me vaka ga nona marautaka o Meri na gauna lekaleka ya kei Jisu, eda marautaka tale ga noda gauna kei Jiova. Eda na vakayagataka vinaka vakacava na gauna qori?

7. Na cava meda dau masu kina, vuli iVolatabu, se vakasama vakatitobu?

⁷ Meda kila ni okati ena noda sokalou na masu, vuli iVolatabu, kei na vakasama vakatitobu. Nida masu, eda vosa vua na Tamada vakalomalagi, e lomani keda vakalevu. (Same 5:7) Nida vulica na iVolatabu, eda mai “kila na ka e baleta na Kalou,” na iVurevure ni vuku kece. (Vkai. 2:1-5) Nida vakasama vakatitobu, eda nanuma na itovo talei i Jiova, vaka kina na nona inaki vakatubuqoroqoro me baleta na nona ibulibuli kece kei na sala eda okati kina ena inaki qori. Vakacava e sega ni sala vinaka ga qo mo vakayagataka kina nomu gauna? Ia eda na vakayagataka vinaka vakacava na gauna lekaleka qori?

8. Na cava eda vulica nona vakayagataka o Jisu nona gauna ena vanua talasiga?

 ⁸ Ke rawa, digia na vanua vakanomodi. Vakasamataka mada na ivakaraitaki i Jisu. Ni bera ni tekivu nona cakacaka vakaitalatala e vuravura, e 40 na siga nona tiko ena vanua talasiga. (Luke 4:1, 2) Ni vakanomodi na vanua qori, e rawa kina ni masu vei Jiova, e vakasamataka tale ga vakatitobu na inaki i Jiova me baleti koya. E macala ni nona cakava qori o Jisu e vakarautaki koya kina ena veika dredre ena vakarau sotava. Ena yaga vakacava vei iko nona ivakaraitaki? Ke o lewe ni dua na vuvale levu, ena sega ni rawarawa nomu raica na vanua vakanomodi e vale. Ena vuku ni ituvaki qori, o rawa ni raica na vanua vakanomodi e tautuba. Qori na ka e dau cakava o Julie ni vinakata me masu vei Jiova. Rau tiko vakaveiwatini e Varanise ena dua na vale vakarauta ga, e dredre gona me tiko taudua, me kua ni vakasosani. E kaya o Julie: “Au dau taubale ena vanua ni gade ena veisiga. Au rawa kina ni tiko taudua meu vosa vei Jiova, me dei tale ga noqu vakasama.”

9. Ni osooso o Jisu, e vakaraitaka vakacava ni mareqeta nona veiwekani kei Jiova?

⁹ E dau osooso sara o Jisu. Ena nona cakacaka vakaitalatala e vuravura, levu era dau muri koya ena vanua e lakova, ena vinakati kina nona gauna. Kena ivakaraitaki, dua na gauna “era mai kumuni tu e matanivale na lewenikoro kece” mera raici koya. Ni yaco qori, se tuvanaka tiko ga na gauna me kauaitaka kina nona veiwekani kei Jiova. Ni bera ni cabe na siga, e raica e “dua na vanua lala” me rawa kina ni vakayagataka nona gauna vei Tamana.—Mari. 1:32-35.

10-11. Me vaka e tukuni ena Maciu 26:40, 41, na ivakasala taudonu cava e tukuna o Jisu vei ratou na nona tisaipeli ena were o Kecisemani? Na cava e yaco?

¹⁰ Ena iotioti ni bogi i Jisu e vuravura, ni sa cava nona cakacaka vakaitalatala, e qara e dua na vanua vakanomodi me rawa ni vakasama kina vakatitobu, me masu tale ga. E mani lako sara ina were o Kecisemani. (Maciu 26:36) Ena gauna qori, e tukuna kina o Jisu e dua na ivakasala taudonu vei ratou na nona tisaipeli me baleta na masu.

¹¹ Dikeva na ka e yaco. Ni ratou yaco ena were o Kecisemani, sa bogi levu na vanua, de dua sa bogilevu tutu. E kerei ratou na nona tisaipeli o Jisu me ratou “yadra tiko” qai gole yani me lai masu. (Maciu 26:37-39) Ni masu tiko, eratou mocelutu na tisaipeli. Ni raica o Jisu ni ratou moce tu, e uqeti ratou tale me ratou “yadra tiko,” me ratou “masu tiko ga.” (Wilika Maciu 26:40, 41.) E kila o Jisu ni ratou nuiqawaqawa na nona tisaipeli, eratou wawale tale  ga. Ena nona yalololoma e tukuna ni “sa malumalumu ga na yago.” E rua tale na gauna e lai masu kina, ni lesu yani ratou mocelutu na nona tisaipeli, ratou sega ni masu.—Maciu 26:42-45.

12. Na cava meda cakava nida nuiqawaqawa se wawale meda masu?

¹² Digia na gauna veiganiti. Eso na gauna eda na rairai nuiqawaqawa se wawale sara ga meda masu. Ke dau yacovi iko qori, mo kila ni levu tale ga era dau va qori. Na cava mo cakava? Era kaya eso era dau masu ni cava e dua na siga, ni vinaka mera dau masu rawa ni se yakavi toka ga ni bera nira wawale sara. Era kaya eso tale ni vakatau tale ga vakalevu ena nodra iduriduri se idabedabe nira masu tiko. Ia vakacava ke o masu ni o nuiqawaqawa se yalolailai tu? Mo tukuna vei Jiova na ivakarau ni lomamu. Mo nuidei ni kila vinaka tu na Tamada dauloloma na kemu ituvaki.—Same 139:4.

13. Ena rawa ni vakasosa vakacava na iyaya vakalivaliva ena noda gauna kei Jiova?

¹³ Qarauna na ka e veivakawelei. Dua na sala eda vaqaqacotaka kina noda veiwekani kei Jiova, ya na noda dau masu. Ia e vinakati eso tale na ka meda toro volekata kina na Kalou. Oya meda vulica na Vosa ni Kalou, meda tiko tale ga ena soqoni ni ivavakoso. Na cava mo cakava me yaga kina nomu gauna ni vuli vakataki iko kei na nomu tiko ena soqoni ni ivavakoso? Mo taroga, ‘Na cava e dau vakaleqa noqu vakarorogo ena soqoni se noqu vuli vakataki au?’ Era dau qiri mai eso, imeli, se vakauitukutuku mai ena talevoni se so tale na iyaya vakalivaliva? Nikua e vica vata na bilioni e tiko na nodra talevoni se iyaya vakalivaliva. Era tukuna eso na dauvakadidike ni rawa ni veivakawelei na kena tiko voleka na talevoni nida saga tiko meda vakasama vakatitobu se vakarorogo matua. E kaya e dua na parofesa ni vakasama: “Ena sega ni dei nomu vakasama ena itavi o qarava tiko, ni o vakasamataka tale tiko e dua na ka.” Ni bera ni tekivu na soqo ni tabacakacaka kei na soqo ni veiwasewase, e dau tukuni wasoma meda porokaramutaka na noda iyaya vakalivaliva me kua ni vakasosani ira eso tale. Vakacava eda rawa ni cakava tale ga qori nida tiko taudua me kua ni  vakasosani keda se vakaleqa noda gauna vei Jiova?

14. Me vaka e tukuni ena Filipai 4:6, 7, ena vukei keda vakacava o Jiova me dei noda vakasama?

¹⁴ Kerei Jiova me dei nomu vakasama. Ni o kila ni veiciriyaki tiko na nomu vakasama ena gauna ni nomu vuli vakataki iko se soqoni ni ivavakoso, kerei Jiova me vukei iko. Ke o lomaleqa se nuiqawaqawa, ena sega ni rawarawa mo guilecava tu mada na nomu leqa mo vakasamataka na veika vakayalo, ia e bibi sara ga mo cakava qori. Mo kerea na vakacegu ni Kalou me taqomaka na lomamu, vaka kina na nomu “vakasama.”—Wilika Filipai 4:6, 7.

15. Na cava e dua na yaga ni noda vakayagataka noda gauna vei Jiova?

¹⁵ Ena yaga vakalevu ni o vakayagataka nomu gauna mo vosa vei Jiova, vakarorogo vua, mo vakasamataki koya tale ga. Ena sala cava? Kena imatai, o na vakatulewa vinaka kina. E vakadeitaka vei keda na iVolatabu ni “o koya e vakailala kei ira na vuku ena vuku.” (Vkai. 13:20) Ni o vakayagataka gona nomu gauna vua na iVurevure ni vuku o Jiova, o na vuku tale ga. O na kila vinaka na sala mo vakamarautaki koya kina kei na sala mo kua ni vakararawataki koya kina.

16. E yaga vakacava ena noda veivakavulici nida vakayagataka noda gauna vei Jiova?

¹⁶ Kena ikarua, o na dua kina na qasenivuli vinaka. Nida vuli iVolatabu tiko kei na dua, e noda isausau levu duadua meda vukei gonevuli me veivolekati kei Jiova. Na levu ga ni noda masu kei na noda vulica na veika me baleta na Tamada vakalomalagi, eda na lomani koya vakalevu, ena rawa kina nida vakavulici gonevuli me lomani Jiova. Qori na ka e dau cakava o Jisu. E dau veiuqeti nona vakamacalataki Tamana, e cakava tale ga ena yalovinaka, qori e uqeti ratou na nona imuri yalodina me ratou lomani Jiova tale ga.—Joni 17:25, 26.

17. Na cava e bibi kina na masu kei na vuli vakataki keda me dei na noda vakabauta?

¹⁷ Kena ikatolu, sa na qai dei ga na nomu vakabauta. Vakasamataka mada na ka ena yaco ni o kerea na veidusimaki ni Kalou, nona veivakacegui kei na veitokoni. Na gauna kece e rogoca kina o Jiova nomu masu, sa na qai dei ga na nomu vakabauti koya. (1 Joni 5:15) Na cava tale ena vaqaqacotaka nomu vakabauta? Nomu vuli vakataki iko. Mo nanuma tiko, “ena vakabauti ga na ka ke rogoci na vosa.” (Roma 10:17) Ia me dei na noda vakabauta, e sega ni vinakati wale ga na kilaka, eso tale na ka meda cakava. Na cava ya?

18. Tukuna e dua na ivakaraitaki e dusia na bibi ni vakasama vakatitobu.

 ¹⁸ E vinakati meda vakasamataka vakatitobu na ka eda vulica tiko. Dikeva mada na ka e cakava o koya e vola na ika77 ni Same. Dua na ka nona rarawa, e nanuma ni o Jiova e sega ni vakadonui koya kei ira na nona itokani Isireli. E sega sara ga ni moce rawa ena bogi ena nona lomaleqa. (Tikina e 2-8) Na cava e cakava? E tukuna vei Jiova: “Au na vakasamataka vakatitobu na nomuni cakacaka kece, au na vakasamataka tale ga vakabibi na ka oni dau cakava.” (Tikina e 12) E macala ni kila vinaka tu na daunisame na ka sa cakava o Jiova vei ira na nona tamata ena gauna sa oti, ia e taroga: “Vakacava sa guilecava na Kalou me vakaraitaka nona loloma, se sa mudu nona yalololoma ena vuku ni nona cudru?” (Tikina e 9) E dau vakasamataka vakatitobu na daunisame na cakacaka i Jiova, nona loloma kei na yalololoma ena gauna sa oti. (Tikina e 11) Na kena yaga? E nuidei na daunisame ni o Jiova ena sega ni biuti ira na nona tamata. (Tikina e 15) Ena dei tale ga na nomu vakabauta, ni o vakasamataka vakatitobu na ka sa cakava oti o Jiova vei ira na nona tamata kei na ka sa cakava oti ena vukumu.

19. Na cava tale na yaga ni noda vakayagataka noda gauna vei Jiova?

¹⁹ E bibi duadua na kena ikava, o na lomani Jiova vakalevu. Na loloma duadua ga ena uqeti iko mo talairawarawa vei Jiova, mo vakuai iko mo vakamarautaki koya, mo vosota tale ga na veika dredre. (Maciu 22:37-39; 1 Kor. 13:4, 7; 1 Joni 5:3) E sega tale ni dua na ka me vakatauvatani kei na talei ni noda veivolekati kei Jiova!—Same 63:1-8.

20. Na cava mo cakava mo rawa ni masu kina vei Jiova, vuli vakataki iko, se vakasama vakatitobu?

²⁰ Meda nanuma tiko ni okati ena noda sokalou, na masu, vuli vakataki keda, kei na noda vakasama vakatitobu. Me vakataki Jisu, qara na vanua vakanomodi mo vakayagataka vei Jiova. Me kua ni dua na ka e vakawelei iko. Kerei Jiova me vukei iko me dei nomu vakasama ena ka vakayalo. Ke o vakayagataka vinaka nikua na nomu gauna, ena vakalougatataki iko o Jiova ena bula tawamudu ena vuravura vou ni Kalou.—Mari. 4:24.