ULUTAGA NI VULI 4
Vuna Eda Tiko Kina ena iVakananumi
“Dou dau cakava qo mo dou vakananumi au kina.”—LUKE 22:19.
SERE 20 Oni Solia na Luvemuni Lomani
KA ENA VULICI *
1-2. (a) Na gauna cava eda dau vakananuma kina e dua eda dau lomana sa mate? (b) Na cava e tauyavutaka o Jisu ena bogi ni se bera nona mate?
KE SA dede mada ga nona takali e dua eda dau lomana, eda se nanumi koya vinaka tu ga. Eda dau vakasamataki koya vakalevu ena tikinisiga e takali kina.
2 Ena veiyabaki eda dau maliwai ira e vica vata na milioni meda tiko ena ivakananumi ni nona takali e dua eda lomana vakalevu, o Jisu Karisito. (1 Pita 1:8) Eda mai vakananuma vata e dua e solia na nona bula me ivoli, meda vakabulai mai na ivalavala ca kei na mate. (Maciu 20:28) Io e vinakata o Jisu mera vakananuma na nona imuri na nona mate. Na bogi e se bera ni mate kina, e tauyavutaka e dua na ivakayakavi duatani sara qai vakarota: “Dou dau cakava qo mo dou vakananumi au kina.” *—Luke 22:19.
3. Na cava eda na veivosakitaka ena ulutaga qo?
3 E dua na iwiliwili lailai ga era tiko ena iVakananumi ni mate i Jisu e nodra inuinui na bula i lomalagi. Ia era tiko tale ga kina e vica vata na milioni era nuitaka tu na bula e vuravura. Eda na veivosakitaka ena ulutaga qo na vuna rau vakanamata kina na rua na ilawalawa qori mera tiko ena iVakananumi ena veiyabaki. Eda na veivosakitaka tale ga na yaga ni noda tiko kina. Meda tekivu sara mada ena vica na vuna era tiko kina na lumuti ena soqo bibi qori.
VUNA ERA TIKO KINA NA LUMUTI
4. Na cava era vakayagataka kina na lumuti na madrai kei na waini ena iVakananumi?
4 Era vakanamata e veiyabaki na lumuti mera tiko ena iVakananumi mera vakayagataka na madrai kei na waini. Cava e veiganiti kina nodra vakayagataka na madrai kei na waini? Me saumi na taro qori, vakasamataka na veika e yaco ena iotioti ni bogi ni bula i Jisu e vuravura. Ni oti na kanavata ni Lakosivia, e tauyavutaka o Jisu e dua na soqo e qai kilai me iVakayakavi ni Turaga. E solia na madrai kei na waini vei ratou na 11 nona yapositolo yalodina qai tukuna me ratou kania ratou gunuva. E tukuna vei ratou o Jisu e rua na veiyalayalati, se veidinadinati, ya na veiyalayalati vou kei na veiyalayalati ni Matanitu. * (Luke 22:19, 20, 28-30) Na veiyalayalati qori e dolava na sala vei ratou na yapositolo kei na dua na iwiliwili lailai mera veiliutaki vakatui mai lomalagi, mera bete tale ga. (Vkta. 5:10; 14:1) O ira ga na ivovo ni lumuti * era okati ena rua na veiyalayalati qori, era na rawa ni vakayagataka na madrai kei na waini ena iVakananumi.
5. Na cava era kila na lumuti me baleta na nodra inuinui?
5 Qo e dua tale na vuna era vakanamata kina na lumuti mera tiko ena iVakananumi: Na soqo qori e rawa kina nira vakasamataka vakabibi na nodra inuinui. Dua na inuinui totoka e solia vei ira o Jiova, ya mera marautaka na bula tawamate se tawavuca mai lomalagi, ra qai veiqaravi kei Jisu Karisito sa vakalagilagi kei ira na vo ni 144,000, vakauasivi nira sa na rawa sara ga ni raica na Kalou o Jiova! (1 Kor. 15:51-53; 1 Joni 3:2) Era kila na lumuti nira sureti mera marautaka na itavi dokai qori mai lomalagi. Ia me rawa nira bula e lomalagi, ena vinakati mera yalodina tiko me yacova nodra mate. (2 Tim. 4:7, 8) Dua na ka nodra marau na lumuti nira vakasamataka nodra inuinui ni bula i lomalagi. (Taito 2:13) Vakacava o ira na ‘so tale na sipi’? (Joni 10:16) Cava eso na vuna era tiko kina ena iVakananumi?
VUNA ERA TIKO KINA ESO TALE NA SIPI
6. Na cava era tiko kina eso tale na sipi ena iVakananumi e veiyabaki?
6 Era tiko tale ga ena iVakananumi eso tale na sipi, ia era na sega ni vakayagataka na madrai kei na waini, era vakarorogo ga. Ena 1938, era sureti ena imatai ni gauna o ira na nuitaka na bula e vuravura mera tiko ena iVakananumi. E tukuni ena Vale ni Vakatawa ni Maji 1, 1938: “Ena donu e veiganiti tale ga mera tiko ena soqo va qo na so tale na sipi mera raica na ka e vakayacori. . . . E dodonu me gauna marautaki tale ga vei ira.” Me vakataki ira ga na dau sureti ena vakamau nira marautaka na sarava na veika e caka ena soqo, o ira tale ga na so tale na sipi era marau na tiko mera raica na veika e yaco ena iVakananumi.
7. Na cava era vakanamata kina na so tale na sipi ena ivunau ni iVakananumi?
7 Era vakasamataka tale ga vakabibi nodra inuinui na so tale na sipi. Era dau vakanamata ena ivunau ni iVakananumi, ni vakatabakidua ena ka ena cakava o Karisito kei ira na le 144,000 vei ira kece na yalodina ena loma ni Duanaudolu na Yabaki. Ena veidusimaki ni nodra Tui o Jisu Karisito, o ira na veiliutaki qori mai lomalagi era na veivuke ena kena veisautaki na vuravura me parataisi, mera vukei tale ga na kawatamata yalodina mera bula uasivi. Sa bau dua dina na gauna marautaki qori vei ira na vica vata na milioni era tiko ena iVakananumi mera vakasamataka na kena vakayacori ena dua na gauna se bera mai na parofisai vakaivolatabu, me vaka na Aisea 35:5, 6; 65:21-23; kei na Vakatakila 21:3, 4. Nira raitayaloyalotaki ira kei ira na wekadra lomani ena vuravura vou, ena vaqaqacotaka nodra inuinui me baleta na veigauna se bera mai, ra qai vakadeitaka mera qaravi Jiova tiko ga.—Maciu 24:13; Kala. 6:9.
8. Na cava e dua tale na vuna era tiko kina ena iVakananumi na so tale na sipi?
8 Vakasamataka e dua tale na vuna era tiko kina na so tale na sipi ena iVakananumi. Era via vakaraitaka nira lomani ira na lumuti ra qai tokoni ira. E parofisaitaki ena Vosa ni Kalou nira na veiwekani voleka na lumuti kei ira na nuitaka na bula e vuravura. Ena sala cava? Meda raica mada eso na kena ivakaraitaki.
9. E vakamacalataki vakacava ena Sakaraia 8:23 na nodra rai na so tale na sipi me baleti ira na lumuti?
9 Wilika Sakaraia 8:23. E totoka dina na parofisai qo ni vakamacalataka nodra rai na so tale na sipi me baleti ira na tacidra kei na ganedra lumuti. Na vosa “dua na Jiu” kei na “kemudou” e vakaibalebaletaka tiko ga e dua na ilawalawa, ya o ira na ivovo ni lumuti. (Roma 2:28, 29) Na “tini na tamata eratou duivosavosa mai na veivanua kece” e dusi ira tiko na so tale na sipi. Era na “taura matua” se yalodina ni kabiti ira na lumuti, mera duavata ena sokalou savasava. Ena bogi gona ni iVakananumi, era vakaraitaka na so tale na sipi nodra veivolekati kei ira na lumuti nira veitomani sara ga ena soqo qori.
10. Na cava e cakava o Jiova me vakayacori kina na parofisai ena Isikeli 37:15-19, 24, 25?
10 Wilika Isikeli 37:15-19, 24, 25. Me vakayacori na parofisai qo, e vakaduavatataki ira na lumuti kei na so tale na sipi o Jiova me rau veivolekati. E vakamacalataki ena parofisai qo e rua na kau. O ira na nuitaka na bula i lomalagi era vaka na kau “nei Juta” (qo na yavusa era digitaki mai kina na tui e Isireli), kei ira na nuitaka na bula e vuravura era vaka na kau “nei Ifireimi.” * O Jiova ena vakaduavatataki rau na ilawalawa qo me rau “dua ga na kau.” Kena ibalebale qo era na veiqaravi ena duavata ena nona veiliutaki na nodrau Tui, o Jisu Karisito. Era na dau tiko gona ena iVakananumi e veiyabaki na lumuti kei ira na so tale na sipi, era na sega ni vaka tiko e rua na ilawalawa, ia era “dua ga na qelenisipi” qai “dua ga na kena ivakatawa.”—Joni 10:16.
11. Era vakaraitaka vakacava “na sipi” ena Maciu 25:31-36, 40 nodra tokoni ira na taci Karisito?
11 Wilika Maciu 25:31-36, 40. “Na sipi” ena ivakatautauvata qo e tukuni ira tiko na yalododonu ena gauna ni icavacava era nuitaka na bula e vuravura, qo o ira na so tale na sipi. Era yalodina ni tokoni ira na ivovo ni lumuti era taci Karisito ena nodra veivuketaka na itavi levu ni vunau kei na veivakatisaipelitaki e vuravura raraba.—Maciu 24:14; 28:19, 20.
12-13. Na cava eso na sala era vakaraitaka kina na so tale na sipi nodra tokoni ira na taci Karisito?
12 Ena veiyabaki ni vo e vica na macawa me vakayacori na iVakananumi, era dau vakaraitaka na so tale na sipi nodra veitokoni vei ira na taci Karisito ena nodra vakaitavi ena dua na sasaga mera sureti na tataleitaki e vuravura raraba ina iVakananumi. (Raica na kato “ O sa Vakavakarau Tiko ena iVakananumi?”) Era veivuke tale ga ena kena tuvanaki vinaka me rawa ni vakayacori na iVakananumi ena ivavakoso kece e vuravura raraba, ia era sega ni vakayagataka na madrai se na waini e levu na lewe ni ivavakoso qori. Era marau na so tale na sipi ni tokoni ira na taci Karisito ena ituvatuva qori. Era kila na sipi qo na rai nei Jisu ni veika era cakava vei ira na tacina e vaka sara ga era cakava tiko vua.—Maciu 25:37-40.
13 Na cava eso tale na vuna eda tiko kina ena iVakananumi ke duidui mada ga noda inuinui?
VUNA EDA TIKO KECE KINA
14. Rau vakaraitaka vakacava vei keda na loloma levu o Jiova kei Jisu?
14 Eda via vakavinavinakataka nodrau lomani keda o Jiova kei Jisu. Levu na sala e vakaraitaka kina o Jiova nona lomani keda, ia e dua e duatani sara. E vakaraitaka na nona loloma levu ni sega ni nanumi koya ga ena nona tala mai na Luvena lomani me vakararawataki qai mate ena vukuda. (Joni 3:16) Eda kila tale ga nona vakaraitaka na loloma levu o Jisu ni yalorawarawa me solia nona bula ena vukuda. (Joni 15:13) Eda sega ni rawa ni sauma lesu vei Jiova kei Jisu na loloma rau vakaraitaka qori. Ia eda rawa ni vakavinavinakataki rau ena ivakarau ni noda bula e veisiga. (Kolo. 3:15) Eda na tiko gona ena iVakananumi meda vakananuma nodrau lomani keda, eda vakaraitaka tale ga nida lomani rau.
15. Na cava era vakavinavinakataka kina vakalevu na ivoli na lumuti kei na so tale na sipi?
15 Eda vakavinavinakataka vakalevu na iloloma ni Kalou na ivoli. (Maciu 20:28) Era vakavinavinakataka na lumuti na ivoli, e rawati kina na nodra inuinui totoka. Nira vakabauta na isoro nei Karisito, e okati ira o Jiova mera yalododonu, mera wili tale ga mera luvena. (Roma 5:1; 8:15-17, 23) Era vakavinavinakataka tale ga na so tale na sipi na ivoli. Nira vakabauta na dra i Karisito e vakadavei, era okati mera savasava ena mata ni Kalou, era rawa ni veiqaravi tabu kina vua, ra nuitaka tale ga mera “bula sivia na veivakararawataki levu.” (Vkta. 7:13-15) Dua gona na sala era vakaraitaka kina na lumuti kei ira na lewe ni so tale na sipi na nodra vakavinavinaka ya mera tiko ena iVakananumi ena veiyabaki.
16. Na cava e dua tale na vuna eda tiko kina ena iVakananumi?
16 Dua tale na vuna eda tiko kina ena iVakananumi nida via talairawarawa vei Jisu. Se mani cava na noda inuinui me baleta na gauna se bera mai, eda vakabibitaka na ivakaro nei Jisu ena bogi e tauyavutaka kina na iVakananumi: “Dou cakava tiko ga qo mo dou vakananumi au kina.”—1 Kor. 11:23, 24.
YAGA VEI KEDA KECE NODA TIKO KINA
17. E yaga vakacava na iVakananumi ena noda veivolekati kei Jiova?
17 Eda volekati Jiova kina. (Jeme. 4:8) Me vaka eda sa raica mai, na iVakananumi eda rawa kina ni vakasamataka na inuinui e solia tu vei keda o Jiova, kei na noda vakasamataka vakatitobu na loloma levu e vakaraitaka vei keda. (Jere. 29:11; 1 Joni 4:8-10) Nida vakasamataka na noda inuinui me baleta na veigauna se bera mai, eda na lomani Jiova kina vakalevu, e dei tale ga noda veiwekani kei koya.—Roma 8:38, 39.
18. Na cava eda na uqeti kina nida vakasamataka vakatitobu na ivakaraitaki nei Jisu?
18 Uqeti meda vakatotomuri Jisu. (1 Pita 2:21) Ena veisiga ni bera na iVakananumi, meda vakabibitaka na itukutuku vakaivolatabu me baleta na iotioti ni macawa i Jisu e vuravura, nona mate, kei na nona vakaturi. Na bogi ni iVakananumi, eda na nanuma lesu kina nona lomani keda o Jisu. (Efeso 5:2; 1 Joni 3:16) Nida vakawilika na nona ivakaraitaki o Jisu ni sega ni nanumi koya ga da qai vakasamataka vakatitobu, ena uqeti keda meda ‘muria tiko ga na ivakarau ni nona bula.’—1 Joni 2:6.
19. Eda na tiko ga vakacava ena loloma ni Kalou?
19 Eda vakadeitaka meda tiko ga ena loloma ni Kalou (Juta 20, 21) Eda na tiko ga ena loloma ni Kalou nida saga ena noda igu kece meda talairawarawa vua, vakarokorokotaka na yacana, da qai vakamarautaka na lomana. (Vkai. 27:11; Maciu 6:9; 1 Joni 5:3) Na soqo ni iVakananumi e uqeti keda meda vakadeitaka me laurai ena noda bula e veisiga nida kaya tiko vei Jiova, ‘Au via tiko ga ena nomuni loloma me tawamudu!’
20. Na cava na vuna vinaka eda dau tiko kina ena iVakananumi?
20 Ke noda inuinui na bula tawamudu i lomalagi se vuravura, e tiko e vica na vuna vinaka meda dau tiko kina ena iVakananumi. Eda dau soqoni vata e veiyabaki ena tikinisiga qori meda vakananuma na nona mate e dua eda dau lomana, o Jisu Karisito. E bibi sara nida nanuma kina na ivakaraitaki levu ni nona loloma o Jiova ni soli Luvena me keda ivoli. Na yabaki qo, ena vakayacori tiko na iVakananumi ena yakavi ni Vakaraubuka, Epereli 15, 2022. Eda lomani Jiova kei na Luvena. Ena iVakananumi gona ni mate i Jisu, e bibi duadua na noda tiko kina.
SERE 16 Lagiti Ja ena Vuku i Luvena Lumuti
^ Ke noda inuinui na bula i lomalagi se na parataisi e vuravura qo, eda dau vakanamata ena veiyabaki meda tiko ena soqo ni iVakananumi. Ena vakamacalataki ena ulutaga qo e vica na vuna vinaka vakaivolatabu eda tiko kina ena soqo qori kei na kena yaga.
^ Na matavosa qo e vakadewataki tale ga me “Dou cakava qo mo dou nanumi au kina” (Today’s English Version) kei na “Dou cakava tiko qo me kequ ivakananumi.” (The Jerusalem Bible).
^ Me ikuri ni ivakamacala me baleta na veiyalayalati vou kei na veiyalayalati ni Matanitu, raica na ulutaga “Dou na ‘Matanitu Bete’” ena Vale ni Vakatawa ni Okotova, 15, 2014, t. 15-17.
^ IVAKAMACALA NI VOSA: Na matavosa ivovo ni lumuti e dusi ira na lotu vaKarisito lumuti era se bula tiko e vuravura.
^ Me ikuri ni ivakamacala ni parofisai me baleta na rua na kau ena Isikeli wase 37, raica na ivola Vakalesui Mai na Sokalou Savasava i Jiova!, t. 130-135, para. 3-17.
