1. Na cava nomu rai ni o vakasamataki Jiova?

 O BAU vakasamataka se vakacava tu o Jiova? Cava o vakasamataka ni o masu vua? Eda sega ni raici Jiova, ia e levu na ka e vakamacalataka na iVolatabu me baleti koya. E tukuni ni o Jiova e “matanisiga kei na isasabai,” e ‘bukawaqa dauveivakarusai’ tale ga. (Same 84:11; Iper. 12:29) E tukuni ni vaka na vatu sefaia, na vatu taliva, e vaka tale ga na ramase ni drodrolagi. (Isik. 1:26-28) Eda qoroya eso na ivakamacala qori me baleti Jiova, se da nanuma nida tawayaga.

2. Na cava ena rawa ni vakadredretaka nodra volekati Jiova eso?

² Nida sega ni raici Jiova, ena rairai dredre meda vakabauta ni lomani keda. Era nanuma eso ni sega ni lomani ira o Jiova baleta na ivakarau ni nodra bula e liu. De dua e sega tale ga na tamadra me lomani ira. E kila vinaka o Jiova na ituvaki qori, ena rawa ni vakadredretaka nodra volekati koya. E vakayagataka gona na nona Vosa meda kila kina na nona itovo.

3. Na cava meda vulica kina na loloma i Jiova?

³ E dua ga na vosa e vakamacalataki Jiova vinaka, ya na loloma. (1 Joni 4:8) E kilai sara ga ena itovo qori. Na ka kece e cakava e yavutaki ena loloma. E kaukaua na nona loloma, e vuabale tale ga ni vakaraitaka mada ga vei ira na sega ni lomani koya. (Maciu 5:44, 45) Eda na vulica ena ulutaga qo na veika me baleti Jiova kei na nona loloma. Na levu ni noda vulica na veika me baleta na noda Kalou, eda na lomani koya kina vakalevu.

E LOMANI IKO VAKALEVU O JIOVA

4. E uqeti iko vakacava na loloma i Jiova? (Raica tale ga na iyaloyalo.)

⁴ “O Jiova [e] dau veikauaitaki.” (Jeme. 5:11) E vakatauvatani koya na iVolatabu kei na dua na tina dauloloma.  (Aisea 66:12, 13) Vakasamataka e dua na tina e kauaitaki luvena lailai ena yalololoma. E kurei luvena toka vakamalua ena gauna e tenei koya tiko kina qai vosa tale ga vakamalua vua. Ni tagi o luvena se mosi vua e dua na ka, ena vakacegui koya. Nida rarawa tale ga, eda rawa ni nuitaka na loloma i Jiova. E vola na daunisame: “Ni bikai au na nuiqawaqawa, oni vakacegui au qai vakayaloqaqataki au.”—Same 94:19.

5. Na cava nomu rai ena dei ni loloma i Jiova vei iko?

⁵ E yalodina tu ga o Jiova. (Same 103:8) E sega ni biuti keda nida caka ca. E dau vakararawataki Jiova vakalevu na matanitu o Isireli, ia e vakaraitaka na dei ni nona loloma vei ira era veivutuni. E kaya: “Ni o talei e mataqu, o rokovi, au lomani iko.” (Aisea 43:4, 5) E sega ni veisau na loloma i Jiova. Eda rawa ni nuitaka tu ga. Ke da valavala ca bibi mada ga, ena sega ni biuti keda o Jiova. Nida veivutuni qai lesu vei Jiova, ena lomani keda tiko ga. E yalataka “ni na veivosoti vakalevu.” (Aisea 55:7) E vakamacalataka na veivosoti qori na iVolatabu me vaka sara ga e kauta mai “o Jiova na gauna ni veivakabulabulataki.”—Caka. 3:19.

6. Na cava eda vulica me baleti Jiova ena Sakaraia 2:8?

⁶ Wilika Sakaraia 2:8. Ni lomani keda o Jiova, e kila vinaka na lomada, e vinakata sara ga me taqomaki keda. Nida rarawa, e rarawa tale ga o koya. Eda rawa gona ni masulaka: “Ni taqomaki au me vaka na loa ni matamuni.” (Same 17:8) Na mata e tikiniyagoda malumalumu sara, eda mareqeta tale ga. Ni vakatauvatani keda gona o Jiova kei na loa ni matana, e vaka ga me tukuna tiko, ‘O koya e vakaleqai kemuni na noqu tamata, e vakaleqa tiko na ka au mareqeta.’

7. Na cava e bibi kina meda vakadeitaka ni lomani keda o Jiova?

⁷ E vinakata o Jiova meda vakadeitaka ni lomani keda yadua. E kila tale ga nida vakatitiqataka nona lomani keda ena vuku ni noda bula e liu, se da sotava sara tiko ga na ituvaki e vakatovolei kina noda nuitaka na loloma i Jiova. Ena dei vakacava noda nuitaki koya? Qori nida vulica nona vakaraitaka o Jiova  nona lomani Jisu, nona lomani ira na lumuti, kei keda kece.

E VAKARAITAKA O JIOVA NA NONA LOLOMA

8. Na cava e sega ni vakatitiqataka kina o Jisu ni lomani koya o Tamana?

⁸ Dua na gauna balavu sara nodrau bula vata tu o Jiova kei na Luvena lomani o Jisu, rau veilomani tale ga vakalevu. E dede duadua na nodrau veiwekani na veitamani qo. E tukuna vakamatata o Jiova ni lomani Jisu me vaka eda wilika ena Maciu 17:5. A rawa ni tukuna o Jiova: ‘Qo o koya au vakadonuya.’ Ia e vinakata meda kila na levu ni nona lomani Jisu, e vakatokai koya me “Luvequ lomani, au vakadonuya.” E talei vei Jiova na itovo i Jisu ni tu vakarau me cabora na nona bula. (Efeso 1:7) O Jisu e sega ni vakatitiqataka ni lomani koya o Tamana. E kila ni lomani koya dina o Jiova. E nuidei me tukuna ena levu na gauna ni lomani koya o Tamana.—Joni 3:35; 10:17; 17:24.

9. Na vosa cava e vakamacalataka nona lomani ira na lumuti o Jiova? Vakamacalataka. (Roma 5:5)

⁹ E tukuna tale ga o Jiova ni lomani ira na lumuti. (Wilika Roma 5:5.) Dikeva na vosa “vakasinaita.” E tukuna e dua na ivolavosa me baleta na vosa qori, ni “drodro mai me vaka na uciwai.” Na vosa vakatautauvata qori e vakabibitaka na levu ni nona lomani ira na lumuti o Jiova. Era kila na lumuti ni “lomani [ira] na Kalou.” (Juta 1) E tukuna na yapositolo o Joni na ivakarau ni lomadra, ni vola: “Raica mada na levu ni nona lomani keda na Tamada, meda vakatokai kina meda luve ni Kalou.” (1 Joni 3:1) Vakacava e yalana ga o Jiova na nona loloma vei ira na lumuti? Sega, e vakaraitaka o Jiova na nona loloma vei keda kece.

10. Na cava na ivakadinadina levu duadua ni nona lomani iko o Jiova?

¹⁰ Na cava na ivakadinadina levu duadua ni loloma i Jiova? Oya na ivoli. Qori na iloloma levu duadua e lomalagi kei vuravura! (Joni 3:16; Roma 5:8) E solia o Jiova na Luvena vakamareqeti, me mai mate ena vukuda kece e vuravura me rawa ni vosoti na noda ivalavala ca, meda veitokani tale ga kei koya. (1 Joni 4:10) Na levu ga ni noda vakasamataka vakatitobu na ka rau cakava ena vukuda o Jiova kei Jisu, eda na kila kina na levu ni nodrau lomani keda yadua. (Kala. 2:20) A sega ni vakarautaki ga na ivoli baleta ni vinakata o Jiova na lewadodonu. Ia e nona iloloma sara ga. E vakaraitaka o Jiova nona lomani keda ni solia na ka talei duadua vua, ya o Jisu. E vakatara me vakararawataki o Luvena, me mate tale ga ena vukuda.

11. Na cava eda vulica ena Jeremaia 31:3?

¹¹ Me vaka eda sa raica mai, o Jiova e dau vakaraitaka na nona loloma, e sega ni tu ga e lomana. (Wilika Jeremaia 31:3.) E tuberi keda vua ni lomani keda. (Vakatauvatana Vakarua 7:7, 8.) E sega ni dua na ka me tawasei keda mai na loloma i Jiova. (Roma 8:38, 39) E uqeti iko vakacava na loloma qo? Wilika na ika23 ni Same mo raica na yaga ni loloma kei na veikaroni i Jiova vei Tevita, vaka kina na kena yaga vei keda kece.

E UQETI IKO VAKACAVA NA LOLOMA I JIOVA?

12. O na vakamacalataka vakacava na ika23 ni Same?

¹² Wilika Same 23:1-6. Na ika23 ni Same e dua na sere e laurai kina nona nuitaka na daunisame na loloma i Jiova kei na nona veikaroni. E vakamacalataka  o Tevita, e vola na same qo, na nona veivolekati sara kei na nona iVakatawa, o Jiova. E nuidei o Tevita ni dusimaki koya tiko o Jiova, e vakararavi vakatabakidua vua. E kila o Tevita ni na vakaraitaka vua o Jiova na nona loloma e veisiga. Na cava e nuidei kina va qori o Tevita?

13. Na cava e nuitaka kina o Tevita na veikaroni i Jiova?

¹³ “Au na sega ni leqataka e dua na ka.” E tukuna o Tevita ni karoni vinaka ni vakarautaka tu ga o Jiova na ka me bula kina. E kila tale ga ni nona itokani o Jiova, e vakadonui koya tale ga. Oya na vuna e nuidei kina se mani cava ena yaco, ena vakarautaka tiko ga o Jiova na ka ena yaga vua. Ni nuitaka o Tevita na loloma i Jiova kei na nona veikaroni, e sega kina ni lomaleqa. Ia e marau tiko ga qai lomavakacegu.—Same 16:11.

14. Sala cava e dau karoni keda kina ena yalololoma o Jiova?

¹⁴ E dau karoni keda ena yalololoma o Jiova, vakabibi ni levu na ka ca e yacovi keda. Kena ivakaraitaki o Kelera, a a veiqaravi tu e Peceli me sivia ni 20 na yabaki. E sega ni kila me vukei ratou vakacava nona vuvale ni veitaravi na leqa ratou sotava. E tauvimate bibi o tamana ni mate e dua na yasa ni yagona (stroke), e vakasivoi e dua na tacina yalewa, e lusi nodratou bisinisi lailai, sa sega tale ga na nodratou vale. E vakaraitaka vakacava o Jiova ni lomani ratou? E kaya o Kelera: “E raica o Jiova me tiko na ka me ratou bula kina e veisiga na noqu vuvale. Levu na gauna au sega sara ga ni vakabauta na levu ni ka e vakarautaka vei keitou! Au dau vakasamataka vakalevu na sala e  vukei keitou kina o Jiova, au na sega vakadua ni guilecava. Qori e uqeti au meu yalodina tiko ga ena gauna dredre.”

15. Na cava e vakabulabulataki Tevita? (Raica tale ga na iyaloyalo.)

¹⁵ “E vakabulabulataki au.” Eso na gauna e rarawa o Tevita ena levu ni leqa kei na ituvaki dredre. (Same 18:4-6) Ia e vakabulabulataki koya na loloma i Jiova kei na nona veikaroni. O Jiova e tubera na nona itokani sa oca tu ena “vanua veico drokadroka” kei na “vanua ni vakacegu e sautu ena wai.” Qori e vakayaloqaqataki Tevita, e rawa ni tomana tiko ga na nona veiqaravi.—Same 18:28-32.

16. E vakacegui iko vakacava na loloma i Jiova?

¹⁶ Nida sotava tale ga nikua na veika dredre, “ena dei ga ni loloma i Jiova eda sega ni vakaoti kina.” (Lele 3:22; Kolo. 1:11) Dikeva mada na ivakaraitaki nei Raijeli. E rarawa vakalevu ni biuti koya o watina, e biuti Jiova tale ga ena gauna ni matedewa (COVID-19). Na cava e cakava o Jiova? E kaya o Raijeli: “E raica o Jiova meu lomani. E vakarautaka na itokani me keimami veimaliwai, era kau kakana mai, era vakau itukutuku mai kei na tikinivolatabu veiuqeti, era matadredredre, era tukuna wasoma vei au ni lomani au o Jiova. Au vakavinavinakataki Jiova tu ga ni vakarautaka e dua na noqu vuvale levu era dauloloma.”

17. Na cava e ‘sega ni rerevaka kina na ca’ o Tevita?

¹⁷ “Au sega ni rerevaka na ca, ni oni tiko vata kei au.” Levu na gauna e leqataki na bula nei Tevita, e levu tale ga na kena meca kaukaua. Ia na loloma i Jiova e vakanuideitaki koya, e taqomaki koya tale ga. E kila o Tevita ni tiko vata kei koya o Jiova ena ituvaki kece, qori e vakadeitaki koya. E rawa gona ni lagata: “[O Jiova] e vakabulai au mai na ka kece au rerevaka.” (Same 34:4) Eso na gauna e rere o Tevita, ia e nuidei ni kila ni lomani koya tu ga o Jiova.

18. Ni o rere, ena uqeti iko vakacava na loloma i Jiova?

¹⁸ Nida sotava na ituvaki vakadomobula, e uqeti keda vakacava noda kila ni lomani keda o Jiova? E vakamacalataka e dua na painia o Susi na ivakarau ni lomadrau, ni vakamatei koya ga na luvedrau tagane: “Ni yacovi keirau vakasauri na leqa rarawataki qo, e rawa sara ga ni vakamalumalumutaki keirau. Ia keirau nuidei ni lomani keirau tu ga o Jiova, e taqomaki keirau tale ga.” E kaya o Raijeli, sa tukuni oti mai: “Dua na bogi au rarawa vakalevu, au lomaleqa, au rere, au masuti Jiova ena levu ni noqu vutugu. E qai vakacegui au o koya ena gauna qori  me vaka na tina e vakacegui luvena, oti au mocelutu sara. Au na sega ni guilecava rawa na siga qori.” Dua na qase ni ivavakoso o Tasi, e vesu me va na yabaki ni sega ni via curu ena mataivalu. E vakadinadinataka vakacava na loloma kei na veikaroni i Jiova? E kaya: “E vakarautaka o Jiova na ka au gadreva kei na levu tale na ka. Au nuidei meu nuitaki koya vakaoti. E vakayagataka tale ga o Jiova nona yalo tabu meu marau tiko ga niu vesu tu. Au vakadeitaka keu nuitaki koya vakalevu, ena lomani au tale ga vakalevu. Au mani painia tudei sara niu tiko e valeniveivesu.”

TORO VOLEKA VUA NOMU KALOU DAULOLOMA

19. (a) Me vakacava noda masu nida kila ni lomani keda na Kalou? (b) Na ivakamacala cava me baleta na loloma i Jiova e uqeti iko sara ga? (Raica na kato “ Tikinivolatabu Eda Kila Kina na Loloma i Jiova.”)

¹⁹ Na irogo kece eda veivosakitaka mai e vakaraitaka ni o Jiova e “Kalou dauloloma,” e tiko vata tale ga kei keda! (2 Kor. 13:11) E kauaitaki keda yadua. Eda vakadeitaka gona ni “wavoliti [keda] na dei ni nona loloma.” (Same 32:10) Na levu ni noda vakasamataka vakatitobu na sala e vakaraitaka kina na nona lomani keda, eda raica kina na levu ni nona karoni keda. Eda na sega ni rere meda masu vua qai tukuna nida vinakata vakalevu na nona loloma. Meda tukuna vua na ka eda lomaleqataka qai nuidei ni kilai keda vinaka, e vinakata tale ga me vukei keda.—Same 145:18, 19.

20. Sala cava e vakavolekati keda kina vei Jiova na nona loloma?

²⁰ Me vaka ga noda torova na buka e waqa tiko ena draki batabata, eda toro volekati Jiova tale ga ena vuku ni nona loloma. E kaukaua sara na loloma i Jiova, ia e vakaraitaka tale ga ena sala malumu. Mo marau gona ni lomani iko o Jiova. Meda vakavinavinakataka kece na nona loloma nida tukuna ena domolevu: “Au lomani Jiova”!—Same 116:1.