Eso era susu ena vanua e dau nodra ivakarau na tagane mera beci ira na yalewa. Me kena ivakaraitaki, e kaya o Hans, e dua na ivakatawa ni tabacakacaka e Bolivia: “Eso na tagane era susu ena vanua era dau raici kina na tagane mera dua tu na ka, era lai nanuma kina vakalevu nira uasivi ira na yalewa. E kaya o Shengxian, e dua na qase ni ivavakoso e Taiwan: “Na vanua au tiko kina, era dau nanuma na tagane ni sega ni dodonu vei ira na yalewa mera tukuna nodra rai ena ka era cakava tiko. Ke dua na tagane e tukuna na nona rai e dua na yalewa, era na beci koya nona icaba.” Eso tale na tagane e sega ni dau laurai levu nodra vakaduiduitaki ira na yalewa. Me kena ivakaraitaki, era na rairai sega ni veidokai ena ka era veiwalitaka me baleti ira na yalewa.

Eda marau ni rawa nira veisau na tagane se vanua cava era susu kina. E rawa nira vulica nira sega ni uasivi ira na yalewa. (Efeso 4:22-24) Qori ena nodra vakatotomuria na ivakaraitaki i Jiova. Ena ulutaga qo, eda na veivosakitaka kina na nona rai o Jiova me baleti ira na yalewa, kei na sala mera raici ira kina na tacida yalewa na tacida tagane mai na rai i Jiova, vaka kina na sala era vakaliuliu kina na qase ni ivavakoso mera dokai ira na tacida yalewa.

CAVA NONA RAI O JIOVA BALETI IRA NA YALEWA?

E uasivi nona rai o Jiova me baleti ira na yalewa. Ni Tama dauloloma, e lomani ira kece na luvena e vuravura. (Joni 3:16) O ira na tacida yalewa yalodina era vaka sara ga na luvena mareqeti. Dikeva mada na sala e dokai ira kina na yalewa o Jiova.

E sega ni vakaduiduitaki ira. E buli ira na tagane kei na yalewa o Jiova mera ucui koya.  (Vkte. 1:27) E sega ni buli ira na tagane mera vuku sara vei ira na yalewa, se me levu na ka era kila. E sega tale ga ni taleitaki ira vakalevu na tagane vei ira na yalewa. (2 Vei. 19:7) E buli ira na tagane kei na yalewa mera kila vakatautauvata na ivakavuvuli vakaivolatabu, ra qai vakatotomuria na nona itovo talei. O Jiova e mareqeti ira tale ga na tagane kei na yalewa era vakabauti koya, se nodra inuinui mera bula tawamudu ena parataisi e vuravura, se ra veiliutaki vakatui se vakabete mai lomalagi. (2 Pita 1:1.) Macala ni o Jiova e sega ni dau vakaduiduitaki ira na yalewa.

E dau vakarogoci ira. E kauaitaka o Jiova na nodra rai kei na nodra leqa na yalewa. Me kena ivakaraitaki, e rogoca na nodrau masu o Raijeli kei Ana, e sauma tale ga. (Vkte. 30:22; 1 Sam. 1:10, 11, 19, 20) E uqeti ira na dauvola iVolatabu o Jiova mera vola na kedra itukutuku na tagane era vakarorogo vei ira na yalewa. Kena ivakaraitaki, a muria na ivakaro i Jiova o Eparama me vakarorogo vua na watina o Sera. (Vkte. 21:12-14) O Tui Tevita a vakarorogo vei Apikali. E kaya ni o Jiova e talai koya mai me vosa vua. (1 Sam. 25:32-35) O Jisu e muria vinaka na itovo i Tamana, ia e vakarorogo vei tinana o Meri. (Joni 2:3-10) Na ivakaraitaki kece qori e vakabibitaka ni dua na sala e dokai ira kina na yalewa o Jiova, ya nona dau vakarogoci ira.

E nuitaki ira. Kena ivakaraitaki, e nuitaki Ivi o Jiova me veivuke ena kena vakarautaki na noda vuravura. (Vkte. 1:28) Ni cakava qori e vakaraitaka kina nona rai me baleti Ivi ni sega ni lolovira vei watina, o Atama, ia e nona ivukevuke ga. E nuitaki rau tale ga na parofita o Tepora kei Ulita o Jiova me rau vakasalataki ira na nona tamata, era okati kina na dauveilewai kei na dua na tui. (Dvei. 4:4-9; 2 Tui 22:14-20) Nikua o Jiova e nuitaki ira na yalewa lotu vaKarisito mera qarava na nona cakacaka. O ira na tacida yalewa yalodina qori era dautukutuku, era painia, era daukaulotu tale ga. Era veivuke ena droini, tarataravaki, kei na vakavinakataki ni Vale ni Soqoni kei na valenivolavola ni tabana. Eso tale era veiqaravi ena valenivolavola ni vakadewa tu yawa. O ira na tacida yalewa qori era vaka na mataivalu levu e vakayagataka o Jiova me vakayacora na nona inaki. (Same 68:11) Macala gona ni o Jiova e sega ni raici ira na yalewa mera malumalumu, se gogo.

ERA VAKATOTOMURI JIOVA VAKACAVA NA TACIDA TAGANE?

Me rawa nira kila na tacida tagane ke tautauvata na nodra rai kei na rai i Jiova me baleti ira na tacida yalewa, ena vinaka mera dikeva na nodra rai kei na ka era dau cakava vei ira na yalewa lotu vaKarisito. Me rawati qori, e vinakati mera vukei. Me vaka ga na nona vakayagataka na misini e dua na vuniwai me kila ke bulabula se tauvimate tiko na utoda, e va tale ga qori na itokani vinaka kei na Vosa ni Kalou, ni rawa ni vukei keda meda kila se vakamarautaki Jiova tiko na noda rai me baleti ira na yalewa se sega. Na cava meda cakava?

Taroga e dua na itokani vinaka. (Vkai. 18:17) E vinaka meda raica e dua na itokani nuitaki, dau yalovinaka, e dau donu tale ga na nona rai. Meda tarogi koya ena taro va qo: “E dau vinaka na noqu ivakarau vei ira na tacida yalewa? Era kila niu dau dokai ira? Dua na ka au rawa ni cakava me vinaka kina noqu veimaliwai kei ira?” Ke tukuna o nomu itokani eso na ka mo vakavinakataka, kua ni cudru, yalorawarawa ga mo veisau.

Vulica na Vosa ni Kalou. Na sala vinaka duadua meda dikeva kina noda ivalavala vei ira na tacida yalewa oya nida vakayagataka na Vosa ni Kalou. (Iper. 4:12) Eda na vulica ena iVolatabu na vinaka ni nodra ivalavala eso na tagane, vaka kina o ira era sega ni cakava qori. Eda rawa ni veidutaitaka na noda ivalavala kei na ka era dau cakava. Kena ikuri, nida vakatauvatana na veitikinivolatabu eda na sega kina ni vakatanitaka e dua na tikinivolatabu meda tokona na raicala me baleti ira na yalewa. Me kena ivakaraitaki, e tukuni ena 1 Pita 3:7 mera ‘rokovi na yalewa vakawati nira ka malumalumu sara.’ b Vakacava e kena ibalebale qori nira lolovira vei ira na tagane, era sega ni vuku, se ra rawata e dua na ka? Sega! Vakatauvatana na vosa i Pita kei na ka e tukuni ena Kalatia  3:26-29, ya ni o Jiova e digitaki ira na yalewa kei ira na tagane mera veiliutaki kei Jisu mai lomalagi. Nida vulica na Vosa ni Kalou qai taroga nona rai e dua na noda itokani vinaka me baleta na noda ivalavala vei ira na yalewa, eda na vulica kina meda dau dokai ira na tacida yalewa.

ERA DOKAI IRA VAKACAVA NA TACIDA YALEWA NA QASE NI IVAVAKOSO?

Era rawa tale ga ni vuli na tacida tagane ena ivavakoso ena sala era dau dokai ira kina na tacida yalewa na qase yalololoma. Era ivakaraitaki vinaka vakacava na qase ni ivavakoso ena nodra dokai na yalewa? Dikeva mada eso na kena ivakaraitaki.

Era dau vakacaucautaki ira na tacida yalewa. Na yapositolo Paula e ivakaraitaki vinaka mera vakatotomuria na qase ni ivavakoso. E vakacaucautaka e vica na tacida yalewa ena nona ivola ina ivavakoso e Roma. (Roma 16:12) Sa na dua mada ga na ka na nodratou marau na tacida yalewa qori ni sa na wiliki na ivola i Paula ena ivavakoso. Era va tale ga qori na qase ni ivavakoso nikua nira vakacaucautaki ira na tacida yalewa ena nodra itovo vinaka kei na nodra veiqaravi vei Jiova. Era kila kina na tacida yalewa nira dokai vakalevu, era mareqeti tale ga. Na nona vosa ni veiuqeti e dua na qase ni ivavakoso e rairai ka sara ga era vinakata tu na tacida yalewa mera veiqaravi tiko ga ena yalodina vei Jiova.—Vkai. 15:23.

Nira vakavinavinakataki ira tiko na tacida yalewa na qase ni ivavakoso, ena bibi me vu mai lomadra, mera cavuta sara ga na ka era vakavinavinakataka tiko. Na vuna? E kaya e dua na tacida yalewa o Jessica: “E marautaki dina ni kaya e dua na tacida tagane vua e dua na tacida yalewa ‘vinaka na cakacaka.’ Ia ena vinaka sara me tukuna mai na ka e vakavinavinakataka, me vaka na nodra vakavulici na gone mera dabe tiko vakamalua ena soqoni, se nona lai kauta mai e dua na vuli iVolatabu ena soqoni.” Nira dau tukuna na qase ni ivavakoso na  ka era vakavinavinakataka, era kila kina na tacida yalewa nira nuitaki, era mareqeti tale ga ena ivavakoso.

Era dau rogoca na nodra vakatutu. O ira na qase ni ivavakoso yalomalumalumu era dau kila ni sega ni vinaka tu ga na nodra vakatutu. Era vinakata mera kila tale ga nodra vakatutu na tacida yalewa, ra qai vakarorogo vinaka nira vosa tiko. Nira cakava qori era uqeti ira kina na tacidra yalewa, e yaga tale ga vei ira. Ena sala cava? E kaya e dua na qase ni ivavakoso o Gerardo, e veiqaravi tiko e Peceli: “Au raica niu taroga na nodra vakatutu na tacida yalewa, au qarava vinaka kina na noqu itavi. Levu na tacida yalewa sa dede sara nodra veiqaravi ni vakatauvatani kei ira na tacida tagane.” Ena ivavakoso, levu na tacida yalewa era painia, era kilai ira vinaka gona na tiko ena yalava. E kaya e dua na qase ni ivavakoso o Bryan: “E levu na ka era cakava na tacida yalewa ena isoqosoqo. Moni vuli mada ga vei ira!”

Era saga na qase ni ivavakoso yalomatua mera rogoca na nodra vakatutu na tacida yalewa. Na vuna? E kaya e dua na qase ni ivavakoso o Edward: “Na nona rai na tacida yalewa kei na levu ni ka e kila tu, ena rawa ni vukea e dua na tacida tagane me kila na veika kece e okati ena dua na ka, ena rawa tale ga ni veikauaitaki kina.” (Vkai. 1:5) Kevaka mada ga e sega ni muria na qase ni ivavakoso na nona vakatutu na tacida yalewa, se rawa tiko ga ni vakavinavinakataka nona rai kei na nona kila.

Era vakavulici ira. O ira na qase ni ivavakoso yalomatua era dau qara na sala mera vakavulici ira kina na tacida yalewa. Me kena ivakaraitaki, era vakavulici ira mera liutaka na cakacaka vakavunau ke sega ni tiko e dua na tacida tagane. Era vakavulici ira ena vakayagataki ni misini me veivuke ena vakavinakataki ni iyaya e taukena na isoqosoqo, mera rawa tale ga ni veivuke ena tarataravaki. E Peceli, era dau vakavulici ira na tacida yalewa na ovasia mera qarava e levu na itavi, okati kina na kena vakavinakataki eso na ka e Peceli, na volivoli, qaravi na veika vakailavo, porokaramu ni kompiuta, kei na levu tale. Nira vakavulici ira na tacida yalewa na qase ni ivavakoso, era vakaraitaka ni rawa nira qarava na itavi na tacida yalewa, era nuitaki tale ga.

E levu na tacida yalewa era vakayagataka na ka era vulica vei ira na qase ni ivavakoso me yaga vei ira eso tale. Me kena ivakaraitaki, eso na tacida yalewa era vakayagataka na ka era vakavulici kina ena tarataravaki, mera vukea eso tale mera tara na nodra vale ni oti na leqa tubukoso. Eso tale na tacida yalewa era vakayagataka na ka era vakavulici kina ena vunau e matanalevu mera vukea e levu tale na tacida yalewa. Na cava nodra rai na tacida yalewa me baleti ira na qase ni ivavakoso era veivakavulici qori? E kaya e dua na tacida yalewa o Jennifer: “Niu vakaitavi ena taravaki ni Vale ni Soqoni, e vakayagataka na gauna na ovasia me vakavulici au kina. E raica na noqu cakacaka, e vakacaucautaki au tale ga kina. Au taleitaka na cakacaka vata kei koya niu kila niu mareqeti, au nuitaki tale ga.”

RAICI IRA MERA LEWE NI NODA VUVALE

Eda lomani ira na tacida yalewa yalodina me vaka ga nona lomani ira o Jiova! Era vaka gona noda lewenivuvale. (1 Tim. 5:1, 2) Eda mareqeti ira, eda taleitaka tale ga na cakacaka vata kei ira. Dua na ka noda marau nira kila noda lomani ira kei na noda tokoni ira. E kaya e dua na tacida yalewa o Vanessa: “Au vakavinavinaka vei Jiova niu lewe ni nona isoqosoqo, era tiko kina na tacida tagane era dau uqeti au.” E kaya e dua na tacida yalewa mai Taiwan: “Au vakavinavinaka vei Jiova kei na nona isoqosoqo, ni dau mareqeti keimami vakalevu na yalewa, era kauaitaka tale ga na loma i keimami. Qo e vaqaqacotaka noqu vakabauta, au vakavinavinaka vakalevu niu rawa ni lewe ni isoqosoqo i Jiova.”

Ena marau vakalevu o Jiova ni raica nodra saga tiko na tagane lotu vaKarisito yalodina me donu nodra rai me baleti ira na yalewa! (Vkai. 27:11) E kaya e dua na qase ni ivavakoso o Benjamin mai Sikoteladi: “Era dau beci na yalewa ena rai ni vuravura. Nira gole yani ena Vale ni Soqoni na yalewa, eda vinakata mera kila nira dokai, era lomani tale ga.” Meda saga mada ga ena noda vinaka taucoko meda vakatotomuri Jiova nida lomani ira na tacida yalewa, eda dokai ira tale ga, ni dodonu ga me caka qori vei ira.—Roma 12:10.