1. Na cava meda cakava me marau kina o Jiova?

 VAKASAMATAKA mada ni o solia e dua na iloloma talei vua e dua, na iloloma qori e totoka, e yaga. O na rarawa ke lai maroroya tu ga qai guilecava! Ia o na marau ke vakayagataka na iloloma qori qai vakavinavinakataki iko. Cava eda vulica? O Jiova e soli Luvena me mate ena vukuda. Ena marau vakalevu nida vakaraitaka noda vakavinavinakataka na ivoli kei na nona loloma!​—Joni 3:16; Roma 5:​7, 8.

2. Na cava eda na veivosakitaka ena ulutaga qo?

² Ni toso tiko na gauna, eda na rawa ni tekivu vakawalena na ivoli. Ena vaka ga eda lai maroroya tu na iloloma qori. Eda marautaka ni tiko vei keda, ia eda vunia tu ga me kua ni laurai. Me kua ni yaco qori, e bibi meda vakasamataka wasoma na ka e cakava ena vukuda o Jiova kei Karisito. Ena vulici qori ena ulutaga qo. Eda na veivosakitaka na yaga ni ivoli ena gauna qo kei na gauna se bera mai. Eda na dikeva tale ga na sala eda na vakaraitaka kina noda vakavinavinakataka na loloma i Jiova, vakabibi ena vula ni iVakananumi qo.

KENA YAGA ENA GAUNA QO

3. Na cava e dua na sala e yaga kina vei keda ena gauna qo na ivoli?

³ Sa yaga tiko vei keda na isoro i Karisito. Kena ivakaraitaki, ena vuku ni ivoli e vosota kina o Jiova noda ivalavala ca. E sega ni vinakati me cakava qori, ia e vinakata ga me vosoti keda. E lagata na daunisame nona vakavinavinaka: “Ni o kemuni Jiova, oni vinaka qai tu  vakarau moni veivosoti.”​—Same 86:5; 103:​3, 10-13.

4. E baleti cei na ivoli e vakarautaka o Jiova? (Luke 5:32; 1 Timoci 1:15)

⁴ Era rairai nanuma eso ni sega ni ganiti ira na veivosoti i Jiova. Io, e sega ni ganiti keda kece. E kila na yapositolo o Paula ni “sega mada ga ni ganita [me] vakatokai [me] yapositolo.” E kaya tale: “Ena loloma soli wale ga ni Kalou, au mai yacova kina na vanua au sa tu kina qo.” (1 Kor. 15:​9, 10) Ena vosoti keda o Jiova nida veivutunitaka noda ivalavala ca. Na vuna? E lomani keda, sega ni baleta ni ganiti keda. Ke o nanuma ni sega ni ganiti iko na veivosoti i Jiova, mo nanuma tiko ni vakarautaka o koya na ivoli me baleti ira na veivutunitaka nodra ivalavala ca, sega ni baleti ira na tamata uasivi.​—Wilika Luke 5:32; 1 Timoci 1:15.

5. Vakacava eda rawa ni tukuna ni dodonu me vosoti keda o Jiova? Vakamacalataka.

⁵ Meda kua ni nanuma ni dodonu me vosoti keda o Jiova ni sa vakayabaki noda veiqaravi tu mai. Macala ga ni marautaka o Jiova noda yalodina. (Iper. 6:10) Ena nona loloma soli wale e soli Luvena mai kina. Qori e sega ni isau ni noda veiqaravi. Ke da kaya ni dodonu me vosoti keda o Jiova ena levu ni ka vinaka eda cakava vua, e vaka ga meda tukuna tiko ni sega ni yaga vei keda nona mate o Karisito.​—Vakatauvatana Kalatia 2:21.

6. Na cava e gumatua kina o Paula ena nona qaravi Jiova?

⁶ E kila o Paula ni na sega ni rawa ni vosoti koya na Kalou. Na cava ga e gumatua kina ena nona qaravi Jiova? E sega ni cakava qori me rawa ni vosoti kina, ia e via vakaraitaka ga nona vakavinavinakataka na loloma soli wale i Jiova. (Efeso 3:7) Me vakataki Paula, eda na gumatua tiko ga ena noda veiqaravi, sega ni baleta nida vinakata me vosoti keda o Jiova, ia eda via vakaraitaka ga noda vakavinavinaka.

7. Na cava e dua tale na sala e yaga kina vei keda na ivoli ena gauna qo? (Roma 5:1; Jemesa 2:23)

⁷ Dua tale na sala e yaga kina vei keda na ivoli ena gauna qo, ya ni rawa nida veiwekani voleka kei Jiova. a Me vaka e tukuni ena ulutaga sa oti, na gauna eda sucu kina, eda sega ni veivolekati kei na Kalou. Ia ena vuku ni ivoli, eda “veiyaloni tiko ga kei na Kalou,” eda veivolekati tale ga kei koya.​—Wilika Roma 5:1; Jemesa 2:23.

8. Na cava meda vakavinavinakataka kina vei Jiova na isolisoli ni masu?

⁸ Dikeva mada qo e dua na sala eda veivolekati kina kei Jiova, ya noda rawa ni masu vua. E sega ni rogoca ga o Jiova na masu e matanalevu ena soqoni, ia e rogoca tale ga noda masu yadua. E rawa ni vakalailaitaka noda lomaleqa na masu, eda vakila tale ga na vakacegu ni vakasama. Ia sega ni koya ga qori. Eda na veivolekati kina kei na Kalou. (Same 65:2; Jeme. 4:8; 1 Joni 5:14) E dau masu wasoma o Jisu ni tiko e vuravura, e kila ni rogoci koya tiko o Jiova, e vaqaqacotaka tale ga nodrau veiwekani. (Luke 5:16) Eda vakavinavinaka gona ni rawa nida veitokani kei Jiova ena vuku ni isoro i Jisu, eda rawa tale ga ni vosa vua ena masu!

 KENA YAGA ENA GAUNA SE BERA MAI

9. E yaga vakacava na ivoli vei ira na dausokalou yalodina i Jiova ena gauna se bera mai?

⁹ E yaga vakacava na ivoli vei ira na dausokalou yalodina i Jiova ena gauna se bera mai? Ena raica o Jiova mera bula tawamudu. Era nanuma e levu ni dredre qori ni sa vicasagavulu na udolu na yabaki nodra mate tiko na tamata. Ia e inaki taumada i Jiova meda bula tawamudu na tamata. Ke a sega ni valavala ca o Atama, eda na bula tawamudu. Ena rairai dredre me rawati na bula tawamudu ena gauna qo, ia eda vakabauta ni rawa qori ena vuku ni ivoli e vakarautaka o Jiova, ya na Luvena mareqeti.​—Roma 8:32.

10. Na cava era vakanamata tu kina na lumuti kei na so tale na sipi?

¹⁰ Eda kila ni na rawati na bula tawamudu ena gauna se bera mai, ia e vinakata o Jiova meda vakasamataka tiko qori ena gauna qo. Era vakanamata tu na lumuti ena bula marautaki i lomalagi nira na veiliutaki kei Karisito mera lewa mai na vuravura. (Vkta. 20:6) Era vakanamata tale ga na so tale na sipi mera bula ena parataisi e vuravura, ena sega kina na mosi kei na rarawa. (Vkta. 21:​3, 4) Vakacava o dua vei ira na so tale na sipi o nuitaka mo bula tawamudu e vuravura? Na icovi qori e tautauvata sara ga kei na icovi ni bula i lomalagi! A buli keda o Jiova meda bula e vuravura. Koya gona, eda na marautaka vakalevu na bula tawamudu e vuravura.

11-12. Na veivakalougatataki cava eda vakanamata tu kina e Parataisi? (Raica tale ga na iyaloyalo.)

¹¹ Vakasamataka mada ena vakacava tu nomu bula ena Parataisi e vuravura. O na sega ni leqataka na tauvimate se mate. (Aisea 25:8; 33:24) Ena vakacegui iko o Jiova ena ka kece o vinakata. Na cava o via vulica? O na via vulica e levu tale na ka me baleta na manumanu?  O via vulica mo qiria e dua na mataqali ivakatagi? O na via vulica na droini? Macala ga ni na vinakati vakalevu na daunipeleni, dau taravale, kei ira na dauteitei. Ena vinakati tale ga na veitokoni ena vakarautaki ni kakana, iyaya ni cakacaka, teitei, na kena qaravi, kei na so tale. (Aisea 35:1; 65:21) Ni o sa na bula tawamudu, ena levu nomu gauna mo vulica qori kei na levu tale.

¹² Eda na marau meda kidavaki ira na vakaturi mai na mate! (Caka. 24:15) Vakasamataka tale ga na levu ni ka mo vulica me baleti Jiova ni o dikeva e levu na ibulibuli. (Same 104:24; Aisea 11:9) Na kena e vinaka duadua, o na marautaka nomu qaravi Jiova, ena sega ni dua na ka me vakaleqa nomu lewaeloma! Vakacava o na soro koso mo marautaka kina “na ivalavala ca e lekaleka wale na kena kamica”? (Iper. 11:25) Sega! Na veivakalougatataki kece qori ena uasivia na ka o vakuai iko kina ena gauna qo. Meda nanuma tiko, nida na sega ni nuitaka tiko ga meda bula e Parataisi. Eda sa na bula kina e veisiga. Ia e rawati ga qori ni lomani keda vakalevu o Jiova qai soli Luvena me mate ena vukuda!

VAKAVINAVINAKATAKA NA LOLOMA I JIOVA

13. Na cava meda cakava meda vakavinavinakataka kina na loloma i Jiova? (2 Korinica 6:1)

¹³ Na cava meda cakava meda vakavinavinakataki Jiova kina ni vakarautaka na ivoli? Eda na gumatua meda vakaliuci koya ena noda bula. (Maciu 6:33) Oya na vuna e mate o Jisu “mera kua kina ni bula ena vukudra ga o ira era bula tiko, mera bula ga ena vuku i koya e mate ena vukudra, qai vakaturi cake.” (2 Kor. 5:15) Nida cakava qori, e vakaraitaka nida sega ni lecava na inaki ni loloma soli wale nei Jiova.​—Wilika 2 Korinica 6:1.

14. Sala cava eda na nuitaki Jiova kina kei na nona veidusimaki?

¹⁴ Eda na vakavinavinakataka tale ga na loloma i Jiova nida nuitaki koya kei na nona veidusimaki. Ena sala cava? Nida vakatulewataka na ka e vauca na vuli kei na cakacaka meda digia, e bibi meda vakasamataka na rai nei Jiova. (1 Kor. 10:31; 2 Kor. 5:7) Nida nuitaki Jiova ena noda vakatulewa, ena dei noda vakabauta kei na noda veiwekani kei koya. Ena dei tale ga noda inuinui.​—Roma 5:​3-5; Jeme. 2:​21, 22.

15. Eda na vakaraitaka vakacava noda vakavinavinaka ena vula ni iVakananumi?

¹⁵ E tiko e dua tale na sala eda na vakavinavinakataka kina na loloma i Jiova. Oya nida gumatua ena vula ni iVakananumi qo meda vakaraitaka vei Jiova nida vakavinavinakataka na ivoli. Eda na saga meda tiko kina,  eda na veisureti tale ga. (1 Tim. 2:4) Mo vakamacalataka vei ira o sureta na ka e dau caka ena iVakananumi. Ena vinaka tale ga mo vakaraitaka na vidio Na Cava a Mate Kina o Jisu? kei na Vakananuma na Mate i Jisu ena jw.org. Kena ikuri, e bibi vei ira na qase ni ivavakoso mera sureti ira na malumu tu vakayalo. Vakasamataka mada nodra marau mai lomalagi kei vuravura ke ra lesu ina qelenisipi eso na sipi era yali tu! (Luke 15:​4-7) Me noda isausau mada ga ena iVakananumi qo meda kua ni kidavaki ira ga eda veikilai. E bibi sara meda kidavaki ira na ka vou kei ira sa dede tu mera qai tiko tale. Eda vinakata mera kila nida kauaitaki ira!​—Roma 12:13.

16. Na cava meda vakaitavi kina vakalevu ena cakacaka vakavunau ena vula ni iVakananumi?

¹⁶ Vakacava o rawa ni vakaitavi vakalevu ena itavi vakayalo ena vula ni iVakananumi? Qori e dua na sala vinaka eda vakavinavinakataka kina na ka rau cakava ena vukuda o Jiova kei Jisu. Nida vakaitavi vakalevu ena cakacaka vakavunau, eda na vakadinadinataka na veitokoni i Jiova, eda na nuitaki koya vakalevu. (1 Kor. 3:9) Mo vakadeitaka mo muria na ituvatuva ni Wili iVolatabu ni iVakananumi e tiko ena Dikeva na iVolatabu e Veisiga, se na kato ena ivola ni soqoni ena lomanimacawa. O rawa sara ga ni vakayagataka na veitikinivolatabu qori mo vakekeli kina ena nomu vuli vakataki iko.

17. Na cava e marautaka o Jiova? (Raica tale ga na kato “ Sala Mo Vakavinavinakataka Kina na Loloma i Jiova.”)

¹⁷ E macala ni o na sega ni rawa ni cakava kece na ka e vakatututaki ena ulutaga qo ena vuku ni kemu ituvaki. Nanuma tiko ni sega ni vakatauvatana o Jiova na ka o solia kei na ka era solia eso tale. Ia e kila vinaka na lomamu. E marautaka na levu ni nomu vakavinavinakataka na ivoli.​—1 Sam. 16:7; Mari. 12:​41-44.

18. Na cava eda vakavinavinakataka kina na Kalou o Jiova kei Jisu Karisito?

¹⁸ Ena vuku wale ga ni ivoli, e vosoti kina noda ivalavala ca, eda veitokani kei Jiova, e rawa tale ga nida bula tawamudu. Meda vakaraitaka tiko ga noda vakavinavinataka na loloma i Jiova e rawati kina na veivakalougatataki qori. (1 Joni 4:19) Meda vakaraitaka tale ga noda vakavinavinakataki Jisu ni lomani keda vakalevu qai mate ena vukuda!​—Joni 15:13.