1. E yaga vakacava noda tiko ena iVakananumi e veiyabaki?

 E MACALA nida kila ni iloloma talei na ivoli! (2 Kor. 9:15) Ni cabora o Jisu nona bula, o na rawa ni veitokani voleka kina kei na Kalou o Jiova. O na rawa tale ga ni bula tawamudu. E veiganiti gona meda vakaraitaka noda vakavinavinakataki Jiova ena vuku ni ivoli ni lomani keda vakalevu! (Roma 5:8) Meda vakavinavinakataka tiko ga na ivoli qai kua ni raica vakamamada, e vakarota kina o Jisu meda vakananuma e veiyabaki nona mate.​—Luke 22:​19, 20.

2. Na cava eda na veivosakitaka ena ulutaga qo?

² Ena vakayacori na iVakananumi ni yabaki qo ena Vakarauwai na ika12 ni Epereli, 2025. E macala ga nida na saga kece meda tiko kina. Ena yaga vakalevu ke da tuvanaka ena vula ni iVakananumi meda vakasamataka vakatitobu a na ka rau cakava o Jiova kei Jisu ena vukuda. Eda na veivosakitaka ena ulutaga qo na ka eda vulica me baleti Jiova kei Jisu ena kena vakarautaki na ivoli. Ena ulutaga tarava, eda na vulica na sala ena yaga kina vei keda na ivoli kei na sala meda vakaraitaka kina noda vakavinavinaka.

KA EDA VULICA ENA IVOLI ME BALETI JIOVA

3. E rawa vakacava nira sereki e le milioni ena nona mate e dua ga na tamata uasivi? (Raica tale ga na iyaloyalo.)

³ Eda vulica ena ivoli nona lewadodonu o Jiova. (Vkru. 32:4) Ena sala cava? Vakasamataka mada: Ni talaidredre o Atama e dewavi keda kina na ivalavala ca kei na mate. (Roma 5:12) Meda sereki mai na ivalavala ca kei na mate, e talai Jisu mai o Jiova me  keda ivoli. E rawa vakacava nira sereki e le milioni ena nona mate e dua ga na tamata uasivi? E vola na yapositolo o Paula: “Ena nona talaidredre gona e dua ga na tamata [o Atama] e okati kina e levu mera ivalavala ca, ia na nona talairawarawa e dua ga na tamata [o Jisu] era na okati kina e levu mera yalododonu.” (Roma 5:19; 1 Tim. 2:6) Kena ibalebale, nona talaidredre e dua na tamata uasivi eda valavala ca kina, eda mate sara. Koya gona nona talairawarawa e dua na tamata uasivi, eda sereki kina.

4. Na cava e sega ni vakatara kina o Jiova mera bula tawamudu na kawa i Atama era talairawarawa?

⁴ Vakacava me mate sara o Jisu me rawa nida vakabulai? Na cava e sega ni vakatara kina o Jiova mera bula tawamudu na kawa i Atama era talairawarawa? Eda na rairai vakasamataka ni qori e dua na kena iwali vinaka. Ia eda guilecava kina na lewadodonu i Jiova. Ni Kalou lewadodonu, ena sega ni raica vakamamada na talaidredre nei Atama.

5. Na cava eda nuidei kina ni na cakava tu ga o Jiova na ka dodonu?

⁵ Vakacava ke sega ni vakarautaka o Jiova na ivoli, e sega tale ga ni vakaraitaka nona lewadodonu ni vakatara mera bula tawamudu na luvei Atama era sega ni uasivi? Era na rairai vakasamataka eso ni na sega ni vakaraitaka nona lewadodonu ena so tale na ka. Kena ivakaraitaki, ena rawa ni vakayacora eso na ka e yalataka? Meda kua ni leqataka qori. Na vuna? Ni lewadodonu o Jiova, e cakava kina e dua na ka e mositi koya sara ga, ya ni cabora na Luvena lomani. Eda nuidei gona ni na cakava tu ga na ka dodonu.

6. E laurai vakacava na loloma i Jiova ni vakarautaka na ivoli? (1 Joni 4:​9, 10)

⁶ Eda vulica ena ivoli ni Kalou lewadodonu o Jiova, eda kila tale ga na levu ni nona lomani keda. (Joni 3:16; wilika 1 Joni 4:​9, 10.) Kena ikuri, eda vulica ni vinakata o Jiova meda bula tawamudu, meda lewe tale ga ni nona vuvale. Vakasamataka mada: Ni valavala ca o Atama, e vakatalai koya me kua ni lewe ni nona vuvale. Qori na vuna eda sucu kina ena taudaku ni vuvale ni Kalou. Ena vuku ni ivoli e vosota kina o Jiova noda ivalavala ca, toso na gauna era na mai lewe ni nona vuvale o ira na vakaraitaka nodra vakabauta kei ira na talairawarawa. Ena gauna mada ga qo, eda veivolekati kei Jiova kei ira na tacida vakayalo. Io, e lomani keda dina o Jiova!​—Roma 5:​10, 11.

7. Na cava eda vulica me baleta na levu ni nona lomani keda o Jiova ni vakararawataki o Jisu?

 ⁷ Eda na kila vinaka na levu ni nona lomani keda o Jiova, ke da vakasamataka na kena mositi koya nona mate o Luvena. E tukuna o Setani ni na sega ni yalodina tiko ga vei Jiova e dua nona dauveiqaravi ni dredre na ituvaki. Me vakalasui Setani o Jiova, e vakatara kina me vakararawataki o Jisu ni bera ni mate. (Jope 2:​1-5; 1 Pita 2:21) Ni rai tiko mai o Jiova, e raica nira vakalialiai Jisu na dauveitusaqati, era kuitalaki koya na sotia ra qai vakoti koya ena kau. E raica tale ga o Jiova ni vakararawataki na Luvena qai vakamatei vakaloloma. (Maciu 27:​28-31, 39) A rawa sara ga ni tarova kece qori. Kena ivakaraitaki, nira tukuna na dauveitusaqati: “Me vakabulai koya mada na Kalou ke vinakata,” a rawa sara ga ni cakava qori o Jiova. (Maciu 27:​42, 43) Ia ke cakava qori ena sega ni saumi na ivoli, ena sega tale ga na noda inuinui. E vakatara gona o Jiova me vakararawataki o Luvena me yacova ni mate.

8. Vakacava e mositi Jiova ni raica nona vakararawataki o Luvena? Vakamacalataka. (Raica tale ga na iyaloyalo.)

⁸ Ni Kalou kaukaua duadua o Jiova, meda kua sara ni nanuma ni sega ni vakila e dua na ka! Eda buli meda ucui koya, me rawa nida vakila na ka, ya na vuna eda kaya kina ni dau vakila tale ga na ka o Jiova. E tukuna na iVolatabu me baleti koya ni dau ‘rarawa.’ (Same 78:​40, 41) Vakasamataka tale ga na ivakaraitaki nei Eparama kei Aisake. E vakaroti o Eparama me cabora na luvena duabau. (Vkte. 22:​9-12; Iper. 11:​17-19) Eda rawa ni vakasamataka na levu ni kena mositi i Eparama ni vakarau vakamatei luvena ena isele. Sa na wacava na kena mositi Jiova nona raica nira vakararawataki Luvena tiko eso na tamata ca me yacova ni mate!​—Raica ena jw.org na vidio Vakatotomuria Nodra Vakabauta​—Eparama, Wase 2.

9. Na cava o vulica ena Roma 8:​32, 38, 39 me baleta nona lomani iko vakalevu o Jiova kei ira na tacimu vakayalo?

⁹ Eda vulica ena ivoli ni lomani keda vakalevu o Jiova, vakalailai nona lomani keda e dua na wekada voleka duadua se itokani dredre. (Wilika Roma 8:​32, 38, 39.) E macala ni lomani keda vakalevu o Jiova, lailai tale noda lomani keda. Vakacava o via bula tawamudu? E vinakata vakalevu o Jiova mo bula tawamudu. Vakacava o vinakata me vosoti nomu ivalavala ca? Qori na ka e vinakata  vakalevu o Jiova me cakava. E vinakata ga meda ciqoma nona iloloma talei nida vakaraitaka noda vakabauta qai talairawarawa. E vakaraitaka o Jiova na levu ni nona lomani keda ni vakarautaka na ivoli. Ena vuravura vou, eda na vulica e levu tale na ka me baleta na loloma i Jiova.​—Dauv. 3:11.

KA EDA VULICA ENA IVOLI ME BALETI JISU

10. (a) Na cava e rarawataka o Jisu me baleta nona mate? (b) Sala cava e vakarokorokotaka kina na yaca i Jiova? (Raica tale ga na kato “ Nona Yalodina o Jisu e Vakarokorokotaki Kina na Yaca i Jiova.”)

¹⁰ E kauaitaka vakabibi o Jisu na irogorogo kei Tamana. (Joni 14:31) E rarawataka vakalevu ni rawa ni rogorogo ca na yaca i Tamana ni beitaki ni vosabeci koya, e saqata tale ga na matanitu. Oya na vuna e masulaka kina: “I Tamaqu, ke rawa, ni kauta tani na bilo qo.” (Maciu 26:39) Ni yalodina tiko vei Jiova o Jisu me yacova ni mate, e vakarokorokotaka kina na yaca i Tamana qai vakalasui Setani.

11. E vakaraitaka vakacava o Jisu ni lomana vakalevu na kawatamata? (Joni 13:1)

¹¹ Eda vulica ena ivoli ni lomana vakalevu na kawatamata o Jisu, vakabibi o ratou nona tisaipeli. (Vkai. 8:31; wilika Joni 13:1.) Kena ivakaraitaki, e kila o Jisu ni na sega ni rawarawa eso nona itavi e vuravura, vakabibi nona vakararawataki qai vakamatei. Ni qarava nona ilesilesi e vuravura, e sega ni cakava tu ga me rawa. Ia e vu mai lomana nona cakacaka vakavunau, veivakavulici, kei na nona vukea eso tale. Ena siga mada ga me mate kina, e savata na yavadratou nona yapositolo, e  vakavulici ratou, e vakacegui ratou tale ga. (Joni 13:​12-15) Ni vako tu mada ga ena kau o Jisu, e vakaceguya na daubasulawa sa voleka tu ni mate, e tuvanaka tale ga me qaravi vinaka o tinana. (Luke 23:​42, 43; Joni 19:​26, 27) E laurai gona ena ivakarau ni nona bula taucoko e vuravura ni lomani keda vakalevu, sega ni nona mate wale ga.

12. Na sala cava e vakarautaka tiko ga kina o Jisu e levu na ka vinaka ena vukuda?

¹² A “mate ga vakadua” na Karisito, ia se cakava tiko ga e levu na ka vinaka ena vukuda. (Roma 6:10) Ena sala cava? E gumatua tiko ga me vakarautaka vei keda e levu na ka vinaka e rawati duadua ga ena ivoli. Dikeva mada na ka e cakava tiko. E veiqaravi vakaTui, vakaBete Levu, e ulu tale ga ni ivavakoso. (1 Kor. 15:25; Efeso 5:23; Iper. 2:17) E liutaka na cakacaka ni nodra kumuni na lumuti kei ira na lewe ni isoqosoqo levu, ena qai vakaoti qori ni bera ni cava na veivakararawataki levu. b (Maciu 25:32; Mari. 13:27 E raica tale ga mera vakani vinaka vakayalo ena iotioti ni veisiga qo o ira na tamata ni Kalou era yalodina. (Maciu 24:45) Ena Duanaudolu na Yabaki ni Nona Veiliutaki, ena vakarautaka tiko ga na veika e yaga vei keda. Io, e solia mai o Jiova na Luvena me cakava e levu na ka vinaka ena vukuda, sega ni mai mate wale ga!

VULICA TIKO GA NA KA VOVOU

13. O na vulica tiko ga vakacava nona lomani iko o Jiova kei Karisito?

¹³ O na vulica tiko ga na loloma ni Kalou o Jiova kei Jisu Karisito ke o dau vakasamataka vakatitobu. Ena vula ni iVakananumi ni yabaki qo, o rawa ni wilika vinaka e dua se vica na Kosipeli. Kua ni saga mo wilika e vica vata na wase ena dua ga na gauna. Ia mo wilika vakamalua qai raica eso tale na vuna mo lomani Jiova kina kei Jisu. Koya e bibi sara, mo wasea na ka o vulica.

14. Me salavata kei na Same 119:97 kei na ivakamacala e ra, e yaga vakacava na vakekeli meda vulica kina na ivoli kei na so tale na ulutaga? (Raica tale ga na iyaloyalo.)

¹⁴ Ke o sa dede mada ga ena dina, o na rairai taroga ke rawa ni o vulica eso tale na ka ena ulutaga kilai levu, me vaka na lewadodonu ni Kalou, nona loloma, kei  na ivoli. Ia na kena dina, ena sega ni oti rawa noda vulica qori kei na so tale na ulutaga. Cava gona mo cakava? Mo wilika qai vakasamataka vakatitobu na itukutuku e tabaki ena noda ivola. Ni o raica e dua na ka e sega ni matata vei iko, vakekeli kina. Ena loma ni siga qori, mo vakasamataka vakatitobu na ka o wilika, na ka o vulica kina me baleti Jiova, na Luvena, kei na nodrau lomani iko.​—Wilika Same 119:97 kei na ivakamacala e ra.

15. Na cava meda qara tiko ga kina eso na iyau vou mai na iVolatabu?

¹⁵ Kua ni yalolailai ke o sega ni kunea e dua na ka vou ena gauna kece o wiliwili kina se vakekeli. Vakasamataka ga ni o vaqara koula tiko. Levu na gauna, o koya e vaqara koula ena vakayagataka e dua na gauna balavu se vica na siga me qai kunea e dua na koula lailai. Ia ena sasaga tiko ga ni talei vua na tiki ni koula lalai qori. Sa qai wacava na talei ni ka kece eda vulica ena iVolatabu! (Same 119:127; Vkai. 8:10) Koya gona mo vosovoso, dei tiko ga ena nomu ituvatuva ni wili iVolatabu.​—Same 1:2.

16. Sala cava eda na vakatotomuri Jiova kina kei Jisu?

¹⁶ Ni o vuli vakataki iko, raica na sala mo muria kina na ka o vulica. Kena ivakaraitaki, mo vakatotomuria na lewadodonu i Jiova ni o sega ni veivakaduiduitaki. Mo vakatotomuria nona lomani Tamana kei ira eso tale o Jisu ni o yalorawarawa mo vakararawataki ena yaca i Jiova, mo vukei ira tale ga na mataveitacini. Kena ikuri, mo vakatotomuri Jisu ni o vukea eso tale me rawa nira vakabauta tale ga na iloloma talei nei Jiova na ivoli.

17. Na cava ena veivosakitaki ena ulutaga tarava?

¹⁷ Na levu ga ni noda vulica na ivoli qai vakavinavinakataka, eda na lomani Jiova kina vakalevu kei na Luvena. Nida cakava qori, rau na lomani keda tale ga vakalevu. (Joni 14:21; Jeme. 4:8) Koya gona, meda vakekeli vinaka ena isolisoli e vakarautaka tu o Jiova meda vulica tiko ga na ivoli. Ena veivosakitaki ena ulutaga tarava eso na sala e yaga kina vei keda na ivoli, kei na ka meda cakava meda vakavinavinakataka kina na loloma i Jiova.