1. Na cava e vinakati meda cakava kece?

 E VINAKATI meda vakatulewa ena veisiga. Eso na vakatulewa e rawarawa, me vaka na ka meda kania ena katalau, se na gauna meda moce kina. Eso tale na ka e dredre toka meda vakatulewataka. E rawa ni tara noda bula, noda marau, ira na wekada se noda sokalou. Eda vinakata me yaga vei keda kei na noda vuvale na ka eda vakatulewataka. Koya e bibi duadua me marau kina Jiova.​—Roma 12:​1, 2.

2. Na cava mo cakava mo vakatulewa kina vakayalomatua?

² O na rawa ni vakatulewa vakayalomatua ke o (1) kila na kena dina, (2) vakasamataka na rai nei Jiova, (3) vakasamataka vinaka. Eda na veivosakitaka qori ena ulutaga qo kei na sala meda vakavulica kina noda vakasama.​—Vkai. 2:11.

MO KILA NA KENA DINA

3. Na cava e bibi kina mo kila na dina ni ituvaki ni bera ni o vakatulewa? Vakatauvatana.

³ Mo vakatulewa vinaka, na imatai ni ka mo cakava ya mo kila na kena dina. Cava e bibi kina? Kaya mada ni lai raici vuniwai e dua e tauvimate bibi. Vakacava ena vakatulewataka o vuniwai na kena iwali ni bera ni dikevi tauvimate se taroga vua eso na taro? Sega. O na vakatulewa vinaka tale ga ke o vakasamataka rawa na dina ni ituvaki. O na cakava vakacava?

4. Me salavata kei na Vosa Vakaibalebale 18:​13, cava mo cakava mo kila na dina ni ituvaki? (Raica tale ga na iyaloyalo.)

 ⁴ Levu na gauna o na kila na dina ni ituvaki ke o dau taro. Kena ivakaraitaki, kaya mada ni o sureti ena dua na soqo. O na tiko kina? Ke o sega ni veikilai kei koya e veisureti se na ka e tuvanaka, e bibi mo tarogi koya: “Ena caka e vei, gauna cava? Le vica era na tiko? O cei ena raica tiko na ka kece e caka? O cei era na tiko kina? Cava ena caka ena soqo? Ena vakarautaki kina na gunu?” O na vakatulewa vinaka ni o kila na kena isau.​—Wilika Vosa Vakaibalebale 18:13.

5. Na cava mo cakava ni o sa kila na kena dina?

⁵ Ni o sa kila na kena dina, vakasamataka na ituvaki taucoko. Kena ivakaraitaki, vakacava ke o kila nira na tiko ena soqo eso era sega ni doka na ivakavuvuli vakaivolatabu, se na vakarautaki na gunu qai sega ni dua e tiko me raica me kua ni sivia na ka e gunuvi? Vakacava e rawa ni tini na soqo qori me soqo ni marau vakalialia? (1 Pita 4:3) Vakacava ke veidonui na gauna ni soqo kei na soqoni ni ivavakoso se cakacaka vakavunau? Ni o vakasamataka na dina ni ituvaki qori ena rawarawa mo vakatulewa vakavinaka. E tiko tale e dua na ka mo cakava. O sa kila nomu rai me baleta  na ituvaki qori, ia cava na rai nei Jiova?​—Vkai. 2:6.

VAKASAMATAKA NA RAI NEI JIOVA

6. Me salavata kei na Jemesa 1:​5, cava meda masuti Jiova kina me vukei keda?

⁶ Masuti Jiova me vukei iko mo kila nona rai. E yalataka me solia vei keda na vuku, meda kila ke marautaka noda vakatulewa. E “lomasavu o koya vei keda kece, e sega ni dau vaqara cala.”​—Wilika Jemesa 1:5.

7. O na kila vakacava na rai nei Jiova? Vakatauvatana.

⁷ Ni o kerea oti na veidusimaki i Jiova, rogoca vinaka na kena isau. Kaya mada ke o sese ena dua na vanua, o na rairai kerea e dua e kea me vukei iko. Vakacava o na biubiu ni bera ni tukuna e dua na ka? Sega. O na rogoca vinaka nona veidusimaki. Ni o kerea tale ga vei Jiova na vuku, saga mo kila na kena isau ni o vaqara na ivakavuvuli vakaivolatabu e ganita na kemu ituvaki. Kena ivakaraitaki, ni o vakatulewataka mo tiko ena soqo sa tukuni oti mai, o na rawa ni dikeva na ka e kaya na iVolatabu me baleta na soqo ni marau vakalialia, na ilala ca, kei na bibi ni vakaliuci ni Matanitu ni Kalou, sega ni ka me baleti keda ga.​—Maciu 6:33; Roma 13:13; 1 Kor. 15:33.

8. Na cava mo cakava mo raica kina na itukutuku o vaqara tiko? (Raica tale ga na iyaloyalo.)

 ⁸ Eso na gauna ena rairai vinakati mo vukei mo raica na itukutuku o vaqara tiko. De dua ena vakasalataki iko e dua na tacida matua. Ia ena yaga tale ga ke o vakekeli. E levu sara na itukutuku yaga e tu ena noda ivukevuke ni vakekeli, me vaka na iDusidusi ni Vakadidike ni iVakadinadina i Jiova kei na iDusidusi ena Noda Bula vaKarisito. Nanuma ni nomu inaki me marautaka o Jiova nomu vakatulewa.

9. Eda kila vakacava ni na marautaka o Jiova noda vakatulewa? (Efeso 5:17)

⁹ Eda kila vakacava ni na marautaka o Jiova noda vakatulewa? E bibi sara ga meda kilai koya vinaka. E kaya na iVolatabu: “Na noda kilai koya e Yalosavasava sara e veivakayalomatuataki.” (Vkai. 9:10) Io, e rawati na yalomatua dina nida kila na itovo i Jiova, nona inaki, kei na ka e taleitaka se cata. Mo taroga: ‘Ni yavutaki ena ka au kila me baleti Jiova, cava au na vakatulewataka ena marau kina?’​—Wilika Efeso 5:17.

10. Na cava e bibi kina na ivakavuvuli vakaivolatabu, sega ni ivakarau ni vuvale se itovo vakavanua?

¹⁰ Me rawa nida vakamarautaki Jiova, eso na gauna e vinakati meda cakava na ka era na sega ni marautaka o ira eda veivolekati. Kena ivakaraitaki, era na rairai uqeti luvedra yalewa ulumatua eso na itubutubu mera vakawati kei na dua na tagane vutuniyau se dua ena rairai vakarautaka e levu na iduguci, ia e malumu tu vakayalo. Rau vinakata me qaravi vinaka vakayago na luvedrau, ia o cei ena vukei koya me toso vakayalo? Na cava na rai nei Jiova ena tikina qori? E tiko na kena isau ena Maciu 6:33. Eda uqeti kina na lotu vaKarisito meda “vakaliuca tiko ga na Matanitu ni Kalou.” Eda doka noda itubutubu kei ira ena noda itikotiko, ia e bibi duadua meda vakamarautaki Jiova.

VAKASAMATAKA VINAKA

11. Na itovo cava e tukuni ena Filipai 1:​9, 10, ena yaga ena nomu vakatulewa?

¹¹ Ni o sa kila vinaka na ivakavuvuli vakaivolatabu e vauci ena nomu vakatulewa, e vinakati mo vakasamataka vinaka. (Wilika Filipai 1:​9, 10) Na nomu yalomatua se nomu kila vinaka na loma ni Kalou, o na rawa ni kila na itinitini ni nomu vakatulewa. Eso na gauna e rawarawa nomu vakatulewa. Ia ena sega ni rawarawa tu ga e veigauna. Nomu yalomatua o na vakatulewa vinaka kina ni dredre mada ga na ituvaki.

12-13. O na vakaraitaka vakacava na yalomatua ni o digia nomu cakacaka?

¹² Vakasamataka mada na ivakaraitaki qo. O vaqara tiko e dua nomu cakacaka me tokona nomu vuvale. E tiko e rua na cakacaka. O vakasamataka na dina ni ka kece e vauca, me vaka na cakacaka cava, kena ituvatuva, na gauna mo yaco yani kina se lesu i vale, kei na so tale. Na cakacaka ruarua qori e rawa ni cakava na lotu vaKarisito. O na rairai digia e dua vei rau ni o taleitaka se saulevu. Ia ni bera ni o vakatulewa, e tiko eso tale na ka mo vakasamataka.

¹³ Kena ivakaraitaki, na cakacaka cava o na calata kina na soqoni ni ivavakoso? Vakacava na gauna mo veimaliwai kina kei ratou nomu vuvale, mo vukei ratou tale ga vakayalo? Ni o taroga qori o na rawa kina ni vakaliuca “na veika era bibi sara,” ya nomu sokalou kei na nomu  vuvale, sega ni kena rawati vakalevu na ilavo. Ena qai vakalougatataka o Jiova na nomu vakatulewa.

14. Eda na vakaraitaka vakacava na yalomatua kei na loloma meda kua ni vakatarabetaka e dua?

¹⁴ Nida yalomatua eda na vakasamataka tale ga ke na tarai ira vakacava eso tale na noda vakatulewa, meda kua kina ni “vakatarabetaka e dua.” (Fpai. 1:10) E bibi qo nida vakatulewataka na ka e baleti keda, me vaka noda isulusulu kei na keda irairai. Kena ivakaraitaki, eda na rairai taleitaka e dua na mataqali isulusulu se sasauni. Ia vakacava ke sega ni taleitaka qori eso ena ivavakoso se taudaku? Nida yalomatua, eda na doka nodra rai. Ena uqeti keda na loloma meda qara na ka e yaga “vei ira tale eso,” eda na yalomalumalumu tale ga. (1 Kor. 10:​23, 24, 32; 1 Tim. 2:​9, 10) Ni cakava qori, ena qai laurai ena noda vakatulewa na loloma kei na veidokai.

15. Na cava mo vakasamataka ni bera ni o vakatulewataka e dua na ka bibi?

¹⁵ Ke dua na ka bibi o vakatulewataka, vakasamataka na ka mo cakava me rawati  kina. E vakavulici keda o Jisu meda “cakacakataka na kena isau.” (Luke 14:28) Vakasamataka gona na levu ni gauna mo vakayagataka, nomu iyau, kei na sasaga me rawati kina. Eso na gauna o na rawa ni tarogi ratou nomu vuvale, mo kila na ka me ratou cakava yadua me ratou tokona kina na vakatulewa qori. Cava e vinaka kina na ituvatuva qo? E rawa ni kilai kina eso na ka mo veisautaka ena nomu vakatulewa, se muri e dua tale na vakatutu e vinaka cake. Ni o okati ratou nomu vuvale se rogoca nodratou vakatutu, ena rawarawa me ratou tokoni iko ena nomu vakatulewa.​—Vkai. 15:22.

VAKATULEWA VINAKA

16. Na cava mo cakava mo vakatulewa vinaka kina? (Raica tale ga na kato “ Sala Mo Vakatulewa Vinaka Kina.”)

¹⁶ Ke o sa cakava na ka kece e veivosakitaki mai cake, o sa tu vakarau mo vakatulewa. O sa kila na kena dina, o dikeva tale ga na ivakavuvuli mo vakatulewataka kina na ka ena marautaka o Jiova. Ia qo mo masuti Jiova me vukei iko ena nomu vakatulewa.

17. Na cava e bibi ena noda vakatulewa?

¹⁷ Ke vinaka mada ga eso nomu vakatulewa ena gauna sa oti, nanuma tiko ni bibi mo nuitaka na vuku i Jiova ena nomu vakatulewa, kua ni nuitaka ga nomu vuku se na ka o kila. O koya ga ena solia vei iko na kilaka dina, lomavuku, kei na yalomatua, ni bibi qori me rawati kina na vuku. (Vkai. 2:​1-5) Ena vukei iko o Jiova mo vakatulewataka na ka ena marau kina.​—Same 23:​2, 3.