1. Na cava e dua na vuna e vakarautaka kina o Jiova na ituvatuva ni vakawati?

 O JIOVA e “Kalou mamarau,” e vinakata meda marau tale ga. (1 Tim. 1:11) E vakarautaka e levu na isolisoli meda marautaka kina na bula. (Jeme. 1:17) E dua qori na vakawati. Ni rau vakamau e dua na tagane kei na dua na yalewa, rau bubuluitaka me rau veilomani, veidokai, me rau veimareqeti tale ga. Ni rau veilomani tiko ga erau na vakila na marau dina.​—Vkai. 5:18.

2. Na cava e yaco ena levu na vakawati nikua?

² Ka ni rarawa ni levu na veiwatini nikua era guilecava nodra vosa ni yalayala ni vakamau. Oya na vuna era rarawa kina. E tukuni ena dua na vakadidike se qai oti ga qo, ni levu na tagane vakawati era dau mokulaki watidra, vosataki ira, se vakararawataki ira ena so tale na sala. Na tagane e va qori nona ivakarau ena rairai dokai watina e matanalevu, ia e dau vakalolomataki koya e vale. Era rarawa tale ga e levu na yalewa vakawati ni dau sara iyaloyalo vakasisila o watidra.

3. Na cava era voravora kina eso na tagane vakawati?

³ Na cava era voravora kina eso na tagane vakawati? De dua e susugi koya e dua na tama voravora, e nanuma kina ni sega ni ca me voravora nona itovo. Eso tale era muria nodra itovo vakavanua e rairai vakabulabulataka na rai, ena vakaraitaka na “tagane dina” nona kaukaua vei watina me kilai kina o cei e boso. Eso na tagane era sega ni vakavulici mera lewa vinaka na yalodra, wili kina nodra cudru. Eso tale era dau sara iyaloyalo vakasisila, e cala kina nodra rai me baleti ira na yalewa kei na veiyacovi. E laurai ena levu tale na vakadidike ni tubu na leqa qori ena gauna ni matedewa na COVID-19. Ia e sega ni rawa ni ulubaletaka  qori o tagane me voravora kina vei watina.

4. Na cava mera qarauna na tagane vakawati? Na vuna?

⁴ Mera qarauna na tagane vakawati era qaravi Jiova me kua ni cala nodra rai me baleti ira na yalewa. a Na vuna? Na ka e vakasamataka e dua e rawa ni tini cakava sara. E vakasalataki ira na lotu vaKarisito e Roma na yapositolo o Paula mera “kua ni muria na ivakarau ni veika vakavuravura qo.” (Roma 12:​1, 2) Na gauna e volavola kina vei ira, sa tiko na ivavakoso qori me vica na yabaki. Ia na ka e tukuna e vakaraitaka nira se muria tiko ga eso ena ivavakoso na itovo kei na rai ni vuravura. Oya na vuna e uqeti ira kina mera veisautaka nodra rai kei na itovo. Na ivakasala qori e baleti ira sara ga na tagane vakawati nikua. Ka ni rarawa nira muria eso vei ira na rai ni vuravura ra qai vakalolomataki watidra. b Na cava e vinakata o Jiova me cakava na tagane vakawati vei watina? Eda raica na kena isau ena tikinivolatabu e yavutaki kina na vuli qo.

5. Me vaka e tukuni ena 1 Pita 3:​7, me vakacava na itovo nei tagane vei watina?

⁵ Wilika 1 Pita 3:7. O Jiova e vakaroti ira na tagane vakawati mera rokovi watidra. Nida rokova e dua, ena laurai ena ka eda cakava. Na tagane e rokovi watina ena caka vinaka vua, ena lomani koya tale ga. Eda na vulica ena ulutaga qo na sala ena vakaraitaka kina o tagane vakawati ni rokovi watina. Ia eda na veivosakitaka e liu na itovo ena vakaleqai yalewa vakawati.

CATA NA ITOVO ENA VAKALEQAI WATIMU

6. Na cava na rai nei Jiova me baleta na tagane e dau voravora vei watina? (Kolosa 3:19)

⁶ Dau voravora. O Jiova e cati koya e voravora nona itovo. (Same 11:5) E sega ni taleitaki ira na tagane vakawati era voravora vei watidra. (Mala. 2:16; wilika Kolosa 3:19.) Me vaka e tukuni ena tikinivolatabu e yavutaki kina na vuli qo, na 1 Pita 3:​7, ke sega ni lomani watina o tagane, ena vakaleqa nona veiwekani kei na Kalou. Ena rawa ni sega ni rogoca o Jiova nona masu.

7. Me vaka e tukuni ena Efeso 4:​31, 32, na vosa cava mera qarauna na tagane vakawati? (Raica tale ga “iVakamacala ni Vosa.”)

⁷ Dau kaukaua na vosa. Era vakalolomataki watidra eso na tagane ena vosa cudrucudru kei na vosa mosimosi. Ia o Jiova e cata “na cudrucudru, na yalokatakata, na karakara, [kei] na vosavakacaca.” c (Wilika Efeso 4:​31, 32.) E rogoca o Jiova na ka kece. E kauaitaka na ivakarau ni nona vosa o tagane vei watina, ke rau tiko taurua mada ga. Na tagane e dau kaukaua nona vosa vei watina e vakaleqa nona vakawati, kei na nona veitokani kei na Kalou.​—Jeme. 1:26.

8. Na cava na rai i Jiova me baleta na iyaloyalo vakasisila? Na vuna?

⁸ Dau sara iyaloyalo vakasisila. Na cava na rai i Jiova me baleta na iyaloyalo vakasisila? E cata. Koya gona, na tagane e dau sara iyaloyalo vakasisila e vakaleqa nona veiwekani kei Jiova, e sega  ni dokai watina tale ga. d E vinakata o Jiova me yalodina vei watina o tagane ena ka e cakava kei na ka e vakasamataka. E kaya o Jisu ni tagane e vakaraica tiko e dua tale na yalewa ena nona garosa, e sa veibutakoci oti “e lomana.” e​—Maciu 5:​28, 29.

9. Na cava e cata kina o Jiova ke veibeci na ivakarau ni nona veiyacovi o tagane vakawati?

⁹ Dau veibeci na ivakarau ni nona veiyacovi. Eso na tagane e dau vakasaurarataki watina ena ivakarau ni veiyacovi e sega ni rokovi, e dukadukali, e sega tale ga ni lomani kina o yalewa. E cata o Jiova na ivalavala e sega kina na veinanumi kei na loloma. E vinakata me lomani watina o tagane, me mareqeti koya, me doka tale ga na ivakarau ni lomana. (Efeso 5:​28, 29) Vakacava ke dau beci watina se voravora na tagane vakawati lotu vaKarisito, se dau sara iyaloyalo vakasisila? Ena veisautaka vakacava nona rai kei na ivalavala?

SALA ME CATA KINA NA ITOVO CA

10. Era na vuli vakacava na tagane vakawati ena ivakaraitaki nei Jisu?

¹⁰ Na cava me cakava o tagane vakawati me kua kina ni voravora se veibeci nona ivakarau? Me saga me vakatotomuri Jisu. A sega ni vakawati o Jisu, ia na ka e dau cakava vei ratou nona tisaipeli e ivakaraitaki vinaka vei ira na tagane vakawati ena ka mera cakava vei watidra. (Efeso 5:25) Kena ivakaraitaki, dikeva na ka era na vulica na tagane vakawati vei Jisu ena ka e dau cakava kei na ka e tukuna vei ratou nona yapositolo.

11. E dau vakacava na itovo nei Jisu vei ratou nona yapositolo?

¹¹ E dau yalovinaka o Jisu vei ratou nona yapositolo, e dokai ratou tale ga. E sega ni voravora se veivakasaurarataki. E nodratou Turaga o Jisu, ia e sega ni vakayagataka nona kaukaua me via lewai ratou. E yalomalumalumu ga me qaravi ratou. (Joni 13:​12-17) E tukuna vei ira nona tisaipeli: “Moni vuli vei au, niu yalomalumalumu, au yalomalua tale ga, oni na kunea kina na vakacegu.” (Maciu 11:​28-30) Dikeva ni yalomalua o Jisu. O koya e yalomalua e sega ni malumalumu, ia e yaloqaqa me lewai koya vinaka. Ni vakacudrui, ena lewa vinaka na ivakarau ni lomana.

12. E dau vakacava na ivakarau ni vosa nei Jisu?

¹² E veivakacegui na vosa i Jisu, e veiuqeti tale ga. E sega ni kaukaua nona vosa vei ira nona imuri. (Luke 8:​47, 48) Nira vakasewasewani koya na meca ra qai vakacudrui koya, “e sega ni veivakasewasewani lesu.” (1 Pita 2:​21-23) Eso na gauna e vakatulewataka o Jisu me galu ga, e sega ni via vosa lesu vakaukaua. (Maciu 27:​12-14) E ivakaraitaki vinaka dina vei ira na tagane vakawati lotu vaKarisito!

13. Me vaka e tukuni ena Maciu 19:​4-6, sala cava ena “kabiti watina” kina o tagane? (Raica tale ga na iyaloyalo.)

¹³ E vakaroti ira na tagane vakawati o Jisu mera yalodina vei watidra. E cavuta na vosa nei Tamana ni a tukuna vei tagane vakawati me “kabiti watina.” (Wilika Maciu 19:​4-6.) Na vosa vaKirisi e vakayagataki ena tikina qori me “kabiti watina,” e kena ibalebale “me dregati.” Koya gona, na kedrau ivau na veiwatini e dodonu me kaukaua me vaka ga erau dregati vata tu. Ke dua vei rau ena cakava na ka ena rarawa kina e dua, rau na rarawa ruarua.  Na tagane e lomani watina vakalevu, ena cata na iyaloyalo vakasisila kece. Ena vagolea tani totolo na matana me kua ni “raica na ka tawayaga.” (Same 119:37) E vaka me veiyalayalati kei na matana me kua ni kauaitaka vakatani e dua tale na yalewa e sega ni watina.​—Jope 31:1.

14. Na cava me cakava na tagane vakawati voravora me vinaka kina nona veiwekani kei Jiova kei watina?

¹⁴ Na tagane vakawati e dau voravora se dau vosa vakaukaua vei watina, e vinakati me cakava eso na ka me vinaka kina nona veiwekani kei Jiova kei watina. Cava me cakava? Dua, me kila ni cala tiko na ka e cakava. E sega ni dua na ka e vunitaki e mata i Jiova. (Same 44:21; Dauv. 12:14; Iper. 4:13) Rua, me muduka nona vakalolomataki watina qai veisautaka nona ivakarau. (Vkai. 28:13) Tolu, me kere veivosoti vei watina, vaka kina vei Jiova. (Caka. 3:19) E bibi tale ga me kerei Jiova me vinakata me veisau, me lewa vinaka tale ga nona vakasama, nona vosa, kei na ka e cakava. (Same 51:​10-12; 2 Kor. 10:5; Fpai. 2:13) Va, me cakava sara na ka e masulaka ni vulica me cata na ivakarau voravora kece kei na vosa kaukaua. (Same 97:10) Lima, me qara totolo nodratou veivuke na ivakatawa dauloloma ena ivavakoso. (Jeme. 5:​14-16) Ono, me muria e dua na ituvatuva me kua kina ni cakava tale na veika ca qori. Na tagane vakawati e dau sara iyaloyalo vakasisila me muria tale ga na ono na tikina qori. Ena vakalougatataka o Jiova nona sasaga me veisautaka nona ivakarau. (Same 37:5) Ia e sega ni vinakati ga me cata o tagane vakawati na itovo ca. E bibi tale ga me vulica me dau rokovi watina. Ena cakava vakacava?

SALA MO ROKOVI WATIMU KINA

15. Ena vakaraitaka vakacava o tagane ni lomani watina?

¹⁵ Vakaraitaka nomu lomani koya. Eso na tagane era marautaka nodra bula vakawati, era dau cakava e veisiga eso  na ka mera vakaraitaka nira lomani watidra. (1 Joni 3:18) Kena ivakaraitaki, ena rawa ni vakaraitaka o tagane ni lomani watina ni rau veitauriliga se mokoti koya. E rawa ni vakau itukutuku vua me kaya “Au nanumi iko tiko,” se taroga “Vacava tiko?” Eso na gauna ena rairai vola vua e dua na ivola lekaleka me vakaraitaka na levu ni nona lomani koya. Ni cakava qori o tagane, e vakaraitaka ni rokovi watina, ena dei kina nodrau bula vakawati.

16. Na cava me vakacaucautaki watina kina o tagane?

¹⁶ Dau vakavinavinakataki koya. Na tagane vakawati e rokovi watina ena mareqeti koya, ena uqeti koya. Dua na sala ena cakava kina qori, ya me nanuma tiko me dau vakavinavinakataki koya ena ka kece e cakava me tokoni koya kina. (Kolo. 3:15) Ni vakacaucautaki yalewa o tagane vakawati, ena marau kina. Ena vakila ni taqomaki, lomani, e rokovi tale ga.​—Vkai. 31:28.

17. Ena vakaraitaka vakacava o tagane ni dokai watina?

¹⁷ Dau yalovinaka, mo veidokai. Na tagane e lomani watina ena mareqeti koya, ena karona. Ena raici koya me iloloma talei e solia o Jiova. (Vkai. 18:22; 31:10) Qori na vuna ena lomani koya kina, ena dokai koya tale ga ena gauna rau veiyacovi kina. Ena sega ni vakasaurarataki koya ena ivakarau ni veiyacovi ena sega ni taleitaka, ena beci se ca kina nona lewaeloma. f Kena ikuri, ena saga o tagane vakawati me vinaka tiko ga nona lewaeloma ena mata i Jiova.​—Caka. 24:16.

18. Na cava mera vakadeitaka na tagane vakawati? (Raica tale ga na kato “ Va na Sala me Vakaraitaka Kina o Tagane Vakawati na Veidokai.”)

¹⁸ Kemuni na tagane vakawati, mo nuidei ni raica o Jiova nomu sasaga mo rokovi watimu ena nomu bula kece, e marautaka tale ga. Mo vakadeitaka mo rokovi koya ni o sega ni cakava e dua na ka me rarawa kina, mo dau yalovinaka, mo dokai koya, mo lomani koya tale ga. Ni o cakava qori ena kila ni o lomani koya, o mareqeti koya. Ni o rokovi watimu, o na taqomaka nomu veiwekani talei duadua, ya nomu veitokani kei Jiova.​—Same 25:14.