“E LEVU dina na ka me tamusuki, ia era le lailai na tamata cakacaka. Ni kerea gona na Turaga ni tatamusuki me tala mai eso tale na tamata cakacaka ina nona tatamusuki.” (Luke 10:2) Na ka e tukuna qori o Jisu ena rauta na 2,000 na yabaki sa oti, e vakavotuya vinaka sara ga na veika e yaco tiko e Myanmar nikua. Na vuna? Na vanua qo era tiko ga kina e rauta ni le 4,200 na dautukutuku era vunautaka tiko na itukutuku vinaka vei ira na le 55 na milioni.

Ia na “Turaga ni tatamusuki” o Jiova, e uqeta na lomadra e vica vata na drau na tacida tagane kei na yalewa mai na veivanua mera lako ina cevaicake kei Esia mera veitokoni ena tatamusuki vakayalo. Na cava e uqeti ira mera biuta na nodra vanua? Era vukei vakacava ena nodra toki? Na veivakalougatataki cava era marautaka tiko? Meda raica mada.

E painia tiko mai Japani o Kazuhiro. Vica na yabaki yani e liu e tauvi koya na manumanusoni, e sega ni vakilai koya, mani kau kina e valenibula. E vakasalataki koya o vuniwai me kua tu mada ni draiva me rua na yabaki. E sega sara ga ni vakabauta. E veinanuyaka: ‘Rawa vakacava niu cakava tiko ga na cakacaka au taleitaka, na painia?’ E masu mai vu ni lomana, qai cikevi Jiova me vukei koya ena dua tale na sala me tomana tiko ga kina na nona painia.

E kaya o Kazuhiro: “Ni oti e dua na vula e rogoca e dua noqu itokani e veiqaravi tiko mai Myanmar na kequ ituvaki. E qiriti au mai qai kaya: ‘E Myanmar, levu era dau vodo basi ga. Ke o lako mai ke, o rawa ni cakacaka vakavunau tiko ga, ni o na sega ni draiva!’ Au mani tarogi noqu vuniwai keu se rawa ni lako tiko ga e Myanmar. Au kurabui ni tukuna mai: ‘E dua na vuniwai ni mona mai Myanmar e veisiko sara tiko ga e Japani ena gauna qo. Au na veikilaitaki kemudrau. Ke o manumanusoni tale, ena rawa ni qaravi iko.’ Na ka e tukuna qori o vuniwai e saumi sara ga kina noqu masu vei Jiova.”

Sega ni bera nona imeli o Kazuhiro ina valenivolavola ni tabana e Myanmar, me vakaraitaka nodrau via lai veiqaravi vakaveiwatini ena vanua qori me rau painia. Ni oti ga e lima na siga, e sauma mai na valenivolavola ni tabana, “Mai, vinakati sara tu ga e levu na painia!” E volitaka sara o Kazuhiro kei na watina o Mari, na nodrau motoka, rawa nodrau ivolatara ni curuvanua, rau volia tale ga nodrau tikite ni waqavuka. Nikua rau marautaka tiko na nodrau veiqaravi ena  iwasewase lailai ni vosa vagalu e Mandalay. E kaya o Kazuhiro: “Ena ka keirau sotava qo, e vakadeitaka na neirau vakabauta na vosa yalayala ni Kalou ena Same 37:5: ‘Tataunaka na nomu sala vei Jiova, vakararavi vua, ena qai yavala ena vukumu o koya.’”

Ena 2014, e vakayacori na soqo ni veiwasewase ni iVakadinadina i Jiova e Myanmar, e itaukeinisoqo sara ga kina. E vica mai na veimatanitu era tiko tale ga. E kaya o Monique, e dua na tacida yalewa e yabaki 34 mai Merika: “Niu lesu mai na soqo qori, au masuti Jiova me baleta na ka meu cakava tarava. Au veitalanoa tale ga kei rau na noqu itubutubu me baleta noqu isausau vakayalo. Keitou nanuma kece meu sa na lesu i Myanmar, ia ena vinakati kina na gauna, meu masu tale ga vakalevu ni bera niu vakatulewa.” E vakamacalataka o Monique na vuna.

“E uqeti ira na nona imuri o Jisu mera ‘cakacakataka na kena isau.’ Au mani taroga: ‘Au rawa ni sauma vakailavo na noqu toki? Au rawa ni qaravi au ena vanua qori me kua ni levu noqu cakacaka saumi?’” E kaya: “Au dikeva rawa ni sega ni veirauti na noqu ilavo meu toki ina dua tale na vanua.” Ia e qai toki ga vakacava?—Luke 14:28.

E kaya o Monique: “Dua na siga e kaya o noqu boso ni via raici au. Au lomaleqa sara ga, au nanuma niu sa na vakacegui. E vakavinavinakataka ga na noqu gugumatua. E kaya ni via solia e dua na noqu bonisi, na ilavo sara ga au vinakata tiko me baleta noqu ilakolako!”

Sa veiqaravi tiko o Monique e Myanmar me tekivu mai na Tiseba 2014. Na cava na nona rai me baleta nona cakacaka vakaitalatala ena vanua e vinakati tu kina na veiqaravi? E kaya: “Au marautaka noqu tiko eke. E tolu tiko noqu vuli iVolatabu. E dua sa yabaki 67. Na gauna kece keirau dau sota kina ena matadredredre tu ga qai mokoti au. Ni vulica ni yaca ni Kalou o Jiova, e tagi sara ga. E kaya: ‘Au se qai rogoca sara tu ga qo ni yaca ni Kalou o Jiova. O se gone sara vei au, o qai vakavulica meu kila na ka e bibi duadua me kilai.’ E vakavuna tale ga noqu tagi. E dau veivakacegui sara ga vei ira na veiqaravi tu ena vanua e vinakati kina na veivuke na irogo va qori.” Wale tiko ga qo e marautaka o Monique na nona lai vuli ena Koronivuli ni iTalatala ni Matanitu.

Dua tale na vuna era lako kina eso i Myanmar e baleta tiko na itukutuku era wilika ena iVolaniyabaki ni 2013 ni iVakadinadina i Jiova me baleta na vanua qori. Dua na tacida yalewa yabaki 30 vakacaca, o Li sa vakaitikotiko rawa mai na Cevaicake kei Esia. E cakacaka saumi, ia e uqeti koya na ka e wilika ena ivolaniyabaki me lai veiqaravi e Myanmar. “Niu tiko ena dua na soqo lavotaki ena 2014 e Yangon, au sotava kina e dua na veiwatini rau veiqaravi tiko ena nodra yalava na vosa vakaJaina ena vanua e vinakati kina vakalevu na veivuke e Myanmar. Niu kila na vosa vakaJaina, au mani nanuma meu sa lai veitokoni ena iwasewase lailai ni vosa vakaJaina e kea. Au lai tomani Monique, keirau toki sara i Mandalay. E vakalougatataki keirau o Jiova me dua neirau cakacaka vagauna ena dua ga na koronivuli, keirau kunea tale ga e dua na vale e voleka. Keirau marautaka na veiqaravi eke, ia dua na ka na katakata ni draki kei na so na ituvaki e sega ni vinaka. Era dau bula rawarawa ga na lewenivanua e Myanmar, ia era itovo vinaka, ra qai tu vakarau mera rogoca na itukutuku vinaka. Eda marautaka tale ga na sala e vakatotolotaka tiko kina na cakacaka o Jiova. Au vakadeitaka ni nona inaki meu veiqaravi eke e Mandalay.”

Era vakila tale ga e vica era veiqaravi tu ena vanua e vinakati kina na cakacaka na yaga ni masu. Vakasamataki Jumpei kei watina o Nao, rau yabaki 30 vakacaca ruarua. Rau a veiqaravi tiko ena  ivavakoso ni vosa vagalu mai Japani. Cava ga rau qai toki kina i Myanmar? E vakamacalataka o Jumpei: “Dau neirau isausau vakaveiwatini na veiqaravi ena vanua e vinakati kina na veivuke e vanuatani. Dua na tacida tagane mai na neitou ivavakoso ni vosa vagalu e Japani a toki tale ga i Myanmar. Sega ni levu sara na ilavo keirau maroroya tu, ia keirau toki ga e kea ena Me 2010. Era kidavaki keirau vakayalololoma na tacida e Myanmar!” Cava e nanuma me baleta na yalava ni vosa vagalu e Myanmar? “Levu sara ga na tataleitaki. Dua na ka nodra kurabui na itaukeinivale era galu nira sarava na vidio e baleti ira. Keirau marautaka neirau vakatulewa me keirau qaravi Jiova eke!”

Vakacava nodrau bula vakailavo o Jumpei kei Nao? “Ni oti e tolu na yabaki, keirau sa vakayagataka e levu na ilavo keirau a maroroya tu, sa na sega ni veirauti me saumi kina na rede ena yabaki e tarava. Keirau masu vakavica mai vu ni loma i keirau. Dua na ka neirau kurabui ni vola mai na valenivolavola ni tabana me keirau veiqaravi vakapainia lavotaki vakalekaleka! Keirau nuitaki Jiova, keirau vakadinadinataka tale ga ni sega ni biuti keirau. Levu na sala e vakaraitaka kina nona kauaitaki keirau.” Wale tiko ga qo rau a vuli tale ga ena Koronivuli ni iTalatala ni Matanitu o Jumpei kei Nao.

Na cava e uqeti Simone, e dua na tacida tagane yabaki 43, mai Itali, kei na watina o Anna, e yabaki 37 mai Niusiladi, me rau toki i Myanmar? E kaya o Anna: “Na itukutuku baleti Myanmar ena iVolaniyabaki ni 2013!” E kaya o Simone: “Dua na ka dokai na veiqaravi e Myanmar. Rawarawa sara na bula eke, levu na gauna au vakayagataka vei Jiova. E veiuqeti tale ga nida vakadinadinataka nona veikauaitaki o Jiova nida veiqaravi ena vanua e vinakati kina na cakacaka.” (Same 121:5) E kaya o Anna: “Dua na ka noqu marau ni vakatauvatani kei na veigauna sa sivi. Rawarawa ga neirau bula. Levu na gauna au vakayagataka kei watiqu, keirau veivolekati tale ga. Levu tale ga na neirau itokani vinaka. Era sega ni dau vakaduiduitaki ira na iVakadinadina na lewenivanua eke, totoka dina na tataleitaki ena yalava!” Ena sala cava?

E vakamacalataka o Anna: “Au vunau vua e dua na goneyalewa ena makete, e vuli tiko ena univesiti, au tuvanaka me keirau na sota tale. Gauna keirau qai sota kina, rau sa veitomani tiko mai kei na dua nona itokani. Na gauna tarava sa vica tale eratou lako yani. Oti qori, eso tale era veitomani yani. Gauna qo sa lima eratou vuli tiko.” E kaya o Simone: “Era yalovinaka na tiko ena yalava, qai dau levu nodra taro. Levu era tataleitaki. Sa sega ga na gauna.”

Vakacava ga na ka me caka me baleta na toki i Myanmar? E kaya o Mizuho mai Japani: “Keirau dau taleitaka kei watiqu o Sachio, na veiqaravi ena vanua e vinakati kina na cakacaka—ia keirau sega ga ni kila se vanua cava. Ni keirau wilika oti na iVolaniyabaki ni  2013 me baleti Myanmar, e uqeti keirau sara ga na irogo mai kea, keirau mani veitalanoataka ke rawa ni keirau lai veiqaravi kina.” E kaya o Sachio: “Keirau mani nanuma me keirau sa gade mada me dua na macawa e Yangon, na korolevu kei Myanmar, me keirau lai raica se vakacava tu na vanua qori. Neirau gade lekaleka qori e vakadeitaka sara ga me keirau toki kina.”

Rau sa yabaki 50 vakacaca o Rodney kei watina o Jane, mai Ositerelia. Rau sa veiqaravi tiko e Myanmar kei na luvedrau tagane o Jordan vaka kina na luvedrau yalewa o Danica me tekivu mai na yabaki 2010. E kaya o Rodney: “E tarai keitou na nodra walokai tu vakayalo na lewenivanua. Au uqeti ira na vo tale ni vuvale mera tovolea mada na veiqaravi ena vanua vakataki Myanmar.” Na vuna? “E sega ni tukuni rawa na kena yaga vakayalo vei keitou vakavuvale! Levu na itabagone era sa kauaitaka ga nodra talevoni, motoka, cakacaka kei na so tale. Ia rau kauaitaka na luvequ na vulici ni vosa vou me rau vakayagataka ena cakacaka vakaitalatala. Erau saga me rau veivosaki kei ira na sega tu ni kila na iVolatabu, me rau saumitaro tale ga ena gauna ni soqoni ena ivavakoso keitou lewena, rau vakaitavi tale ga ena ituvatuva vakayalo tale eso.”

E kaya o Oliver, e dua na tacida yabaki 37 mai Merika, na vuna e uqeta kina na veiqaravi qo: “E yaga vakalevu noda qaravi Jiova ena taudaku ni vanua eda sa dau matau tu ga kina. Niu lai veiqaravi ena dua tale na vanua e uqeti au meu nuidei, au qai nuitaki Jiova se mani ituvaki vakacava au sotava. Niu veiqaravi tiko kei ira keimami sega ni veikilai, ia e tautauvata na neimami vakabauta, e vukei au sara ga meu raica ni sega ni vakatauvatani rawa kei na dua tale na ka na bibi ni Matanitu ni Kalou.” Nikua, rau tomana tiko ga o Oliver kei na watina o Anna, na nodrau veiqaravi ena gumatua ena yalava ni vosa vakaJaina.

O Trazel, e dua na tacida yabaki 52 mai Ositerelia, sa veiqaravi tiko e Myanmar me tekivu mai na yabaki 2004. E kaya: “Ke vakatara na kemuni ituvaki, au uqeti kemuni moni lai veiqaravi ena vanua e vinakati kina na veivuke. Au vakadinadinataka ke gu na lomamu mo veiqaravi, o Jiova ena vakalougatataka na nomu sasaga. Au sega vakadua ni tadra niu na mai bula tu va qo. Au vakalougatataki kina vakalevu, vakila tale ga na vakacegu, na ka sara ga au dau vinakata tu.”

Me uqeti kemuni mada ga na ka era tukuna o ira na veiqaravi e Myanmar moni vukei ira tale ga kina na tamata lomadina era tiko ena yalava e sega ni tarai. Io, era veisureti tiko mai na vanua e vinakati tu kina na veiqaravi nira kaya, “Yalovinaka, ni lako mai Myanmar moni mai vukei keimami!”