E TU ena iVolatabu na ka era cavuta na tagane era “vakataki keda” ga. (Jeme. 5:17) Kena ivakaraitaki, eda na kila vinaka na ka e tukuna o Paula ena Roma 7:21-24: “Niu via cakava na ka e dodonu, e tiko ga vei au na ca. . . . Au sa vakaloloma dina!” E veivakacegui na ka e vola o Paula. Ena sala cava? E dau saga me valuta na nona malumalumu me vakataki keda ga.

E vola tale vakadodonu o Paula eso na ka e vakila. E kaya me baleti Jisu ena Kalatia 2:20 ni “lomani [koya], e solia tale ga nona bula ena vuku[na].” E dau va tale ga qori na nomu rai? De dua ena so ga na gauna.

Ke da dau beci keda ena so na gauna ena vuku ni noda cala makawa, ena rairai dredre meda vakabauta ni lomani keda o Jiova, e sega tale ga ni vosoti keda. Ena dredre tale ga meda vakabauta ni ivoli e nona iloloma o Jiova vei keda yadua. Vakacava e vinakata o Jisu meda raica va qori na ivoli? Na cava ena vukei keda me donu na noda rai? Meda veivosakitaka mada na taro qori.

E vinakata o Jisu meda raica na nona isoro me nona iloloma vei keda yadua. Eda na vakadeitaka vakacava qori? Raitayaloyalotaka mada na ka e tukuni ena Luke 23:39-43. E lili tu e dua na tagane ena kaunirarawa e yasa i Jisu. E tukuna vakadodonu vei Jisu ni cala dina. E rairai cala levu nira dau vakamatei ena kaunirarawa o ira na cala bibi. E lomaleqa na tagane qo mani vakamasuti Jisu: “Nanumi au ni oni sa tiko ena nomuni Matanitu.”

Na cava e qai cakava o Jisu? Raitayaloyalotaka mada na levu ni mosi ena gauna e golea kina na uluna me raica na daubasulawa. Dua na ka na levu ni nona mosi, ia e matadredredre vua o Jisu qai vakacegui koya. E kaya: “Au tukuna vakadodonu vei iko nikua, daru na tiko vata mai Parataisi.” A rawa ni tukuna vua o Jisu ni “lako mai na Luve ni tamata . . . me solia . . . nona bula me kedra ivoli e le levu.” (Maciu 20:28) Ia e sega ni cavuta qori, e kaya ga vua ni baleti koya sara ga na nona isoro. E kauaitaki koya dina ni cavuta na vosa “daru,” ni vosa sara tiko ga vua. E tukuna vua ni na bula ena parataisi.

E macala ni vinakata o Jisu me kila na tagane qori ni yaga tale ga vua na isoro e vakarau cabora. Ke sa kauaitaka o Jisu na daubasulawa a sega ni bau qarava na Kalou ena dua na gauna, sa qai wacava na nona kauaitaka na lotu vaKarisito e qarava na Kalou! Na cava ena vukei keda meda vakabauta ni isoro i Karisito e baleti keda yadua sara ga?

Ni lesi Paula o Jisu me vunau, e vakadeitaka vua ni mate ena vukuna o Jisu. E vakamacalataka: “Au vakavinavinaka vei Karisito Jisu na noda Turaga, o koya e vakaukauataki au, ni  okati au meu yalodina ni lesi au ena cakacaka vakaitalatala, e dina niu dau vosabeca na Kalou, au dau veivakacacani, au qai dau veibeci.” (1 Tim. 1:12-14) E levu na ka ca a cakava o Paula, ia e vakadeitaka ni lomani koya o Jisu qai nuitaki koya ni lesi koya me vunau. E lesia tale ga vei keda o Jisu e dua na itavi meda vunautaka na itukutuku vinaka. (Maciu 28:19, 20) Vakacava eda na vakabauta tale ga ni mate ena vukuda o Jisu nida lai vunau?

A vakasivoi o Albert me 34 na yabaki, e qaravi Jiova tale. E vakamacalataka: “Au dau vakasamataka tu ga na noqu ivalavala ca. Ia niu lai vunau, e dau tiko vei au na rai nei Paula, ni lesi au o Jisu meu vunautaka na itukutuku vinaka. Qori e vakamarautaki au, e donu noqu rai me baleti au ena gauna qo kei na gauna se bera mai.”—Same 51:3.

O Allan e dau basulawa e liu, e voravora tale ga na nona itovo ni bera ni vulica na iVolatabu. E kaya: “Au dau vakasamataka tu ga na noqu dau vakacacani ira e levu. So na gauna, au yalolailai sara ga. Ia au vakavinavinakataki Jiova ni vakadonuya e dua na tamata ivalavala ca vakataki au me vunautaka na itukutuku vinaka. Nira rogoca na itukutuku vinaka na lewenivanua, au dau vakasamataka na vinaka kei na loloma i Jiova. Au kila ni vakayagataki au meu vukei ira na daubasulawa kei ira na tamata voravora.”

Nida lai vunau, eda na vakasamataka tiko ga na ka e vinaka kei na ka e veiuqeti. E vakadeitaka ni lomani keda o Jisu, e dau veivosoti, e nuitaki keda tale ga.

Ena rairai beitaki keda tu ga na lomada ena vuku ni noda cala makawa me yacova ni vakarusai na ituvaki ca i Setani. Eda na valuta vakacava na rai qori?

E ora vakalevu na loma i Jean ni dau vakasamataka na kena ituvaki ni se gone, ni dau rua na ivakarau ni nona bula. E kaya: “Dua na ka noqu marau ni ‘uasivia na lomada na Kalou.’” (1 Joni 3:19, 20) Me vakataki Jean, eda marau tale ga nida kila ni rau kila vinaka o Jiova kei Jisu nida ivalavala ca. Meda nanuma tiko ni rau vakarautaka vakayalololoma na ivoli vei ira na veivutunitaka na nodra ivalavala ca, sega ni o ira na uasivi.—1 Tim. 1:15.

Eda na vakadeitaka ni baleti keda yadua sara ga na ivoli nida vakasamataka vakatitobu qai masulaka na ka e dau cakava o Jisu vei ira na ivalavala ca, kei na noda qarava mai vu ni lomada na cakacaka vakaitalatala e lesi vei keda. Nida cakava qori, eda na tukuna tale ga na ka e cavuta o Paula me baleti Jisu: “E lomani au, e solia tale ga nona bula ena vukuqu.”