1. Me vaka e tukuni ena 3 Joni 3, 4, na cava eda dau marautaka?

VAKASAMATAKA mada na levu ni nona marau na yapositolo o Joni ni rogoca nodra qaravi Jiova tiko ga ena yalodina o ira e vukea mera kila na ka dina! E levu na ka dredre era sotava, e saga tiko ga na yapositolo o Joni me vaqaqacotaka na nodra vakabauta na lotu vaKarisito yalodina qori, ni okati ira mera luvena vakayalo. Eda dau marau tale ga nira yalataki ira vei Jiova na luveda kei na noda vuli iVolatabu, ra qai yalodina tiko ga.—Wilika 3 Joni 3, 4.

2. Na cava na inaki ni ivola e vola o Joni?

² Ena 98 G.V., a rairai tiko o Joni e Efeso se dua na vanua voleka. De dua e toki i kea ni sere oti mai na yanuyanu o Patimo. E uqeti koya ena gauna qori na yalo tabu i Jiova me vola e tolu na ivola. E kena inaki me uqeti ira na lotu vaKarisito yalodina, me dei nodra vakabauti Jisu ra qai muria tiko ga na ka dina.

3. Na taro cava eda na sauma?

³ O Joni na iotioti ni yapositolo me bula tiko. E leqataka vakalevu na nodra ivakavuvuli na qasenivuli lasu ena ivavakoso. * (1 Joni 2:18, 19, 26) Era tukuna na vukitani qori nira kilai Jiova, ia era sega ni muria na nona ivakaro. Meda veivosakitaka mada na ivakasala uqeti vakalou i Joni. Eda na sauma tale ga e tolu na taro: Na cava na ibalebale ni noda muria na ka dina? Na cava e rawa ni vakadredretaka noda cakava qori? Eda na veivukei  vakacava meda dei tiko ga ena ka dina?

4. Me vaka e tukuni ena 1 Joni 2:3-6 kei na 2 Joni 4, 6, na cava meda cakava meda muria tiko ga kina na ka dina?

⁴ Meda muria tiko ga na ka dina, e vinakati meda kila na ka dina ena Vosa ni Kalou, na iVolatabu. E vinakati tale ga meda ‘muria na ivunau’ i Jiova, oya meda talairawarawa vua. (Wilika 1 Joni 2:3-6; 2 Joni 4, 6.) E ivakaraitaki vinaka o Jisu ena nona talairawarawa vei Jiova. E dua gona na sala bibi eda talairawarawa kina vei Jiova oya nida muria voleka na weniyava i Jisu.—Joni 8:29; 1 Pita 2:21.

5. Na cava meda vakadeitaka?

⁵ Meda muria tiko ga na ka dina, e bibi meda vakadeitaka ni o Jiova e Kalou ni ka dina, e dina tale ga na ka kece e tukuna ena nona Vosa na iVolatabu. E bibi tale ga meda vakadeitaka ni o Jisu na Mesaia yalataki. E levu nikua era vakatitiqataka ni sa lumuti o Jisu me Tui ni Matanitu ni Kalou. E veivakasalataki o Joni nira na levu na “dauveivakacalai,” e rawa nira vakacalai ira na sega ni vakabauta dei na ka dina me baleti Jiova kei Jisu. (2 Joni 7-11) E vola o Joni: “O cei na dau lasulasu? Sega ni o koya ga e cakitaka ni Karisito o Jisu?” (1 Joni 2:22) Na sala duadua ga meda kua kina ni vakacalai, oya noda vulica na Vosa ni Kalou. Nida cakava qori, eda na qai kilai Jiova kei Jisu. (Joni 17:3) Ena dei tale ga noda vakabauta na ka dina.

6. Na cava e rawa ni vakadredretaka nodra muria na ka dina na lotu vaKarisito itabagone?

⁶ Meda qarauna kece na lotu vaKarisito na vuku vakatamata. (1 Joni 2:26) E bibi tale ga mera qarauna na lotu vaKarisito itabagone na dai qo. E kaya o Alexia, * e dua na tacida yalewa mai Varanise, e yabaki 25: “Niu se gone, au lomatarotarotaka na vakasama ni vuravura, me vaka na bula vakaidewadewa kei na vuku vakatamata. Eso na gauna au taleitaka sara ga na ivakavuvuli qori. Au kila ni cala keu vakabauta na ka kece au rogoca e koronivuli, niu sega mada ni raica na ka e tukuna o Jiova.” E qai vulica o Alexia na ivola Life —How Did It Get Here? By Evolution or by Creation? Ena loma ga ni vica na macawa, mai oti yani na nona vakatitiqa. E kaya tale: “Au sa qai vakadeitaka ni dina na ka e tukuni ena iVolatabu. Au kila nida muria na kena ivakatagedegede, eda na marau kina, eda lomavakacegu tale ga.”

7. Na cava meda qarauna? Na vuna?

⁷ Meda qarauna na lotu vaKarisito kece, gone kei na qase, me kua ni rua na ivakarau ni noda bula. E vakamatatataka o Joni ni sega ni rawa nida muria tiko na ka dina da qai cakava tiko eso na itovo dukadukali. (1 Joni 1:6) Ke da vinakata me vakadonui keda o Jiova ena gauna qo kei na gauna se bera mai, e bibi meda kila tiko ni o Jiova e raica na ka kece eda cakava. Kena ibalebale, e sega ni dua na ivalavala ca e vunitaki vua.—Iper. 4:13.

8. Na cava meda cata?

⁸ Meda cata na rai ni vuravura me baleta na ivalavala ca. E vola na yapositolo o Joni: “Ke da kaya, ‘E sega noda ivalavala ca,’ eda sa vakacalai keda tiko ga.” (1 Joni 1:8) Ena gauna i Joni, era kaya na vukitani ni rawa nida veitokani tiko ga kei na Kalou ke da nakita meda cakava tiko na ka e cata. E va tale ga qori nodra rai e levu nikua. Era kaya nira vakabauta na Kalou, ia era sega ni duavata kei na nona rai me baleta na ivalavala ca, vakabibi na ka e vauca na veiyacovi. Na ka e okata o Jiova me ivalavala ca, era kaya ni noda vakatulewa, e noda ivakarau ga ni bula.

9. E yaga vakacava vei ira na itabagone nira dei ena ivakavuvuli vakaivolatabu era vakabauta?

⁹ Era na rairai temaki na lotu vaKarisito itabagone mera muria nodra itovo dukadukali na lewe ni kalasi, se o ira era cakacaka vata. Qori na ka e sotava e dua na tacida tagane o Aleksandar. E kaya: “Era saga eso na goneyalewa e koronivuli me  keimami veiyacovi. Era kaya ni sega noqu itau, de dua au taleitaki ira ga na tagane.” Ke o sotava tale ga qori, mo nanuma tiko ni o na marau, bulabula, ena vinaka nomu lewaeloma kei na nomu veiwekani kei Jiova ke o dei tiko ga ena ivakavuvuli vakaivolatabu o vakabauta. Ena gauna kece o vorata kina na veitemaki sa na rawarawa sara mo cakava na ka dodonu. Kua tale ga ni guilecava ni vu mai vei Setani na raicala ni vuravura me baleta na veiyacovi. Ni o sega ni muria na rai ni vuravura, o sa ‘vakamalumalumutaka tiko na vunica.’—1 Joni 2:14.

10. E uqeti keda vakacava na 1 Joni 1:9 meda qaravi Jiova ena lewaeloma e savasava?

¹⁰ Eda kila ni tu na dodonu vei Jiova me lewa na itovo e okati me ivalavala ca. Eda saga tale ga ena noda vinaka kece meda kua ni valavala ca. Ia nida valavala ca, eda vakatusa vei Jiova ena masu. (Wilika 1 Joni 1:9.) Ke ivalavala ca bibi, eda na kerea na nodra veivuke na qase e lesia o Jiova mera karoni keda. (Jeme. 5:14-16) Meda kua gona ni rarawataka vakasivia na noda cala makawa. Na vuna? Ni vakarautaka na Tamada dauloloma na isoro ni veivoli i Luvena me vosoti kina na noda ivalavala ca. Ni tukuna o Jiova ni na vosoti ira na veivutuni, ena cakava dina qori. E vakarautaka gona na sala meda qaravi koya kina ena lewaeloma e savasava.—1 Joni 2:1, 2, 12; 3:19, 20.

11. Eda na taqomaka vakacava na noda vakasama mai na ivakavuvuli e rawa ni vakaleqa na noda vakabauta?

¹¹ Meda cata na nodra ivakavuvuli na vukitani. Ni tauyavu oti na ivavakoso vaKarisito, e vakayagataka tiko ga na Tevoro e levu na dauveivakacalai me vakavuna nodra vakatitiqa na dausokalou yalodina. E vinakati gona meda vakaduiduitaka na  ka dina mai na ka lasu. * E rawa nira vakayagataka na meca na Internet se na kena sala ni veikilai me vakaluluqataka noda nuitaki Jiova kei na noda lomani ira na tacida. Kua ni guilecava o cei e vakavuna tiko na itukutuku qori, mo kua gona ni rogoca!—1 Joni 4:1, 6; Vkta. 12:9.

12. Na cava meda vaqaqacotaka kina noda vakabauta na ka dina eda vulica?

¹² Meda vorata na sasaga i Setani, e vinakati meda vaqaqacotaka noda vakabauti Jisu da qai vakabauta dei na nona itavi ena inaki ni Kalou. Meda nuitaka tale ga na sala e dusimaka tiko kina o Jiova na nona isoqosoqo nikua. (Maciu 24:45-47) Eda vaqaqacotaka na noda vakabauta nida vulica wasoma na Vosa ni Kalou. Na noda vakabauta ena vaka na kau e ti sobu na wakana e loma ni qele. E tautauvata qori kei na ka e vola o Paula ena ivavakoso e Kolosa. E kaya: “Ni oni sa ciqomi Karisito Jisu na Turaga, moni muria tiko ga na nona veidusimaki, me ti sara na wakamuni, moni tarai cake vua, moni tudei ena vakabauta.” (Kolo. 2:6, 7) Ke da vaqaqacotaka na noda vakabauta, ena dredre vei Setani kei ira na nona ito mera tarova noda muria tiko ga na ka dina.—2 Joni 8, 9.

13. Na cava meda namaka? Na vuna?

¹³ Meda namaka ni na cati keda o vuravura. (1 Joni 3:13) E kaya o Joni ni “lewa tiko na vunica na vuravura taucoko.” (1 Joni 5:19) Ni sa voleka ni cava na vuravura ca qo, sa na qai cudru ga vakalevu o Setani. (Vkta. 12:12) E vakayagataka gona e levu na ilawaki qaseqase, me vaka na itovo vakasisila kei na nodra lasu na vukitani. Ena bukana tale ga na veivakacacani kaukaua. E kila o Setani ni sa lekaleka sara na nona gauna me tarova noda cakacaka vakavunau, me vakaluluqataka tale ga noda vakabauta. Sa rauta me vakadredretaki se vakatabui na noda cakacaka ena vica na vanua. Ia era yalodina tiko ga na tacida ena veivanua qori. Era vakadinadinataka ni rawa nida yalodina tiko ga se mani cava e cakava na vunica!

14. Na cava e dua na sala eda na vukei ira kina na tacida mera dei tiko ga ena dina?

¹⁴ Meda vukei ira na tacida mera dei tiko ga ena dina, e bibi meda vakaraitaka na yalololoma. (1 Joni 3:10, 11, 16-18) Meda kua ni veilomani ga ena gauna vinaka, meda veilomani tale ga ena gauna dredre. Kena ivakaraitaki, o kila e dua se qai takali ga na wekana voleka, me vakayaloqaqataki se vukei? Se rogoca nira vakaleqai eso na tacida ena leqa tubukoso, e vinakati me tara nodra vale kei na Vale ni Soqoni? Eda na vakaraitaka na levu ni noda lomani ira na tacida ena ka eda tukuna, vakabibi na ka eda cakava.

15. Me vaka e tukuni ena 1 Joni 4:7, 8, na cava meda cakava?

¹⁵ Eda vakatotomuria na Tamada vakalomalagi dauloloma nida veilomani. (Wilika 1 Joni 4:7, 8.) Dua na sala bibi eda vakaraitaka kina na loloma oya nida veivosoti. Kena ivakaraitaki, ena rairai vakararawataki keda e dua qai kere veivosoti. Eda na vakaraitaka na loloma nida vosoti koya qai guilecava na nona cala. (Kolo. 3:13) E sotava qori e dua na tacida tagane o Aldo, e dau doka vakalevu e dua na tacida ia e qai rogoca ni veibeci na ka e tukuna me baleti ira na kainona. E kaya: “Au masu wasoma vei Jiova me vukei au me donu  noqu rai me baleta na tacida qori.” Sega ni o koya ga qori. E kerea me rau veitomani ena cakacaka vakavunau. Ni rau cakacaka vata, e vakamacalataka o Aldo ni rarawataka na ka e tukuna. E kuria: “Ni rogoca na tacida na noqu rarawa, e kere veivosoti sara. Au kila sara ga mai na itautau ni nona vosa ni veivutunitaka na ka e tukuna. Ni keirau qai veitalatala, keirau sa veitokani vinaka tale.”

16-17. Na cava eda vakadeitaka meda cakava?

¹⁶ E dau lomani ira na tacina na yapositolo o Joni, e kauaitaka vakalevu na nodra bula vakayalo. E kilai qori ena ivakasala e vola ena tolu na nona ivola uqeti vakalou. E veiuqeti meda kila nira na veiliutaki kei Karisito na tagane kei na yalewa era vakataki koya!—1 Joni 2:27.

¹⁷ Meda muria mada ga na ivakasala eda sa veivosakitaka mai. Meda vakadeitaka meda muria tiko ga na ka dina, nida talairawarawa vei Jiova ena ka kece eda cakava. Vulica na nona Vosa qai nuitaka. Vaqaqacotaka na noda vakabauti Jisu. Cata na ivakavuvuli vakatamata kei na nodra ivakavuvuli na vukitani. Qarauna me kua ni rua na ivakarau ni noda bula, meda kua tale ga ni valavala ca. Muria na ivakatagedegede savasava i Jiova. Vukei ira na tacida mera yaloqaqa nida vosoti ira era vakararawataki keda da qai vukei ira na vakaleqai tu. Ena rawa gona nida muria tiko ga na ka dina se mani dredre vakacava na ituvaki.