Au a sucu ena 1954 e St. Paul, Minnesota, Merika. Erau sega ni vutuniyau se dravudravua sara na noqu itubutubu, keitou Katolika. Keitou le lima na gone, au ikarua ni qase. Au a vuli ena dua na koronivuli ni Katolika, au dau vukea na bete ena gauna ni Misa. Ia e sega ni levu na ka au kila mai na iVolatabu. Au vakabauta ni bula tiko na Kalou e bulia na ka kece, au sa sega ga ni vakabauta na lotu.

Ena imatai ni yabaki ni noqu vuli loya e William Mitchell College, era vunau yani i vale na iVakadinadina i Jiova. Au a savasava tiko, rau mani tukuna na veiwatini yalovinaka qori me rau lesu tale mai. Ni rau lesu mai, au sa vakarautaka tiko e rua na taro: “Na cava era vutuniyau ga kina vakalevu na tamata ca?”, “E rawati vakacava na marau?” Au mani taura sara na ivola Na ka Dina sa Basika ki na Bula Tawamudu kei na iVolatabu na Vakadewa ni Vuravura Vou, e drokadroka na waqana. Au vakadonuya tale ga meu vuli iVolatabu. Levu sara ga na  ka vou au vulica. Dua na ka noqu marau niu kila ni na liutaka na vuravura na Matanitu ni Kalou, qori e matanitu vinaka duadua. Au vakadinadinataka ni matewale na sasaga ni veiliutaki vakatamata. E kauta ga mai na rarawa, na veivakalolomataki kei na leqa.

Au yalataki au vei Jiova ena itekitekivu ni 1982 qai papitaiso ena icavacava ni yabaki qori ena soqo ni tikina na “Kingdom Truth.” E vakayacori ena Civic Center e St. Paul. Au lesu tale ina Civic Center ena macawa tarava meu lai veitarogi. Au qai kila ena Okotova niu pasi ena veitarogi, sa vakadonui tale ga meu loya.

Ena soqo ni tikina na “Kingdom Truth,” au sotavi Mike Richardson, e dua na lewenivuvale e Peceli e Brooklyn. E kaya ni sa tiko e dua na tabana e qarava na ka vakalawa ena itikotiko liu. Au nanuma sara na ka e tukuna na matanivanua ni Iciopea ena Cakacaka 8:36, au qai taroga, ‘Na cava e tarova tiko noqu kerekere meu lai veiqaravi ena tabana qori?’ Au mani vakalewe fomu meu veiqaravi e Peceli.

Rau rarawa na noqu itubutubu niu sa iVakadinadina i Jiova. E tarogi au o Ta se yaga vakacava ena noqu cakacaka vakaloya na veiqaravi ena Watchtower. Au vakamacalataka niu bolecakacaka ga. Au tukuna vua ni na soli tiko vei au e 75 na dola e veivula, na ilavo lailai era dau taura na lewenivuvale e Peceli.

Niu vakaotia vinaka na vo ni noqu cakacaka, au tekivu veiqaravi e Peceli e Brooklyn, Niu Yoka ena 1984. Au lesi sara ena tabana e qarava na ka vakalawa. E lako donu mai na itavi qori ena kena gauna.

Ena Noveba 1983, e voli kina na valenisarasara na Stanley Theater e Jersey City, New Jersey. Era kerea na tacida na ivolatara mera vakavinakataka na ka vakalivaliva kei na wai. Nira sota kei ira na vakailesilesi, era vakamacalataka na tacida nira via vakayagataka na vanua qori me dau caka kina na soqo ni tikina ni iVakadinadina i Jiova. Ia e tiko na kena leqa. E tukuni ena lawa ni taravale me tara ga na valenilotu ena vanua e tiko kina na itikotiko. Ia e tiko na Stanley Theater ena vanua ni bisinisi, era sega gona ni solia na vakailesilesi na ivolatara. Era saga na tacida me rogoci tale na nodra kerekere, mani sega ni vakadonui.

 Ena imatai ni macawa ni noqu veiqaravi e Peceli, e kauta na kisi qori na isoqosoqo ina mataveilewai me sagai me vakadonui tale na ivolatara. Me vaka ni se qai oti ga e rua na yabaki noqu cakacaka ena mataveilewai e St. Paul, Minnesota, au kila vinaka na mataqali kisi qori. E tukuna ena mataveilewai e dua na noda loya ni dau caka ena Stanley Theater e levu na soqo, me vaka na sara iyaloyalo kei na lagasere, na cava me qai vakatabui kina na soqo ni lotu? E dikeva vinaka na mataveilewai na kisi qori qai vakatulewataka ni beca o Jersey City na noda galala ni sokalou. E mani vakarota me solia na siti na ivolatara. Au tekivu raica na sala e tokona kina o Jiova na nona isoqosoqo ni vakayagataka na veika vakalawa me toso kina nona cakacaka. Dua na ka noqu marau niu bau vakaitavi kina.

Era tekivuna sara na tacida na cakacaka levu me vakavinakataki na valenisarasara. E qai vakayacori na nodra tuvaitutu na ika79 ni kalasi e Kiliati ena noda vanua ni soqo vou e Jersey City ena ika8 ni Seviteba 1985, ni bera ni dua na yabaki mai na tekivu ni cakacaka. Au marau ni bau tokona na cakacaka ni Matanitu ni Kalou ena tabana e qarava na ka vakalawa. Au marautaka sara vakalevu mai na noqu cakacaka vakaloya ni bera niu mai tekivu e Peceli. Au sega ni kila ena gauna qori ni na vakayagataki au o Jiova ena levu tale na kisi ni veilewai.

Ena veiyabaki ni 1980, era beca na vuniwai kei na valenibula, na nodra kerekere na iVakadinadina i Jiova era qase cake me kua ni soli vei ira na dra. E dredre sara vei ira na yalewa bukete nira nanuma na turaganilewa ni cala vakalawa nodra kerea me kua ni soli vei ira na dra. Era kaya ke sega ni soli na dra, e rawa ni mate o tina qai biu tu mai o gone.

Ena ika29 ni Tiseba 1988, e lako vakalevu na dra vei Sister Denise Nicoleau ni vakasucuma oti na luvena tagane. E vakavuna me lailai na nona dra, e mani tukuna o vuniwai me soli vua na dra. A sega ni vakadonuya o Sister Nicoleau. Ena mataka tarava, e kerea ina mataveilewai na valenibula me vakadonuya me ratou solia na dra. E qai vakadonuya o turaganilewa, e sega mada ga ni dua na kisi ni veilewai, se me bau tukuni vei Sister Nicoleau se o watina.

Ena Vakaraubuka na ika30 ni Tiseba, e soli vei Sister Nicoleau na dra, e sega mada ga ni vakadonuya o watina kei ratou nona vuvale eratou duri tu e yasana. Eratou  vesu ena bogi qori eso na lewe ni vuvale kei na dua se rua na qase ni ivavakoso ni ratou viribaiti Sister Nicoleau me kua ni soli vua na dra. Ena mataka ni Vakarauwai na ika31 ni Tiseba, sa kaburaki tu e Niu Yoka na itukutuku qori.

Ena mataka ni Moniti, au lai vosa vua na turaganilewa ni mataveilewai levu o Milton Mollen. Au vakamacalataka na ka e yaco ni a sainitaka e dua na turaganilewa me soli na dra ni sega mada ga ni rogoci na kena kisi. E kerea o turaganilewa Mollen meu lako yani ena yakavi me keirau veivosakitaka na kena itukutuku matailalai kei na lawa e vauci kina. E tomani au ena yakavi qori na noqu ovasia o Philip Brumley me keirau gole ena valenivolavola nei turaganilewa. E kerei koya na loya ni valenibula o Mollen me tiko tale ga ena veivosaki. E katakata toka na veivosaki qori. Ni caka tiko na bose, e vola mai ena dua na ivola o Brother Brumley meu tauri au vakamalua. E yaga sara ga na ivakasala qori ni vakaninivaki nona veiba tiko na loya ni valenibula.

Oti e rauta ni dua na aua, e kaya o Turaganilewa Mollen ni qori na imatai ni kisi me rogoci ena siga tarava. Ni keitou sa biubiu, e kaya o Mollen ni na via “tarabi toka” vua na loya ni valenibula “nimataka.” Kena ibalebale ni na ka ni sasaga toka me valataka nona kisi. Vaka ga e vakadeitaki au tiko o Jiova ni yavutaki vinaka na neitou kisi. Au qoroya na sala e vakayagataki keitou kina o Jiova me vakayacori na lomana.

Keitou cakacaka tale ena bogi qori me vakarautaki na ka me keitou tukuna ena siga tarava. E voleka tu ga e Peceli na valeniveilewai. E levu gona ena neitou tabana keimami taubale ga. Eratou rogoca na kisi qori e va na turaganilewa. Eratou vakatulewataka ni cala na kena vakadonui me soli na dra. E tokoni Sister Nicoleau na mataveilewai levu qai vakaraitaka ni beci na dodonu ni tamata yadua ni kerei na veivakadonui ni mataveilewai, se rogoci na kisi ni sega ni kila o koya e beitaki.

Sega ni dede e vakadeitaka na mataveilewai levu duadua e Niu Yoka, ni tiko na dodonu nei Sister Nicoleau me kua ni soli vua na dra. Qori na imatai ni kisi ni dra ena  mataveilewai levu au bau vakaitavi kina, e qai tolu tale ni toso na gauna. (Raica na kato “ Qaqa ena Mataveilewai Levu.”) Au bau tomana tale ga eso na loya ni Peceli ena kisi me baleta na dodonu ni susu gone, na veisere, na taukeni ni iyau, kei na ka e vauca na qele kei na tara vale.

Na yaca i watiqu o Dawn. Na imatai ni gauna au sotavi koya kina, sa tolu tiko na luvena, rau sa veisere tale ga kei watina. E cakacaka qai painia. E sotava e levu na ka dredre, ia au qoroya nona sasaga me qaravi Jiova. Ena 1992, keirau tiko ena soqo ni tikina e Niu Yoka, e kena usutu “Light Bearers,” au qai vosaki koya ena gauna qori. Keirau vakamau sara ena yabaki tarava. E isolisoli i Jiova vei au na yalewa qo, ni dauyalololoma, vakaliuci Jiova, e mamarau qai lasalasa. E caka vinaka tu ga vei au o Dawn ena gauna taucoko ni neirau bula.—Vkai. 31:12.

Ni keirau vakamau, eratou sa ka lelevu na gone, dua e yabaki 11, dua e 13, dua tale e 16. Au vinakata meu dua na tama vinaka. Au mani wilika vinaka qai muria na ka kece au raica ena ivola ni isoqosoqo me baleta na itubutubu vakacabecabe. E sega ni rawarawa ni toso na yabaki, ia au marau ni ratou sa okati au na gone meu nodratou itokani vinaka, meu tamadratou tale ga. Keirau vakadonuya mera dau gole mai na nodratou itokani, keirau dau marau nira tiko e vale e levu na gone.

Ena 2013, keirau toki vakaveiwatini i Wisconsin me keirau lai qaravi neirau itubutubu. Au kurabui ni rawa ni tomani tiko ga noqu veiqaravi e Peceli. E kerei meu dau veivuke vagauna ena tabana e qarava na veika vakalawa ni isoqosoqo.

Ena Seviteba 2018, au liaca ni vaka meu terema tiko vakalevu. E dikevi au e dua na vuniwai, ia e sega ni kila na vu ni leqa. E qai kaya e dua tale na vuniwai meu raica e dua na vuniwai ni nave. Ena Janueri 2019, e kaya vei au o vuniwai ni tauvi au tiko e dua na mataqali mate ni nave, ia e sega ni vakadeitaka.

Oti tale e tolu na siga, e ramusu na ligaqu niu vakatasisisi tiko ena ucacevata. Sa vakayabaki noqu dau vakatasisisi, e noqu qito qori. Au vakila gona ni sa malumu tiko ga mai noqu masela. Au kidroa ena kena tete totolo na mate qo, e vakaleqa sara ga na noqu vosa, veitosoyaki, kei na noqu tilo.

Dua na ka noqu marau niu bau yaga tu ena isoqosoqo i Jiova noqu kila vakaloya. Au marau talega ni bau vola eso na ivola mera wilika na vuniwai, loya kei na turaganilewa, meu vosa talega ena veiyasa i vuravura meu matataki ira na tamata i Jiova ena nodra dodonu me kua ni soli vei ira na dra ena veiqaravi vakavuniwai. Ia au duavata kei na ka e tukuni ena Luke 17:10: ‘Au dauveiqaravi tawayaga. Na ka au cakava e dodonu ga meu cakava.’