E tiko na ivakadinadina ni a Bete Levu o Jisu ena gauna e papitaiso kina ena 29 G.V. Eda kila vakacava? Na gauna e papitaiso kina o Jisu, e tu vakarau ni cabora na nona bula ena icabocabonisoro ivakatakarakara me cakava na “loma” ni Kalou. (Kala. 1:4; Iper. 10:5-10) Sa tu na icabocabonisoro ivakatakarakara mai na gauna e papitaiso kina o Jisu, kena ibalebale sa tiko tale ga na valenisoro levu vakayalo. Qori na ituvatuva ni sokalou savasava vei Jiova e yavutaki ena ivoli. Na icabocabonisoro e dua na tiki bibi ni valenisoro vakayalo.—Maciu 3:16, 17; Iper. 5:4-6.

Ni sa tiko na valenisoro levu vakayalo ena vinakati me veiqaravi kina na bete levu. E lumuti kina o Jisu ena “yalo tabu,” e soli tale ga vua na “kaukaua.” (Caka. 10:37, 38; Mari. 1:9-11) Ia eda vakadeitaka vakacava ni a lumuti o Jisu me Bete Levu ni bera ni mate kei na nona vakaturi? Eda vakadeitaka qori nida raica na ivakaraitaki i Eroni kei ira kece na bete levu era taravi koya ena Lawa e soli vei Mosese.

E vakaroti ena Lawa, na bete levu duadua ga e rawa ni curu ena Loqi Tabu Sara ena valeniveitavaki, dua na gauna e muri ena Loqi Tabu Sara ni valenisoro. E tiko e dua na ilatilati me wasea na rumu qori mai na Loqi Tabu. Ena lakosivita na ilatilati qori na bete levu ena Siga ni Veibuluti. (Iper. 9:1-3, 6, 7) Me vaka ga nona lumuti o Eroni kei ira na bete levu era taravi koya ni bera nira “lakosivia na ilati” ena valeniveitavaki, a rairai lumuti tale ga o Jisu me bete levu ni valenisoro levu vakayalo i Jiova ni bera ni mate, oti me qai “lakosivia na ilati,” ya na lewena me lai bula i lomalagi. (Iper. 10:20) Ya na vuna e kaya kina na yapositolo o Paula ni lako mai o Jisu “na bete levu” qai “curu sara ina valelaca levu e uasivi e sega ni tara ena liga,” ya “mai lomalagi.”—Iper. 9:11, 24.

E sega na duidui ni kena vakadeitaki na veiyalayalati vou kei na kena tauyavutaki. Na vuna? Ni lako cake i lomalagi o Jisu me cabora na yagona uasivi ena vukuda, e muria na ikalawa me vakadeitaki kina se vakalawataki na veiyalayalati vou. Na ikalawa vata ga qori e tauyavutaki kina na veiyalayalati. Na cava e okati ena ikalawa qori?

Kena imatai, e rairai vei Jiova o Jisu; oti e cabora vei Jiova na nona isoro talei; sa qai ciqoma o Jiova na yaga ni nona dra e vakadavei. Ena qai yaga ga na veiyalayalati ke muri na ikalawa qo.

E sega ni vakamatatataki ena iVolatabu na gauna e ciqoma kina o Jiova na isoro talei i Jisu. Eda sega ni rawa gona ni tukuna vakamatata e dua na gauna a vakadeitaki kina na veiyalayalati vou, me vakayagataki sara. Na ka ga eda kila ni a lako cake i lomalagi o Jisu ni vo e tini na siga me Penitiko. (Caka. 1:3) Ena loma ni gauna lekaleka qori, e cabora kina na nona isoro talei vei Jiova qai vakadonui sara. (Iper. 9:12) E laurai levu sara ga na kena ivakadinadina ena Penitiko. (Caka. 2:1-4, 32, 33) Tekivu sara ga ena gauna qori na veiyalayalati vou.

Vakalekaleka sara, e vakadeitaki qai tauyavutaki na veiyalayalati vou ni sa ciqoma oti o Jiova na dra talei i Jisu. E tekivu veiqaravi kina vakabete levu o Jisu me Dauveisorovaki.—Iper. 7:25; 8:1-3, 6; 9:13-15.