E vinakata sara ga o Jiova me rau marau na veiwatini, me dei nodrau vakawati rau qai veivolekati. (Maciu 19:4-6) Ke o via vakawati, o na kunea vakacava na kemu isa vinaka? Ni Dauveibuli o Jiova, e kila vinaka na sala me vinaka kina na veibuku kei na vakawati. Koya gona, ke o muria na ivakavuvuli e vakarautaka mai, o na marau kina. Meda veivosakitaka mada e vica na ivakavuvuli qori.

Kena imatai, meda kila tiko qo me baleti keda: “E dau veivakaisini duadua ga na loma ni tamata qai rerevaki.” (Jere. 17:9) Ni rau via vakawati e rua, rau sota rau tekivu veibuku, ena rawa ni kaukaua nodrau veitaleitaki. Ni yaco qori ena dredre me rau vakatulewa vakayalomatua. Ni rau yavutaka nodrau vakawati ena nodrau veitaleitaki, toso na gauna erau na rarawa kina. (Vkai. 28:26) Oya na vuna e sega ni ka vakayalomatua me rau cavuta na vosa ni veidomoni ni se qai tekivu ga nodrau veikilai, se rau yalataka eso na ka ni bera ni rau veikilai vinaka.

E kaya na Vosa Vakaibalebale 22:3: “O koya e yalomatua e raica na ca qai vunitaki koya, ia na yalowai e lako tu yani qai yacovi koya na leqa.” Na cava e rawa ni leqataki kina na website ni veibuku? Ka ni rarawa, eso era sota ena website, era tekivu veibuku, lakolako era qai liaca nira lawakitaki. Kena ikuri, o ira na daulawaki era bulia na akaude lasutaki mera lawakitaki ira kina na yalowai, ra qai butakoca na nodra ilavo. Eso na gauna era tukuna na daulawaki qori nira iVakadinadina i Jiova.

Vakasamataka e dua tale na leqa e rawa ni yaco. Eso na website ni veibuku era vakayagataka na porokaramu mera cakacakataka kina ke rawa ni rau veibuku e rua. Ia e sega na ivakadinadina ni nuitaki na iwalewale qori. E sega ni ka vakayalomatua meda nuitaka na porokaramu ni kompiuta e bulia ga na tamata, meda vakatulewataka kina e dua na ka bibi, ya na kena digitaki na keda isa vinaka. Ena sega tu ga ni nuitaki na porokaramu ni kompiuta ni vakatauvatani kei na ivakavuvuli vakaivolatabu—Vkai. 1:7; 3:5-7.

E kaya na ivakavuvuli ena Vosa Vakaibalebale 14:15: “Na tamata yalowai e vakabauta na vosa kece, ia o koya e yalomatua e  vakasamataka na nona ilakolako kece.” Ni bera ni o vakatulewataka mo vakawatitaka e dua, ena vinakati mo kilai koya vinaka. Ia ena dredre qori ke drau sota ena website. Kevaka mada ga o raica na kena itukutuku, e levu tale ga na gauna drau veivosaki kina ena website, vakacava o rawa ni kaya ni o kilai koya vinaka? Era nanuma eso nira sa kunea e dua era domona dina, ia era kidroataka na ka era qai kila ena gauna era sota kina.

E kaya na daunisame: “Au sega ni vakailala kei ira na dau veidabui, au yawaki ira tale ga na vunitaka na kedra roka dina.” (Same 26:4) E levu era dau lasutaka na kedra itukutuku ena website, me rawa nira taleitaki kina. Era vunitaka na kedra roka dina, se ra sega ni vakaraitaka ena gauna era vakau itukutuku tiko kina ena website. E bibi meda vakasamataka na isau ni vica na taro qo. Eso e rawa nira tukuna nira iVakadinadina i Jiova, ia vakacava era sa papitaiso? Era matua vakayalo? Vakacava era veivolekati kei Jiova? Era dokai ena nodra ivavakoso? Se ra ivakaraitaki ca, se “ilala ca”? (1 Kor. 15:33; 2 Tim. 2:20, 21) Vakacava era sa galala mera vakawati tale me salavata kei na ivakavuvuli vakaivolatabu? E bibi mo kila na kedra isau, ia ena dredre ke o sega ni veivosaki kei na so tale na tacida era kilai koya vinaka. (Vkai. 15:22) E macala gona ni o koya e yalodina vei Jiova, ena sega sara ga ni vakasamataka me “vauci vata” kei na dua e sega ni vakabauta.—2 Kor. 6:14; 1 Kor. 7:39.

Ni leqataki na website ni veibuku, e tiko eso tale na sala vinaka mo vaqara kina e dua mo drau veikilai vinaka ena rawa ni watimu vinaka. O na raica e vei e dua me watimu vinaka? Ke vakatarai na sosoqoni vata, era na rawa ni veikilai na iVakadinadina i Jiova nira tiko ena soqoni ni ivavakoso, soqo ni tabacakacaka, soqo ni veiwasewase, kei na so tale na soqo.

Ke sega ni rawa nida sosoqoni vata, me kena ivakaraitaki ena vuku ni matedewa na COVID-19, eda vakayagataka na iyaya vakalivaliva meda tiko kina ena soqoni. Qori na vanua eda rawa ni kila kina eso tale na iVakadinadina i Jiova era sega tu ni vakawati. O rawa ni rogoca nira vakaitavi ena soqoni, era vakamacalataka tale ga na nodra vakabauta. (1 Tim. 6:11, 12) Oni rawa tale ga ni veivosaki ena rumu lalai (breakout room) ni oti na soqoni. Ni o sosoqoni vata kei na so tale na mataveitacini ena vidio, o rawa ni raici koya o taleitaka ni veimaliwai kei na so tale, o na kila kina na nona itovo. (1 Pita 3:4) Toso na gauna ni drau sa veikilai vinaka, o rawa ni vakadeitaka ke tautauvata na nomudrau isausau kei na ka drau vakabibitaka, ena rawa tale ga ni drau isa ni vakawati vinaka se sega.

Nira muria vinaka na dawai na ivakavuvuli vakaivolatabu nira qara e dua me watidra, ena rawa ni marautaki na nodra bula vakawati. E kaya na Vosa Vakaibalebale: “O koya e kunea na yalewa [se tagane] vinaka me watina, e kunea na ka vinaka, e lomani koya o Jiova.”—Vkai. 18:22.