1. Na cava na loma i Jiova nikua?

 E LOMA ni Kalou me vunautaki na itukutuku vinaka ni Matanitu ni Kalou e vuravura taucoko. (Mari. 13:10; 1 Tim. 2:3, 4) Qori na cakacaka i Jiova, na kena bibi e digitaki Luvena lomani kina me liutaka. Eda nuidei ena vuku ni veidusimaki i Jisu, ena vakaoti kina na cakacaka vakavunau me vaka e vinakata o Jiova ni bera na icavacava.—Maciu 24:14.

2. Na cava eda na vulica ena ulutaga qo?

² Eda na vulica ena ulutaga qo ni vakayagataka tiko o Jisu na nona “dauveiqaravi yalodina e vuku” me vakarautaka na kakana vakayalo, me tuvanaki ira tale ga na nona imuri ena dua na cakacaka vakavunau levu duadua me bau vakayacori. (Maciu 24:45) Kena ikuri, eda na raica na veika eda rawa ni cakava meda tokoni Jisu kina kei na dauveiqaravi yalodina.

3. Na lewa cava e soli vei Jisu?

³ E liutaka tiko na cakacaka vakavunau o Jisu. Eda vakadeitaka vakacava qori? Ni bera toka ga ni lesu i lomalagi, a sotavi ira e vica na nona imuri yalodina ena dua na ulunivanua e Kalili. E tukuna vei ira: “Sa soli vei au na lewa kece mai lomalagi kei vuravura.” Dikeva tale mada na ka e tukuna tarava: “O koya gona, ni lako moni vakavulici ira na lewe ni veivanua kece ga mera tisaipeli.” (Maciu 28:18, 19) Me ikuri ni veika e lesi vei Jisu, e soli tale ga vua na lewa me liutaka na cakacaka vakavunau.

4. Eda vakadeitaka vakacava ni se dusimaka tiko ga o Jisu na cakacaka vakavunau?

 ⁴ E tukuna o Jisu ni na vakayacori na vunau kei na veivakatisaipelitaki e “veivanua kece,” ena tiko tale ga kei ira na nona imuri “ena veisiga kece me yacova na ivakataotioti ni veika vakavuravura.” (Maciu 28:20) Na veika e tukuna qori e dusia sara ga vakamatata ni na vakayacori tiko na cakacaka vakavunau ena veidusimaki i Jisu me yacova mai noda gauna.

5. Eda veivuke tiko vakacava ena kena vakayacori na Same 110:3?

⁵ E sega ni leqataka o Jisu ke lailai na tamata cakacaka ena ivakataotioti ni veika vakavuravura. E kila ni na vakayacori na vosa ni parofisai ni daunisame: “Era na yalorawarawa ni cabori ira na nomuni tamata ena siga ni nomuni mataivalu.” (Same 110:3) Ke o vakaitavi tiko ena cakacaka vakavunau, o sa tokoni Jisu sara tiko ga kei na dauveiqaravi yalodina me vakayacori na parofisai qori. E toso tiko ga na cakacaka, ia e levu tale ga na veika dredre.

6. Na ka dredre cava era sotava nikua na dau vunautaka na Matanitu ni Kalou?

⁶ Dua na ka dredre era sotava na dau vunautaka na Matanitu ni Kalou, ya na veitusaqati. E veivakacalai na ka era tukuna na vukitani, iliuliu ni lotu kei ira na daunipolitiki me baleta noda cakacaka. Ke ra vakacalai na wekada, noda veikilai, kei ira eda cakacaka vata ena itukutuku qori, era rawa sara ga ni tusaqati keda meda kua ni qaravi Jiova, meda kua tale ga ni vunau. Ena so na vanua era tusaqati nira vakarerei, vakayacori vei ira na itovo voravora, era vesu, se curu sara e valeniveivesu. Eda sega ni kidroataka qori. E parofisaitaka o Jisu: “Era na cati kemudou na veimatanitu ena vuku ni yacaqu.” (Maciu 24:9) Nida kila nida cati sara tiko ga, e vakaraitaka ni vakadonui keda o Jiova. (Maciu 5:11, 12) E tokona sara tiko ga na Tevoro na veitusaqati. Ia e sega vakadua ni kaukaua vei Jisu! Ena veitokoni sara ga i Jisu era rogoca kina na itukutuku vinaka e levu e vuravura raraba. Vakasamataka mada na ivakadinadina qo.

7. Na ivakadinadina cava o raica ni sa vakayacori tiko me baleta na Vakatakila 14:6, 7?

⁷ Nida vunautaka na Matanitu ni Kalou, e dredre toka ni duidui na noda vosa. Ena ka e vakatakila o Jisu vua na yapositolo o Joni, e tukuna ni na wali na leqa qori nikua ena itukutuku vinaka. (Wilika Vakatakila 14:6, 7.) Ena sala cava? Eda tukuna tiko vei ira e levu mera kauaitaka na itukutuku ni Matanitu ni Kalou. Nikua, era sa rawa ni wilika na lewe i vuravura na ivola vakaivolatabu ena noda website na jw.org ni sa vakadewataki tu ena sivia na 1,000 na vosa! A vakadonui me vakadewataki na ivola Marau me Tawamudu! ena sivia na 700 na vosa meda vakayagataka sara ga ena veivakatisaipelitaki! Sa vakarautaki tale tu ga na kakana vakayalo ena vidio me baleti ira na galu kei na nodra ivola na mataboko (braille). Eda sa raica sara tiko ga kina na kena vakayacori na parofisai vakaivolatabu. O ira na “duivosavosa mai na veivanua kece” era sa vulica tiko na “vosa savasava” ni ka dina ena iVolatabu. (Saka. 8:23; Sefa. 3:9) E rawati ga na ka kece qori ena nona veiliutaki maqosa o Jisu Karisito.

8. Na cava na yaga ni noda cakacaka vakavunau me yacova mai qo?

⁸ Nikua, e sivia ni walu na milioni mai na 240 na vanua era lewe tiko ni isoqosoqo i Jiova, ra qai papitaiso e veiyabaki e vica  vata na udolu! Ia e bibi sara mai na iwiliwili qori na itovo vakayalo, ya “na itovo vou” era vakaraitaka tiko na tisaipeli vou qo. (Kolo. 3:8-10) Levu era biuta na itovo vakasisila, voravora, veivakaduiduitaki kei na boletaki vanua. Sa vakayacori sara tiko ga na parofisai ena Aisea 2:4, nira “sega ni vulica tale na ivalu.” Nida gumatua ni vakaraitaka na itovo vou, eda sa veivuke tiko ena nodra vagolei mai e levu ina isoqosoqo ni Kalou, eda vakaraitaka tale ga nida muria tiko na noda iliuliu o Jisu Karisito. (Joni 13:35; 1 Pita 2:12) Ia e sega ni yaco tu ga vakasauri qori. E vukei keda sara tiko ga o Jisu.

9. Na cava e parofisaitaki ena Maciu 24:45-47, me baleta na gauna ni icavacava?

⁹ Wilika Maciu 24:45-47. E parofisaitaka o Jisu ni na lesia e dua na “dauveiqaravi yalodina e vuku” ena gauna ni icavacava me vakarautaka na kakana vakayalo. Meda namaka gona me cakacaka vakaukaua na dauveiqaravi qori ena noda gauna. Qori sara ga na ka e cakava tiko. E vakayagataka na noda iliuliu e dua na ilawalawa lailai lumuti me vakarautaka na “kakana [vakayalo] ena kena gauna donu” vei ira na tamata ni Kalou kei ira na tataleitaki. Era sega ni nanuma na tagane qori nira lewa na nodra vakabauta eso tale. (2 Kor. 1:24) Era kila ni o Jisu Karisito e “nodra iliuliu kei na nodra turaga” na nona tamata.—Aisea 55:4.

10. Na ivola cava ena iyaloyalo e vakadeitaka vei iko mo muria na sala ina bula tawamudu?

¹⁰ Me tekivu mai na 1919, sa vakarautaka na dauveiqaravi yalodina e levu na ivola era kania kina na kakana vakayalo bulabula na tataleitaki ena imatai ni gauna. Ena 1921, e vakarautaka na dauveiqaravi na ivola The Harp of God mera  vulica kina na tataleitaki eso na ivakavuvuli rawarawa vakaivolatabu. Ni toso na gauna, e vakarautaki eso tale na ivola. Na ivola cava o vulica kina mo kila na Tamada vakalomalagi, mo lomani koya tale ga? O a vuli ena ivola “Let God Be True,” Na Ka Dina sa Basika ki na Bula Tawamudu, Ko na Rawa ni Bula Tawamudu ena Vuravura Parataisi, Ka Mo Kila Mo Bula Tawamudu Kina, Na Cava Mada e Kaya na iVolatabu?, Na Cava Eda na Vulica ena iVolatabu?, se noda ivola vou na Marau me Tawamudu!? E yaga dina ena veivakatisaipelitaki na ivola kece qori ena gauna e sevutaki kina.

11. Na cava e bibi kina meda kania na kakana vakayalo?

¹¹ Sega ni o ira ga na tataleitaki vou era vinakata tu na kakana dina vakayalo. O keda kece. E vola na yapositolo o Paula: “Na kakana dina e rauti ira na matua.” E kaya tale ga o Paula ni noda muria na ka eda vulica ena iVolatabu ena rawa kina meda “vakaduiduitaka na ka e donu mai na ka e cala.” (Iper. 5:14) Ena gauna dredre qo sa torosobu tu kina na itovo, ena sega ni rawarawa meda muria na ivakatagedegede i Jiova. Ia e raica o Jisu meda vakaukauataki ena kakana bulabula vakayalo. E ivurevure ni kakana qori na Vosa uqeti ni Kalou na iVolatabu. E vakarautaka na dauveiqaravi na kakana qori, e veisoliyaka tale ga ena veidusimaki i Jisu.

12. Me vakataki Jisu, eda vakabibitaka vakacava na yaca ni Kalou?

¹² Me vakataki Jisu, eda vakabibitaka sara ga na yaca ni Kalou ni dodonu ga me caka qori. (Joni 17:6, 26) Me kena ivakaraitaki, ena 1931 eda tekivu vakayagataka kina na yaca vakaivolatabu iVakadinadina i Jiova, eda vinakata sara ga meda vakatokayacataki vua na Tamada vakalomalagi. (Aisea 43:10-12) Me tekivu  tale ga mai na Okotova ni yabaki qori, sa biu na yaca ni Kalou ena tabana e liu ni mekesini na Vale ni Vakatawa. Me kena ikuri e vakalesuya mai na New World Translation of the Holy Scriptures na yaca ni Kalou ena kena vanua donu. E veibasai dina kei na ka era cakava na lotu ni Veivanua vaKarisito nira bokoca na yaca i Jiova ena levu na vakadewa ni nodra iVolatabu!

13. O vakadeitaka vakacava ni o Jisu e vakayagataka tiko “na dauveiqaravi yalodina e vuku” nikua? (Joni 6:68)

¹³ E vakayagataka o Jisu “na dauveiqaravi yalodina e vuku” me tauyavutaka kina e dua na isoqosoqo e vuravura me tokona na sokalou savasava. Na cava nomu rai me baleta na isoqosoqo qori? De dua o na sauma ni o vakasamataka tiko nona vosa na yapositolo o Pita, ni kaya vei Jisu: “Me keitou qai lako tale vei cei? Na nomuni vosa ga e vosa ni bula tawamudu.” (Joni 6:68) Eda na tu e vei nikua ke da sega ni kila na isoqosoqo i Jiova? E vakayagataka tiko na isoqosoqo qori o Jisu meda vakani kina vakavinaka vakayalo. E vakayagataka tale ga me vakavulici keda meda vakayacora vinaka noda cakacaka vakaitalatala. Kena ikuri, e vukei keda meda tokara “na tamata vou” meda vakamarautaki Jiova.—Efeso 4:24.

14. E yaga vakacava nomu lewena na isoqosoqo i Jiova donuya na veidewavi ni matedewa na COVID-19?

¹⁴ E dau vakarautaka o Jisu na veidusimaki vuku ena gauna ni leqa. Na yaga ni veidusimaki qori e laurai votu donuya na gauna e veidewavi kina na matedewa qo na COVID-19. Nira veilecayaki e levu e vuravura, e raica o Jisu meda dusimaki  vakamatata ena ka meda cakava meda taqomaki kina. Eda uqeti meda vakaiubi ni mata nida veitosoyaki tiko ena veivanua, meda veiyawaki tale ga. Era vakadreti na qase ni ivavakoso mera veivosaki vakalevu kei ira na lewe ni ivavakoso mera kila tiko na kedra ituvaki vakayago, vakayalo tale ga. (Aisea 32:1, 2) Kena ikuri, eda rogoca eso tale na veidusimaki ena irogo ni iLawalawa Dauvakatulewa, eda vakayaloqaqataki tale ga kina.

15. Na cava eda dusimaki kina me baleta na soqoni kei na cakacaka vakavunau ni veidewavi tiko na matedewa? Cava e laurai?

¹⁵ Donuya na veidewavi ni matedewa qori, eda dusimaki vakamatata ena sala me vakayacori kina na soqoni kei na cakacaka vakavunau. E totolo ga nida tekivu tiko ena soqoni vaKarisito, soqo ni tabacakacaka, kei na soqo ni veiwasewase nida sarava ena vidio kei na noda vakayagataka na Internet. Eda tekivu vunau tale ga nida volavola se qiri. E vakalougatataka o Jiova na noda sasaga. Levu na valenivolavola ni tabana era volatukutukutaka na tubu ni dautukutuku. E levu tale ga na irogo veiuqeti ena gauna eda bula donuya tu qo.—Raica na kato “ Vakalougatataka o Jiova Noda Vunau.”

16. Na cava eda rawa ni vakadeitaka?

¹⁶ Era na rairai nanuma eso ni sa sivia tale na qaqarauni ni isoqosoqo ni veidewavi tiko na matedewa. Ia e qai laurai ni yaga sara ga vakalevu na veidusimaki qori. (Maciu 11:19) Nida vakasamataka vakatitobu na nona liutaki ira tiko vakayalololoma na nona tamata o Jisu, eda vakadeitaka se mani cava ena yaco nimataka, erau na tokoni keda tiko ga o Jiova kei na Luvena lomani o Jisu.—Wilika Iperiu 13:5, 6.

17. Na cava nomu rai ni o cakacaka tiko ena veidusimaki i Jisu?

¹⁷ Eda kalougata nida cakacaka tiko ena veidusimaki i Jisu! Eda lewe ni dua na isoqosoqo e sega ni wasei keda na duidui itovo vakavanua, matanitu se vosa. Eda vakarautaki vakavinaka vakayalo meda vakaitavi ena cakacaka vakavunau. Eda vukei tale ga meda vakaraitaka na itovo vou, kei na noda vulica meda dau veilomani. E tiko gona na vuna vinaka meda sakitaka kina ni noda iliuliu o Jisu!