1. Meda raica vakacava noda rawa ni masu vei Jiova?

 E DUA na isolisoli talei e solia vei keda na Dauveibuli ni lomalagi kei na vuravura, oya meda masu vua. Vakasamataka mada: Eda rawa ni talaucaka na lomada vei Jiova ena dua ga na gauna, kei na vosa cava ga. Sega ni vinakati me tuvanaki na gauna meda masu kina. Eda rawa ni masu vua ena idavodavo ni tauvimate e valenibula, se valeniveivesu, eda nuidei ni na rogoci keda na Tamada dauloloma. Eda na sega ni vakawalena na isolisoli talei qo.

2. E vakaraitaka vakacava o Tui Tevita ni mareqeta na isolisoli ni masu?

² E vakamareqeta o Tui Tevita na isolisoli ni masu. E lagata vei Jiova: “Na noqu masu me vaka na ka boivinaka dau vakamai e matamuni.” (Same 141:1, 2) Ena gauna i Tevita, e vakarautaki sara vakavinaka na ka boivinaka tabu era dau vakayagataka na bete ena sokalou savasava. (Lako 30:34, 35) Na nona cavuta o Tevita na ka boivinaka e dusia ni vinakata me vakasamataka vinaka na ka me tukuna vua na Tamana vakalomalagi. Qori tale ga na ka eda vinakata, me taleitaka o Jiova na noda masu.

3. Me vakacava noda ivakarau nida masu vei Jiova? Na vuna?

³ Nida masu vei Jiova, meda kua ni veibeci. Nida masu meda vakaraitaka nida dokai koya vakalevu. Vakasamataka mada na raivotu vakatubuqoroqoro i Aisea, Isikeli, Taniela, kei Joni. E duidui kece na raivotu qori, ia e dua na ka era tautauvata kina. Era vakamacalataka kece ni o Jiova e Tui cecere. O Aisea e “raici Jiova ni dabe tiko ena  idabedabe vakaturaga cecere.” (Aisea 6:1-3) O Isikeli e raici Jiova ni dabe tiko ena nona qiqi vakaturaga qai ‘ramase me vaka na drodrolagi.’ (Isik. 1:26-28) O Taniela e raici “Koya e Dede sara na nona bula,” e vulavula nona isulu qai caudre tiko na yameyame ni bukawaqa mai nona idabedabe vakaturaga. (Tani. 7:9, 10) O Joni e raici Jiova ni dabe tiko ena idabedabe vakaturaga qai wavokita tu na drodrolagi e vaka na emeralita na kena irairai. (Vkta. 4:2-4) Nida vakasamataka na lagilagi i Jiova, eda vakavinavinakataka vakalevu na noda rawa ni masu vua kei na bibi ni noda veidokai. Ia eda na masu vakacava vua?

4. Na cava eda vulica ena itekitekivu ni masu ni turaga ena Maciu 6:9, 10?

⁴ Wilika Maciu 6:9, 10. Ena Vunau ena Ulunivanua, e vakavulici ira nona tisaipeli o Jisu ena ivakarau ni masu e taleitaka na Kalou. Ni cavuta oti o Jisu “mo dou masu gona va qo,” e cavuta e liu na veika bibi me baleta na inaki i Jiova: ya me vakarokorokotaki na yacana; me yaco mai na nona Matanitu, ena vakarusai ira kece na saqata na Kalou; kei na veivakalougatataki se bera mai me baleta na vuravura kei na kawatamata. Nida okata na ka kece qori ena noda masu, eda vakaraitaka ni bibi vei keda na inaki ni Kalou.

5. E veiganiti meda masulaka na veika me baleti keda?

⁵ E vakaraitaka tarava o Jisu ni veiganiti meda masulaka na veika me baleti keda. Eda rawa ni kerei Jiova me solia na keda kakana ena dua na siga, me vosota na noda ivalavala ca, me taqomaki keda mai na veitemaki, me vakabulai keda tale ga mai vua na vunica. (Maciu 6:11-13) Nida kerea qori vei Jiova, eda vakaraitaka nida nuitaki koya, eda via vakamarautaki koya tale ga.

6. Vakacava meda masulaka ga na ka e cavuti ena masu ni Turaga? Vakamacalataka.

⁶ E sega ni namaka o Jisu mera muria voleka na nona imuri na ka e cavuti ena masu ni Turaga. Eso tale na masu e  cabora o Jisu, e cavuta kina na veika e kauaitaka vakabibi ena gauna ya. (Maciu 26:39, 42; Joni 17:1-26) Na cava eda vulica kina? Eda rawa tale ga ni masulaka na ka eda lomaleqataka. Nida vakatulewa, meda kerea na vuku kei na yalomatua ena noda masu. (Same 119:33, 34) Nida vakarau qarava e dua na itavi dredre, meda kerea tale ga na vuku kei na yalomatua. (Vkai. 2:6) O ira na itubutubu mera masulaki luvedra, o ira na gone mera masulaki ira na nodra itubutubu, o keda kece meda masulaki ira noda vuli iVolatabu kei ira eda vunau kina. Ia nida masu meda kua ni kerekere tiko ga.

7. Na cava meda vakacaucautaki Jiova kina ena masu?

⁷ Meda kua ni guilecava meda vakacaucautaki Jiova ena noda masu. O koya duadua ga meda vakacaucautaka vakalevu. Na vuna? E “vinaka qai tu vakarau [me] veivosoti.” Kena ikuri, e “dauyalololoma qai dauveinanumi, berabera ni cudru qai vuabale ena loloma e dei kei na yalodina.” (Same 86:5, 15) Eda vakacaucautaki Jiova ena vuku ni nona itovo kei na ka e cakava.

8. Na cava eso na ka meda vakavinavinakataki Jiova kina? (Same 104:12-15, 24)

⁸ Me ikuri ni noda vakacaucautaki Jiova ena masu, meda vakavinavinakataka tale ga na veika totoka e vakarautaka. Me kena ivakaraitaki, eda vakavinavinakataki koya ena totoka ni roka ni senikau, na veimataqali kakana kana vinaka, kei na noda marautaka na veimaliwai kei ira noda itokani voleka. E vakarautaka vei keda na Tamada dauloloma na ka qo kei na levu tale meda marau kina. (Wilika Same 104:12-15, 24.) Koya e bibi sara, eda vakavinavinakataki Jiova ena levu ni kakana vakayalo e vakarautaka mai kei na inuinui totoka me baleta na veigauna se bera mai.

9. Na cava mo cakava mo kua kina ni guilecava mo vakavinavinakataki Jiova? (1 Cesalonaika 5:17, 18)

⁹ E rawarawa sara nida guilecava meda vakavinavinakataki Jiova ena ka kece e  cakava ena vukuda. Na cava mo cakava mo nanuma tiko kina? O rawa sara ga ni vola eso na ka o masulaka, oti dikeva tale mo raica na sala e sauma kina o Jiova nomu masu. Oti masu sara mo vakavinavinakataka nona veivuke. (Wilika 1 Cesalonaika 5:17, 18.) Vakasamataka mada qo: Eda marau nira vakavinavinakataki keda eso tale, eda taleitaka. Ena marau tale ga o Jiova nida nanuma meda vakavinavinakataki koya ni sauma noda masu. (Kolo. 3:15) Na cava e dua tale na vuna bibi meda vakavinavinakataka kina na noda Kalou?

10. Me vaka e tukuni ena 1 Pita 2:21, na cava meda vakavinavinakataki Jiova kina ni talai Jisu mai vuravura?

¹⁰ Wilika 1 Pita 2:21. Eda vakavinavinakataki Jiova ni tala mai na Luvena lomani me vakavulici keda. Nida vulica na bula i Jisu, e levu sara na ka eda kila kina me baleti Jiova kei na sala meda vakamarautaki koya kina. Ke da vakaraitaka noda vakabauta na isoro i Karisito, eda na veitokani voleka kei na Kalou o Jiova, eda na veiyaloni tale ga kei koya.—Roma 5:1.

11. Na cava eda masu kina ena yaca i Jisu?

¹¹ Eda vakavinavinakataki Jiova nida masu vua ena vuku i Luvena. O Jiova e vakayagataki Jisu me solia vei keda na ka eda kerea. E rogoca o Jiova na masu e cabori ena yaca i Jisu, e sauma tale ga. E kaya o Jisu: “Na ka kece . . . dou kerea ena yacaqu, au na cakava, me vakalagilagi kina na Tamaqu ena vuku i Luvena.”—Joni 14:13, 14.

12. Na cava e dua tale na vuna meda vakavinavinakataki Jiova kina ena vuku i Luvena?

¹² E vosota o Jiova noda ivalavala ca ena yavu ni isoro ni veivoli i Jisu. E tukuna na iVolatabu ni o Jisu e “noda bete levu, e sa dabe ena ligaimatau ni idabedabe vakaturaga i koya e Cecere mai lomalagi.” (Iper. 8:1) E “tiko vata kei Tamada e dua na noda dauveivuke,” ya o Jisu. (1 Joni 2:1) Eda vakavinavinakataka vakalevu vei Jiova ni vakarautaka mai e dua na Bete Levu e dauveinanumi e kila vinaka na noda malumalumu, e “vakamamasu tale ga ena vukuda.” (Roma 8:34; Iper. 4:15) Eda kawa ivalavala ca, ke sega gona na isoro i Jisu ena dredre meda torovi Jiova ena masu. Eda duavata kece nida na sega ni dolea rawa na iloloma e solia vei keda o Jiova, ya na Luvena lomani!

13. Ena bogi ni bera ni mate o Jisu, e lomani ratou vakacava na nona tisaipeli?

¹³ Ena bogi ni bera ni mate o Jisu, e balavu nona masulaki ratou na nona tisaipeli, e kerei Tamana me “taqomaki ratou tiko ena vuku i koya na vunica.” (Joni 17:15) E vakaraitaka qori na levu ni nona lomani ratou! E kila ni sa vakarau vakararawataki vakalevu, ia se kauaitaki ratou tiko ga na nona yapositolo.

14. Eda na vakaraitaka vakacava nida lomani ira na mataveitacini?

¹⁴ Eda na vakatotomuri Jisu nida sega ni kauaitaka ga na veika me baleti keda. Ia eda na masulaki ira vakawasoma na mataveitacini. Nida cakava qori, eda sa talairawarawa tiko ena ivakaro i Jisu meda veilomani, eda vakaraitaka  tale ga vei Jiova na levu ni noda lomani ira na tacida vakayalo. (Joni 13:34) Ena yaga dina noda masulaki ira, e sega ni vakalusi gauna. E kaya na Vosa ni Kalou ni nona ‘vakamamasu na tamata yalododonu ena yaga vakalevu.’—Jeme. 5:16.

15. Na cava meda masulaki ira kina na mataveitacini?

¹⁵ E yaga vakalevu noda masulaki ira na mataveitacini nira sotava tiko e levu na ituvaki dredre. Meda kerei Jiova me vukei ira mera vosota na tauvimate, na leqa tubukoso, na ivalu, na veitusaqati, se so tale na ituvaki dredre. Meda masulaki ira tale ga na mataveitacini era vakaitavi ena nodra vukei na leqa tu. O na rairai kila eso era sotava tiko na ituvaki dredre va qori. Mo cavuta sara ga na yacadra ena nomu masu. Eda vakaraitaka nida lomani ira dina na mataveitacini nida kerei Jiova me vukei ira mera vosota.

16. Na cava meda masulaki ira kina na liutaka tiko na cakacaka?

¹⁶ Era vakavinavinakataka vakalevu o ira na liutaka tiko na cakacaka noda masulaki ira, e yaga dina. E vakadinadinataka qori na yapositolo o Paula. E vola: “Moni masulaki yau tale ga, me soli kina vei au na vosa ena gauna au dolava kina na gusuqu, meu rawa ni vosa doudou, meu vakatakila na ka vuni tabu ni itukutuku vinaka.” (Efeso 6:19) Nikua e levu tale ga na tacida tagane gugumatua era liutaka tiko na cakacaka. Eda vakaraitaka noda lomani ira nida kerei Jiova me vakalougatataka na nodra veiqaravi.

17-18. Na gauna cava eda na kerei kina meda masu ena vukudra eso tale? Cava meda nanuma tiko?

¹⁷ Eso na gauna, ena tukuni mo masu ena vukudra eso tale. Kena ivakaraitaki, na tacida yalewa e caka vuli iVolatabu ena rairai kerea na tacida yalewa e veitomani me masu. Na tacida yalewa qori ena rairai sega ni kilai gonevuli vinaka, de dua ena via masu ni cava na vuli. Ena sala qori ena rawa kina ni kila na ka me masulaka me baleti gonevuli.

 ¹⁸ Ena rairai kerei e dua na tacida tagane me masu ena sota ni cakacaka vakavunau se soqoni ni ivavakoso. Mera nanuma tiko o ira na lesi ena itavi qo na inaki ni soqoni. Na masu e sega ni gauna me vakasalataki kina na ivavakoso se me vakarogoi kina eso na itukutuku. Levu na soqoni ni ivavakoso e lokuci e lima na miniti ena sere kei na masu, na tacida gona e lesi me kua ni ‘balavu na nona masu’ vakabibi ni tekivu na soqoni.—Maciu 6:7.

19. Na cava meda cakava meda vakarau tu kina ena siga ni veilewai i Jiova?

¹⁹ E vinakati sara ga meda dau vakabibitaka ena noda bula na masu, vakauasivi ni sa voleka mai na siga ni veilewai i Jiova. E tukuna kina o Jisu: “O koya gona, mo dou yadra tiko, dou masu tiko ga mo dou drovaka kina na ka kece ena yaco.” (Luke 21:36) Io, ke da masu vakawasoma, eda na yadra tiko kina vakayalo qai vakarau tu ena siga ni veilewai ni Kalou.

20. Ena rawa vakacava ni boi kamica na noda masu me vaka na ka boi kamica?

²⁰ Na cava eda sa veivosakitaka mai? Eda mareqeta vakalevu na isolisoli talei ni masu. Na ka bibi meda masulaka oya na veika e vauca na inaki i Jiova. Eda vakavinavinakataka na Luve ni Kalou kei na nona veiliutaki, eda masulaki ira tale ga na mataveitacini. Kena ikuri, eda masulaka na veika vakayago meda bula kina kei na veika vakayalo. Nida vakasamataka vinaka na veika meda tukuna ena noda masu, eda vakaraitaka nida mareqeta na isolisoli talei qo. Ena boi kamica vei Jiova na noda masu me vaka na ka boivinaka, ena “taleitaka o koya.”—Vkai. 15:8.