1. Na cava e ka vakayalomatua kina meda vakavakarau ina leqa tubukoso?

 EDA rawa ni bula nida vakavakarau. Kena ivakaraitaki ni yaco na leqa tubukoso, rawa nira bula o ira na vakavakarau vinaka, rawa tale ga nira vukea eso. E kaya e dua na isoqosoqo e dau vukei ira na lewenivanua mai Urope: “E yaga vakalevu na vakavakarau vinaka.”

2. Na cava meda vakavakarau kina ena veivakararawataki levu? (Maciu 24:44)

² Ena yaco vakasauri na “veivakararawataki levu.” (Maciu 24:21) Ia e sega ni vaka na leqa tubukoso tale eso na veivakararawataki levu, nida kila ni sa vakarau yaco mai. Rauta na 2,000 na yabaki sa oti, e vakasalataki ira na nona imuri o Jisu mera vakarautaki ira tu ena siga qori. (Wilika Maciu 24:44.) Ke da vakavakarau, ena rawarawa meda vosota na gauna dredre qori qai vukea eso tale mera vosota.—Luke 21:36.

3. Ena yaga vakacava na vosota, veikauaitaki dina, kei na loloma nida vakavakarau ena veivakararawataki levu?

³ Dikeva mada e tolu na itovo ena yaga ena noda vakavakarau ena veivakararawataki levu. Na cava eda na cakava ke tukuni meda kacivaka na itukutuku warumisa ni veilewai da qai tusaqati kina? (Vkta. 16:21) Ena vinakati na vosota meda talairawarawa vei Jiova nida nuitaka nona veitaqomaki. Na cava eda na cakava ke vakacacani eso na ka era taukena na tacida, se na ka kece e tu vei ira? (Apak. 3:17, 18) Ena bibi na veikauaitaki dina meda vukei ira na tacida. Ni valuti keda na matanitu era tovata, cava eda na cakava ke tukuni meda mai tiko kei ira na tacida me dua na gauna? (Isik. 38:10-12) Ena vinakati meda lomani ira vakalevu, meda vosota vata na gauna dredre qori.

4. E tukuni vakacava ena iVolatabu ni bibi meda vakaraitaka tiko na vosota, veikauaitaki dina, kei na loloma?

 ⁴ E uqeti keda na Vosa ni Kalou meda vakaraitaka tiko ga na vosota, veikauaitaki dina, kei na loloma. E kaya na Luke 21:19: “Na nomudou vosota ga dou na vakabulai kina.” E kaya na Kolosa 3:12: “Moni vakaisulu ena yalo ni veikauaitaki dina.” E tukuni ena 1 Cesalonaika 4:9, 10: “Sa vakavulici kemuni vinaka sara na Kalou moni veilomani. . . . Ia keitou vakamasuti kemuni moni vakayacora ena nomuni vinaka kece.” E volai na tikinivolatabu qori vei ira na tisaipeli era sa vakaraitaka tiko na vosota, na veikauaitaki dina, kei na loloma. Ia e vinakati mera vakaraitaka tiko ga na itovo qori. E bibi meda vakatotomuria tale ga. Me rawa qori, eda na raica na sala era vakaraitaka kina na lotu vaKarisito ena imatai ni senitiuri na itovo yadua qori. Oti eda na dikeva na sala meda vakatotomuri ira kina na tisaipeli qai vakaraitaka nida sa vakarau tu ena veivakararawataki levu.

5. Era vosota vakacava na ituvaki dredre na lotu vaKarisito ena imatai ni senitiuri?

⁵ E vinakati vei ira na lotu vaKarisito ena imatai ni senitiuri mera vosota. (Iper. 10:36) Era sotava na leqa vata ga era vakila e levu ena gauna ya. Kena ikuri, era sotava eso tale na ituvaki. Kena ivakaraitaki, levu era tusaqati vei ira na iliuliu ni lotu vakaJiu, vei ira na vakailesilesi ni Roma, kei na nodra vuvale. (Maciu 10:21) Ena loma ni ivavakoso, era na sasaga ena so na gauna mera kua ni muri ira na vukitani kei na nodra ivakavuvuli e vakavuna na duiyaloyalo. (Caka. 20:29, 30) Ia era vosota rawa na lotu vaKarisito qori. (Vkta. 2:3) Ena sala cava? Era vakasamataka na nodra ivakaraitaki ni vosota ena iVolatabu, me vakataki Jope. (Jeme. 5:10, 11) Era masuti Jiova me vakaukauataki ira. (Caka. 4:29-31) Era vakasamataka tale ga ni na vakalougatataki ira o Jiova nira vosota tiko ga.—Caka. 5:41.

6. Na cava o vulica ena ka e cakava o Merita meu vosota kina na veitusaqati?

⁶ Eda rawa tale ga ni vosota ke da vulica wasoma na ivakaraitaki ni vosota e tu ena Vosa ni Kalou kei na noda ivola da qai vakasamataka vakatitobu. Kena ivakaraitaki: Ni cakava qori o Merita, na tacida yalewa mai Albania, e vosota rawa kina na kaukaua ni nodratou veitusaqati na vuvale. E kaya: “E uqeti au sara ga noqu vulica na ivakaraitaki vakaivolatabu nei Jope. A sotava e levu sara na ka rarawa, e sega ga ni kila o cei e vakavuna, ia e kaya: ‘Me yacova niu mate, au na sega ni soro ena noqu yalodina!’ (Jope 27:5) Au vakasamataka ni dredre sara na veika e sotava o Jope ni vakatauvatani kei na ka au sotava. Na kena duidui ga niu kila vinaka o koya e vakavuna na leqa qori.”

7. Ke da sega ni sotava tiko na ituvaki dredre, cava meda vulica meda cakava ena gauna qo?

⁷ Eda rawa tale ga ni vakalevutaka na noda vosota nida masu vagumatua vei Jiova qai tukuna kece vua na ka eda kauai kina. (Fpai. 4:6; 1 Ces. 5:17) De dua o sega ni sotava tiko na ituvaki dredre ena gauna sara ga qo. Ia vakacava o rawa kerea na veidusimaki i Jiova ni o rarawa, veilecayaki, se sega ni kila na ka mo cakava? Ke o kerea wasoma na veivuke ni Kalou ena leqa lalai o sotava ena gauna qo, o na sega ni tu suka mo cakava qori ni o sotava na leqa lelevu ena gauna se bera mai. O na nuidei ni kila vinaka o koya na gauna kei na sala me vukei iko kina.—Same 27:1, 3.

8. E yaga vakacava na ivakaraitaki nei Mira mo vosota na ituvaki dredre se bera mai? (Jemesa 1:2-4) (Raica tale ga na iyaloyalo.)

⁸ Eda na rawa ni vosota na veivakararawataki levu se bera mai, ke da vosota na ituvaki dredre ena gauna qo. (Roma 5:3) Na vuna?  Era kaya e levu na tacida ni gauna era vosota kina e dua na ituvaki dredre, e yaga qori mera vosota na ituvaki dredre e tarava. Nira vosota qori ena veivuke i Jiova, sa ra qai vakabauta ga vakalevu ni vinakata o koya me vukei ira. Ni dei nodra vakabauti Jiova, e rawa kina nira vosota na ituvaki dredre e tarava. (Wilika Jemesa 1:2-4.) Qori na ka e vakadinadinataka o Mira, e dua na painia mai Albania. E yaga nona vosota na ituvaki dredre sa oti me vosota tiko ga na ituvaki ena gauna qo. E kaya ni so na gauna e nanuma ni o koya duadua ga e levu sara nona leqa. Ia e dau vakasamataka nona tokoni koya tu ga o Jiova ena 20 na yabaki sa oti. E kaya e lomana: ‘Mo yalodina tiko ga. Me kua ni maumau na gauna kece qori kei na ituvaki dredre o vosota rawa ena veivuke i Jiova.’ Vakacava o iko? O rawa tale ga ni vakasamataka nona dau vukei iko o Jiova mo vosota ena gauna sa oti. Mo nuidei ni kila vinaka nomu vosota na ituvaki dredre kece, ena vakalougatataki iko tale ga. (Maciu 5:10-12) Ni tekivu gona na veivakararawataki levu, o sa vulica mo vosota, o vakadeitaka mo vosota tiko ga.

9. E vakaraitaka vakacava na ivavakoso e Anitioki e Siria na veikauaitaki dina?

⁹ Dikeva na ka e yacovi ira na lotu vaKarisito e Jutia nira donuya na dausiga levu. Ni rogoca na ivavakoso e Anitioki e Siria na ituvaki qori, era kauaitaki ira dina na tacidra e Jutia. Era mani cakava kina e dua na ka mera vukei na mataveitacini e kea. Era “lomavata” na tisaipeli “me vaka na ka era dui rawata, mera vakauta na ka ni veivuke vei ira na veitacini era tiko mai Jutia.” (Caka. 11:27-30) Era tu vakayawa na mataveitacini era vakaleqai ena dausiga, ia era saga sara na lotu vaKarisito e Anitioki mera vukei ira.—1 Joni 3:17, 18.

10. Eda vakaraitaka vakacava na veikauaitaki dina nira donuya na tacida na leqa tubukoso? (Raica tale ga na iyaloyalo.)

¹⁰ Eda na vakaraitaka tale ga nikua na veikauaitaki dina nida rogoca nira donuya na tacida na leqa tubukoso. Eda tu vakarau meda veivuke, de dua nida tarogi ira na qase ke rawa nida veivuke. Oya nida cau ena cakacaka e vuravura raraba se nida masulaki ira na tacida era donuya na leqa tubukoso. b (Vkai. 17:17) Kena ivakaraitaki ena 2020, e sivia ni 950 na Komiti ni Vakacoko e lesi e veiyasa i vuravura, me vukei ira era vakaleqai ena matedewa na COVID-19. Eda vakavinavinakataki ira vakalevu na lewe ni komiti qori. E uqeti ira na veikauaitaki dina mera kauta na iyaya ni vakacoko vei ira na mataveitacini, era vakarautaka tale ga na veivuke vakayalo. Ena so na vanua, era vakavinakataka se tara tale na nodra vale na tacida kei na Vale ni Soqoni.—Vakatauvatana 2 Korinica 8:1-4.

11. E rokovi vakacava na Tamada vakalomalagi nida vakaraitaka na veikauaitaki dina?

¹¹ Nida vakaraitaka na veikauaitaki dina ni oti na leqa tubukoso, era na raica eso tale na noda vakuai keda. Kena ivakaraitaki, ena 2019 e vakacacana na Cagilaba o Dorian na Vale ni Soqoni ena Bahamas. Nira tara tale na mataveitacini na Vale ni Soqoni, era mani kerea e dua na matai e sega ni tacida me vola mai na isau ni nona cakacaka. E tukuna vei ira: “Au via cautaka . . . na misini, na tamata cakacaka kei na iyaya ni vale. . . . Au via cakava qo ena nomudou isoqosoqo. E uqeti au na nomuni kauaitaki ira na nomuni veikilai.” Levu e veiyasa i vuravura era sega ni kilai Jiova, ia era raica na ka eda cakava. Eda marau meda kila ni  ka eda cakava ena noda veikauaitaki dina, e uqeta eso mera toro voleka vei koya ‘e kauaitaki keda vakalevu’!—Efeso 2:4.

12. E vakarautaki keda vakacava ina veivakararawataki levu noda vakaraitaka tiko na veikauaitaki dina? (Vakatakila 13:16, 17)

¹² Na cava e bibi kina meda vakaraitaka na veikauaitaki dina ena gauna ni veivakararawataki levu? E vakaraitaka na iVolatabu ni o ira na sega ni tokona na veika vakapolitiki era na sotava na veika dredre ena gauna qo kei na gauna ni veivakararawataki levu. (Wilika Vakatakila 13:16, 17.) Era na rairai vinakata na mataveitacini meda vukei ira me vakarautaki na ka ni bula ni veisiga. Ni mai vakataulewa na noda Tui o Karisito Jisu, me raica mada ga nida vakaraitaka tiko na veikauaitaki dina qai sureti keda meda “taukena na matanitu” ni Kalou.—Maciu 25:34-40.

13. Me vaka e tukuni ena Roma 15:7, era vakaraitaka vakacava na lotu vaKarisito nira veilomani vakalevu?

¹³ Era kilai tani na lotu vaKarisito taumada ena nodra veilomani. Ia e rawarawa mera vakaraitaka na loloma? Vakasamataka mada na ivavakoso e Roma. Eso vei ira era Jiu, era tuberi mera talairawarawa ena Lawa e vola o Mosese. Ia eso tale era lewe ni Veimatanitu, e duidui sara na nodra isususu. Eso na lotu vaKarisito era rairai bobula, eso tale era galala. De dua eso era taukena na bobula. Era vakaraitaka vakacava na lotu vaKarisito qori na nodra veilomani nira duidui sara? E uqeti ira na yapositolo o Paula mera “dau veiciqomi.” (Wilika Roma 15:7.) Na cava e vakaibalebaletaka? Na vosa e vakadewataki me “veiciqomi,” e tiko kina na vakasama meda yalovinaka se veisureti ina noda vale, se mera mai noda itokani. Kena ivakaraitaki, e tukuna o Paula vei Filimoni me ciqomi Onisimo, na nona bobula a dro tu: “Ciqomi koya ena loloma.” (Fmon. 17) O Pirisila kei Akuila tale ga erau ciqomi Apolosa, e lailai sara na ka e kila me baleta na lotu vaKarisito, rau mani “kauti koya sara.” (Caka. 18:26) Era veiciqomi na lotu vaKarisito qori ni duidui mada ga na vanua era lako mai kina, e sega ni vakaleqa na nodra duavata kei na veilomani.

14. E vakaraitaka vakacava na loloma o Anna kei watina?

¹⁴ Eda na vakaraitaka tale ga noda lomani ira na tacida nida okati ira mera noda itokani meda dau veimaliwai. Qori ena uqeti ira sara ga mera vakaraitaka nira lomani keda. (2 Kor. 6:11-13) Dikeva mada na ivakaraitaki nei Anna kei watina. Ni rau toki oti ga ena nodrau ilesilesi vou me rau daukaulotu ena Ra kei Aferika, e veitakavi sara na COVID-19. Me vaka ni rau se vou yani, e dredre me rau veimaliwai kei ira na lewe ni ivavakoso. E rawa vakacava ni rau vakaraitaka na loloma? Rau qiriti ira na mataveitacini mera veivosaki ena vidio, rau tukuna vei ira ni rau vinakata sara ga me rau kilai ira vinaka. Qori e uqeta sara ga e levu na vuvale, era qai qiriti rau wasoma, era vakauitukutuku tale ga vei rau. Na cava rau saga kina na daukaulotu me rau kilai ira vinaka na mataveitacini? E kaya o Anna: “Au na sega vakadua ni guilecava nodra lomani au kei na noqu vuvale na tacida ena gauna vinaka kei na gauna ca. Qori e uqeti au meu vakaraitaka tale ga na loloma.”

15. Na cava o vulica vei Vanessa me baleta noda lomani ira kece na tacida? (Raica tale ga na iyaloyalo.)

¹⁵ Levu vei keda eda lewena na ivavakoso era tiko kina na tacida era lako mai na veivanua, e duidui tale ga na nodra itovo kei na ivakarau ni bula. Eda na lomani ira vakalevu ke da kauaitaka ga na nodra itovo vinaka. E dua na tacida yalewa o Vanessa, e veiqaravi e Niusiladi, e dredre vua me veimaliwai kei  na so tale ena ivavakoso. Ia e mani vakatulewataka me veimaliwai vakalevu kei ira e veivakacudrui na nodra itovo, me kua ni yawaki ira. Ni cakava qori e kila na vuna e lomani ira kina o Jiova. E kaya: “Ni tekivu veiqaravi vakaivakatawa ni tabacakacaka o watiqu, keirau veimaliwai kei ira na levu na tacida e duidui sara na nodra itovo, au raica ni rawarawa noqu veimaliwai kei ira. Au taleitaka na duidui qori. E macala ni taleitaka tale ga qori o Jiova ni vakadonuya mera qaravi koya o ira e duidui na nodra isususu.” Nida vulica meda raici ira na tacida mai na rai nei Jiova, e vakaraitaka nida lomani ira.—2 Kor. 8:24.

16. Na cava e bibi kina na loloma ena veivakararawataki levu? (Raica tale ga na iyaloyalo.)

¹⁶ Ena bibi sara noda veilomani ena veivakararawataki levu. Ena taqomaki keda vakacava o Jiova ni tekivu na veivakararawataki levu? Dikeva mada na ka e tukuna o Jiova vei ira na nona tamata ni valuti ira o Papiloni makawa: “Ni lako na noqu tamata, moni curu ina nomuni rumu e loma, ni sogota na nomuni katuba. Moni vunitaki kemuni vakalekaleka me oti mada na veicudruvi.” (Aisea 26:20) De dua eda na muria tale ga na vosa qori ena veivakararawataki levu. Na “rumu e loma,” e rairai dusia na noda ivavakoso. E yalataka o Jiova ni na taqomaki keda ena veivakararawataki levu ke da duavata tiko ga kei ira na tacida. Meda gumatua gona ena gauna qo meda lomani ira vakalevu na tacida, meda vosota tale ga na nodra malumalumu. Ni rawa ni vakatau kina na noda bula!

17. Ke da vakarautaki keda rawa qo, cava eda na cakava ena veivakararawataki levu?

¹⁷ Ena gauna dredre duadua vua na kawatamata “na siga levu i Jiova.” (Sefa. 1:14, 15) Eda na rarawa tale ga na tamata i Jiova. Ia ke da vakarautaki keda rawa qo, eda na sega ni lomaleqa, eda rawa tale ga ni vukea eso. Eda na vosota na leqa cava ga ena basika. Nira rarawa na tacida, eda na saga ena noda vinaka kece meda vukei ira nida kauaitaki ira dina qai vakarautaka na ka era gadreva. Ke da vakamatauna rawa qo meda lomani ira na tacida, eda na cakava tale ga qori ena gauna se bera mai. Ena qai vakalougatataki keda o Jiova meda bula tawamudu ena vuravura sa na guilecavi vakadua kina na leqa kece kei na veika dredre.—Aisea 65:17.