NA CAVA o vakabauta kina na veivosa qori? Dua na vuna ni tukuna sara ga na iVolatabu. E tukuna na 1 Pita 5:7: “Moni biuta vua na nomuni lomaocaoca kece, ni kauaitaki kemuni o koya.” Vakacava o vakadinadinataka ni kauaitaki iko na Kalou?

E tu vei Jiova na itovo eda vinakata vua e dua na itokani. Era dau veitokani voleka o ira era veilomani qai veikauaitaki. Ia eda kila vinaka ni o Jiova e yalololoma qai kauaitaki keda e veisiga. Kena ivakaraitaki: “[E] dau vakacabea na matanisiga vei ira na daucaka ca kei na daucaka vinaka, e vakatauca tale ga na uca vei ira na yalododonu kei ira na sega ni yalododonu.” (Maciu 5:45) E yaga vakacava na matanisiga kei na uca? Qo e dua vei ira, ni rawa kina vua na Kalou me ‘vakamamautaki keda ena kakana kei na lomada ena marau.’ (Caka. 14:17) Io, e raica o Jiova me levu na kakana e vuravura, ni qori e dua vei ira na ka eda dau vinakata.

Ia na cava era dau walokai kina e levu? Ni levu na veiliutaki era qara ga na itutu kei na ilavo, era sega ni kauaitaka na nodra tiko vinaka na lewenivanua. Sa voleka ni vakaotia o Jiova na kocokoco me sosomitaka na veiliutaki vakapolitiki na veiliutaki ni Matanitu vakalomalagi e kena Tui na Luvena. Ena sega ni dua ena walokai ena gauna qori. Ena gauna qo, o Jiova ena tokoni ira na  dausokalou yalodina. (Same 37:25) Qori e dusia ni kauaitaki keda.

Na itokani vinaka ena solia nona gauna vei iko. De dua ena vica na aua nomudrau veitalanoataka na ka drau taleitaka. Na itokani vinaka ena vakarorogo matua ni o talaucaka vua nomu leqa se ka o lomaocaocataka. Vakacava e dau va qori o Jiova? Io! E dau rogoca noda masu. E uqeti keda na iVolatabu meda “gumatua ena masu,” da qai “kua ni cegu ena masu.”—Roma 12:12; 1 Ces. 5:17.

Vakacava na balavu ni gauna ena tu vakarau kina o Jiova me rogoca noda masu? Ena sauma vei keda e dua na ivakaraitaki vakaivolatabu. Ni bera ni digitaki ratou na nona yapositolo o Jisu, “e masu tiko vua na Kalou ena bogi taucoko.” (Luke 6:12) De dua a cavuta sara tiko ga na yacadratou kece na tisaipeli, na nodratou itovo vinaka kei na nodratou malumalumu, qai kerei Tamana me vukei koya ena nona digidigi. Ena siga tarava, e nuidei o Jisu ni donu nona digitaki ratou e ganita me ratou yapositolo. Ni “Daurogo masu,” ena taleitaka o Jiova me rogoca na masu kece e cabori mai vu ni lomada. (Same 65:2) Ke mani vakacava na balavu ni noda masulaka tiko e dua na ka bibi, ena kauai tiko ga o Jiova.

E dau dredre mada ga vei ira na itokani vinaka mera dauveivosoti. So na gauna e dau mai tini botoilevu na nodrau veitokani dede e rua ni dredre me rau veivosoti. E sega ni va qori o Jiova. E sureti keda kece na iVolatabu meda kerea nona veivosoti, “ni na veivosoti vakalevu o koya.” (Aisea 55:6, 7) Na cava e dau veivosoti kina o Jiova?

E sega ni vakatauvatani rawa na nona loloma. Na levu ni nona lomani vuravura, e soli Jisu na Luvena me vakabulai keda na kawatamata mai na ivalavala ca kei na leqa.  (Joni 3:16) Levu tale na ka e rawati ena ivoli. E rawarawa vua na Kalou me vosoti ira e lomana ena isoro ni veivoli i Karisito. E vola na yapositolo o Joni: “Ke da vakatusa noda ivalavala ca, ena vosota na noda ivalavala ca . . . baleta ni yalodina o koya, e yalododonu tale ga.” (1 Joni 1:9) Rawa nida veitokani tiko ga kei na Kalou ena vuku ni nona veivosoti. Qori ena uqeti keda vakalevu.

Era veivuke na itokani dina ena gauna e vinakati kina. Vakacava o Jiova? E kaya nona Vosa: “Ke bale mada ga [e dua na dauveiqaravi ni Kalou], ena sega ni davo vakatoboicu, ni tokoni koya o Jiova ena ligana.” (Same 37:24) Levu na sala e ‘tokoni ira kina nona dauveiqaravi’ o Jiova. Rogoca mada qo e dua na ivakaraitaki mai St. Croix ena Caribbean.

Dua na goneyalewa lailai e sega ni vakarokorokotaka na kuila ena vuku ni nona vakabauta vakalotu ra qai vakasagai koya na lewenikalasi. E masulaka na veivuke i Jiova, mani vakamacalataka na ulutaga qori ena loma ni kalasi. E vakayagataka na ivola iTalanoa Mai na iVolatabu, e vakamacalataka ni yavutaka nona vakatulewa ena italanoa me baleti Setareki, Mesake, kei Apeteniko. E kaya: “E taqomaki ratou na tolu na Iperiu o Jiova ni ratou sega ni sokaloutaka na matakau.” E solia sara na ivola ya vei ira na vakarogoci koya tiko. Era vinakata na ivola ya e le tinikadua na lewe ni nona kalasi. Dua na ka nona marau na goneyalewa lailai ya ni kila ni vakaukauataki koya o Jiova, e solia tale ga vua na vuku me vakamacalataka kina na ulutaga qo.

Ke o vakatitiqataka nona kauaitaki iko o Jiova, vakasamataka vakabibi na tikinivolatabu me vaka na Same 34:17-19; 55:22; kei na 145:18, 19. Tarogi ira na tacida era sa dede ena dina se na sala cava e vakaraitaka kina o Jiova ni kauaitaki ira. Ni o vinakata tale ga nona veivuke o Jiova, masulaka vua. O na vakila kina nona ‘veikauaitaki.’