1. Na cava eda marautaka nikua?

E MARAUTAKI dina nida rogoca na tubu e rawati tiko ena isoqosoqo i Jiova! Ena yabaki sa oti, e sivia ni 10 na milioni na noda vuli iVolatabu. Qo e dusia ni sa serau tiko na noda rarama na dauveiqaravi ni Kalou! Vakasamataka mada na vica vata na milioni na tataleitaki era tiko ena iVakananumi. Io, sa rawa nira mai kila na loloma ni Kalou ena nona vakarautaka na ivoli.—1 Joni 4:9.

2, 3. (a) Na cava e sega ni tarova noda ‘rarama me vaka na cina?’ (b) Me baleta na vosa i Jisu ena Maciu 5:14-16, cava eda na dikeva tiko ena ulutaga qo?

² Eda vosataka na dauveiqaravi i Jiova e veiyasa i vuravura e levu na vosa. Ia e sega vakadua ni tarova qori noda duavata ni vakalagilagi Jiova na Tamada. (Vkta. 7:9) Se mani duidui vakacava na noda vosa, se vanua eda tiko kina, eda rawa ni serau tiko ga yani me vaka na ‘cina e vuravura.’—Fpai. 2:15.

³ Io, e vakalagilagi o Jiova ni tubu na noda cakacaka, noda duavata, kei na noda yadra tiko. Eda na veivosakitaka ena ulutaga qo na sala e dina kina qori.—Wilika Maciu 5:14-16.

4, 5. (a) Me ikuri ni noda vunau, sala cava tale ena serau kina noda rarama? (b) E yaga vakacava noda dau veikauaitaki? (Raica na imatai ni iyaloyalo.)

⁴ “Ena sega ni rawa ni dua e yalodina se dina vua na Turaga ena vo ni gauna qo . . . vakavo ga ke ciqoma ni rawa ni serau na nona rarama.” Qori na ka e tabaki ena ulutaga “Rarama ena Vanua Butobuto (Light in the Darkness) ena Watch Tower ni 1 June, 1925. E vakamacalataki tarava: “Ena cakava qori ni tukuna na itukutuku vinaka vei ira na lewe ni veivanua e vuravura, me muria tale ga na sala ni rarama.” Kena ibalebale, dua na sala e serau kina noda rarama, oya noda vunautaka na itukutuku vinaka kei na noda veivakatisaipelitaki. (Maciu 28:19, 20) Kena ikuri, eda na vakalagilagi Jiova ena noda itovo vaKarisito. Era dau vakaraici keda na itaukeinivale kei ira na tavali. Nira raica na noda matadredredre kei na noda veikidavaki, sa tukuni keda sara tiko ga kei na Kalou eda qarava.

⁵ E kaya o Jisu vei ratou na nona tisaipeli: “Ni dou curu i vale, kidavaki ira na lewena.” (Maciu 10:12) Ena vanua eratou dau vunau kina o Jisu kei ratou na yapositolo, e kena ivakarau mera sureti na vulagi e vale. Nikua, e sega ni dau caka qori ena levu na vanua. Ia na nomu veikauaitaki kei na nomu vosavosa vinaka ni o vakamacalataka na inaki ni veisiko, ena sega ni lomaleqa kina o itaukeinivale. E vinaka duadua mo dau matadredredre. E yaga vakalevu qori nira vunau ena qiqi na mataveitacini. Ke o dau vakaitavi kina, o na rairai vakadinata ni levu era dau kauai nida matadredredre se vakabula vei ira. Ena rawa ni uqeti ira mera golevi keda mai mera taura e dua noda ivola. Na nomu veikauaitaki e rawa tale ga ni tekivu kina nomudrau veitalanoa.

6. Erau vakarabailevutaka vakacava nodrau cakacaka vakaitalatala e dua na veiwatini itabaqase?

⁶ Rau sega ni vakaitavi vakalevu ena vunau e veivale e dua na veiwatini itabaqase mai Igiladi ni rau tautauvimate. Ia erau vakatulewataka me serau tiko ga na nodrau rarama ena yasa ni nodrau vale. Erau biuta ena teveli na ivola vakaivolatabu, qo me donuya na gauna era dau gole kina ena dua na koronivuli voleka na itubutubu mera lai kauti luvedra mai. Na nodra via kila gona na itubutubu na lewenivola, e levu era taura kina na ilavelave ni Questions Young People Ask—Answers That Work, Volume 1 kei na 2, vaka kina na brochure. E veitomani tale ga e dua na tacida yalewa painia mai na nodrau ivavakoso. Na nodratou veikauaitaki kei na loloma, e uqeta kina e dua na itubutubu me vulica na iVolatabu.

7. O na vukei ira vakacava na vulagi ena nomu vanua?

⁷ Ena vica na yabaki sa oti, levu na vanua era tabili kina na isenivalu. O na vukei ira vakacava mera kilai Jiova kei na nona inaki? Kena imatai, vakacava mo vulica na nodra vosa ni veikidavaki na tiko ena nomu vanua? E yaga sara vakalevu na porokaramu ni vuli vosa na JW Language. Vakacava mo vulica tale ga eso na iyatuvosa me rawa nira kauai kina. O na rawa ni dusimaki ira ena jw.org, mera raica tale ga na veimataqali vidio kei na ivola ena nodra vosa.—Vkru. 10:19.

8, 9. (a) E yaga vakacava na noda soqoni ena lomanimacawa? (b) Era na tuberi luvedra vakacava na itubutubu mera vakaitavi ena soqoni?

⁸ E vakarautaka vakayalololoma o Jiova na Soqoni ni Bula vaKarisito  kei na Cakacaka Vakaitalatala me rawa nida maqosa tiko ga ena cakacaka vakaitalatala. Nida rogoca na ivakasala yaga ena soqoni qori, eda doudou kina meda veisikovi lesu qai caka vuli iVolatabu.

⁹ Levu na ka vou era dau raica nodra vakaitavi ena soqoni na luveda. Ra itubutubu, dua na sala oni na vukei luvemuni me serau tiko ga nodra rarama, oya moni tuberi ira mera dau vakamacala ena nodra vosa ga. Ni rawarawa ga nodra ivakamacala qai vu mai lomadra, e rawa ni uqeti ira na ka vou mera kila na ka dina.—1 Kor. 14:25.

10. E yaga vakacava na sokalou vakavuvale ena noda duavata?

¹⁰ Dua tale na sala me ramase tiko ga kina nomu rarama, oya mo uqeta na duavata ena vuvale kei na ivavakoso. Era na rawata qori na itubutubu ke wasoma na Sokalou Vakavuvale. Levu na vuvale era dau sarava na JW Broadcasting ni dua na vula. Ke oni cakava qori, vakacava moni veivosakitaka na sala me muri kina na veika dou sarava. Ni veivakavulici tiko ena sokalou vakavuvale, me nanuma o itubutubu ni duidui na iwalewale ni nona vukei e dua na gone ni vakatauvatani kei na dua na itabagone. Me vakamatatataki na sala me muri kina na ka e saravi me ganiti ira na lewenivuvale yadua.—Same 148:12, 13.

11-13. Eda rawa vakacava ni uqeta na duavata na lewe ni ivavakoso kece, da qai vukei ira na so tale me serau nodra rarama?

¹¹ Era na uqeta vakacava na itabagone na duavata ena ivavakoso, ra qai uqeti ira eso tale me serau tale ga nodra rarama? Ke o itabagone lotu vaKarisito, vakacava e rawa ni nomu isausau mo dau kauaitaki ira na itabaqase? O rawa ni kerei ira ena veidokai mera talanoataka na ka era sotava ena gauna ni nodra veiqaravi. Ena yaga vakalevu qori, ni na uqeti iko kei ira na itabaqase me serau tiko ga nomuni rarama ni ka dina. O keda kece eda rawa ni kidavaki ira na tiko ena soqoni. Ni o cakava qori, o na uqeta na duavata, o na uqeti ira tale ga na vulagi me serau nodra rarama. Kena ibalebale, o rawa ni kidavaki ira na vulagi ena matadredredre, se rawa ni kauti ira na ka vou ina vanua mera dabe kina. Mo  veikilaitaki ira kei ira na mataveitacini, nira na sega ni madua.

¹² Ke o lesi mo liutaka na soqoni ni cakacaka vakavunau, o rawa ni vukei ira tale ga na itabaqase mera vakaitavi. Vakacava sa veiganiti tiko na yalava mera cakacaka kina? Ena so na ituvaki, oni rawa ni lesia mera cakacaka vata kei ira na tacida era se bulabula vinaka mera vukei kina. Moni kauaitaki ira tale ga era tautauvimate se vakaiyalayala na ka e rawa nira cakava. Io, ni o vuku qai veinanumi, o na rawa ni vukei ira na gone, itabaqase, ira na matua kei ira na ka vou mera gumatua ni vunautaka na itukutuku vinaka.—Vunau 19:32.

¹³ E uqeti na daunisame me kaya: “Sa dua na ka vinaka qai marautaki nira tiko ena duavata na veitacini!” (Wilika Same 133:1, 2.) Nira veimaliwai na Isireli, ena yaga vei ira nodra ivakaraitaki vinaka na dauveiqaravi ni Kalou. E vaka sara ga nira lumu ena waiwai e veivakabulabulataki qai marautaki. Vakacava mo ivakaraitaki vinaka tale ga vei ira na mataveitacini, mo uqeta na duavata? Ke o sa cakava tiko qori, dodonu mo vakavinavinakataki. Vakacava mo “lomasavu” vakalevu, ya me rabailevu nomu cakava qori se me kua ni cegu?—2 Kor. 6:11-13.

14. Na cava mo cakava me serau kina nomu rarama vei ira oni tiko veitikivi?

¹⁴ Vakacava mo gumatua tiko ga vakalevu me serau nomu rarama vei ira oni tiko veitikivi? Na nomu itovo vinaka kei na vosa vakayalovinaka ena rawa ni uqeti ira mera mai kila na ka dina. Mo taroga: ‘Era raici au vakacava o ira keimami tiko veitikivi? E savasava tu ga noqu vale, era dau qoroya? Au dau tu vakarau ni veivuke?’ Ni o veitalanoa kei ira na mataveitacini, vakacava mo taroga se yaga vakacava na nodra veikauaitaki kei na nodra itovo vinaka vei ira na wekadra, ira na tu voleka, itokani e vanua ni cakacaka se koronivuli? Ni caka qori, ena veiuqeti na veitalanoa.—Efeso 5:9.

15. Na cava e bibi kina meda yadra tiko?

¹⁵ Nida saga me serau vakalevu noda rarama, e tiko tale ga na ka meda cakava. E vakamasuti ira nona tisaipeli o Jisu: “Dou yadra tiko.” (Maciu 24:42; 25:13; 26:41) Ke da nanuma ni se yawa sara na “veivakararawataki levu,” se yaco mai ena dua tale na itabagauna, eda na vakawalena na kacivaki ni itukutuku vinaka. (Maciu 24:21) Sa sega ni serau noda rarama vei ira eda tiko veitikivi, ia sa na kataremoremo se boko sara.

16, 17. Na cava o rawa ni cakava mo yadra tiko ga kina?

¹⁶ Sa qai ca tiko ga na vuravura qo, ena vinakati meda yadra tiko. Ena yavala o Jiova ena nona gauna lokuci. Ena sega tale ni lomatarotarotaki qori. (Maciu 24:42-44) Ia ena gauna mada ga qo, meda vosovoso da qai yadra tiko. Meda wilika e veisiga na Vosa ni Kalou, da qai yadra tiko ena noda gumatua ena masu. (1 Pita 4:7) Meda dau vakasamataka na kedra italanoa na tacida era marau nira yadra tiko qai ramase tale ga nodra rarama. Dua na ivakaraitaki vinaka e tiko ena ulutaga “Vitusagavulu na Yabaki na Noqu Taura Matua na Tutu ni Nona iSulu na Jiu,” e tabaki ena Vale ni Vakatawa ni 15 ni Epereli, 2012, tabana e 18-21.

¹⁷ Mo dau veimaliwai qai vakaogai iko ena itavi vakalou. O na marau kina vakalevu, o na sega tale ga ni kauaitaka na toso totolo ni gauna. (Efeso 5:16) Ena 100 na yabaki sa oti, era ogaoga na tacida qai levu na ka e rawati. Ia e levu sara na ka eda sa cakava tiko nikua ena veidusimaki i Jiova. Sa serau tiko na noda  rarama ena kena ivakatagedegede eda sega ni bau tadra.

18, 19. Sala cava era vukei keda kina na qase ni ivavakoso meda yadra qai toso tiko ga? Vakamacalataka.

¹⁸ Eda sega ni uasivi, ia e veiuqeti nida kila ni sega ni rawa ni tarova qori na noda qaravi Jiova mai vu ni lomada. Koya gona, meda dokai ira na qase ni ivavakoso, na “isolisoli tamata” i Jiova. (Wilika Efeso 4:8, 11, 12.) Ni veisiko yani e dua na qase, vakayagataka na gauna qori mo dikeva kina na yaga ni nona ivakasala.

¹⁹ Rua na qase ni ivavakoso e Igiladi rau lai sikova e dua na veiwatini e leqa tiko nodrau bula vakawati. E vakila o yalewa ni rau sega ni duavata sara vakayalo. E tusanaka o tagane ni sega ni kenadau ena veivakavulici, ya na vuna e sega ni wasoma kina na nodratou sokalou vakavuvale. Rau vakamacalataka na qase na ivakaraitaki i Jisu. E kauaitaki ratou nona tisaipeli qai vakarautaka na ka ratou vinakata. Rau uqeti tagane na qase me vakatotomuri Jisu. Rau uqeti yalewa tale ga me vosota. Rau vakamacalataka tale ga eso na vakatutu yaga me rau cakacaka vata kina me rawa ni ratou sokalou vakavuvale kei na rua na luvedrau. (Efeso 5:21-29) E muri rau vakavinavinakataki tagane ena nona sasaga. Rau uqeti koya me vosota qai nuitaka na veidusimaki ni yalo tabu me dua kina na ulunivuvale vinaka. Na nodrau veikauaitaki na qase kei na nodrau veitokoni e vukei ratou na vuvale qo me serau tiko ga na nodratou rarama.

20. Na cava e rawa ni yaco ni serau tiko ga nomu rarama?

²⁰ E lagata na daunisame: “E marau o koya e rerevaki Jiova, e muria na nona sala.” (Same 128:1) Ni serau na nomu rarama, qo ena nomu sureta eso tale mera qaravi Jiova, qarauna nomu ivalavala me uqeta na duavata kei na nomu yadra tiko ga, o na marau kina vakalevu. Io, era na raica eso tale nomu cakacaka vinaka, rawa tale ga nira mai vakalagilagia na Tamada.—Maciu 5:16.