1. Na cava na rai i Jiova ni lesu vua e dua nona sipi?

EDA vulica ena ulutaga sa oti ni vakatauvatani koya o Jiova kei na vakatawanisipi vinaka e karoni ira vakayalololoma na nona sipi yadua. E vaqarai ira era yali. E kaya o Jiova vei ira na Isireli era biuti koya: “Moni lesu mai vei au, au na lesu yani vei kemuni.” Eda kila ni sega ni veisau nona rai, ni kaya: “Au sega ni veisau.” (Mala. 3:6, 7) E kaya o Jisu ni marau vakalevu o Jiova kei ira na agilosi ni lesu vua e dua mada ga nona dauveiqaravi e yali tu.—Luke 15:10, 32.

2. Na cava eda na veivosakitaka ena ulutaga qo?

² Meda dikeva mada e tolu na vosa vakatautauvata i Jisu e vakabibitaka na sala meda vukei ira kina era sa yawaki Jiova tu. Eda na veivosakitaka eso na itovo meda vukei ira kina na sipi era yali tu mera lesu vei Jiova. Eda na vulica tale ga na vuna e yaga kina noda vukei ira na malumu tu vakayalo.

3-4. Me vaka e tukuni ena Luke 15:8-10, na cava e vaqara kina na marama na ilavo drakema?

³ E vinakati na sasaga meda vaqarai ira na via lesu vei Jiova. Ena dua na vosa vakatautauvata i Jisu ena Kosipeli i Luke, e vakamacalataka e dua na marama e vaqara e dua na ka vakamareqeti e yali, oya na ilavo na drakema. E vakabibitaki ena vosa vakatautauvata qo na ivakarau ni nona vaqaqara.—Wilika Luke 15:8-10.

⁴ E vakamacalataka o Jisu na ka e vakila na marama qori ni kunea na ilavo e yali. Ena gauna ya, ni vakamau e dua na goneyalewa ni Isireli, ena rawa ni solia vua o tinana e tini na ilavo drakema. Ena rairai mareqeta yadua na ilavo qori ni kena ivakarau me soli e tini. E nanuma ni lutu ena fuloa na ilavo qori. E mani waqaca nona cina me vaqara, ia e sega ni kunea. Ena rairai sega ni rarama vinaka sara  nona cina waiwai me kunea kina na ilavo siliva lailai. E mani taviraka vinaka na loma ni vale taucoko. E qai raica na ilavo ena vanua e kumuna kina na duka, e taliva tiko ena rarama ni cina. E lomavakacegu sara ga! E kacivi ira na nona itokani kei ira na tiko voleka me tukuna vei ira na itukutuku vinaka.

5. Na cava ena rairai dredre kina meda kunei ira na malumu tu vakayalo?

⁵ Eda vulica ena vosa vakatautauvata i Jisu ni vinakati na sasaga me kunei e dua na ka e yali. Ena rairai vinakati tale ga na sasaga meda kunei ira na biuta na ivavakoso. De dua sa vakayabaki nodra sega tu ni tomani keda. Era sa toki beka ena vanua e tiko kina e dua na ivavakoso e sega ni kilai ira. E macala ni so vei ira era vinakata sara tu ga ena gauna qo mera lesu vei Jiova. Oya mera duavata tale kei na nona vuvale era sokalou dina, ia ena vinakati meda vukei ira.

6. Eda rawa ni vakaitavi vakacava na lewe ni ivavakoso ena nodra vaqarai na malumu tu vakayalo?

⁶ O cei e rawa ni vakaitavi ena nodra vaqarai na malumu tu vakayalo? O keda kece, okati kina na qase ni ivavakoso, painia, lewenivuvale, kei ira na dautukutuku ena ivavakoso. O kila e dua na wekamu se itokani sa malumu tu vakayalo? O sotava e dua e malumu tu vakayalo ni o vunau e veivale se matanalevu? Ke vakadonuya mo solia vei iratou na qase na nona naba se vanua e tiko kina, o rawa ni cakava sara qori.

7. Na cava o vulica vua na qase ni ivavakoso o Thomas?

⁷ Na cava e rawa nira cakava na qase ni ivavakoso mera kunei ira na via lesu vei Jiova? Dikeva na ka e tukuna e dua na qase ni ivavakoso o Thomas * e tiko e Sipeni, e sa vukea tale ga e sivia ni 40 na tacida mera lesu ina ivavakoso. E kaya: “Au dau taroga eso na tacida ke ra kila na vanua era tiko kina na malumu tu vakayalo. Se au na taroga ke ra kila eso era sa sega tu ni gole mai ena soqoni. Era marau e levu ena ivavakoso mera veivuke, era kila nira sa vakaitavi tale ga. Niu lai raici ira na tacida era malumu tu vakayalo, au dau tarogi luvedra kei na wekadra. Eso era dau soqoni tu kei luvedra, eso mada ga na luvedra era dautukutuku tu ena dua na gauna. E rawa tale ga nira vukei mera lesu vei Jiova.”

8. Ena vosa vakatautauvata ena Luke 15:17-24, na cava e cakava o tama ni veivutuni o luvena?

⁸ Na itovo cava e vinakati meda vukei ira na via lesu vei Jiova? Dikeva eso na ka eda vulica ena vosa vakatautauvata i Jisu me baleta na gone murilomana e biubiu e vale. (Wilika Luke 15:17-24.) E vakamacalataka o Jisu na sala e kilaiyalona kina qai lesu tale. E cici yani o tamana qai mokoti koya me vakaraitaka nona loloma. Ia e nanuma o gone ni sega ni ganiti koya me luvena, e ca nona lewaeloma. E kauaitaki koya o tamana ni talaucaka na lomana. E qai cakava eso na ka me vakaraitaka ni marautaka nona lesu yani. E okati koya me lewenivuvale mareqeti, sega ni tamata cakacaka. E laurai qori ena nona vakarautaka e dua na kakana levu kei na isulu totoka vei luvena e veivutuni.

9. Na itovo cava e vinakati meda vukei ira kina na malumu tu vakayalo? (Raica na kato “ Sala Meda Vukei Ira Kina na Via Lesu Mai.”)

⁹ O Jiova e vaka na tama ena vosa vakatautauvata ya. E lomani ira na tacida era malumu tu vakayalo qai vinakata  mera lesu vua. Nida vakatotomuri Jiova, eda na vukei ira mera lesu vua. Ena vinakati meda vakaraitaka na vosovoso, veikauaitaki, kei na loloma. Na cava meda vakaraitaka kina na itovo qori? Eda na vakaraitaka vakacava?

10. E yaga vakacava na vosovoso nira vukei na malumu tu vakayalo?

¹⁰ E vinakati meda vosovoso. Na vuna? Ni taura na gauna me qai lesu vei Jiova e dua. Era kaya e levu na malumu vakayalo ena dua na gauna, nira mai qaravi Jiova tale ni sikovi ira wasoma na qase ni ivavakoso kei ira na mataveitacini. E vola e dua na tacida yalewa mai Esia, o Nancy: “E vukei au vakalevu e dua na noqu itokani voleka ena ivavakoso. E lomani au, e vaka sara ga me tuakaqu. E talanoataka na veika keirau dau marautaka tu qai vakarorogo vinaka niu talaucaka na lomaqu. E sega ni tu suka me veivakasalataki. E vakaraitaka ni itokani dina, ni tu vakarau me veivuke ena veigauna.”

11. Na cava e bibi kina na veikauaitaki nida vukea e dua e rarawa?

¹¹ E yaga sara vakalevu na veikauaitaki, ni rawa ni uqeta e dua me marau tale. Eso era malumu tu vakayalo e sa vakayabaki nodra rarawataka tiko na ka era cakava eso na tacida. Era sega kina ni via lesu vei Jiova. Eso era rairai nanuma ni sega ni donu na ka e caka vei ira. Era vinakata e dua me rogoci ira, me kila tale ga na ivakarau ni lomadra. (Jeme. 1:19) E kaya o María, a malumu tu vakayalo, “Au dau vinakata e dua me rogoci au, vakacegui au, qai vakasalataki au.”

12. Sala cava e vaka kina na dali na loloma i Jiova?

 ¹² Na iVolatabu e vakatauvatana nona lomani ira nona tamata o Jiova kei na ivau se dali. Ena sala cava? Dikeva na ivakaraitaki qo: Raitayaloyalotaka mada ni o luvu tiko ena dua na wasawasa voravora qai viritaki yani na iqaloqalo. E macala ni o na marautaka qori ni na vakalailaitaka nomu sasaga mo kua ni luvu. Ia e sega ni vinakati wale ga na iqaloqalo. E batabata na wai, o na bula ga ke o vodo i waqa. O vinakata me viritaki yani na dali me dreti iko i waqa. E kaya o Jiova vei ira na Isireli era lako sese: “Au tuberi ira tiko ga ena . . . ivau ni loloma.” (Osea 11:4) Nikua, e va tale ga qori na rai i Jiova me baleti ira na malumu tu vakayalo, era nuiqawaqawa, era rarawataka na veika dredre. E vinakata mera kila ni lomani ira, e via vukei ira tale ga mera lesu vua. E rawa gona ni vakayagataki iko o Jiova mo vakaraitaka vei ira na nona loloma.

13. Tukuna e dua na ivakaraitaki ni kena bibi meda vakaraitaka na loloma.

¹³ E bibi meda vakadeitaka vei ira na malumu tu vakayalo ni lomani ira o Jiova, eda lomani ira tale ga. E kaya o Pablo, e cavuti ena ulutaga sa oti, a malumu tu vakayalo me sivia ni 30 na yabaki: “Ena dua na mataka niu biubiu mai vale, e kauaitaki au e dua na tacida yalewa itabaqase, e vosa vakayalovinaka vei au. Au tagi sara ga vaka na gonelailai. Au tukuna vua ni vaka ga e talai koya mai o Jiova me vosa vei au. Qori sara ga na gauna au vakatulewataka kina meu lesu vei Jiova.”

14. Ena vosa vakatautauvata ena Luke 15:4, 5, na cava e cakava na ivakatawanisipi ni kunea na sipi e yali?

¹⁴ E bibi meda vukei ira tiko ga na malumu tu vakayalo. Me vaka na gone cidroi ena vosa vakatautauvata i Jisu, de dua era rarawa vakalevu. Era sega tale ga ni veivolekati kei Jiova me vaka e liu ena veika era sotava ena vuravura i Setani. E bibi meda vukei ira me dei nodra vakabauti Jiova. E vakamacalataka o Jisu ena vosa vakatautauvata ni sipi e yali, na ivakatawa e vakataqara na sipi e tabana qai colata lesu ina qelenisipi. E vakayagataka na ivakatawa na nona gauna kei na igu me vaqara na sipi e yali. Ia e liaca ni vinakati me colata lesu ina qelenisipi, ni sega na kaukaua me lesu tale vakataki koya.—Wilika Luke 15:4, 5.

15. Eda na vukei ira vakacava na malumu tu vakayalo era via lesu vei Jiova? (Raica na kato “ E Dua na iVukevuke Yaga.”)

¹⁵ Ena rairai vinakati na gauna kei na igu meda vukea e dua sa malumu tu vakayalo me valuta nona malumalumu. Eda rawa ni vukei koya me kaukaua vakayalo nida kerea na veivuke ni yalo tabu, eda vakayagataka nona Vosa kei na ivola vakaivolatabu ena ivavakoso. (Roma 15:1) Eda na cakava vakacava qori? E kaya e dua na qase ni ivavakoso matua: “E levu era malumu tu vakayalo ena vinakati mera vuli iVolatabu tale nira vakatulewataka mera lesu vei Jiova.” * Ke o kerei mo vuli kei na dua e malumu tu vakayalo, mo ciqoma ena  marau na ilesilesi qori ke rawa. E tomana, “Na dautukutuku e taura na vuli me itokani vinaka, me nuitaki tale ga.”

16. Eda kila vakacava nira na tokoni keda na agilosi?

¹⁶ E vakadinadinataki ena levu na ivakaraitaki nira cakacaka vata kei keda na agilosi, mera kunei na malumu tu vakayalo era via lesu vei Jiova. (Vkta. 14:6) Kena ivakaraitaki e dua na tacida o Silvio mai Ecuador, e masulaka vagumatua me vukei me rawa ni lesu ina ivavakoso. Ni se masu tiko, erau sa tu e katuba e rua na qase ni ivavakoso. Erau marautaka na veisiko qori, rau tekivu vukei koya sara.

17. Na cava eda na vakila nida vukei ira na malumu tu vakayalo?

¹⁷ Eda na marau vakalevu nida vukei ira na malumu tu vakayalo mera lesu vei Jiova. Dikeva na ka e kaya o Salvador, e dua na tacida tagane painia e dau kauaitaki ira na malumu tu vakayalo: “Eso na gauna, au luluvu sara ga ena levu ni noqu marau. Au marau vakalevu niu cakacaka vata kei Jiova me vukei e dua nona dauveiqaravi me lako tani mai na vuravura i Setani me lesu ina ivavakoso.”—Caka. 20:35.

18. Ke o sa malumu tu vakayalo, na cava mo vakadeitaka?

¹⁸ Ke o sa sega ni dau veimaliwai kei ira na mataveitacini ena gauna qo, mo nuidei ni se lomani iko tiko ga o Jiova. E vinakata mo lesu vua. E tiko na ka mo cakava mo rawa ni lesu vua. Ia me vaka na tama ena vosa vakatautauvata i Jisu, o Jiova e waraki iko tiko mo lesu vua, ena ciqomi iko ena marau.