1. Na cava na rerevaka na Kalou? Cava e bibi kina vei ira na lomani Jiova?

ERA lomana na Kalou na lotu vaKarisito, era rerevaki koya tale ga. Ena rairai veicalati qori vei ira eso. Ia eda sega ni tukuna tiko na mataqali rere eda domobula kina. Eda na veivosakitaka qo e dua na mataqali rere. O ira era vakaraitaka na rere qo era doka vakalevu na Kalou, era rokovi koya tale ga. Era sega ni via vakararawataka na Tamadra vakalomalagi nira vinakata me vinaka tiko ga na nodra veitokani kei koya.—Same 111:10; Vkai. 8:13.

2. Na cava e rua na ka eda na veivosakitaka?

² Wilika Same 86:11. Ni o vakasamataka na vosa qori, o na kila ni matata tu vei Tui Tevita na bibi ni nona doka vakalevu na Kalou. Meda veivosakitaka mada na sala meda muria kina na masu i Tevita. Kena imatai, eda na dikeva e vica na vuna meda doka kina vakalevu na yaca ni Kalou. Kena ikarua, eda na veivosakitaka na sala eda na vakaraitaka kina e veisiga nida doka vakalevu na yaca ni Kalou.

3. Na cava e sotava o Mosese e rairai uqeti koya me doka vakalevu na yaca ni Kalou?

³ Vakasamataka mada na rai nei Mosese ni lako cuvacuva tiko ena qaravatu qai raivotutaka ni tavali na lagilagi i Jiova. E tukuni ena ivola na Insight on the Scriptures ni “rairai dua dina na ka vakatubuqoroqoro me bau raica e dua na tamata ni bera ni mai bula e vuravura o  Jisu Karisito.” E qai rogoca o Mosese ni cavuta na agilosi: “O Jiova, o Jiova, na Kalou dauyalololoma qai dauveinanumi, e berabera ni cudru, qai vuabale ena loloma e dei kei na dina.” (Lako 33:17-23; 34:5-7) De dua e dau vakasamataka lesu o Mosese na ka e yaco qori ena gauna e cavuta kina na yaca i Jiova. Sa rauta me vakaroti ira na Isireli ena dua na gauna e muri, mera “rerevaka na yaca lagilagi qai vakatubuqoroqoro qo.”—Vkru. 28:58.

4. Na cava ena uqeti keda meda dokai Jiova vakalevu?

⁴ Nida vakasamataka na yaca i Jiova, e vinaka meda vakasamataki koya vakatitobu. Meda nanuma tiko na nona itovo me vaka na kaukaua, vuku, lewadodonu, kei na loloma. Nida vakasamataka na vica na itovo qori kei na levu tale, eda na dokai koya vakalevu.—Same 77:11-15.

5-6. (a) Na cava na ibalebale ni yaca ni Kalou? (b) Me vaka e cavuti ena Lako Yani 3:13, 14 kei na Aisea 64:8, na sala cava e vakavuna kina o Jiova me yaco na ka?

⁵ Na cava eda kila me baleta na ibalebale ni yaca ni Kalou? Era tokona e levu na dauvakadidike ni yaca Jiova e rairai kena ibalebale “O Koya e Vakavuna me Yaco.” Eda kila mai na ibalebale ni yacana ni sega ni dua na ka me tarova na nona inaki, ena vakayacora dina na ka e vinakata. Ena sala cava?

⁶ E dau vakavuna o Jiova me vakayacori na nona inaki. (Wilika Lako Yani 3:13, 14.) Eda dau uqeti wasoma meda vakasamataka vakatitobu na itovo qoroi ni Kalou. O Jiova e dau vakayagataki ira na nona dauveiqaravi sega ni uasivi mera qaravi koya, mera vakayacora tale ga na nona inaki. (Wilika Aisea 64:8.) Ena sala qori e vakavuna kina o Jiova me vakayacori na nona inaki. E sega gona ni dua na ka e tarova na kena vakayacori.—Aisea 46:10, 11.

7. Na cava meda cakava meda vakavinavinakataka kina na Tamada vakalomalagi?

⁷ Na cava meda cakava meda vakavinavinakataka kina na Tamada vakalomalagi?  Oya nida vakasamataka vakatitobu na ka e cakava vei keda kei na ka eda rawata ena nona veivuke. Kena ivakaraitaki, nida vakasamataka na ka kece e bulia, eda qoroya vakalevu na nona ibulibuli. (Same 8:3, 4) Nida vakasamataka tale ga ni dau vukei keda meda vakayacora na lomana, eda na dokai koya vakalevu. E vakatubuqoroqoro na yaca i Jiova! Na cava e vauci kina? Na ka kece e kilai kina, na ka kece sa cakava, kei na ka kece ena qai vakayacora.—Same 89:7, 8.

8. Me vaka e cavuti ena Vakarua 32:2, 3, na cava e vinakata o Jiova meda cakava ena yacana?

⁸ Ni bera nira butuka na Isireli na Vanua Yalataki, e vakavulici Mosese o Jiova ena dua na sere. (Vkru. 31:19) Oti me qai vakavulica o Mosese vei ira na Isireli. (Wilika Vakarua 32:2, 3.) Nida vakasamataka vakatitobu na tikina e 2 kei na 3, e macala ni sega ni vinakata o Jiova me vunitaki na yacana, se meda nanuma ni tabu meda cavuta. E vinakata meda kila kece! Era okata na Isireli me ka dokai nodra rogoci Mosese me vakavulici ira ena veika me baleti Jiova kei na yacana lagilagi! Qori e vakayaloqaqataki ira, e vakacegui ira tale ga me vaka na uca mirimiri e vakatubura na kau. Na cava meda cakava me va tale ga qori na iwalewale ni noda veivakavulici?

9. Eda vakaitavi vakacava ena vakarokorokotaki ni yaca i Jiova?

⁹ Nida vunau e veivale se vunau e matanalevu, eda rawa ni vakayagataka na iVolatabu meda vakaraitaka na yaca ni Kalou o Jiova. Eda rawa tale ga ni solia vei ira na ivola, vidio, kei na ulutaga ena noda website e vakacaucautaki Jiova. Ena vanua ni cakacaka, koronivuli, se nida gade, eda na raica na gauna veiganiti meda wasea kina na veika me baleti Jiova kei na ka e vinakata. Nida tukuna vei ira na veika vinaka ena cakava vua na kawatamata kei na vuravura, de dua era se qai rogoca vakadua na levu ni nona lomani keda o Jiova. Nida cakava qori, eda sa vakaitavi tiko ena vakarokorokotaki ni yacana. Eda sa vakalasuya tiko eso na itukutuku lasu kei na ka e vakaucacataki kina o Jiova era rairai vakavulici kina. Eda sa vukei ira tiko mera kila na itukutuku veivakacegui mai na iVolatabu.—Aisea 65:13, 14.

10. Na cava meda kua ni vakavulica wale ga kina na ka e vinakata o Jiova kei na nona ivakatagedegede?

¹⁰ Nida veivakavulici ena iVolatabu, eda vinakata meda vukei ira na gonevuli mera kila na yaca i Jiova, mera vakayagataka tale ga. Kena ikuri, eda via vukei ira mera kila na ibalebale ni yacana. Vakacava era na kila qori nida vakavulici ira tiko ga ena ivakavuvuli, ivakatagedegede vakalou, kei na lawa me baleta na itovo? Na gonevuli vinaka ena rawa ni vulica na lawa ni Kalou, ena taleitaka tale ga. Ia ena talairawarawa vei Jiova na gonevuli qori ni lomani koya? Nanuma tiko ni o Ivi e kila na lawa ni Kalou, ia a sega ni lomana dina na Vunilawa, vaka kina o Atama. (Vkte. 3:1-6) E levu tale na ka e vauci ena noda veivakavulici. Eda sega ni vakavulica wale ga na ka e vinakata na Kalou kei na nona ivakatagedegede dodonu.

11. Nida vakavulica na lawa ni Kalou kei na nona ivakatagedegede, eda na vukei ira vakacava na gonevuli mera lomana na Vunilawa?

¹¹ E dau yaga tu ga na ka e vinakata o Jiova kei na nona ivakatagedegede. (Same 119:97, 111, 112) Ia ena sega beka ni va qori na nodra rai na gonevuli,  vakavo ke ra kila ni yavutaki na lawa qori ena loloma i Jiova. Eda rawa gona ni tarogi ira: “Na cava mada e tukuna kina na Kalou vei ira na nona dauveiqaravi mera cakava qo, se kua ni cakava ya? Na cava eda vulica kina me baleti koya?” Ke da vukei ira na gonevuli mera vakasamataki Jiova, mera lomana tale ga na yacana lagilagi, eda na rawa ni uqeta na lomadra. Nida cakava qori, era na sega ni lomana wale ga na nona lawa, era na lomana tale ga na Vunilawa. (Same 119:68) Ena dei na nodra vakabauta, era na vosota tale ga na veika dredre.—1 Kor. 3:12-15.

12. E waserua vakacava na loma i Tevita? Na cava e yaco kina?

¹² E laurai e dua na matavosa bibi ena Same 86:11, oya na “vakaduavatataka na lomaqu.” E uqeti vakalou o Tui Tevita me vola na matavosa qori. E vakadinata ena nona bula ni rawarawa sara me waserua na lomada. Kena ivakaraitaki, dua na gauna ni tiko ena nona delanivale, e raica ni sili tiko e dua na yalewa vakawati. Vakacava e taucoko na loma i Tevita se waserua? E kila vinaka na ivakatagedegede i Jiova: “Mo kua ni domona na watina na kainomu.” (Lako 20:17) Ia e raici koya tiko ga. Sa waserua na lomana, oya ni vinakati Pacisepa, e vinakata tale ga me vakamarautaki Jiova. Sa dede nona lomani Jiova tu o Tevita, e rerevaki koya tale ga, ia e sikalutu ena nona gagadre ca. Ena ituvaki qori, e cakava kina o Tevita na ka ca. E vakarogorogocataka na yaca i Jiova. E vakaleqai ira tale ga na sega ni cala, wili kina o ira na lewe ni nona vuvale.—2 Sam. 11:1-5, 14-17; 12:7-12.

13. Eda kila vakacava ni a taucoko tale na loma i Tevita?

¹³ E vakadodonutaki Tevita o Jiova qai veisau. (2 Sam. 12:13; Same 51:2-4, 17) E nanuma o Tevita na leqa kei na rarawa e vu mai na kena waserua na lomana. Na ka e cavuta ena Same 86:11 e rawa tale ga ni vakadewataki va qo: “Ni solia vei au na loma e taucoko.” Vakacava e vukei Tevita o Jiova me taucoko na lomana se vakaduavatataka? Io, e qai cavuti ena Vosa ni Kalou ni o Tevita e “taucoko na lomana vei Jiova na nona Kalou.”—1 Tui 11:4; 15:3.

14. Na cava meda taroga? Na vuna?

¹⁴ E veivakayaloqaqataki na ivakaraitaki i Tevita, e ka ni vuli tale ga vei keda. Nona sikalutu ina ivalavala ca bibi e ivakasala  vei keda nikua. Ke da sa qaravi Jiova dede tu mai, se wale ga qo, e bibi meda taroga, ‘Au vorata tiko na sasaga i Setani me wasea rua na lomaqu?’

15. E yaga vakacava noda rerevaka na Kalou nida raica na iyaloyalo veivagarogaroi?

¹⁵ Kaya mada ke o raica ena tivi se Internet na iyaloyalo e veivagarogaroi, cava o na cakava? De dua o na rawa ni tukuna ni iyaloyalo qori e sega ni vakasisila. Vakacava e rawa ni vakayagataka qori o Setani me wasea rua na lomamu? (2 Kor. 2:11) Eda rawa ni vakatauvatana na iyaloyalo qori kei na matau ni kola buka se tolonikau. Na imatai ni ka ena cakava o koya e vakayagataka, oya me taya na tolonikau ena muana momoto. Oti sa qai kola vakaukaua me wasea rua. Eda rawa ni kaya ni iyaloyalo veivagarogaroi e vaka na matau. Ena rairai tekivu ga ena ka lalai qai nanumi ni sega na kena ca, ia e rawa ni tini ena ivalavala ca e wasea rua na lomada, meda na tawayalodina. Mo qarauna gona me kua ni dua na ka va qori me wasea rua na lomamu! Mo vakadeitaka me taucoko tiko ga, mo rerevaka na yaca i Jiova!

16. Na cava meda taroga nida temaki?

¹⁶ Me ikuri ni iyaloyalo veivagarogaroi, e levu tale na ka e temaki keda kina o Setani. Na cava eda na cakava? E rawarawa sara meda tukuna ni sega ni ca. Kena ivakaraitaki, eda na rawa ni tukuna: ‘Au na sega ni vakasivoi niu cakava qo, e sega sara ni ca.’ Qori na raicala. E vinaka meda taroga e vica na taro qo: ‘Vakacava e vakayagataka qori o Setani me wasea rua na lomaqu? Keu rawai ena gagadre ca, au na vakarogorogocataka na yaca i Jiova? Na ka au cakava qo ena vakavolekati au vua na Kalou seu na yawaki koya?’ Meda vakasamataka vakatitobu  na taro qori. Kerea na vuku mo sauma kina vakadodonu. (Jeme. 1:5) Nida cakava qori eda na taqomaki. Eda na vorata sara ga na veitemaki me vakataki Jisu, ni kaya: “Lako tani, Setani!”—Maciu 4:10.

17. Na cava e ca kina me waserua na lomada? Vakatauvatana.

¹⁷ E ca ni waserua na lomada. Vakasamataka mada e dua na timi ni qito era sega ni dau veimaliwai vinaka. Eso era vinakata ga mera vakalagilagi, e vica tale era sega ni via muria na lawa ni qito, eso tale era beci koya na dauniveivakavulici. Na timi qori ena rairai sega ni qaqa ena qito. Ia na timi era duavata na lewena ena rawa ni qaqa. Vakacava o iko? O rawa ni vaka na timi qori ke duavata na nomu rai, ka o vinakata, kei na lomamu ena qaravi Jiova. Nanuma tiko ni vinakata o Setani me wasea rua na lomamu. E vinakata me veisaqasaqa kei na ivakatagedegede i Jiova na nomu rai, ka o vinakata, kei na lomamu. Ia e vinakati me taucoko na lomamu ena nomu qaravi Jiova. (Maciu 22:36-38) Me kua sara ni wasea rua o Setani na lomamu!

18. Me salavata kei na Maika 4:5, na cava mo vakadeitaka?

¹⁸ Mo masulaka vei Jiova me vakataki Tevita: “Ni vakaduavatataka na lomaqu me rerevaka na yacamuni.” Saga mo muria sara na ka o masulaka. Mo vakaraitaka ena nomu vakatulewa lalai se lelevu e veisiga, ni o doka vakalevu na yaca tabu i Jiova. Nomu cakava qori ni o nona iVakadinadina, ena rogo vinaka kina na yacana. (Vkai. 27:11) Eda na duavata kei na ka e tukuna na parofita o Maika: “Eda na muria na yaca i Jiova na noda Kalou me tawamudu, io me tawamudu.”—Maika 4:5.