1. Na cava e rairai galili kina eso na dauveiqaravi i Jiova?

LEVU vei keda eda dau galili ena so na gauna. Eso ena lekaleka ga nodra galili, eso tale ena dede toka. E rawa mada ga nida galili nida tiko vakalewe levu. Eso ena rairai dredre mera veitokani ena ivavakoso vou era lewena. Eso tale era dau veivolekati kei na nodra vuvale, ia era galili nira toki sara vakayawa mai na nodra vale. Eso tale era dau nanumi ira vakalevu na wekadra lomani e sa takali. Era galili eso na lotu vaKarisito nira cati, vakabibi o ira na qai vulica wale ga na dina, se tusaqati vei ira na lewe ni nodra vuvale era sega ni tiko ena dina, se nodra itokani makawa.

2. Na taro cava eda na sauma?

² E kila vinaka o Jiova na ka kece me baleti keda. E kila mada ga nida galili, e vinakata tale ga me vukei keda. Ena vukei keda vakacava o Jiova? Na cava meda cakava meda vosota kina na galili? Eda na vukei ira vakacava na lewe ni ivavakoso era galili tiko? Meda veivosakitaka mada na kena isau.

3. E kauaitaki Ilaija vakacava o Jiova?

³ E kauaitaka vakalevu o Jiova na kedra ituvaki na nona dauveiqaravi kece. E voleka vei keda yadua, e kila tale ga na ka e vakararawataki keda nida yalolailai. (Same 145:18, 19) Dikeva mada nona kauaitaka nona parofita o Ilaija. A bula na turaga yalodina qori ena dua na gauna dredre ena ivolatukutuku makawa kei Isireli. Era tusaqati  vakaukaua na dauveiqaravi i Jiova, era vinakata sara ga na meca ni Kalou mera vakamatei Ilaija. (1 Tui 19:1, 2) Kena ikuri, e nanuma ni o koya ga na parofita ni Kalou sa vo tiko, de dua qori na ka e vakararawataki koya vakalevu. (1 Tui 19:10) E totolo ga ni vukei koya o Jiova. E tala na nona agilosi me vakadeitaka vua ni se vo tiko e levu era qaravi Jiova e Isireli, sega ni o koya duadua ga!—1 Tui 19:5, 18.

4. E kauaitaki ira vakacava nona dauveiqaravi o Jiova me vaka e tukuni ena Marika 10:29, 30?

⁴ E kila vinaka tu o Jiova nida digia meda qaravi koya, eso ena vakuai ira ena levu na ka. De dua na nodra veitokoni na wekadra kei na itokani era sega ni tiko ena dina. E rairai leqataka qori na yapositolo o Pita ni tarogi Jisu: “Keitou sa biuta na ka kece me keitou muri kemuni, na cava ena qai neitou?” (Maciu 19:27) E vakadeitaka o Jisu vei ira na nona tisaipeli nira na lewena e dua na vuvale levu vakayalo. (Wilika Marika 10:29, 30.) E yalataka tale ga o Jiova na Ulu ni noda vuvale vakayalo, ni na tokoni ira era vinakata mera qaravi koya. (Same 9:10) Meda raica mada eso na ka eda rawa ni cakava, me vukei keda kina o Jiova nida galili.

5. E yaga vakacava nomu dau vakasamataka nona vukei iko o Jiova?

⁵ Vakasamataka nona vukei iko tiko o Jiova. (Same 55:22) Qo ena vukei iko me donu tiko ga nomu rai me baleta na kemu ituvaki. E kaya e dua na tacida dawai o Kara, * e sega ni dua na lewe ni nona vuvale e tiko ena dina: “Niu vakasamataka vakatitobu nona vukei au o Jiova meu vosota na veika dredre, au vakila niu sega ni galili. Au vakadeitaka ni na tokoni au tu ga o Jiova ena veigauna se bera mai.”

6. E uqeti ira vakacava na galili na 1 Pita 5:9, 10?

⁶ Vakasamataka nona vukei ira na  tacida era galili o Jiova. (Wilika 1 Pita 5:9, 10.) O Eroni, e iVakadinadina i Jiova duadua ena nona vuvale. E kaya: “E rawarawa meda raica ena ivavakoso ni tu tale ga na nodra leqa. Eda kila nida sasaga kece tiko meda qaravi Jiova, qori e uqeti keimami na sega ni tiko ena dina na lewe ni neimami vuvale.”

7. E vukei iko vakacava na masu?

⁷ Me dua na ituvatuva vinaka vakayalo. Qo e okati kina nomu talaucaka vei Jiova na lomamu. (1 Pita 5:7) E kaya o Marisela: “E vukei au vakalevu noqu gumatua ni masu vei Jiova meu vosota kina na galili.” E vakatulewataka na tacida gone qo me mai qaravi Jiova. E galili ni sega ni tokoni koya e dua na lewe ni nona vuvale. E kaya tale o Marisela: “E vaka ga na Tamaqu dina, au dau masu wasoma vua e veisiga, e kila na lomaqu.”

8. E yaga vakacava nomu wilika na Vosa ni Kalou qai vakasamataka vakatitobu?

⁸ Wilika e veisiga na iVolatabu, vakasamataka vakatitobu na tikinivolatabu e vakaraitaka kina o Jiova nona lomani iko. E kaya e dua na tacida yalewa o Bale, e dau vosota nodratou vakalewai koya na lewe ni nona vuvale: “E vukei au vakalevu noqu dau wilika qai vakasamataka vakatitobu na tikinivolatabu kei na kedra italanoa na tacida era vosota tale ga na ituvaki qo.” Eso na lotu vaKarisito era nanuma vinaka na tikinivolatabu veivakacegui me vaka na Same 27:10 kei na Aisea 41:10. Eso tale era dau rogoca na katokatoni ni ulutaga me vulici nira vakavakarau ena soqoni, se nira wili iVolatabu. Nira cakava qori era sega kina ni galili vakalevu.

9. E yaga vakacava nomu dau tiko ena soqoni?

⁹ Saga mo tiko wasoma ena soqoni. O na vakayaloqaqataki ena ka o rogoca, o na kilai ira vinaka tale ga na mataveitacini. (Iper. 10:24, 25) E kaya o Marisela, sa tukuni oti mai: “Au dau mamadua, ia au saga meu tiko ena soqoni kece, meu vakamacala tale ga. Qo e vukei au meu veivolekati kei ira na lewe ni ivavakoso.”

10. Na cava e bibi kina meda veitokani kei ira na lotu vaKarisito yalodina?

¹⁰ Mo veitokani kei ira na lotu vaKarisito yalodina. Mo qara ena ivavakoso na itokani o rawa ni vuli kina, ya ke ra qase se gone se duidui nodra itovo vakavanua. E kaya na iVolatabu ni “laurai na vuku vei ira na itabaqase.” (Jope 12:12) E levu tale ga na ka era na vulica na qase cake vei ira na itabagone yalodina.  Kena ivakaraitaki, e gone sara o Tevita vei Jonacani. Ia erau marautaka nodrau veitokani voleka. (1 Sam. 18:1) Erau dau veivukei me rau qaravi Jiova ni dredre sara na ituvaki. (1 Sam. 23:16-18) E kaya e dua na tacida o Irinieta, e iVakadinadina i Jiova ena nona vuvale: “O ira na mataveitacini era vaka na noda itubutubu se tacida vakayalo. E rawa ni vakayagataki ira o Jiova mera vakacegui keda.”

11. Na cava mo cakava me dei kina na nomu veitokani?

¹¹ Ke o dau mamadua, de dua ena sega ni rawarawa me so nomu itokani vou. E kaya o Raijeli, e dua na tacida mamadua, e tusaqati ni mai vulica na dina, “Au liaca ni bibi nodra veivuke na taciqu vakayalo ena ivavakoso.” E sega ni rawarawa meda talaucaka na lomada vua e dua tale. Ia na veivosaki va qori e yavu sara ga ni veitokani dredre. Era vinakata na nomu itokani mera vakayaloqaqataki iko mera tokoni iko, ia era vinakata mera kila na ka o vinakata.

12. E yaga vakacava na cakacaka vakaitalatala me so kina nomu itokani vinaka?

¹² E dua na sala vinaka mo veitokani kina kei ira na tacida, ya nida veitomani ena cakacaka vakaitalatala. E kaya o Kara, sa cavuti oti mai: “E levu sara noqu itokani vinaka niu veitomani kei ira na tacida yalewa ena vunau kei na so tale na itavi. E dau tokoni au o Jiova ena veiyabaki sa sivi ni vakayagataki ira na noqu itokani qo.” E yaga dina na noda veitokani kei ira na tacida yalodina qori. E vakayagataki ira o Jiova mera vakayaloqaqataki iko ni o yalolailai, se galili.—Vkai. 17:17.

13. Na cava e noda itavi kece na lewe ni ivavakoso?

¹³ E noda itavi kece na lewe ni ivavakoso meda uqeta na veilomani kei na veiyaloni, me kua kina ni dua e galili. (Joni 13:35) E rawa ni veiuqeti sara na ka eda cakava se tukuna! Rogoca na ka e tukuna e dua na tacida yalewa: “Niu mai vulica na dina, sa noqu vuvale sara ga na ivavakoso. Au mai iVakadinadina i Jiova ga ena nodra veitokoni.” O na vukei ira vakacava na tiko duadua ena dina mera vakila nira lewe ni ivavakoso?

14. Na cava meda cakava meda veitokani vinaka kei ira na ka vou?

¹⁴ Mo vakaliuliu ni veitokani kei ira na ka vou. Eda na tekivu ga nida kidavaki ira na ka vovou ena ivavakoso. (Roma 15:7) Ia e levu tale na ka eda rawa ni cakava, ni toso na gauna eda sa na veitokani vinaka sara. Meda caka vinaka vei ira, meda kauaitaki ira tale ga. Meda kua ni taroga na taro e vakavu madua, ia meda saga ni kila na leqa era sotava tiko. Eso ena rairai dredre mera talaucaka na lomadra, ia meda kua ni vakasaurarataki ira. Saga mo kila na ka e tu e lomadra ni o yalomatuataka na ka o taroga qai vakarogoca vinaka na kena isau. Kena ivakaraitaki, o rawa ni taroga e mai kila vakacava na dina.

15. E rawa nira veivuke vakacava ena ivavakoso na lotu vaKarisito matua?

¹⁵ Era na toso vinaka kece vakayalo na lewe ni ivavakoso nira veikauaitaki na lotu vaKarisito matua, vakabibi o ira na qase ni ivavakoso. Kena ivakaraitaki, e kaya o Melita, e tuberi koya duadua ena dina o tinana: “Au vakavinavinakataki  ira vakalevu na tacida tagane era vaka na tamaqu, era vakayagataka nodra gauna vei au, era kauaitaki au tale ga ena veiyabaki sa sivi. Era dau vakarorogo vinaka niu talaucaka na lomaqu.” E galili e dua na tacida tagane o Mario, ni biuta na dina o nona qasenivuli ni vuli iVolatabu. E kaya: “Era kauaitaki au vakalevu na qase ni ivavakoso. Era dau vosa vei au. Keimami vunau vata, era wasea tale ga vei au eso na ka vakayalo era vulica ena nodra vuli vakataki ira, keimami qito vata tale ga.” Erau sa veiqaravi tiko vakatabakidua o Melita kei Mario ena gauna qo.

16-17. Sala cava eda rawa ni veivuke kina?

¹⁶ Meda dau veivuke. (Kala. 6:10) E kaya o Laitia, e daukaulotu tiko ena dua na vanua e yawa sara mai na nona vuvale: “E vinakati vakalevu na veivuke lalai ena gauna e gadrevi kina. Au nanuma sara ni a coqa noqu motoka ena dua na siga. Niu yaco i vale, dua na ka noqu lomaleqa. Ia e sureti au e dua na veiwatini ina nodrau vale me keitou lai kana, e kakana rawarawa ga. Au sa guilecava na ka keitou kania, ia au se nanuma vinaka tu ga nodrau vakarogoci au vinaka. Au lomavakacegu sara ga!”

¹⁷ Eda dau marautaka kece meda tiko ena soqo vakayalo me vaka na soqo ni tabacakacaka kei na soqo ni veiwasewase nida dau veimaliwai kina, eda veivosakitaka tale ga na porokaramu. Ia e kaya o Kara, sa cavuti oti mai, “Au dau galili sara ga ena soqo ni tabacakacaka kei na soqo ni veiwasewase.” Na vuna? E kaya: “Au dau maliwai ira e vica vata na drau se vica vata na udolu na mataveitacini. Levu ga na gauna era dabe vata vakavuvale. Ia o yau, au sa qai galili ga vakalevu.” Eso tale e dredre mera tiko ena soqo ni veiwasewase se soqo ni tabacakacaka ni sa mate o kedra isa. O kila e dua e sotava tiko na ituvaki qori? O rawa ni sureti koya me tomani kemudou vakavuvale ena soqo e tarava.

18. Nida veisureti, eda na muria vakacava na 2 Korinica 6:11-13?

¹⁸ Veimaliwai kei ira. Saga me duidui  na mataveitacini moni veimaliwai, vakabibi o ira na galili tu. Eda vinakata meda dau “lomasavu,” vakabibi vei ira na galili. (Wilika 2 Korinica 6:11-13.) E kaya o Melita, sa cavuti oti mai: “Keirau marau vakalevu nira dau sureti keirau na mataveitacini me keirau lako ina nodra vale, se me keimami gade vata.” Vakacava e tiko e dua ena ivavakoso o rawa ni sureta?

19. Na gauna cava ena yaga kina noda veimaliwai kei ira na tacida?

¹⁹ Eso na gauna era na marautaka na tacida meda dau veimaliwai. Eso ena rairai dredre mera veimaliwai kei na wekadra ena gauna ni olodei. Eso tale era na rairai rarawa ena so na tikinisiga me vaka na siga e takali kina e dua na lewenivuvale era lomana. Nida lai veimaliwai kei ira na tacida qori, e vakaraitaka nida kauaitaki ira dina.—Fpai. 2:20.

20. Ena uqeti keda vakacava na ka e tukuna o Jisu ena Maciu 12:48-50 nida yalolailai?

²⁰ E levu na vuna e rawa ni galili kina na lotu vaKarisito. Ia meda kua ni guilecava, ni kila vinaka tu o Jiova na kemu ituvaki. E vakarautaka na ka eda gadreva ni vakayagataki ira na tacida. (Wilika Maciu 12:48-50.) Eda vakavinavinakataka na ituvatuva yalololoma i Jiova nida saga ena noda vinaka meda tokoni ira noda vuvale vakayalo. Se mani cava na keda ituvaki, eda na sega ni galili ni tokoni keda tu ga o Jiova!