1. Na cava e cakava vei keda yadua o Jiova?

O JIOVA e vagolei keda yadudua vua. (Joni 6:44) Vakasamataka mada ya. O Jiova e dikeva e vica vata na bilioni na tamata e vuravura, e qai raica e dua na ka talei vei iko. O lomadina, o na rawa ni lomani koya. (1 Vei. 28:9) E kilai iko vinaka o Jiova, e lomani iko tale ga. E veivakacegui dina qori!

2. E vakatauvatana vakacava o Jisu nona kauaitaki ira nona sipi yadua o Jiova?

² E kauaitaki iko vakalevu o Jiova, e kauaitaki ira kece tale ga na tacimu vaKarisito. O Jisu e vakatauvatani Jiova me dua na ivakatawanisipi. E 100 nona sipi na ivakatawa, e yali e dua, na cava ena cakava? Ena “biuta tu mada e 99 ena ulunivanua me vaqara na dua e yali.” Ni kunea na sipi na ivakatawa, ena sega ni cudruva. Ena marau ga. Cava eda vulica eke? E bibi vei Jiova na sipi yadua. E kaya o Jisu: “E sega tale ga ni taleitaka na Tamaqu mai lomalagi me rusa e dua vei ira na lalai qo.”—Maciu 18:12-14.

3. Na cava eda na veivosakitaka ena ulutaga qo?

³ Eda na sega sara ga ni via vakayalolailaitaka e dua na tacida. Eda na qarauna vakacava meda kua ni veivakatarabetaki? Na cava meda cakava ke dua e vakararawataki keda? Eda na sauma na taro qori ena ulutaga qo. Ia meda vulica mada eso na ka me baleti “ira na lalai qo” e tukuni tiko ena Maciu wase 18?

4. O cei o “ira na lalai qo”?

⁴ O “ira na lalai qo” ya o ira na tisaipeli kece i Jisu e duidui  na yabaki ni nodra bula. Se mani vakacava na yabaki ni nodra bula, era vaka na “gone lailai” oya nira yalorawarawa me vakavulici ira o Jisu. (Maciu 18:3) Ena rairai duidui nodra isususu kei na itovo vakavanua, duidui na itovo ni nodra rai kei na ivakarau. Era vakaraitaka kece nira vakabauti Karisito. E lomani ira kina vakalevu o koya.—Maciu 18:6; Joni 1:12.

5. Na cava nona rai o Jiova ni dua e vakatarabetaka se vakararawataka e dua nona tamata?

⁵ Era talei kece vei Jiova o “ira na lalai qo.” Meda kila nona rai, da vakasamataka mada na noda rai me baleti ira na gone. Era ka talei vei keda. Eda vinakata meda taqomaki ira nira malumalumu, lailai nodra kila, e sega tale ga vei ira na yalomatua e tu vei keda na qase. Eda sega ni taleitaka meda raica ni vakararawataki e dua, ia eda na rarawa se cudru sara ga ke dua e vakararawataka na gone. Ena sala vata ga qori, e vinakata o Jiova me taqomaki keda. E rarawa se cudru sara ga ni dua e vakatarabetaka se vakararawataka e dua nona dauveiqaravi!—Aisea 63:9; Mari. 9:42.

6. Me vaka e tukuni ena 1 Korinica 1:26-29, na cava na rai ni vuravura me baleti ira na tisaipeli i Jisu?

⁶ Sala cava tale era vaka kina na “lalai qo” na tisaipeli i Jisu? O cei e okata na vuravura me bibi? O ira na vutuniyau, rogo, kei ira na veiliutaki. Kena veibasai, o ira na tisaipeli i Jisu era sega soti ni bibi, era beci na “lalai qo.” (Wilika 1 Korinica 1:26-29.) Ia e sega ni raici ira va qori o Jiova.

7. Na rai cava e vinakata o Jiova me tiko vei keda me baleti ira na tacida?

⁷ E lomani ira kece nona dauveiqaravi o Jiova, se ra qaravi koya tiko me vica vata na yabaki, se ra vou ena dina. O ira kece na tacida era bibi vei Jiova, e dodonu mera bibi tale ga vei keda. Eda vinakata meda “lomani ira na mataveitacini kece,” sega ni so ga vei ira. (1 Pita 2:17) Meda tu vakarau ni taqomaki ira qai kauaitaki ira. Ke da kila nida vakararawataka se vakacudruya e dua, meda kua ni vakalecalecava meda nanuma ni dodonu me vosoti keda qai guilecava. Na cava era na rairai cudru kina eso? De dua ena vuku ni nodra isususu, eso na mataveitacini era dau beci ira. Eso tale era vou ena dina, era se sega ni vulica mera dau veivosoti. Se mani vakacava na ituvaki, meda saga na veiyaloni. Ia eso era dau cudrucudru tu ga. E bibi mera kila ni qo e sega ni itovo vinaka, ena vinakati mera cakacaka kina. Bibi qo me rawa ni lomavakacegu kina, me vinaka tale ga nona veiwekani kei ira tale eso.

8. Na ivakarau ni rai cava e tu vei ratou na tisaipeli i Jisu?

⁸ Na cava e veivosakitaki ira kina na “lalai qo” o Jisu? Era tarogi koya nona tisaipeli: “O cei mada e levu duadua ena Matanitu vakalomalagi?” (Maciu 18:1) E levu na Jiu ena gauna oya era raica vakabibi na itutu. E kaya e dua na dauvakadidike: “Levu era saga ena nodra bula taucoko mera rokovi, kilai, rogo, vakadonui, mera dokai tale ga.”

9. Na cava me ratou cakava na tisaipeli i Jisu?

⁹ E kila o Jisu ni vinakati vei ratou nona tisaipeli me ratou sasaga vakaukaua me ratou cavuraka na yalo ni veisisivi ratou susugi kina ena ivakarau vakaJiu. E tukuna vei ratou: “O koya e levu vei  kemudou me okati koya me gone duadua, o koya e liu tiko me dauveiqaravi.” (Luke 22:26) Eda na vaka e dua e “gone duadua” nida “okati ira na kena vo mera uasivi” keda. (Fpai. 2:3) Nida vakaraitaka tiko ga na itovo qo, eda na sega ni veivakatarabetaki.

10. Na ivakasala cava i Paula meda tugana e lomada?

¹⁰ Era uasivi keda na tacida ena so na ka. Ena rawarawa nida raica qori nida kauaitaka ga nodra itovo vinaka. Meda tugana e lomada nona ivakasala na yapositolo o Paula vei ira e Korinica: “Na cava o nanuma kina ni o duatani? Na cava e tu vei iko a sega ni soli vei iko? Ke mani soli vei iko, na cava o dokadoka kina? Vaka sara ga era sega ni soli vei iko!” (1 Kor. 4:7) Eda sega ni vinakata mera vakalevulevui keda eso tale, se meda nanuma nida uasivi ira. Ke veiuqeti nona vunau e dua na tacida tagane, se rawarawa vua e dua na tacida yalewa me tekivuna na vuli iVolatabu, bibi me rau vakacaucautaki Jiova ga.

11. Na cava eda vulica ena vosa vakatautauvata i Jisu me baleta na tui kei na nona dauveiqaravi?

¹¹ Ni oti ga nona vakadreti ira nona imuri o Jisu mera kua ni veivakatarabetaki, e cavuta sara na vosa vakatautauvata me baleta e dua na tui kei na nona dauveiqaravi. E bokoca na tui na dinau levu ni nona dauveiqaravi ni sa sega ni sauma rawa. E muri, na dauveiqaravi qori e sega ni via bokoca na dinau lailai ni dua tale na dauveiqaravi. Kena itinitini, e biuti koya na tui e valeniveivesu ni sega ni dauloloma. Cava eda vulica kina? E kaya o Jisu: “Ena sega tale ga ni vosoti kemuni na Tamaqu mai lomalagi ke sega ni vu mai lomamuni na nomuni vosoti ira na tacimuni.”—Maciu 18:21-35.

12. Ke da sega ni veivosoti, eda na vakararawataki ira vakacava eso tale?

¹² Na ka e cakava na dauveiqaravi ya e vakaleqai koya kei ira tale eso. Kena imatai, e sega ni veinanumi se lomana nona itokani dauveiqaravi ni “balati koya i valeniveivesu me sauma kece sara na nona dinau.” Kena ikarua, e vakararawataki ira nona itokani dauveiqaravi nira raica na ka e cakava. “Nira raica eso nona itokani dauveiqaravi na ka e yaco, dua na ka nodra rarawa.” Ena salavata ga qori, na ka eda cakava e vakararawataki ira eso tale. Ke cala vei keda e dua qai sega nida vosoti koya, na cava ena yaco? Kena imatai, eda vakararawataki koya nida sega ni vosoti koya, sega ni kauaitaki koya, se lomani koya. Kena ikarua, era na rarawa eso ena ivavakoso nira raica nida sega ni veiyaloni kei na tacida ya.

13. Na cava o vulica mai na ka e sotava e dua na painia?

¹³ Nida vosoti ira na tacida, eda na vinaka ga kina kei ira tale ga na tacida. Qori na ka e sotava e dua na painia, eda na vakatoka o Crystal. E vakararawataki koya e dua na tacina yalewa ena ivavakoso. E kaya o Crystal: “Eso na gauna e dau mosimosi sara ga na ka e tukuna, e vaka na isua ni isele. Au sega mada ga ni via vodo motoka vata kei koya ena cakacaka vakaitalatala. Au sa sega ni gugumatua, au sega tale ga ni marau.” E nanuma o Crystal ni tiko na vuna vinaka me rarawa kina. Ia e sega ni cudruvi tacina tiko ga, se lomalomani koya. E yalomalumalumu  ni muria na ivakasala vakaivolatabu ena ulutaga “Veivosoti Mai Vu ni Yalomu” e tabaki ena Vale ni Vakatawa Okotova 15, 1999. E vosota na tacina o Crystal. E kaya: “Au sa qai kila qo ni o keda kece eda saga tiko meda tokara na isulu vou. E vosoti keda vakarawarawa o Jiova e veisiga. Au vakila sara ga ni taluva e dua na icolacola levu. Au sa marau tale.”

14. Me vaka e tukuni ena Maciu 18:21, 22, na cava e rairai dredre me cakava na yapositolo o Pita? Cava eda vulica ena ka e tukuna o Jisu?

¹⁴ Eda kila ni dodonu meda veivosoti, qori na ka e dodonu meda cakava. Ia eso na gauna e dredre, e rairai va qori nona rai na yapositolo o Pita ena so na gauna. (Wilika Maciu 18:21, 22.) Na cava ena vukei keda? Kena imatai, eda vakasamataka vakatitobu na levu ni nona vosoti keda o Jiova. (Maciu 18:32, 33) E sega ni ganiti keda qori, ia e cakava vakarawarawa. (Same 103:8-10) Ena gauna vata qori, “e dodonu meda veilomani tale ga.” E dodonu ga meda veivosoti. E bibi meda vosoti ira na mataveitacini. (1 Joni 4:11) Kena ikarua, vakasamataka vakabibi na ka ena yaco nida veivosoti. Eda rawa ni vukei koya e cala vei keda, e duavata tiko ga na ivavakoso, eda taqomaka noda veitokani kei Jiova, e taluva tale ga vei keda e dua na icolacola bibi. (2 Kor. 2:7; Kolo. 3:14) Kena iotioti, masu vei Jiova ni kerei keda meda veivosoti. Me kua ni vakaleqa o Setani na noda veiyaloni kei ira na tacida. (Efeso 4:26, 27) E bibi nona veivuke o Jiova meda kua ni coriti ena dai ni Setani.

15. Me salavata kei na Kolosa 3:13, na cava meda cakava ke vakaleqai keda na ka e cakava e dua na tacida?

¹⁵ Vakacava ke vakaleqai iko vakalevu e  dua na ka e cakava na tacimu? Na cava mo cakava? Sasaga sara mo drau veiyaloni tiko ga. Gumatua ni masu vei Jiova. Kerei koya me vakalougatataka na tacida e vakararawataki iko, me vukei iko tale ga mo raica nona itovo vinaka e taleitaka o Jiova. (Luke 6:28) Ke o sega ni guilecava na ka e cakava o tacimu, vakasamataka na sala mo torovi koya kina. E vinaka mo nanuma tiko ni a rairai sega ni nakita me vakararawataki iko. (Maciu 5:23, 24; 1 Kor. 13:7) Ni o vosa vua, mo nanuma tiko ni sega ni ca na nona inaki. Ia vakacava ke sega ni via veiyaloni? Kua ni soro. “Moni dau yalorawarawa, ni dau veivosoti tale ga vakarawarawa.” (Wilika Kolosa 3:13.) Koya e bibi sara, kua ni yaloca tiko ga ni rawa ni vakaleqa nomu veitokani kei Jiova. Me kua sara ni dua na ka e vakatarabetaki iko. Nomu cakava qori, o vakaraitaka ni o lomani Jiova vakalevu ni vakatauvatani kei na dua tale na ka.—Same 119:165.

16. Na cava na noda itavi yadua?

¹⁶ Eda vakavinavinakataka ni rawa nida qaravi Jiova ena duavata nida “dua ga na qelenisipi” ena nona veidusimaki e “dua na ivakatawa”! (Joni 10:16) E kaya na ivola iSoqosoqo e Cakava na Loma i Jiova, ena tabana e 165: “Ni o marautaka tiko na duavata, e nomu itavi mo vakamareqeta.” E bibi gona meda “vulica meda raici ira na tacida vakayalo mai na rai i Jiova.” E raici keda kece o Jiova meda ka talei. Vakacava e va tale ga qori na nomu raici ira na mataveitacini? O Jiova e raica qai vakamareqeta na ka kece o cakava mo vukei ira kina, mo karoni ira tale ga.—Maciu 10:42.

17. Na cava eda vakadeitaka meda cakava?

¹⁷ Eda lomani ira na tacida. O koya gona, eda ‘vakadeitaka meda kua ni biuta e dua na ka me tarabe se bale kina na tacida.’ (Roma 14:13) Eda okati ira na tacida mera uasivi keda. Eda vinakata tale ga meda vosoti ira mai vu ni lomada. Me kua ni dua na ka era cakava meda tarabe kina. Meda “guta mada ga na bula veiyaloni kei na ka ena vakauqeti keda yadua.”—Roma 14:19.