ENA gauna makawa era dau solia na Isireli eso na ilavo mera tokona na sokalou dina. Ia ena gauna i Jisu e dredre qai tara bi na saumi ivakacavacava.

Me tokoni na sokalou dina ena valeniveitavaki, oti ya ena valenisoro, mera sauma na Jiu uabula e veimama na sikeli (se rua na drakema). Ena imatai ni senitiuri na ilavo qori e dau voli kina na isoro, e vakavinakataki tale ga kina na valenisoro e tara o Eroti. Era tarogi Pita eso na Jiu ke dau saumi ivakacavacava o Jisu, ia e sega ni saqata na Karisito na saumi ivakacavacava. E tukuna mada ga vei Pita na vanua me lai kau mai kina na ivakacavacava qori.—Maciu 17:24-27.

Dua tale na ivakacavacava era sauma na tamata ni Kalou ena gauna oya na ikatini, ya na ikatini ni nodra vuaniqele se kedra isau. (Vunau 27:30-32; Tiko 18:26-28) Era kaya na iliuliu ni lotu me qarauni me saumi sara ga na ivakacavacava ena kakana draudrau kece, vaka kina na “midi kei na dili kei na kumini.” E sega ni vakalewa o Jisu na kena saumi na ikatini, ia e vakavotuya ga na nodra veivakaisini na vunivola kei na Farisi.—Maciu 23:23.

Ena gauna qori era veiliutaki tiko na kai Roma, era lavaka e levu na ivakacavacava vei ira na lewenivanua. Kena ivakaraitaki, o ira na itaukeiniqele era na sauma na ivakacavacava ena ilavo se na iyau. E tukuni nira sauma e rauta ni 20 ina 25 na pasede. E tiko tale ga na ivakacavacava mera sauma na Jiu yadua. Na ivakacavacava sara ga qo era taroga na Farisi vei Jisu. E vakavotuya na rai donu me baleta na saumi ni ivakacavacava, e kaya: “O koya gona, ni solia lesu vei Sisa na ka e nei Sisa, vua na Kalou na ka e nona na Kalou.”—Maciu 22:15-22.

E tiko tale ga na ivakacavacava e saumi me baleta na ka e volitaki, se voli mai na dua na vanua. E kumuni na ivakacavacava qori ena ikelekele ni waqa, ikawakawa, gaunisala e muri vakalevu kei na icurucuru ina tauni se makete.

E tarabi sara ga vei ira na vakarurugi vei Roma na saumi ivakacavacava. E tukuna e dua na daunitukutuku makawa ni Roma o Tacitus, ni se veiliutaki tiko o Empara Tiperiu ni tiko e vuravura o Jisu, “e oca sara ga o Siria kei Jutia na saumi ivakacavacava, rau mani kerea me vakalailaitaki.”

Sa qai ikuri ga ni icolacola na iwalewale e kumuni kina na ivakacavacava. O koya me qarava na cakacaka qo me sauma e dua na ilavo levu. Oti qori ena sauma eso tale mera lai kumuna mai na ivakacavacava. Kena ibalebale o ira kece qori era na rawatubu kina. Kena irairai ni dau vakacakacakataki ira na kumuni ivakacavacava o Sakiusa. (Luke 19:1, 2) Sa rauta me levu era cati ira na dau kumuni ivakacavacava, era beci ira tale ga.