E vola o Paula: ‘Au mate ena vuku ni lawa ena noqu muria na lawa, ena vuku ni ka qo au bula kina vua na Kalou.’—Kala. 2:19.

Na ka e vola o Paula e salavata kei na dua na tikina bibi e tukuna vei ira na ivavakoso e Kalatia ena yasayasa vakaRoma. Eso na lotu vaKarisito e kea era vakamuai vei ira na qasenivuli lasu. O ira na qasenivuli qori era vakavulica tiko ni vinakati mera muria na Lawa a soli vei Mosese, me rawati kina na bula tawamudu, vakauasivi na veika e vauca na veicilivi. Ia e kila o Paula ni sega ni vinakata na Kalou mera cilivi nona dauveiqaravi. E momona na nona ivakamacala qai vakacala na nodra ivakavuvuli lasu, e vakadeitaka tale ga na nodra vakabauta na mataveitacini ena isoro ni veivoli i Jisu Karisito.—Kala. 2:4; 5:2.

E vakaraitaka vakamatata na iVolatabu ni gauna e mate kina e dua, sa sega ni kila tale e dua na ka se lewai koya na ka e tu wavoliti koya. (Dauv. 9:5) Ni tukuna o Paula: “Au mate ena noqu muria na lawa,” e vakaibalebaletaka ni sa sega ni vauci ena Lawa e soli vei Mosese. Ia e vakadeitaka o Paula ni nona vakabauta na isoro ni veivoli sa mai “bula kina vua na Kalou.”

Na veisau ni kena ituvaki o Paula e yaco ena ‘vuku ni lawa.’ Ena sala cava? Sa qai vakamacalataki oti ga ni “sega ni okati e dua me yalododonu ni muria na lawa, ena vuku ga ni nona vakabauti Jisu Karisito.” (Kala. 2:16) E rawati e dua na ka bibi ena Lawa. E vakamacalataka o Paula vei ira e Kalatia: “A caka me vakavotui kina na ivalavala ca, me yaco mada mai na kawa a tukuni vua na vosa ni yalayala.” (Kala. 3:19) Io, e vakavotuya na Lawa ni sega ni rawa vei ira na tamata ivalavala ca mera muria vinaka na Lawa, e vinakati tale ga e dua na isoro uasivi. O koya gona, e vukei ira na lewenivanua na Lawa mera kila na “kawa,” ya na Karisito. Ni vakaraitaka e dua na nona vakabauti Jisu Karisito, ena okati kina me yalododonu vua na Kalou. (Kala. 3:24) E mai kila na tikina qo o Paula ni dusimaki koya na Lawa me kilai Jisu qai vakabauti koya. O Paula e “mate” gona ni “muria na lawa” qai ‘bula vua na Kalou.’ Sa sega ni lewai koya na Lawa, sa lewai koya ga na Kalou.

E dua tale ga na vakasama va qori e vola o Paula vei ira e Roma. “Raveitacini, oni a mate tale ga ena Lawa ena vuku ni yago i Karisito . . . Eda sa sereki mai na Lawa, nida a mate ena ka a vauci keda tu.” (Roma 7:4, 6) E sega ni vakaibalebaletaka o Paula ena tikinivolatabu qori kei na Kalatia 2:19, ni mate ni a valavala ca ena Lawa. Ia e tukuna tiko ga vakadodonu na veisereki. Sa sega ni lewai koya kei na so tale era vakataki koya na Lawa. Era sa sereki nira vakabauta na isoro i Karisito.