1. Na cava e tukuni mera cakava na ilala levu?

E SOQO vata mai e dua na ilala levu e duidui nodra vosa, era gole mai na levu na matanitu. Dua na ka veivakurabuitaki e yaco ena siga ya. E dua na ilala Jiu era vosataka na nodra vosa na vulagi! E veivakurabuitaki dina qori, ia na ka era tukuna na Jiu vei ira kei na ka e tukuna na yapositolo o Pita e veivakurabuitaki sara vakalevu. E okati kina na nodra vakabulai ke ra vakabauti Jisu Karisito. E uqeti ira sara ga na ka era rogoca, era mani taroga: “Na cava me keimami cakava?” E tukuna o Pita: “Ni papitaiso kece.”—Caka. 2:37, 38.

2. Na cava eda na veivosakitaka ena ulutaga qo? (Raica na iyaloyalo ena waqana.)

² E duatani sara na ka e yaco tarava. Rauta ni 3,000 era papitaiso ena siga oya era mai tisaipeli i Karisito. Qori na itekitekivu ni cakacaka ni veivakatisaipelitaki levu e vakarota o Jisu mera cakava na nona imuri. E tomani na cakacaka qori ina ika21 ni senitiuri. Ena noda gauna, ena sega ni rawa nida vukea e dua me papitaiso ena loma ga ni vica na aua. Ena taura toka e vica na vula, dua na yabaki se sivia me rawata o gonevuli na isausau qori. Ke o caka vuli iVolatabu tiko ena gauna qo, o kila ni ka ni sasaga na cakacaka ni veivakatisaipelitaki. Ena veivosakitaki ena ulutaga qo na sala mo vukea kina nomu vuli iVolatabu me papitaiso me tisaipeli i Karisito.

3. Me vaka e volai ena Maciu 28:19, 20, na cava me cakava o gonevuli me papitaiso kina?

³ E bibi me muria o gonevuli na ka e vulica tiko ena iVolatabu ni bera ni papitaiso. (Wilika Maciu  28:19, 20.) Ni muria o gonevuli na ka e vulica, ena vaka na “tamata vuku” ena vosa vakatautauvata i Jisu e kelikeli vakatitobu me tara na nona vale ena delanivatu. (Maciu 7:24, 25; Luke 6:47, 48) Eda na vukei koya vakacava me muria na ka e vulica tiko? Meda veivosakitaka mada e tolu na vakatutu.

4. O na vukei nomu gonevuli vakacava me sasaga tiko ga me lai papitaiso sara? (Raica tale ga na kato “ Vukei Nomu Gonevuli me Tiko Nona iSausau, me Rawata Tale Ga.”)

⁴ Vukei nomu gonevuli me tiko nona isausau. Na vuna? Vakasamataka mada na ivakatautauvata qo: Ke o na gole tiko ena dua na ilakolako balavu, o na vinakata mo kele ena so na vanua rairai vinaka. Ena sega ni balavu kina na nomu ilakolako. E va tale ga qori o nomu gonevuli. Ke biuta eso na isausau lalai qai rawata, ena liaca ni rawa ni sauva nona isausau me papitaiso. Vakayagataka na kato “iSausau” ena ivola Marau me Tawamudu! mo vukei nomu gonevuli me toso. Ni cava e dua na lesoni, veivosakitaka kei nomu gonevuli se veisemati vakacava nona isausau kei na ka e vulica. Ke o nanuma tiko me dua tale nona isausau, vola ena vanua e volai kina “Eso tale.” Drau veivosakitaka wasoma na isausau e vinakata me rawata ena dua na gauna lekaleka, kei na kena ena taura toka na gauna.

5. Me vaka e volai ena Marika 10:17-22, na cava e tukuna o Jisu vua na tagane vutuniyau? Na vuna?

⁵ Vukei nomu gonevuli me veisautaka eso na ivakarau ni bula. (Wilika Marika 10:17-22.) E kila o Jisu ni dredre vua na tagane vutuniyau me volitaka na ka kece e tu vua. (Mari. 10:23) Ia e tukuna vua o Jisu me cakava na veisau levu qo. Na vuna? Ni lomani koya. Eso  na gauna eda rairai tu suka meda uqeti gonevuli me muria na ka sa vulica tiko, nida nanuma ni se sega ni kena gauna me veisau kina. Ena rairai taura na gauna mera biuta na itovo makawa, mera sulumaka na itovo vou. (Kolo. 3:9, 10) Ia na totolo ga ni nomudrau veivosakitaka na tikina qo, ena totolo tale ga ni cakava na veisau o gonevuli. Ena vakaraitaka qori nomu kauaitaki koya dina.—Same 141:5; Vkai. 27:17.

6. Na cava meda vakayagataka kina na taro vakavure vakasama?

⁶ E yaga tale ga na taro vakavure vakasama, ya noda tarogi gonevuli me vakamacalataka nona rai me baleta e dua na ulutaga. Vakayagataka na taro va qori mo kila kina nona rai se ka e vakabauta. Ke wasoma nomu cakava qori, ena rawarawa nomudrau veivosakitaka eso na ulutaga e dredre me vakabauta. E tiko sara ga e levu na taro vakavure vakasama ena ivola Marau me Tawamudu! Kena ivakaraitaki, e tarogi ena lesoni 04: “Na cava nona rai o Jiova ni o vakayagataka na yacana?” Dua na taro e tiko ena lesoni 09: “Na cava eso na ka o via masulaka?” Ena rairai taura na gauna me vakasamataka na isau ni taro. O rawa ni vukei koya me vakamacala mai na tikinivolatabu kei na iyaloyalo.

7. Rawa ni yaga vakacava nida vakayagataka na italanoa dina?

⁷ Ni sa kila o gonevuli na ka me cakava, vakayagataka na italanoa dina mo uqeti koya me cakava sara. Kena ivakaraitaki, ke dredre vua me dau tiko ena soqoni, o rawa ni vakaraitaka na vidio E Kauaitaki Au o Jiova e tiko ena iwasewase “iKuri” ena lesoni 14. Levu na lesoni ena ivola Marau me Tawamudu!, o na raica kina na italanoa ena iwasewase “Vakekeli” se “iKuri.” * Qarauna mo kua ni vakatauvatani nomu gonevuli kei na dua tale ni o kaya, “Ke sa cakava o koya, o rawa tale ga ni cakava.” Qori na ka me vakasamataka o gonevuli. Ia mo veivosakitaka eso na tikina bibi e uqeti koya e vakaraitaki ena vidio me muria na ivakavuvuli vakaivolatabu. De dua mo tukuna e dua na tikinivolatabu e vakamacalataki se dua na ka e vakayacori. Vakabibitaka na sala e vukei koya kina o Jiova.

8. Eda na vukei gonevuli vakacava me lomani Jiova?

⁸ Vukei nomu gonevuli me lomani Jiova. Ena sala cava? Raica na gauna veiganiti kece mo vakabibitaka kina na itovo i Jiova. Vukei nomu gonevuli me kila ni Kalou mamarau o Jiova, e dau tokoni ira na lomani koya. (1 Tim. 1:11; Iper. 11:6) Vakaraitaka vua ni na yaga na ka e vulica tiko, vakamacalataka tale ga ni qori e vakaraitaka ni lomani koya o Jiova. (Aisea 48:17, 18) Ena uqeti gonevuli vakalevu me cakava na veiveisau ni sa lomani Jiova vakalevu.—1 Joni 5:3.

9. Me vaka e tukuni ena Marika 10:29, 30, na cava ena uqeti gonevuli me vakuai koya me rawa ni papitaiso?

⁹ Me toso nomu gonevuli me papitaiso sara, ena vinakati me vakuai koya. Me vaka ga na tagane vutuniyau sa tukuni oti mai, eso na gonevuli ena rairai vinakati mera vakuai ira mai na veika  vakayago. Ke sega ni salavata kei na ivakavuvuli vakaivolatabu na nona cakacaka saumi, ena rairai vinakati mera veisautaka. Levu era na rairai vakanadakuya nodra itokani era sega ni lomani Jiova. Eso tale era na rairai sega ni ciqomi vei ira na lewe ni nodra vale nira cati keda na iVakadinadina i Jiova. E tukuna o Jisu ni na rairai dredre mera vakuai ira eso mai na veika qo. Ia e yalataka nira na sega ni rarawa o ira na muri koya. Era na vakalougatataki ga vakalevu nira lewena e dua na vuvale vakayalo era dau veilomani. (Wilika Marika 10:29, 30.) O na vukei nomu gonevuli vakacava me yaga vua na isolisoli totoka qo?

10. Na cava o vulica ena ka e tukuna o Manuel?

¹⁰ Mo veitokani kei nomu gonevuli. E bibi mo vakaraitaka vei nomu gonevuli ni o kauaitaki koya. Na vuna? Dikeva na ka e tukuna o Manuel, e tiko e Mexico. E nanuma lesu na gauna e vuli iVolatabu tu kina, e kaya: “Ni bera ni keirau vuli, e dau taroga o qasenivuli seu vakacava tiko. E vukei au meu kua ni taqaya, au rawa kina ni talanoataka vua eso tale na ka. Au vakila ni kauaitaki au sara ga.”

11. Ena rawa ni yaga vakacava vei ira na gonevuli na nodra veimaliwai kei qasenivuli?

¹¹ Mo dau veimaliwai kei nomu gonevuli, me vaka ga e cakava o Jisu kei ratou na nona imuri. (Joni 3:22) Ke toso vinaka tiko nomu vuli iVolatabu, rawa ni sureta i vale mo drau gunuti se kana vata, se sarava e dua na porokaramu ni JW Broadcasting. Ena rawa ni taleitaka sara qori ena gauna ni olodei ni na rairai galili tu kina. E kaya o Kazibwe, e tiko e Uganda: “Au vakabauta niu vulica e levu sara na ka me baleti Jiova niu veimaliwai kei na noqu qasenivuli mai na neirau vuli. Au raica na sala e karoni ira kina na nona tamata o Jiova kei na  nodra mamarau. Qori sara ga na ka au vinakata.”

12. Na cava me duidui kina na mataveitacini era tomani keda ena vuli iVolatabu?

¹² Sureta eso tale na dautukutuku ina vuli iVolatabu. Eso na gauna eda nanuma ni rawarawa meda gole duadua ga, se me dua tiko ga na dautukutuku me tomani keda. De dua ena rawarawa qori ia ena yaga vakalevu vei ira noda vuli iVolatabu nira tomani keda eso tale na mataveitacini. E kaya o Dmitrii, e tiko mai Moldova: “E duidui tu na ivakarau ni nodra ivakamacala na dautukutuku era gole mai na noqu vuli. Au mai kila eso tale na sala meu muria kina na ka au vulica tiko. Au sega tale ga ni madua ena imatai ni gauna au tiko kina ena soqoni niu sa veikilai tiko kei na levu na mataveitacini.”

13. Na cava meda vukei gonevuli kina me tiko ena soqoni?

¹³ Vukei nomu gonevuli me tiko ena soqoni ni ivavakoso. Na vuna? E vakarota o Jiova mera soqoni vata na nona dauveiqaravi, ni bibi ena noda sokalou. (Iper. 10:24, 25) Kena ikuri, o ira na tacida era lewe ni noda vuvale vakayalo. Nida soqoni vata kei ira, e vaka ga nida vakayagataka vata e dua na kakana vinaka e vale. Ni o vukei nomu gonevuli me tiko ena soqoni, o sa vukei koya sara tiko ga ena dua na ka bibi me rawa ni papitaiso kina. Ia ena rairai dredre vua me cakava qori. Ena vukei gonevuli vakacava na ivola Marau me Tawamudu! me kua ni dua na ka e vakalatilati ena nona tiko ena soqoni?

14. Eda na uqeti gonevuli vakacava me tiko ena soqoni?

¹⁴ Vakayagataka na lesoni 10 ena ivola Marau me Tawamudu! me uqeti nomu gonevuli. Era kerei na dautukutuku matua mera vakayagataka na lesoni qo ni bera ni sevutaki na ivola. Era kaya ni uqeti ira nodra gonevuli mera tiko ena soqoni. Mo kua ni waraka sara na lesoni 10 mo qai sureti nomu gonevuli me tiko ena soqoni. Sureti koya ena gauna totolo duadua. Mo cakava wasoma. E duidui na gonevuli, e duidui tale ga na ka era sotava. Mo kauaitaka gona na kena ituvaki qai raica na sala mo veivuke kina. Kua ni yalolailai ke taura na gauna me qai tiko ena soqoni. Mo yalovosovoso, sureti koya tiko ga.

15. Na cava ena rairai lomaleqataka noda gonevuli?

¹⁵ O se nanuma tiko na gauna o dau lomaleqataka kina mo dua na iVakadinadina i Jiova? De o nanuma ni sega tu ga ni rawa mo vunau e veivale. Se o rairai leqataka nira na tusaqati iko nomu lewenivuvale se itokani. Kevaka kina, o na kila vinaka na ivakarau ni rai nei nomu gonevuli. E kaya o Jisu nira na va qori eso. Ia e vakayaloqaqataki ira nona imuri mera kua ni rere ni qaravi Jiova. (Maciu 10:16, 17, 27, 28) E vukei ira vakacava nona imuri o Jisu mera kua ni lomaleqa? O na muria vakacava nona ivakaraitaki?

16. Eda na vakavulici gonevuli vakacava me wasea na ka e vakabauta?

¹⁶ Vukei gonevuli tiko ga me wasea nona vakabauta. De dua ratou rere na tisaipeli i Jisu ni talai ratou me ratou lai vunau. Ia e vukei ratou o Jisu ni tukuna na vanua me ratou vunau kina kei na itukutuku me ratou kacivaka. (Maciu 10: 5-7) O na vakatotomuri Jisu vakacava? Vukei nomu gonevuli me kila na vanua me vunau kina. Me kena ivakaraitaki, tarogi koya ke kila e dua ena yaga vua nona vulica na ka dina vakaivolatabu. Oti, vukei koya me vakarautaka na ka me tukuna ni o vakaraitaka vua na sala rawarawa me wasea kina na ka dina qori. Ni veiganiti, drau vakatovotovotaka ni vakayagataki na ulutaga “Ka Era Kaya Eso” kei na “Ke Taroga e Dua,” e laurai ena ivola Marau me Tawamudu! Ni o cakava qori, o sa vakavulici nomu gonevuli me vakayagataka na iVolatabu me rawarawa nona ivakamacala, me vosa tale ga vakayalovinaka.

17. Eda na vakayagataka vakacava na Maciu 10:19, 20, 29-31 meda vukei noda gonevuli me nuitaki Jiova?

¹⁷ Vukei nomu gonevuli me nuitaki Jiova. E vakadeitaki ratou na nona tisaipeli o Jisu ni na vukei ratou o Jiova ni lomani ratou. (Wilika Maciu 10:19, 20, 29-31.) Vakadeitaka vei nomu gonevuli ni na vukei koya tale ga o Jiova. O rawa ni vukei koya me nuitaki Jiova ni drau masulaka vata na nona isausau. E kaya o Franciszek, e tiko mai Poladi: “E dau cavuta o noqu qasenivuli na noqu isausau ena nona masu. Niu raica ni rogoca o Jiova na masu nei noqu qasenivuli, au sa tekivu masu tale ga. Au vakila na veivuke i Jiova ena gauna au vinakata kina meu cegu mai na noqu cakacaka vou me vica na siga, meu rawa ni tiko ena soqoni kei na soqo ni veiwasewase.”

18. Na cava na rai i Jiova me baleta nodra cakacaka na qasenivuli lotu vaKarisito?

¹⁸ O Jiova e kauaitaki ira vakalevu noda vuli iVolatabu. E kila vinaka nodra cakacaka vakaukaua na qasenivuli lotu vaKarisito mera vukea e levu tale mera toro voleka vua, e lomani ira tale ga. (Aisea 52:7) Ke sega tiko nomu vuli iVolatabu ena gauna qo, o se rawa tiko ga ni vukei ira na vuli iVolatabu mera toso mera papitaiso ni o tomani ira na dautukutuku ena nodra vuli iVolatabu.