E KAYA o Lisa: * “E uqeti au sara ga na nodra yalovinaka na mataveitacini.” E vakaibalebaletaka tiko na ka e uqeti koya me taleitaka na ka dina. E tautauvata tale ga kei na ka e kaya o Ane: “E uqeti au na nodra yalovinaka, sega ni ka era vakavulica.” Rau taleitaka tiko ena gauna qo na tacida qori na wili iVolatabu kei na nodrau vakasamataka vakatitobu, ia e uqeti rau vakalevu na yalovinaka.

Eda na vakaraitaka vakacava na yalovinaka ena uqeti ira eso tale? Meda veivosakitaka mada qo e rua: na yameda kei na noda itovo. Oti eda na veivosakitaka o cei meda vakaraitaka kina na yalovinaka.

Na yalewa vakawati maqosa e vakamacalataki ena Vosa Vakaibalebale wase 31 e tiko e yamena “na lawa ni yalovinaka.” (Vkai. 31:26) E lewa “na lawa” qori na itautau ni nona vosa kei na ka e tukuna. E vinaka tale ga me tiko e yamedra na tama “na lawa” qori. Levu na itubutubu era kila vinaka ni vosa kaukaua era na rairai sega ni vakarorogo kina na luvedra, se muria na vosa. E bibi gona mera vosa ga vakayalovinaka.

Ke o itubutubu se sega, o na lewa vinaka vakacava na yamemu mo rawa ni vosa vakayalovinaka? Eda na kila qori ena imatai ni cegu ni Vosa Vakaibalebale 31:26: “E vosa vakavuku na gusuna.” E okati kina noda digia vinaka na vosa, me tau tale ga vakavuku. E yaga vakalevu nida taroga, ‘Ena veivakacudrui na ka au vakarau tukuna qo, se vakaseavutaka na cudru?’ (Vkai. 15:1) Io, e ka vakavuku meda vakasama rawa ni bera nida vosa.

E kaya e dua tale na vosa vakaibalebale: “Na vosa vakalialia e vaka na isua ni iseleiwau.” (Vkai. 12:18) Nida vakasamataka na sala ena uqeti ira kina eso tale na ka eda kaya kei na kena itautau, eda na rawa ni qarauna vinaka sara na ka eda tukuna. Io, na noda muria tiko ga “na lawa ni yalovinaka” ena uqeti keda me kua ni mosimosi se kaukaua na itautau ni noda vosa. (Efeso 4:31, 32) Eda na sosomitaka na vosa kei na vakasama e sega ni vinaka ena vosa e tau ena yalovinaka, veiuqeti, e taleitaki. O Jiova e ivakaraitaki vinaka ena tikina qo ni vakaceguya sara ga e dua na nona dauveiqaravi o Ilaija ena gauna e rere voli kina. Na agilosi e matataki Jiova e vosa ena “domo malumu, e rogo lailai.” (1 Tui 19:12) Ia na yalovinaka e sega ni okati ga kina na noda vosa vakayalovinaka. E bibi me laurai tale ga ena noda itovo, nida dau caka vinaka. Ena sala cava?

Nida vakatotomuri Jiova eda na dau vosa vakayalovinaka, eda na caka vinaka tale ga. (Efeso 4:32; 5:1, 2) E vakamacalataka o Lisa sa cavuti oti mai, na nodra vakaraitaka na iVakadinadina i Jiova na yalovinaka. E kaya: “Ni vakasauri ga na kena tukuni me keitou sa toki, erau cegu sara ga mai na cakacaka e rua na veiwatini ena ivavakoso me rau mai veivuke ena tawa iyaya. Ena gauna qori au se bera mada ga ni vuli iVolatabu!” Na nodratou  caka vinaka na tacida qori e uqeti Lisa me vakasamataka vakabibi na ka dina.

O Ane sa tukuni oti mai, e vakavinavinakataka nodra dau yalovinaka vua na iVakadinadina i Jiova. E kaya: “Ena vuku ni itovo ni vuravura eda bula tu kina qo, au dau vakatitiqa. E dredre meu nuitaka e dua.” E kuria: “Niu sotavi ira na iVakadinadina i Jiova, au dau lomatarotarotaka na inaki ni ka era cakava. Au dau taroga, ‘Na cava mada era dau kauaitaki au kina?’ Ia na nona dau yalovinaka o koya e vakavulici au ena iVolatabu, e uqeti au meu nuitaki koya.” E yaga vakacava? “Toso na gauna, au sa qai kauaitaka vakabibi na ka au vulica tiko.”

Dikeva ni uqeti rau sara ga o Lisa kei Ane na nodra caka vinaka na lewe ni ivavakoso yadudua, rau vulica sara kina na ka dina. Na nodra yalovinaka na lewe ni ivavakoso, e uqeti rau me rau nuitaki ira.

Era na rairai dau vosa vakayalovinaka eso ra qai matadredredre ni nodra itovo  vakavanua. E vinaka nira vakaraitaka na itovo vakavanua qori se sa ivakarau ga ni nodra bula. Ia ke yavutaki ga ena tikina qori, eda sa na sega tiko ni vakatotomuria na nona yalovinaka na Kalou.—Vakatauvatana Cakacaka 28:2.

Na itovo vakalou qo na yalovinaka se yalololoma, e okati tiko ena vua ni yalo tabu ni Kalou. (Kala. 5:22, 23) Nida saga gona meda vakaraitaka na yalovinaka, e sa uqeti keda tiko na yalo tabu. E salavata qori kei na noda vinakata meda vakatotomuri Jiova kei Jisu. Nida lotu vaKarisito, eda na kauaitaka tale ga na ka me baleti ira eso tale. E uqeti keda gona na noda lomana na Kalou o Jiova kei na noda lomani ira na wekada. Ena totoka kina noda vakaraitaka na itovo qo ni vu mai lomada, e vakadonuya tale ga na Kalou.

Kena irairai ni dau matau meda yalovinaka ga vei ira na caka vinaka vei keda se o ira na noda veikilai. (2 Sam. 2:6) Qori e dua na sala eda vakavinavinakataki ira kina. (Kolo. 3:15) Ia vakacava ke da nanuma ni sega ni veiganiti meda yalovinaka vua e dua?

Vakasamataka mada qo: E ivakaraitaki uasivi o Jiova ni dau vakaraitaka na loloma soli wale, qai vakavulici keda ena nona Vosa ni bibi meda vakaraitaka na itovo qo. Na matavosa “loloma soli wale” e vakayagataki vakalevu ena iVolatabu vaKirisi vaKarisito. E vakaraitaka vakacava vei keda na Kalou na yalololoma se yalovinaka?

Vakasamataki ira mada na milioni vakamilioni e yalovinaka vei ira o Jiova ni dau vakarautaka na ka mera bula kina. (Maciu 5:45) Ni bera mada ga nira kilai Jiova, e dau vakaraitaka vei ira na itovo qori. (Efeso 2:4, 5, 8) Me kena ivakaraitaki, e solia na ka vinaka duadua, ya na Luvena duabau ga, ena vukuda kece na kawatamata. E vola na yapositolo o Paula ni vakarautaka o Jiova na ivoli “me vaka na levu ni nona loloma soli wale.” (Efeso 1:7) Kena ikuri, nida ivalavala ca qai dau vakararawataki Jiova, e sega ni cegu nona veidusimaki kei na nona vakavulici keda. Na nona veidusimaki kei na nona vosa e vaka na malumu ni “miri ni uca.” (Vkru. 32:2) Eda sega sara ga ni sauma rawa na nona dauyalovinaka vei keda. Eda nuitaka tale ga na yalovinaka i Jiova me baleta noda veigauna se bera mai.—Vakatauvatana 1 Pita 1:13.

E macala ni veivakacegui sara ga na yalovinaka i Jiova, e veiuqeti. Eda na sega gona ni digia o cei meda vakaraitaka vua na yalovinaka. Ia eda na gumatua ni vakatotomuri Jiova me ivakarau sara ga ni noda bula na yalovinaka. (1 Ces. 5:15) Nida vakaraitaka wasoma na itovo qori, eda na vaka na bukawaqa katakata vinaka ena siga batabata. Eda na dau vakacegui ira na wekada, tacida vakayalo, cakacaka vata, vuli vata, kei ira eda tiko veitikivi.

Vakasamataki ira mada na lewe ni nomu vuvale se ivavakoso ena yaga vei ira na nomu vosa vakayalovinaka kei na caka vinaka. Ena rairai tiko ena ivavakoso e dua e vinakati me caka eso na ka ena nona vale kei na iteitei, se caka wasoma e dua na ka me vaka na volivoli. Kena ikuri, ni o sotava e dua ena cakacaka vakavunau e vinakati me vukei, vakacava o na vukei koya?

Nida vakatotomuri Jiova, me laurai mada ga ena ka eda tukuna kei na ka eda cakava “na lawa ni yalovinaka.”