1. Na cava meda cakava meda bula ena siga i Jiova?

 NI TUKUNI ena iVolatabu na “siga i Jiova,” e dusia na gauna ena lewai ira kina na meca o Jiova qai vakabulai ira nona tamata. Ena gauna sa oti, eso na gauna e vakatauitotogi o Jiova. (Aisea 13:1, 6; Isik. 13:5; Sefa. 1:8) Ena noda gauna, ena tekivu na “siga i Jiova” ni vakarusai o Papiloni na Ka Levu me yacova na ivalu na Amaketoni. Meda bula ena “siga” qori, e bibi meda vakavakarau rawa qo. E vakavulica o Jisu meda vakarautaki keda ena “veivakararawataki levu,” e vakabibitaka tale ga meda ‘vakarau tu ga’ ena gauna qori.—Maciu 24:21; Luke 12:40.

2. Ena yaga vakacava vei keda na 1 Cesalonaika?

² Ena imatai ni nona ivola uqeti vakalou na yapositolo o Paula vei ira e Cesalonaika, e vola e vica na ivakatautauvata me vukei ira na lotu vaKarisito mera vakarautaki ira tu ga ena siga levu ni veilewai i Jiova. E kila o Paula ni na sega ni yaco ena gauna ya na siga i Jiova. (2 Ces. 2:1-3) Ia e uqeti ira tiko ga mera vakarautaki ira ena siga qori, me vaka ga ni na yaco ena siga e tarava. E vinakati tale ga meda muria na nona ivakasala. Meda dikeva mada nona vakamacalataka e vica na tikina qo: (1) ena yaco vakacava na siga i Jiova, (2) o cei ena sega ni vakabulai ena siga qori, (3) eda na vakarautaki keda vakacava meda bula.

3. Ena yaco vakacava na siga i Jiova me vaka na daubutako ena bogi? (Raica tale ga na iyaloyalo.)

³ “Me vaka sara ga na daubutako ena bogi.” (1 Ces. 5:2) Qo na imatai ni ivakatautauvata e vakamacalataka na kena yaco mai na siga i Jiova. Era dau yavala totolo na daubutako  ena bogi nida sega sara ga ni namaka. Na siga tale ga i Jiova ena yaco mai vakasauri, era na kidacalataka e levu. O ira mada ga na lotu vaKarisito dina era na rairai kidacalataka na totolo ni veika e yaco. Ia eda na sega ni vakataki ira na tamata ca, nira na vakarusai.

4. Na sala cava e vaka kina na taratara ni yalewa bukete na siga i Jiova?

⁴ “Me vaka ga na taratara ni yalewa bukete.” (1 Ces. 5:3) Ena sega ni kila na yalewa bukete na gauna sara ga ena taratara kina. Ia e kila tiko ni na yaco qori. Ena rawa ni vakasauri mai, ena levu na mosi qai sega ni tarovi rawa. E va tale ga qori noda sega ni kila na siga kei na aua ena tekivu kina na siga i Jiova. Ia eda kila ni na yaco mai. Nona vakataulewa na Kalou vei ira na tamata ca ena yaco vakasauri, era na sega ni dro rawa.

5. Na sala cava e vaka kina na kida ni mataka na veivakararawataki levu?

⁵ Me vaka na kida ni mataka. Na ikatolu ni nona ivakatautauvata o Paula e vakamacalataka tale na daubutako ena bogi. Ia qo sa vakatauvatana o Paula na siga i Jiova kei na kida ni mataka. (1 Ces. 5:4) O ira na butako ena bogi e rawa nira wele qai sega ni kila na toso ni gauna. E rawa gona nira tobo ni sa kida na mataka ena siga tarava. Na veivakararawataki levu tale ga ena vakavotui ira era vaka na daubutako, nira se tiko ga ena butobuto, era cakava tiko na ka e sega ni vakamarautaka na Kalou. Eda sega ni vakataki ira nida cata na itovo e vakararawataki Jiova qai muria tiko ga “na ivalavala vinaka kece, na yalododonu, kei na dina.” (Efeso 5:8-12) E vakayagataka tarava o Paula e rua tale na ivakatautauvata me vakamacalataki ira kina na sega ni vakabulai.

6. Ena vakasama cava era moce tiko kina e levu? (1 Cesalonaika 5:6, 7)

⁶ “O ira na moce.” (Wilika 1 Cesalonaika 5:6, 7.) O Paula e vakatauvatani ira na sega ni vakabulai ena siga i Jiova kei ira na moce tiko. Era sega ni kila na veika e yaco wavoliti ira se na toso ni gauna. Era sega gona ni kila na veika bibi e yaco tiko, se na ka mera cakava kina. Levu nikua era moce tu vakayalo. (Roma 11:8) Era sega ni kila na ivakadinadina nida sa bula tiko ena “iotioti ni veisiga,” sa voleka tale ga na veivakararawataki levu. Na veika lelevu e yaco tiko e vuravura ena rawa ni vakayadrata eso mera kua ni moce vakayalo, mera bau kauaitaka na itukutuku ni Matanitu ni Kalou. Ia e levu era lai moce tale, era sega ni yadra tiko. Eso mada ga era vakabauta na siga ni veilewai, era nanuma ni se yawa. (2 Pita 3:3, 4) Ia eda kila ni sa qai bibi ga na ivakasala vakalou meda yadra tiko e veisiga.

7. Sala cava era vaka kina na mateni o ira e cudruva na Kalou?

⁷ “O ira na mateni.” E kaya na yapositolo o Paula nira vaka na mateni o ira e cudruva na Kalou. O ira na mateni, e berabera nodra kila na veika e yaco wavoliti ira, e sega ni vinaka na nodra vakatulewa. Era va tale ga qori na tamata ca nira sega ni muria na ivakaro ni Kalou. Era digia na ivakarau ni bula era na tini rusa kina. Ia e tukuni vei keda na lotu vaKarisito meda yalomatua, meda vakasama vinaka. (1 Ces. 5:6) E tukuna e dua na vakadidike ni iVolatabu ni yalomatua e kilai ena “dei ni yalo, vakalewai vinaka ni ka, sa na qai rawa nida vakatulewa vinaka.” Na cava me dei kina na lomada? Meda kua kina ni vakaitavi tu ena veika vakapolitiki, se saga me wali na leqa ni vuravura qo. Ni sa voleka tiko na siga i Jiova, eda na vakatovolei vakalevu meda vakaitavi ena veika vakavuravura. Ia meda kua ni leqataka na ka meda na cakava se tukuna. Na yalo tabu ena vukei keda me dei na lomada kei na ivakarau ni noda vakasama, meda vakatulewa vinaka tale ga.—Luke 12:11, 12.

8. Na itovo cava ena 1 Cesalonaika 5:8 ena uqeti keda meda yadra tiko, meda yalomatua? (Raica tale ga na iyaloyalo)

⁸ Meda “dara [na] isasabai ni sereda” kei na “isala ni uluda.” E vakatauvatani keda o Paula kei ira na sotia era yadra tiko, era vakaisulu tu ni ivalu. (Wilika 1 Cesalonaika 5:8.) Na sotia e veiqaravi tiko e vinakati me vakarautaki koya tu ga ena ivalu. Eda va tale ga qori o keda. E vinakati meda vakarau tu ga ena siga i Jiova nida dara tiko na isasabai ni sereda na vakabauta kei na loloma, me isala ni uluda na inuinui ni bula. Na itovo qori ena yaga sara ga vei keda.

9. E taqomaki keda vakacava na vakabauta?

⁹ Na nona isasabai ni serena na sotia ena taqomaka na utona. Ia vei keda, na vakabauta kei na loloma ena taqomaka na lomada. E uqeti keda na itovo qori meda qaravi Jiova tiko ga, meda muri Jisu tale ga. E veivakadeitaki na vakabauta ni o Jiova ena vakaicovitaki ira na vakasaqarai koya tiko mai vu ni lomadra. (Iper. 11:6) Ena uqeti keda meda yalodina tiko vua na noda iLiuliu o Jisu, ke vinakati mada ga meda vosota na ituvaki dredre. Eda rawa ni vaqaqacotaka noda vakabauta nida vuli ena nodra ivakaraitaki na yalodina tiko ena gauna qo nira tusaqati se leqa vakailavo. Meda qarauna tale ga na icori ni  domodomoiyau nida vakatotomuri ira na bula rawarawa ga nira vakaliuca na Matanitu ni Kalou. b

10. Ena yaga vakacava noda vosota nida lomana na Kalou kei ira e levu?

¹⁰ E bibi tale ga na loloma meda rawa ni yadra tiko kina, meda yalomatua. (Maciu 22:37-39) Nida lomana na Kalou, eda na vosota tiko na cakacaka vakavunau se leqa cava eda sotava. (2 Tim. 1:7, 8) Nida lomani ira eda sega ni vakabauta vata, eda na vunau tiko ga ena noda yalava, eda na vunau ena talevoni se vola ivola. Eda na sega ni soro nida nuitaka ni dua na gauna era na veisau e levu, mera cakava na ka e dodonu.—Isik. 18:27, 28.

11. E yaga vakacava noda lomani ira na itokani vakabauta? (1 Cesalonaika 5:11)

¹¹ Na noda lomani ira na kainoda, era okati kina na itokani lotu vaKarisito. Eda vakaraitaka na loloma qori nida “veivakayaloqaqataki tiko,” eda “veivakauqeti” tale ga. (Wilika 1 Cesalonaika 5:11.) Me vakataki ira na sotia era veitokoni ena ivalu, eda na dau veivakauqeti. Ena rairai vakacalaka nona vakamavoataka nona itokani e dua na sotia ni katakata tiko na ivalu, ia e sega ni nakita. Eda na sega tale ga ni nakita meda vakararawataki ira na tacida, se sauma na ca era cakava vei keda. (1 Ces. 5:13, 15) Eda vakaraitaka tale ga na loloma nida dokai ira na tacida tagane era vakatawai keda tiko ena ivavakoso. (1 Ces. 5:12) Ni vola o Paula na ivola qo, se bera ni yabaki dua na tauyavu ni ivavakoso e Cesalonaika. Era se ka vou na tagane era lesi ena ivavakoso qori, era rairai cakava tale ga eso na cala. Ia se bibi tiko ga mera dokai. Ni sa voleka mai na veivakararawataki levu, eda na rairai nuitaka vakalevu nodra veidusimaki na qase ena noda ivavakoso ni vakatauvatani kei na gauna qo. De dua eda na sega ni veivosaki rawa kei ira na tacida ena itikotiko liu, vaka kina ena valenivolavola ni tabana. E bibi gona meda vulica ena gauna qo meda lomani ira na qase ni ivavakoso, meda dokai ira. Se mani cava e yaco, meda  yalomatua tiko ga, meda kua ni kauaitaka nodra malumalumu. Ia meda kauaitaka ga ni vakayagataki Karisito o Jiova me dusimaki ira na tagane yalodina qori.

12. E taqomaka vakacava na noda vakasama na inuinui?

¹² Me vaka ni taqomaka na ulu ni sotia na nona isala, e taqomaka tale ga noda vakasama na inuinui ni bula. Ni dei na noda inuinui, eda na raica sara ga ni tawayaga na veika e vakarautaka tu na vuravura qo. (Fpai. 3:8) E vukei keda na noda inuinui meda yalodei tiko ga. E dina qori vei Wallace kei Laurinda, rau veiqaravi tiko e Aferika. Ena loma ga ni tolu na macawa, e mate na tamai Wallace kei na tinai Laurinda. Rau sega ni lesu rawa i vale me rau tokoni ira na wekadrau ena vuku ni matedewa na COVID-19. E vola o Wallace: “E vukei au na inuinui ni veivakaturi meu vakasamataka na kedrau ituvaki ena imatai ni nodrau siga ena vuravura vou, sega ni kedrau ituvaki ena iotioti ni siga ni nodrau bula ena vuravura qo. E vakacegui au na inuinui qori niu dau rarawa seu vakasamataka nodrau sa yali.”

13. Na cava meda cakava me sobuti keda kina na yalo tabu?

¹³ “Ni kua ni bokoca na bukawaqa ni yalo tabu.” (1 Ces. 5:19) E vakatauvatana o Paula na yalo tabu kei na bukawaqa e tiko e lomada. Ni sobuti keda na yalo tabu ni Kalou, eda na gumatua kina, eda taleitaka vakalevu na ka dodonu, eda na vakayaloqaqataki tale ga meda qaravi Jiova. (Roma 12:11) Na cava meda cakava me sobuti keda kina na yalo tabu? Eda kerea ena masu, eda vulica na Vosa uqeti ni Kalou qai veimaliwai kei na nona isoqosoqo e dusimaki ena yalo tabu. Nida cakava qori eda na vakaraitaka kina na itovo e okati ena “vua ni yalo tabu.”—Kala. 5:22, 23.

14. Na cava meda qarauna me rawa ni sobuti keda tiko ga na yalo tabu? (Raica tale ga na iyaloyalo.)

¹⁴ Ni solia vei keda na Kalou na yalo tabu, meda qarauna sara meda “kua ni bokoca na bukawaqa ni yalo tabu.” E solia na yalona tabu vei ira na savasava  tiko ga nodra vakasama kei na nodra itovo. Ena sega ni solia na yalona tabu ke da vakasamataka tiko ga na ka tawasavasava, oti eda cakava sara. (1 Ces. 4:7, 8) Me sobuti keda tiko ga na yalo tabu, e bibi meda “kua ni dau beca na parofisai.” (1 Ces. 5:20) Na “parofisai” qo e vakaibalebaletaka na itukutuku e uqeta na yalo tabu, okati kina na veika me baleta na siga i Jiova, kei na lekaleka ni gauna eda bula tiko kina. Meda kua sara ni guilecava na siga qori meda nanuma kina ni na sega ni yaco na Amaketoni ena noda gauna. Ia meda nanuma dei tiko ni dodonu tiko ga noda ivalavala, meda “qarava tale ga na Kalou” e veisiga.—2 Pita 3:11, 12.

15. Eda na qarauna vakacava meda kua ni vakacalai ena itukutuku lasu kei na ivakavuvuli ni timoni? (1 Cesalonaika 5:21)

¹⁵ Ena dua na gauna sa voleka sara qo, era na kaya kina na dau tusaqata na Kalou: “Na vakacegu kei na sautu!” (1 Ces. 5:3) Ena roboti vuravura na itukutuku lasu era uqeta na timoni mera vakacalai kina e levu. (Vkta. 16:13, 14) Vakacava o keda? Eda na sega sara ga ni vakacalai ke da dau “vakadeitaka na dina ni ka kece.” (Wilika 1 Cesalonaika 5:21.) Na vosa vaKirisi e vakadewataki me “vakadeitaka” e veisemati ena kena vakatovolei na koula kei na siliva. E vinakati gona meda dau vakatovolea na veika kece eda rogoca se wilika meda vakadeitaka na kena dina. E bibi qori vei ira e Cesalonaika, sa qai bibi sara vei keda nikua ni sa voleka na veivakararawataki levu. Meda kua ni vakabauta tu ga na ka kece era kaya eso, meda vakayagataka noda vakasama meda vakatauvatana na ka eda wilika se rogoca kei na ka e tukuni ena iVolatabu kei na isoqosoqo i Jiova. Nida cakava qori, eda na sega ni vakacalai ena ivakavuvuli ni timoni.—Vkai. 14:15; 1 Tim. 4:1.

16. Na inuinui cava eda na vakalougatataki kina? Cava eda uqeti meda cakava?

¹⁶ Era na vakabulai vakailawalawa na dauveiqaravi ni Kalou ena veivakararawataki levu. Ia eda sega ni kila yadudua na veika ena yaco ena siga nimataka. (Jeme. 4:14) Ke da bula sivia na veivakararawataki levu se mate ni bera na siga qori, eda na vakalougatataki meda bula tawamudu ke da yalodina tiko ga. Era na tiko mai lomalagi kei Karisito o ira na lumuti. O ira na so tale na sipi era na tawana na parataisi e vuravura. Meda vakanamata mada ga ena noda inuinui totoka qai vakarau tu ga ena siga i Jiova!