Meda vakamarautaki Jiova, e bibi me tiko vei keda na vakabauta. Ia e kaya na iVolatabu “nira sega ni vakabauta na tamata kece.” (2 Ces. 3:2) Na yapositolo o Paula e tukuni ira na tusaqati koya nira ‘dau veivakaleqai, era daucaka ca,” qai vinakata me dua e vakabulai koya. Ia na ka e tukuna me baleta na vakabauta e rabailevu. Eso era sega ni via vakabauta na ivakadinadina matata ni bula tiko na Kalou na Dauveibuli. (Roma 1:20) Eso tale era rairai kaya nira vakabauta e dua e kaukaua sara. Ia e sega ni vinakati na mataqali vakabauta qori me vakamarautaki Jiova.

E bibi meda vakabauta ni bula dina tiko o Jiova, ena “vakaicovitaki” ira tale ga e dei na nodra vakabauta. (Iper. 11:6) Na vakabauta e okati ena vua ni yalo tabu ni Kalou. Me sobuti keda na yalo tabu, e vinakati meda kerea vei Jiova ena masu. (Luke 11:9, 10, 13) Na sala bibi me sobuti keda kina na yalo tabu, ya nida wilika na Vosa uqeti ni Kalou. Oti meda vakasamataka vakatitobu na ka eda wilika qai saga meda muria na ka eda vulica. Nida cakava qori, ena vukei keda na yalo tabu meda muria na ivakarau ni bula ena tiko kina vei keda na vakabauta ena vakamarautaki Jiova.