1. E vakatauvatani Jiova kei na cava o Tevita me vaka e tukuni ena Same 18:46?

 NIDA bula tiko ena vuravura qo, e rawa ni vakadredretaka noda bula na leqa tawanamaki, se rawa ni veisautaka sara ga vakadua. Eda vakavinavinaka ni rawa nida kere veivuke vei Jiova! Ena ulutaga sa oti, eda vulica kina ni o Jiova e Kalou bula, e tu vakarau tale ga me vukei keda. Ni dau vukei keda, e vakadeitaka qori ni ‘bula tiko o Jiova!’ (Wilika Same 18:46.) Ia ni cavuta oti ga qori o Tevita, e tukuna ni nona “Uluvatu” na Kalou. Na cava e vakatauvatani Jiova kina kei na uluvatu, e dua na ka e sega ni bula?

2. Na cava meda kauaitaka kina nona tukuna o Tevita ni o Jiova e “noqu Uluvatu”?

² Eda na veivosakitaka ena ulutaga qo na vuna e tukuni kina ni o Jiova e vaka na uluvatu, kei na ka eda vulica me baleti koya ena vosa vakatautauvata qori. Eda vulica tale ga na sala meda raici koya kina me noda Uluvatu. Kena ilutua, eda na veivosakitaka na sala meda vakatotomuria kina na nona itovo.

VUNA E ULUVATU KINA O JIOVA

3. E dau vakayagataka vakacava na iVolatabu na vosa “uluvatu”? (Raica na ena waqana.)

³ E vakayagataka na iVolatabu na vosa “uluvatu” meda kila kina eso na itovo i Jiova. E laurai vakalevu ena veitikinivolatabu e vakacaucautaki kina ni sega tale ni dua na Kalou rau tautauvata. Na imatai ni gauna e tukuni kina ni o Jiova e vaka na “Uluvatu,” ya ena Vakarua 32:4. Ena masu nei Ana, e kaya ni “sega ni dua na uluvatu me vakataki koya na neimami Kalou.” (1 Sam. 2:2) E kaya o Apakuki ni o Jiova e “noqu Uluvatu.” (Apak. 1:12) E kaya o koya e vola na ika73 ni Same, ni Kalou e “uluvatu ni lomaqu.” (Same 73:26) O Jiova mada ga e tukuna ni o koya na uluvatu. (Aisea  44:8) Meda dikeva mada e tolu na itovo i Jiova e laurai kina ni Uluvatu, kei na sala eda rawa ni okati koya kina me “noda Uluvatu.”—Vkru. 32:31.

4. E noda ivakaruru vakacava o Jiova? (Same 94:22)

⁴ O Jiova na ivakaruru. Me vaka ga nona rawa ni lai vakaruru e dua ena qaravatu me taqomaki ena kaukaua ni cagilaba, o Jiova tale ga e taqomaki keda nida sotava na ituvaki dredre e rawa ni vakaleqa noda bula. (Wilika Same 94:22.) E vukei keda tale ga meda taqomaka noda veiwekani kei koya me kua ni vakaleqa na ituvaki dredre eda sotava. Kena ikuri, e yalataka ni na vakaotia na ka e rawa ni vakaleqa na noda bula vakacegu kei na sautu.—Isik. 34:25, 26.

5. E noda vatu ni iVakaruru vakacava o Jiova?

⁵ Dua na sala e noda vatu ni iVakaruru kina o Jiova, ya nida masu vua. Nida cakava qori “na vakacegu ni Kalou” e taqomaka na lomada kei na noda vakasama. (Fpai. 4:6, 7) Vakasamataki Artem mada, e dua na tacida tagane e curu e valeniveivesu ena vuku ni nona vakabauta. E vakatarogi koya vakavica e dua na turaga voravora e talai mai me vaqaqai koya, e vakarerei koya, e vakamaduataki koya tale ga. E kaya o Artem: “Na gauna au vakatarogi kina vua na dauveivaqaqai, dua na ka na curuoso ni noqu vakasama. . . . Ia au masu wasoma vei Jiova, au kerea me solia vei au na vakacegu kei na vuku. E cakava na dauveivaqaqai eso na ka me vakaleqai au kina, ia au marau vakalevu niu yalodina tiko ga . . . Ena veivuke i Jiova, e vaka ga au duri tu ena daku ni bai vatu.”

6. Na cava eda na nuitaki Jiova tu ga kina? (Aisea 26:3, 4)

⁶ O Jiova e nuitaki. Me vaka na vatu e sega ni tosoi rawa, o Jiova ena tu vakarau e veigauna me vukei keda. Eda nuitaki koya ni “Uluvatu tawamudu.” (Wilika Aisea 26:3, 4.) E bula tu ga o Jiova me vakayacora na ka e yalataka, me rogoca na noda masu, me tokoni keda tale ga. Kena ikuri, eda nuitaki koya ni dau yalodina vei ira na sokaloutaki koya. (2 Sam. 22:26) Ena sega sara ni guilecava na ka eda cakava, ena vakaicovitaki keda tu ga.—Iper. 6:10; 11:6.

7. Na cava na yaga ni noda nuitaki Jiova? (Raica tale ga na iyaloyalo.)

⁷ Nida nuitaki Jiova vakatabakidua, eda okati koya me noda Uluvatu. Eda nuidei nida talairawarawa vua ena gauna dredre mada ga, ena vinaka vei keda. (Aisea 48:17, 18) Nida raica nona veitokoni, eda na nuitaki koya kina vakalevu. Eda na tu vakarau meda vosota na veika dredre e rawa ni vukei keda duadua ga kina o Jiova. Levu na gauna ni sega sara ga ni dua meda kere veivuke kina, eda kila ni o Jiova ga eda na nuitaka. E kaya o Vladimir: “Au volekati Jiova vakalevu niu tu e valeniveivesu. Me vaka niu tu taudua,  au sega tale ga ni lewa na ituvaki au sotava, au vulica meu dau nuitaki Jiova vakalevu.”

8. (a) Na cava eda kaya kina ni dei tu ga o Jiova? (b) E yaga vakacava ni noda Uluvatu na Kalou? (Same 62:6, 7)

⁸ O Jiova e dei tu ga. O Jiova e vaka na Uluvatu levu, e dei tu ga qai sega ni yavalati rawa. E dei tu ga nona itovo qai sega ni veisau na nona inaki. (Mala. 3:6) E sega ni veisautaka na nona inaki me baleta na kawatamata na talaidredre mai Iteni. E vola na yapositolo o Paula ni o Jiova e “sega ni rawa ni cakitaki koya vakataki koya.” (2 Tim. 2:13) Kena ibalebale qo se mani cava e yaco, se ka era cakava eso, ena sega ni veisau na nona itovo, nona inaki se ivakatagedegede. Nida nuitaka na noda Kalou e dau dei tu ga, eda na rai tiko ga vua me vakabulai keda, me vukei keda tale ga meda vosota na ituvaki dredre.—Wilika Same 62:6, 7.

9. Na cava o vulica vei Tatyana?

⁹ E noda Uluvatu o Jiova nida vakasamataka vakatitobu na nona itovo kei na nona inaki. Qo ena vukei keda meda lewa matau nida vosota tiko na veika dredre. (Same 16:8) Qori na ka e vakadinadinataka e dua na tacida yalewa o Tatyana, e vakatabui me biuta na nona vale ena vuku ni nona vakabauta. E kaya: “Au vakila niu galili. Ni se qai tekivu a via dredre toka, au yalolailai tale ga.” Ia ni kila ni veisemati tiko na nona vesu kei na inaki i Jiova, e vosota qai sega ni nuiqawaqawa. E kaya tale o Tatyana: “Noqu kila na vuna au sotava kina qori, e vakaraitaka niu lomani Jiova vakalevu, au via vakamarautaki koya tale ga. E vukei au sara ga meu kua ni vakasamataka vakalevu na ituvaki au sotava tiko.”

10. E rawa vakacava ni noda Uluvatu o Jiova ena gauna qo?

¹⁰ Eda na vakatovolei ena veigauna sa tu qo e matada, ena vinakati kina meda nuitaki Jiova vakalevu. E bibi ena gauna qo meda vaqaqacotaka noda vakabauta ni na vukei keda o koya ena ituvaki dredre cava ga me rawa nida yalodina tiko ga. Eda na cakava vakacava qori? Meda wilika na itukutuku vakaivolatabu kei na kedra italanoa na tacida ena gauna qo. Saga meda kila na sala e vakaraitaka kina o Jiova na itovo me tokoni ira nona dausokalou. Vakasamataka vakatitobu na itukutuku qori, ena rawa ni nomu Uluvatu kina o Jiova.

VAKATOTOMURIA NA ITOVO I JIOVA

11. Na cava eda via vakatotomuria kina na itovo talei nei Jiova? (Raica tale ga na kato “ Nodra iSausau na Tacida Tagane Gone.”)

¹¹ Eda sa dikeva mai na itovo i Jiova e rawa kina ni noda uluvatu. Dikeva qo na sala eda rawa ni vakatotomuria kina na nona itovo. Na levu ga ni noda cakava qori, na levu tale ga ni noda vakayaloqaqataki  ira na mataveitacini. Kena ivakaraitaki, o Jisu e vakayacani Saimoni me o Kifa (e vakadewataki me o Pita), kena ibalebale “O Koya na Vatu.” (Joni 1:42) E dusia qori ni na ivurevure ni vakacegu o Pita, ena vakadeitaka tale ga na nodra vakabauta na lewe ni ivavakoso. E tukuni ni o ira na qase ni ivavakoso era vaka na “yaloyalo ni vatu levu.” E dusia qori na nodra dau taqomaki ira na lewe ni ivavakoso. (Aisea 32:2) E macala ni na yaga ena ivavakoso na noda vakatotomuria kece na itovo talei nei Jiova.—Efeso 5:1.

12. Vakamacalataka na sala eda rawa kina ni nodra ivakaruru na tacida.

¹² Meda ivakaruru. Eso na gauna eda dau vakarurugi ira na tacida ni yaco na leqa tubukoso, tikoyavavala, se ivalu. Ni sa qai ca tiko ga na “iotioti ni veisiga,” sa na levu sara na gauna eda veivuke kina. (2 Tim. 3:1) Eda na vakacegui ira na tacida, eda na vakaraitaka tale ga nida lomani ira. Dua na sala eda rawa ni cakava kina qori nida kidavaki ira ena Vale ni Soqoni, meda vakaraitaka na veilomani ena ivavakoso. Eda bula tu qo ena vuravura sa sega kina na loloma, e vakavuna na nodra nuiqawaqawa na tacida. Nira mai soqoni gona na tacida, eda vinakata mera vakila na loloma, veivakacegui kei na veivakadeitaki.

13. Sala cava era ivakaruru kina na qase ni ivavakoso? (Raica tale ga na iyaloyalo.)

¹³ Era ivakaruru tale ga na qase ni ivavakoso nira sotava na tacida na ituvaki dredre se ra vakatovolei. Ni yaco na leqa tubukoso se dua e tauvimate bibi, era na veivuke sara ga e liu na qase ni ivavakoso. Era veivakacegui tale ga vakayalo. Era na doudou na tacida mera torovi ira na qase ke ra kila nira yalomalua, dau loloma, era  tu vakarau tale ga mera vakarorogo. Na itovo qori era na vakila kina eso tale nira kauaitaki, e rawarawa kina mera muria na ivakavuvuli vakaivolatabu e dusimaki ira kina na qase.—1 Ces. 2:7, 8, 11.

14. Sala cava eda vakaraitaka kina nida nuitaki?

¹⁴ Meda nuitaki. Eda vinakata mera nuitaki keda eso tale, vakauasivi ni yaco na ituvaki dredre. (Vkai. 17:17) Sala cava ena ni kilai kina nida nuitaki? Meda saga meda vakaraitaka tiko ga na itovo vakalou me vaka noda dina ena noda yalayala, eda saga tale ga meda yaco totolo yani ena kena gauna. (Maciu 5:37) Eda tu vakarau tale ga meda veivuke ke vinakati. Kena ikuri, eda na gumatua ni vakaotia na noda ilesilesi ena ivavakoso nida muria vinaka na kena idusidusi.

15. Era yaga vakacava ena ivavakoso na qase nuitaki?

¹⁵ Era yaga ena ivavakoso na qase nuitaki. Ena sala cava? Ke ra torovi rawarawa na qase, era na kila na dautukutuku nira tokoni, me vaka na ivakatawa ni nodra iwasewase lailai. Era kila tale ga nira lomani nira raica nodra yalorawarawa na qase mera veivuke. Kena ikuri, era na nuitaki nira yavutaka na nodra ivakasala ena iVolatabu kei na ivola vakaivolatabu e tabaka na dauveiqaravi yalodina e vuku, sega ni yavutaki ga ena nodra nanuma. Era na nuitaki tale ga nira sega ni talanoataka  na ka vuni me baleti ira na mataveitacini ra qai vakayacora na ka era yalataka.

16. Ena yaga vakacava vei keda kei ira eso tale nida dei ena ka dodonu?

¹⁶ Meda dei ena ka dodonu. Eda ivakaraitaki vinaka vei ira eso tale ke da dei ena ka dodonu, ke da yavutaka tale ga noda vakatulewa ena ivakavuvuli vakaivolatabu. Nida vakalevutaka na noda vakabauta kei na kilaka dodonu, eda na dei tiko ga ena ka dina. Eda sega ni lomalomarua, yamekemeke, se vakacalai totolo ena ivakavuvuli lasu kei na rai ni vuravura. (Efeso 4:14; Jeme. 1:6-8) Na noda vakabauti Jiova kei na nona yalayala, e vakanuideitaki keda nida rogoca na itukutuku ca. (Same 112:7, 8) Kena ikuri, eda na rawa ni vukei ira era rairai sotava tiko na ituvaki dredre.—1 Ces. 3:2, 3.

17. Na cava mera cakava na qase ni ivavakoso me rawa nira vakadeitaki ira na mataveitacini?

¹⁷ E bibi mera lewai ira vinaka na qase ni ivavakoso, mera yalomatua, me kua ni yakusurasura nodra bula, mera yalorawarawa tale ga. Era veivuke na tagane qo mera vakadeitaki na mataveitacini, me vaqaqacotaki tale ga na nodra vakabauta nira “taura matua na vosa dina.” (Taito 1:9; 1 Tim. 3:1-3) Na nodra ivakaraitaki vinaka kei na nodra veivakatawani, era vukei ira kina na dautukutuku mera tiko wasoma ena soqoni, cakacaka vakavunau, mera vuli vakataki ira tale ga. Nira sotava na mataveitacini na leqa e vakavu nuiqawaqawa, era na veivakayaloqaqataki na qase mera nuitaki Jiova na tacida kei na nona vosa ni yalayala.

18. Na cava eda vinakata kina meda vakacaucautaki Jiova qai toro volekati koya tiko ga? (Raica tale ga na kato “ Sala Mo Veivolekati Kina kei Jiova.”)

¹⁸ Nida sa veivosakitaka oti mai na itovo talei i Jiova, eda rawa gona ni duavata kei Tui Tevita: “Me vakacaucautaki o Jiova na noqu Uluvatu.” (Same 144:1) Eda na nuitaki Jiova tu ga e veigauna. Ke da sa qase mada ga eda rawa tiko ga ni kaya: “E noqu Uluvatu o koya,” nida nuidei ni na vukei keda tu ga meda toso vakayalo.—Same 92:14, 15.