1. E yaga vakacava noda vulica ena Same 15:1-5?

 EDA vulica ena ulutaga sa oti ni rawa nira vulagi ena valelaca i Jiova na nona dauveiqaravi era yalataki ira vua nira bucina mera veitokani voleka kei koya. Ia na cava meda cakava me rawati kina qori? E vakamatatataki qori ena ika15 ni Same. (Wilika Same 15:1-5.) Eda vulica ena same qo na ka meda cakava meda veivolekati tiko ga kina kei na Kalou.

2. Na cava a rairai vakasamataka tiko na daunisame o Tevita ni cavuta na valelaca i Jiova?

² E tekivu na ika15 ni Same ena dua na taro: “Kemuni Jiova, o cei me vulagi ena nomuni valelaca? O cei me tiko ena nomuni ulunivanua tabu?” (Same 15:1) Ni cavuta na daunisame o Tevita na “valelaca,” a rairai vakasamataka tiko na valeniveitavaki a tiko mai Kipioni ena dua na gauna. E cavuta tale ga na “ulunivanua tabu” ni Kalou, de dua e dusi Saioni mai Jerusalemi. Qori e vica na kilomita ena ceva kei Kipioni, e birika kina o Tevita e dua na valelaca me tiko kina na kato ni veiyalayalati me yacova ni sa tara na valenisoro.—2 Sam. 6:17.

3. Na cava meda vulica kina na ika15 ni Same? (Raica tale ga na iyaloyalo.)

³ E levu na Isireli e sega ni vakadonui mera veiqaravi ena valeniveitavaki, e vica wale sara e rawa nira curu ena loma ni valelaca e tiko kina na kato ni veiyalayalati. Ia o ira kece na dausokalou yalodina i Jiova e rawa nira vulagi ena nona valelaca vakayalo, nira nona itokani ra qai dei ena veitokani qori. Eda vinakata kece qori. E tukuni ena ika15 ni Same eso na itovo meda vakaraitaka, me rawa nida itokani tiko ga nei Jiova.

 LAKO VAKADODONU, CAKAVA TALE GA NA KA DODONU

4. Eda kila vakacava ni sega ni vinakata o Jiova meda papitaiso ga? (Aisea 48:1)

⁴ E tukuni ena Same 15:2, ni itokani ni Kalou e “lako tiko vakadodonu, e cakava tiko na ka dodonu.” Na matavosa “lako tiko” kei na “cakava tiko” e dusia e dua na ka meda cakava tiko ga. Ia vakacava eda rawa ni ‘lako tiko ga vakadodonu’? Io. Eda sega ni uasivi, ia ena raica o Jiova nida “lako tiko vakadodonu” ke da saga ena noda vinaka taucoko meda talairawarawa vua. Nida yalataki keda vua na Kalou qai papitaiso, qori sa itekitekivu sara ga ni noda lako vata kei na Kalou. Nanuma tiko ena gauna vakaivolatabu, ni dua e lewe ni matanitu o Isireli e sega ni kena ibalebale qori ni sa rawa ni vulagi nei Jiova. Eso era masuti koya, ia era sega ni “dina se yalododonu kina.” (Wilika Aisea 48:1.) E vinakati gona vei ira na Isireli lomadina mera vulica na ka e vinakata o Jiova ra qai muria. E va tale ga qori nikua. Me rawa ni vakadonui keda na Kalou, e sega ni vinakati ga meda papitaiso qai veimaliwai tiko ena ivavakoso. E bibi meda “cakava tiko [ga] na ka dodonu.” Na cava e okati kina?

5. Na cava e okati ena noda talairawarawa vei Jiova ena ka kece?

⁵ Ena rai nei Jiova, na noda “lako tiko vakadodonu” kei na noda “cakava tiko na ka dodonu,” e sega ni kena ibalebale ga na noda tiko wasoma ena soqoni. (1 Sam. 15:22) Eda na saga meda talairawarawa vua na Kalou ena ka kece eda cakava, ke da tiko taudua mada ga. (Vkai. 3:6; Dauv. 12:13, 14) E bibi meda talairawarawa vei Jiova ena ka lalai mada ga. Nida cakava qori eda  vakaraitaka nida lomani koya dina, ena lomani keda kina vakalevu.—Joni 14:23; 1 Joni 5:3.

6. Me vaka e tukuni ena Iperiu 6:10-12, cava e bibi sara ni vakatauvatani kei na noda caka vinaka ena gauna sa oti?

⁶ E marautaka vakalevu o Jiova na ka eda cakava ena vukuna ena gauna sa oti. Ia na noda caka vinaka ena gauna sa oti e sega ni kena ibalebale ya nida na vulagi tiko ga i Jiova ena nona valelaca. E vakamatatataki qori ena Iperiu 6:10-12. (Wilika.) E sega ni guilecava o Jiova na veika vinaka eda sa cakava oti. Ia e vinakata meda qaravi koya tiko ga mai vu ni lomada me “yacova sara na icavacava.” Ena vakalougatataki keda meda nona itokani me tawamudu ke da “sega ni vakacauoca.”—Kala. 6:9.

VOSA DINA MAI LOMADA

7. Na cava na ibalebale ni noda vosa dina mai lomada?

⁷ O koya e vinakata me vakadonui me vulagi ena valelaca i Jiova me “dau vosa dina mai lomana.” (Same 15:2) E sega ni kena ibalebale ga me kua ni lasu. E vinakata o Jiova meda dina ena ka kece eda tukuna se cakava. (Iper. 13:18) E bibi sara ga qori. Na vuna? “Ni sevaka o Jiova na tamata lawakica, ia e veitokani voleka kei ira na yalododonu.”—Vkai. 3:32.

8. Na itovo cava meda qarauna?

⁸ O ira era ‘dau vosa dina mai lomadra,’ ena sega ni vakarairai na nodra talairawarawa e matanalevu, ia era beca lo tiko na lawa ni Kalou. (Aisea 29:13) Era sega ni dau lawakica. Ia o koya e lawakica ena rawa ni vakatitiqataka na vuku e laurai ena so na ivakasala i Jiova. (Jeme. 1:5-8) De dua ena talaidredre vei Jiova ena so na ka e nanuma ni sega ni bibi. Oti qori, ke sega ni dua na ka ca e yacovi koya ena vuku ni nona talaidredre, ena rawa ni doudou kina me beca eso tale na lawa ni Kalou qai veivakaisini na ivakarau ni nona sokalou. (Dauv. 8:11) Ia eda vinakata meda dina ena ka kece.

9. Na cava eda vulica ena imatai ni gauna e sotavi Nacanieli kina o Jisu? (Raica tale ga na iyaloyalo.)

 ⁹ Eda vulica na bibi ni dau dina ena imatai ni gauna e sotavi Nacanieli kina o Jisu. E dua na ka vakatubuqoroqoro e yaco ni sureta o Filipi na nona itokani o Nacanieli me sotavi Jisu. Se bera mada ga ni sotavi Nacanieli o Jisu, ia e kaya me baleti koya: “Raica, e dua na kai Isireli dina, e sega ni dau lawaki.” (Joni 1:47) Macala ga ni kila o Jisu ni ratou dau dina na vo ni nona tisaipeli, ia e duatani sara o Nacanieli. E sega ni uasivi o Nacanieli me vakataki keda ga, ia e dau dina ena ka kece, e sega tale ga ni dau lawaki. E qoroya qori o Jisu qai vakacaucautaki koya. Eda vinakata tale ga me tukuna qori vei keda o Jisu!

10. Na cava meda lewa vinaka kina noda vosa? (Jemesa 1:26)

¹⁰ Levu na ka e tukuni ena Same 15 e vauca tiko na ka eda dau cakava vei ira eso tale. E tukuni ena Same 15:3 ni o koya e vulagi ena valelaca i Jiova “e sega ni vakaucaca ena yamena, e sega ni caka ca vua erau tiko veitikivi, qai sega ni vakarogocataki ira nona itokani.” Nida sega ni lewa vinaka noda vosa ena vakaleqai ira eso tale, eda na sega tale ga ni vulagi ena valelaca i Jiova.—Wilika Jemesa 1:26.

11. Na cava na vakaucaca? Cava e caka vei ira na dau vakaucaca era sega ni veivutuni?

¹¹ E cavuta sara ga na daunisame na vosa, vakaucaca. Na cava na vakaucaca? Qo na itukutuku lasu e vakarogocataka e dua. O ira na dau vakaucaca era sega ni veivutuni, era na kau tani mai na ivavakoso.—Jere. 17:10.

12-13. Na cava eso na ituvaki eda na sega kina ni nakita noda vakarogocataka eso noda itokani? (Raica tale ga na iyaloyalo.)

¹² E tukuna tale ga na Same 15:3 meda nanuma tiko ni vulagi nei Jiova ena sega  ni caka ca vua erau tiko veitikivi, qai sega ni vakarogocataki ira nona itokani. Na cava e rairai okati kina?

¹³ De dua eda na sega ni nakita noda vakarogocataka e dua nida tukuna na ka ca me baleti koya. Kena ivakaraitaki: (1) sa cegu ena nona veiqaravi vakatabakidua e dua na tacida yalewa, (2) rau sa sega ni veiqaravi e Peceli e dua na veiwatini, se (3) sa sega ni qase se dauveiqaravi ni ivavakoso e dua na tacida tagane. Vakacava meda vakilakila na vuna e yaco kina na veisau qori qai veitukuniyaka? De tiko dina na vuna, ia eda sega ni kila. Kena ikuri, na vulagi ena valelaca i Jiova “e sega ni caka ca vua erau tiko veitikivi, qai sega ni vakarogocataki ira nona itokani.”

ROKOVI IRA NA REREVAKI JIOVA

14. Vakamacalataka na sala era cata kina na vulagi i Jiova e dua e “ivalavala torosobu”?

¹⁴ E tukuni ena Same 15:4, na itokani i Jiova “e cati koya e ivalavala torosobu.” Eda na cakava vakacava qori? Nida sega ni uasivi, e sega ni tu vei keda na dodonu meda tukuna ni dua e ivalavala torosobu. Na vuna? Eda na rairai veivolekati kei na so tale ena vuku ni nodra itovo vinaka, ia eda na sega ni taleitaka eso tale. Koya gona, meda cati ira ga e raica o Jiova nira “ivalavala torosobu.” (1 Kor. 5:11) Qo e okati kina o ira na sega ni veivutunitaka na nodra itovo ca, beca noda vakabauta, se saga me vakaleqa noda bula vakayalo.—Vkai. 13:20.

15. Na cava e dua na sala eda rokovi ira kina “na rerevaki Jiova”?

¹⁵ E tukuna tale ga na Same 15:4 ni bibi meda rokovi “ira na rerevaki Jiova.” Eda na qara gona na sala meda yalovinaka kina vei ira na itokani i Jiova, meda dokai ira tale ga. (Roma 12:10) Ena sala cava? Dua e tukuni ena Same 15:4, ni o koya e vulagi ena valelaca i Jiova “e dau dina ena nona vosa ni yalayala, veitalia ke vakaleqai kina.” Nida sega ni dina ena noda yalayala, ena rawa ni vakararawataka eso tale. (Maciu 5:37) Kena ivakaraitaki, e vinakata o Jiova mera dina na veiwatini ena nodra bubului ni vakamau. E marau tale ga nira saga na itubutubu mera dina ena ka era yalataka vei ira na luvedra. Noda lomana na Kalou kei ira na wekada ena uqeti keda meda saga tale ga meda dina ena ka eda tukuna.

16. Na cava e dua tale na sala eda na rokovi ira kina na itokani nei Jiova?

¹⁶ Dua tale na sala eda rokovi ira kina na itokani i Jiova, ya nida dau veikauaitaki, eda lomasavu tale ga. (Roma 12:13) Nida vakayagataka noda gauna vei ira na tacida, ena dei kina na noda veitokani kei ira, vaka kina o Jiova. Kena ikuri, nida dau veikauaitaki eda sa vakatotomuri Jiova tiko.

KUA NI LOMANA NA ILAVO

17. Na cava e cavuti kina na ilavo ena Same 15?

¹⁷ Eda wilika ni vulagi i Jiova “e sega ni solia nona ilavo me rawa tubu kina, e sega tale ga ni ciqoma na veivaqumi me beitaki kina o koya e tawacala.” (Same 15:5) Na cava e cavuti kina na ilavo ena same lekaleka qo? Nida lomana na ilavo ena vakararawataki ira eso tale, ena vakaleqa tale ga noda veitokani kei na Kalou. (1 Tim. 6:10) Ena gauna vakaivolatabu, eso era lawakitaki ira na tacidra dravudravua nira lavaka na tubu ni ilavo era solia vakadinau.  Eso tale ga na turaganilewa era vaqumi ra qai lewa vakatawadodonu na sega ni cala. Qori e cata sara ga o Jiova.—Isik. 22:12.

18. Na cava meda taroga nida dikeva tiko noda rai me baleta na ilavo? (Iperiu 13:5)

¹⁸ E vinaka meda dikeva na noda rai me baleta na ilavo. Mo taroga: ‘Au dau vakasamataka tu ga na ilavo kei na ka meu volia kina? Keu dinau, e dau berabera noqu sauma niu nanuma ni sega ni via vakayagataka o koya e solia vei au? Keu vakailavo au nanuma niu uasivi ira eso tale qai dredre noqu lomasavu? Au dau vakalewai ira na taciqu nira domodomoiyau baleta ga nira vakailavo? Au dau kauaitaki ira ga na vutuniyau, vakalailai o ira na dravudravua?’ E bibi meda vakasamataka na taro qori ni sureti keda o Jiova meda nona vulagi. Eda na taqomaka na veisureti qori nida sega sara ga ni lomana na ilavo. Ke da cakava qori, ena sega ni biuti keda o Jiova!—Wilika Iperiu 13:5.

E LOMANI IRA NONA ITOKANI O JIOVA

19. Na cava na inaki levu ni ka e vinakata o Jiova?

¹⁹ E cava na ika15 ni Same ena yalayala qo: “O koya e cakava na veika qori ena sega vakadua ni yavalati.” (Same 15:5) E tukuna na daunisame na inaki levu ni ka e vinakata na Kalou. E vinakata o Jiova meda marau. E dusimaki keda gona meda vakalougatataki kina, meda taqomaki tale ga.—Aisea 48:17.

20. Na cava era vakanamata kina na vulagi i Jiova?

²⁰ Era vakanamata na vulagi e vakadonuya o Jiova ena veigauna totoka se bera mai. O ira na lumuti yalodina era na curu ena ‘levu na tikina’ e vakarautaka tu vei ira o Jisu mai lomalagi. (Joni 14:2) O ira na nuitaka na bula e vuravura era vakanamata ena ka e yalataka na Vakatakila 21:3. Macala ga nida marautaka kece nona veisureti vakayalololoma o Jiova meda nona itokani, meda nona vulagi tawamudu tale ga ena nona valelaca!