Taro na Dauwiliwili
Na cava era rairai tukuna kina eso ni dusia na “vosa i Jiova” na ka e tukuni ena Same 12:7 (ena tikina e 6), ia na New World Translation e vakaibalebaletaki ira “na vakacacani” (ena tikina e 5)?
Eda kila ena tikina wavolita ni tikinivolatabu qo ni dusia tiko na tamata.
Ena Same 12:1-4, eda wilika nira sa “yali o ira na vakabauta mai na kedra maliwa na tamata.” Ia e tukuna ena Same 12:5-7:
“‘Nira sa vakacacani na vakaloloma,
Nira vutugu na dravudravua,
Au na tucake mai meu cakava e dua na ka,’ e kaya o Jiova.
‘Au na vakabulai ira mai vei ira na dauveibeci.’
E savasava na vosa i Jiova,
E vaka na siliva e samaki ena lovo, qai vakasavasavataki vakavitu.
Kemuni Jiova, oni na yadravi ira,
Oni na taqomaki ira yadudua mai na itabatamata qo me tawamudu.”
E tukuni ena tikina e 5 na ka ena cakava na Kalou vei ira na vakacacani. Ena vakabulai ira.
E kuria na tikina e 6 ni “savasava na vosa i Jiova,” “e vaka na siliva e samaki.” Qori na noda rai na lotu vaKarisito me baleta na vosa i Jiova.—Same 18:30; 119:140.
Dikeva mada na tikina e tarava, na Same 12:7: “Kemuni Jiova, oni na yadravi ira, oni na taqomaki ira yadudua mai na itabatamata qo me tawamudu.” O cei e vakaibalebaletaki ena vosa “ira”?
Ni tukuni ena tikina e 6 na “vosa i Jiova,” oti sa qai tarava mai na tikina e 7, era rairai nanuma kina eso ni vosa “ira” e dusia na vosa ni Kalou. Eda kila ni Kalou e taqomaka na iVolatabu nira saga mada ga e levu na dauveitusaqati mera vakarusa, mera vakatabuya tale ga.—Aisea 40:8; 1 Pita 1:25.
Ia e donu vinaka tale ga na ka e tukuni ena tikina e 5. O Jiova e dau vukei ira na “vakacacani” kei ira na “vakaloloma.” Ena sega ni cegu na nona vakabulai ira.—Jope 36:15; Same 6:4; 31:1, 2; 54:7; 145:20.
Na cava gona e vakaibalebaletaka na vosa “ira” ena tikina e 7?
Na same qo e dusi ira tiko na tamata.
E tukuni ena Same 12:1 me baleti “ira na vakabauta” era dau lasutaki. Oti qori eda wilika tarava ni o Jiova ena totogitaki ira era vakayagataka vakatani na yamedra. E vakacegui keda na daunisame meda nuitaka na Kalou me vukei ira na nona tamata, baleta ni savasava na nona vosa.
Koya gona e tukuna na tikina e 7 ni o Jiova ena yadravi ira qai taqomaki “ira,” qori o ira na vakacacani vei ira na tamata ca.
E laurai na vosa “ira” ena levu na ilavelave nuitaki ni iVolatabu vakaIperiu (Hebrew Masoretic text). Na ivakadewa vaKirisi ni iVolatabu vakaIperiu (Greek Septuagint) e laurai kina vakarua ena tikina e 7 na vosa “keimami.” Qori e dusi ira tiko ga na yalodina era vakacacani, era vakalolomataki. Sa qai tinia gona na tikina e 7 nira na taqomaki “yadudua” o ira na yalodina “mai na itabatamata qo,” ya o ira na tamata ca era bukana na ca. (Same 12:7, 8) Ena dua na vakadewa vakaArame ni iVolatabu vakaIperiu, e tukuni ena tikina e 7: “Kemuni, TURAGA, oni na taqomaki ira na yalododonu, oni na yadravi ira mai na itabatamata ca qo me tawamudu. Era veilakoyaki na tamata ena veiyasana, me vaka na liji e domica na dra ni luve ni tamata.” Na vica na vakadewa qori e ikuri ni ivakadinadina ni Same 12:7 e sega ni vakaibalebaletaka tiko na vosa ni Kalou.
E veivakacegui gona na tikinivolatabu qo vei “ira na vakabauta” ni na vukei ira na Kalou.
