1, 2. (a) Na cava e ikalawa bibi kina na papitaiso? (b) Na cava me vakadeitaka e dua e via papitaiso?

O DUA vei ira na itabagone o vakasamataka tiko mo papitaiso? Qori na ka dokai duadua meda cakava. Ia me vaka e vakamacalataki ena ulutaga sa oti, e ikalawa bibi na papitaiso. Eda vakaraitaka kina e matanalevu noda yalayala vei Jiova meda qaravi koya me tawamudu nida vakaliuca na lomana. Kena ibalebale ke o via papitaiso mo vakadeitaka ni o sa yalomatua, sa lomamu dina, o kila tale ga na ibalebale ni yalayala.

² Vakacava ke o se sega ni vakadeitaka mo papitaiso? Se o via papitaiso, ia erau nanuma nomu itubutubu mo wawa tale vakalailai, de dua mo yalomatua ena bula vaKarisito? Ni yaco qori, kua ni yalolailai. Mo vakayagataka na gauna qori mo toso kina vakayalo. Toso na gauna o sa rawa ni papitaiso. Ni o vakasamataka tiko qori, saga mo tekia e tolu na nomu isausau me baleta (1) na ka o vakabauta, (2) nomu ivalavala, kei na (3) nomu dau vakavinavinaka.

3, 4. E ivakaraitaki vinaka vakacava o Timoci vei ira na itabagone?

³ O na sauma vakacava na taro qo: Na cava au vakabauta kina ni bula dina tiko na Kalou? Cava au vakabauta kina ni uqeti vakalou na iVolatabu? Cava au vakabauta kina ni vinaka cake na ivakarau ni bula savasava ena iVolatabu mai na ivakarau ni bula e vuravura? E sega ni inaki ni taro qo mo vakatitiqa kina. Me uqeti iko ga mo muria nona ivakasala na yapositolo o Paula: “Moni vakadinata kina ni vinaka, e yaga, qai uasivi na loma ni Kalou.” (Roma 12:2) Ia na cava e vinakati tale kina vei ira na tacida e Roma mera vakadinata na ka era sa vakabauta rawa tu?

⁴ Qo e dua na ivakaraitaki vakaivolatabu. E kila vinaka o Timoci na iVolatabu ni dau vakavulici koya o tinana kei buna ni se “gone dramidrami.” Ia e uqeti Timoci o Paula: “Mo muria tiko ga na ka o vakavulici kina, na ka o vakabauta ena gauna e vakadeitaki kina vei iko.” (2 Tim. 3:14, 15) E vakamacalataki ena dua na ivola ni vosa taumada na “vakadeitaki” e tiko kina na vakasama ni “vakabauta dina qai sega ni vakatitiqataki na dina ni dua na itukutuku.” Io, e vakabauta o Timoci ni sa kunea na ka dina. E sega ni rau tukuna vua o tinana kei buna ni qori na ka dina, ia e vakasamataka vinaka ga o Timoci na vuna e vakabauta kina qai vakadeitaki vua.—Wilika Roma 12:1.

5, 6. Na cava e bibi kina mo vakayagataka nomu “vakasama” ni o se gone?

⁵ Vakacava o iko? De dua o sa kila na ka dina ena dua na gauna balavu. Vakacava me nomu isausau mo dikeva na vuna o vakabauta kina? Ni o cakava qori, ena dei nomu vakabauta, o na sega ni rawai ena veimurimuri, sega ni rawai ena vakasama ni vuravura se nomu vakasama ga.

⁶ Ni o vakayagataka nomu “vakasama” ni o se gone, o na rawa ni sauma vinaka nodra taro na nomu icaba, me vaka: ‘O vakadeitaka vakacava ni tiko na Kalou? Na cava e vakatara kina na Kalou yalololoma me yaco na veika ca? O kila vakacava ni sa bula makawa tu mai na Kalou?’ Ni o vakavakarau vinaka, ena sega ni vakaleqa nomu vakabauta na taro qori, ena uqeti iko mo gumatua ena vuli vakataki iko.

7-9. Vakamacalataka se yaga vakacava na ulutaga na “What Does the Bible Really Teach?” me dei kina noda vakabauta.

⁷ Ni o gumatua ni vuli vakataki iko, o na sega ni vakatitiqa, ena dei nomu vakabauta. (Caka. 17:11) Levu na ivukevuke yaga e rawa nida vakayagataka. Kena ivakaraitaki na brochure The Origin of Life—Five Questions Worth Asking kei na ivola Is There a Creator Who Cares About You? Kena ikuri, levu na itabagone era marautaka na ulutaga ena noda website “What Does the Bible Really Teach?” E vica na ulutaga qori e tiko ena BIBLE TEACHINGS ena jw.org. Na inaki ni ulutaga qori me vaqaqacotaka nomu vakabauta.

⁸ O kila vinaka na iVolatabu, ena rawarawa mo sauma na taro e tiko ena ulutaga kece qori. Vakacava o vakadeitaka ni qori dina na isaunitaro? Ena vinakati mo vakamacalataka e vica na tikinivolatabu ena ulutaga yadua, mo qai vola na ka o nanuma. Ena vukei iko mo tu vakarau ni vakamacalataka nomu vakabauta. Na ulutaga na “What Does the Bible Really Teach?” e vukea e levu na itabagone me dei nodra vakabauta. Ke o rawa ni raica na Internet, vakacava mo vulica qori ena nomu vuli vakataki iko?

 ⁹ Ni o vaqaqacotaka na ka o vakabauta, o sa na vakarautaki iko tiko ena papitaiso. E tukuna e dua na tacida yalewa gone: “Ni bera niu vakatulewataka meu papitaiso, au vulica rawa na iVolatabu, au vakadeitaka kina ni qo na lotu dina. Sa qai dei tiko ga e veisiga na ka au vakabauta qori.”

10. Na cava eda kaya kina ni na kilai nona vakabauta e dua ena nona ivalavala?

¹⁰ E tukuna na iVolatabu: “Na vakabauta . . . ena mate ke sega na cakacaka.” (Jeme. 2:17) Ke dei na ka o vakabauta, ena laurai ena nomu ivalavala. Ena vakacava nomu ivalavala? E vakamacalataka na iVolatabu mo “ivalavala savasava, [mo] qarava tale ga na Kalou.”—Wilika 2 Pita 3:11.

11. Vakamacalataka na matavosa “ivalavala savasava.”

¹¹ Mo rawa ni “ivalavala savasava,” e dodonu me savasava nomu itovo. Kena ivakaraitaki, vakasamataka mada na ono na vula sa oti. O vakaraitaka vakacava ni vakavulici nomu “vakasama” me vakaduiduitaka na ka e donu mai na ka e cala? (Iper. 5:14) Bau dua na gauna o vorata kina na veitemaki se veimurimuri? Vakacava era doka nomu vakabauta o ira e koronivuli ni vinaka nomu itovo? O dau tutaka nomu vakabauta se o vakamurimuri ira nomu lewenikalasi mo kua kina ni vakalialiai? (1 Pita 4:3, 4) Eda kila ni sega ni dua e uasivi. Eso mada ga sa dede nodra qaravi Jiova era dau rere ni vakamacalataka e matanalevu nodra vakabauta. Ia o koya e yalataka nona bula vei Jiova ena sakitaka me vakatokayacataki ena yaca ni Kalou. Ena laurai qori ena nona ivalavala.

12. Na cava na ibalebale ni nomu ‘qarava na Kalou’? Mo raica vakacava qori?

¹² Na cava na ibalebale ni nomu “qarava na Kalou”? Qo na ka o dau cakava ena ivavakoso, me vaka nomu tiko ena soqoni kei na nomu vakaitavi ena cakacaka vakaitalatala. Wili kina eso na ka e sega ni laurai levu, me vaka na nomu dau masu kei na nomu vuli vakataki iko. Ni dua e yalataki koya vei Jiova ena sega ni raica qori me itavi. Ia ena vakaraitaka na rai vata ga e tiko vei Tui Tevita, ni kaya: “Na noqu Kalou, au marautaka vakalevu meu cakava na lomamuni, qai tu e vu ni lomaqu na nomuni lawa.”—Same 40:8.

13, 14. Na cava eso na ka ena vukei iko mo “qarava na Kalou”? E yaga vakacava qori vei ira eso na itabagone?

¹³ Ena tabana e 308 kei na 309 ni ivola Questions Young People Ask—Answers That Work, Volume 2, e vakarautaki mera vakalewena na itabagone. Ena vukei iko qori mo tekia nomu isausau. O rawa ni vola kina nomu isaunitaro ena so na taro va qo, “Na cava o dau vakabibitaka ena nomu masu, cava e vakaraitaka me baleta nomu lomani Jiova?” “Cava o dau vulica ena nomu vuli vakataki iko?” “O dau vakaitavi ena cakacaka vakaitalatala, ke sega mada ga ni lako nomu itubutubu?” E tiko tale ga na vanua mo vakavola kina nomu isausau me baleta na masu, vuli vakataki iko, kei na cakacaka vakaitalatala.

¹⁴ Levu na itabagone era vakasamataka tiko mera papitaiso era raica ni yaga vakalevu na ivola qori. E kaya e dua na goneyalewa o Tilda: “Au vakayagataka na ivola qori meu tekia kina noqu isausau. Au sauva yadudua ni toso na gauna. Oti ga e dua na yabaki au kila niu sa rawa ni papitaiso.” E kaya tale ga e dua  na cauravou o Patrick: “Au sa kila tiko na noqu isausau, ia niu vola e uqeti au meu gumatua ni sauva na isausau qori.”

15. Na cava mo vakatulewa taudua ga kina ena nomu yalayala?

¹⁵ Qo e dua na taro vakavure vakasama e tiko ena ivola ya: “Ke rau tinia nomu itubutubu se nomu itokani nodra qaravi Jiova, o na qaravi Jiova tiko ga?” Mo nanuma tiko, ni o dua na lotu vaKarisito yalayala papitaiso, o na saumitaro vei Jiova. Kena ibalebale, nomu qaravi Jiova me kua ni vakatau vei ira na so tale se o rau nomu itubutubu. Me laurai ena nomu ivalavala savasava kei na nomu qarava na Kalou ni o vakabauta na ka dina, o qai via muria na ivakatagedegede ni Kalou. Toso na gauna sa rawa ni o papitaiso.

16, 17. (a) Na cava ena uqeta e dua me lotu vaKarisito? (b) Na ivakaraitaki cava ena uqeti iko mo vakavinavinakataka na ivoli?

¹⁶ E tarogi Jisu e dua na turaga e kila vinaka na Lawa: “Na cava na ivunau levu duadua ena Lawa?” E sauma o Jisu: “Mo lomani Jiova na nomu Kalou ena lomamu taucoko, ena nomu vinaka taucoko, kei na nomu vakasama taucoko.” (Maciu 22:35-37) E vakabibitaka eke o Jisu na inaki dina ni noda vakaitavi ena cakacaka vaKarisito me vaka na papitaiso, oya me vu mai lomada noda lomani Jiova. Dua vei ira na sala vinaka duadua me titobu kina nomu lomani Jiova, oya mo vakasamataka vakatitobu na nona iloloma uasivi duadua, na isoro ni veivoli i Luvena. (Wilika 2 Korinica 5:14, 15; 1 Joni 4:9, 19.) Ni o vakasamataka na ivoli kei na kena yaga, ena uqeti iko mo vakaraitaka nomu vakavinavinaka.

¹⁷ Kena ivakaraitaki: Kaya mada ni dua e vueti iko ni o luvu. Vakacava ni o sa yaco e vale, o na guilecava na ka vinaka a caka vei iko? Sega! O na vakavinavinakataka sara ga na ka e cakava. O na via solia sara ga nomu bula ena vukuna! Ia e vakasakiti sara na ka rau cakava o Jiova kei Jisu. Ke sega ni rau vakarautaka na ivoli, eda na sega ni vueti rawa mai na ivalavala ca kei na mate. Ia ena vuku ni nodrau loloma, sa rawa nida nuitaka na bula tawamudu ena vuravura parataisi!

18, 19. (a) Na cava mo kua ni lomaleqataka kina nomu to vei Jiova? (b) Ena vinaka vakacava noda bula nida qaravi Jiova?

¹⁸ Vakacava o vakavinavinakataka na  ka e cakava o Jiova ena vukumu? E veiganiti kina mo yalataka nomu bula vei Jiova qai papitaiso. Nanuma tiko, na nomu yalayala e kena ibalebale nomu yalataka vei Jiova mo cakava na lomana me tawamudu, veitalia se cava e yaco. Vakacava e dodonu mo lomaleqataka qori? Sega! Nanuma tiko e vinakata o Jiova mo marautaka na bula e vinaka duadua, ena “vakaicovitaki ira tale ga era vakasaqarai koya ena yalogu.” (Iper. 11:6) Ena sega ni vakaleqa nomu bula na nomu yalayala vei Jiova kei na nomu papitaiso. Kena veibasai ga, ena vinaka kina nomu bula. Tukuna e dua na tacida tagane yabaki 24 a papitaiso ni se gonelailai: “De dua ena levu sara na ka au kila keu a yalayala ni oti e vica na yabaki. Ia niu yalayala vei Jiova niu se gone e taqomaki au mai na ka e dau vakaliuci e vuravura.”

¹⁹ E vinakata o Jiova meda marau. Ia o Setani e dau nanumi koya ga, e sega ni nanumi keda. E sega ni yaga tawamudu na icovi e vakarautaka o Setani vei ira nona ito. E sega ni dua na itukutuku vinaka e lako mai vua meda vakanuinui kina, se me dua na yavu vinaka meda vakanamata kina. E rawa vakacava ni solia e dua na ka e sega ni nona? Ena vakarautaka ga na veigauna ca se bera mai, ni nona ivotavota tale ga qori!—Vkta. 20:10.

20. Na cava me cakava e dua na itabagone me rawa ni yalayala qai papitaiso? (Raica tale ga na kato “ Mo Rawa ni Toso Vakayalo.”)

²⁰ Io, e vakatulewa vinaka duadua nomu yalataka nomu bula vei Jiova. Vakacava o sa rawa ni cakava na ikalawa ya? Mo kua ni lomalomarua. Ia ke o nanuma mo wawa tale mada, mo muria na vakatutu ena ulutaga qo mo toso tiko ga kina vakayalo. E vola o Paula vei ira mai Filipai: “Se mani toso cava eda sa cakava, meda toso tiko ga i liu ena ivakarau vata ga qori.” (Fpai. 3:16) Ke o muria na ivakasala qori, toso na gauna o na via yalataka nomu bula vei Jiova qai papitaiso.