E sega ni dua nikua e kila na kena irairai o Paula. Na iyaloyalo e tabaki ena noda ivola e droini wale ga, e sega ni kena e kune ena vakekeli.

Ia e tiko eso na ka e rawa ni kilai kina na kena irairai. Kena ivakaraitaki, e cavuti ena Zion’s Watch Tower ni Maji 1, 1902: “Me baleta na kena irairai o Paula: . . . E cavuti ena ivola na ‘Acts of Paul and Thecla,’ . . . a volai ena rauta na 150 G.V., e vakamacalataki kina na irairai kei Paula, de dua e vakamacala vinaka duadua, e dina tale ga. E tukuni kina ni ‘turaga lailai ga, e cou, yava teqa, bulicaki vinaka, sota na vacuna; e ucu momoto.’”

E vakamacalataka na ivolavosa na Oxford Dictionary of the Christian Church (itabataba ni 1997) me baleta na ivola makawa qori: “E rairai dina eso na ka e volai me baleti Paula kei Thecla ena ivola na ‘Acts.’” E dokai vakalevu na ivola qori ena imatai ni senitiuri qai vakadinadinataki ena 80 na kena ilavelave vaKirisi kei na so tale na vosa. Koya gona, na droini e tabaki ena noda ivola e salavata kei na vica na itukutuku makawa me baleta na kena irairai na yapositolo qo.

Me nanumi ni tiko eso tale na ka e bibi mai na irairai kei Paula. Ena nona cakacaka vakaitalatala mada ga, era tukuna eso na dauvakalelewa “ni tiko vata kei keda e maloku sara qai vakasevaki na nona vosa.” (2 Kor. 10:10) Me nanumi ni a qai mai lotu vaKarisito ni oti nona vakaraitaki koya vakacakamana o Jisu. Meda vakasamataka tale ga na ka e cakava rawa o Paula ni “digitaka oti na tagane qo [o Karisito] me tukuna na [yacana] ina veimatanitu.” (Caka. 9:3-5, 15; 22:6-8) Meda vakasamataka vakabibi na kena yaga nida vulica na ivola vakaivolatabu e uqeti Paula o Jiova me vola.

A sega ni sakitaka o Paula na ka e rawata ni bera ni lotu vaKarisito, e sega tale ga ni vakamacalataka na kena irairai. (Caka. 26:4, 5; Fpai. 3:4-6) E kaya ga: “O yau na imurimuri sara ni yapositolo, e sega mada ga ni ganita meu vakatokai meu yapositolo.” (1 Kor. 15:9) E qai vola: “Vei koya e lailai duadua vei ira na yalosavasava kece, o yau au muri tale vua. Ia au qai nuitaki ena loloma soli wale qo meu tukuna yani ina veimatanitu na itukutuku vinaka talei kei Karisito e sega ni katumi rawa.” (Efeso 3:8) Qori ga na ka eda na kauaitaka vakabibi, sega soti na kena irairai.