1. Na cava era via vakadeitaka na itubutubu lotu vaKarisito ni bera ni papitaiso na luvedra?

“SA VICA vata na vula noqu tukuna tiko vei Ta kei Na niu sa via papitaiso, keitou dau veivosakitaka tale ga. Rau via vakadeitaka meu kila na bibi ni noqu vakatulewa. E siga guiguilecavi dredre vei au na ika31 ni Tiseba, 1934.” Qori na ka e vakamacalataka o Blossom Brandt me baleta nona vakatulewataka me papitaiso. Nikua, era kauaitaka tale ga na itubutubu lotu vaKarisito mera vukei luvedra mera vakatulewa vakayalomatua. E rawa ni vakavuleqa vakayalo ke dua e lokuyara se vakabera tiko na nona papitaiso. (Jeme. 4:17) Ia era via vakadeitaka na itubutubu ni bera nira papitaiso na luvedra, sa rawa nira qarava na itavi ni lotu vaKarisito na veivakatisaipelitaki.

2. (a) Na cava era kauai kina e vica na ivakatawa ni tabacakacaka? (b) Cava eda na veivosakitaka ena ulutaga qo?

² Era kauai e vica na ivakatawa ni tabacakacaka nira sota  kei ira na itabagone era voleka ni yabaki 20 se yabaki 20 vakacaca era susu ena dina, ia era se bera tiko ga ni papitaiso. Era tiko ena soqoni ena levu na gauna, era vakaitavi tale ga ena cakacaka vakaitalatala. Era nanuma nira sa iVakadinadina i Jiova. Ia e tiko eso na vuna era sega ni via yalataki ira kina vei Jiova mera papitaiso. Na cava e dua na vuna? Ena so na gauna, era kaya na itubutubu mera qai papitaiso malua. Eda na veivosakitaka ena ulutaga qo e va na vuna era sega ni via vukei luvedra kina na itubutubu mera toso, mera papitaiso.

3. Na cava erau kauaitaka na itubutubu nei Blossom?

³ Erau kauaitaka vakabibi na itubutubu nei Blossom, sa cavuti oti ena imatai ni parakaravu ke sa yalomatua o luvedrau goneyalewa me kila na inaki kei na bibi ni papitaiso. Era na kila vakacava na itubutubu ni sa rawa ni yalayala o luvedra?

4. Ena uqeti ira vakacava na itubutubu na ivakaro i Jisu ena Maciu 28:19, 20 nira vakavulici luvedra tiko?

⁴ Wilika Maciu 28:19, 20. Me vaka e vakamacalataki ena ulutaga sa oti, e sega ni cavuti ena iVolatabu na yabaki me papitaiso kina e dua. Ia ena yaga mera vakasamataka na itubutubu na inaki ni veivakatisaipelitaki. Na vosa vaKirisi ‘veivakatisaipelitaki’ ena Maciu 28:19 e tiko kina na vakasama ni veivakavulici, e kena inaki me so tale na gonevuli se tisaipeli. Na tisaipeli e vulica qai kila na ivakavuvuli i Jisu, oti me muria sara. Me nodra isausau kece na itubutubu lotu vaKarisito mera vakavulici luvedra nira se gone dramidrami ra qai vukei ira mera papitaiso, mera tisaipeli i Karisito. Io ena sega ni rawa ni papitaiso na gone dramidrami. Ia e vakaraitaka na iVolatabu ni rawa nira kila vinaka ra qai taleitaka na ka dina vakaivolatabu na gone lalai.

5, 6. (a) Na cava eda vulica ena ka e vakamacalataka na iVolatabu ena papitaiso i Timoci? (b) Era na vukei luvedra vakacava na itubutubu?

⁵ O Timoci e dua na tisaipeli e muria na dina ni se gone. E kaya na yapositolo o Paula ni vulica o Timoci na ka dina ena iVolatabu ni se gone dramidrami. A susu ena vuvale duidui lotu. Ni Jiu o tinana kei buna, rau tugana e lomana me taleitaka na iVolatabu ena kena ivakarau era dau cakava na Jiu, mani dei nona vakabauta. (2 Tim. 1:5; 3:14, 15) Ni sa voleka ni yabaki 20, se 20 vakacaca, sa dua na tisaipeli nuitaki o Timoci me qarava eso na itavi bibi ena ivavakoso.—Caka. 16:1-3.

⁶ E macala nira duidui na gone, era na sega ni yalomatua ena dua vata ga na gauna se yabaki. Eso e matua totolo na nodra vakasama kei na lomadra, era vinakata sara mera papitaiso. Eso tale era qai via papitaiso nira sa qase toka. Era na sega gona ni vakasaurarataki luvedra na itubutubu yalomatua mera papitaiso. Ia era na vukei ira yadudua mera toso vakayalo me salavata kei na nodra yabaki. Era marau na itubutubu nira muria na luvedra na vakasama ena Vosa Vakaibalebale 27:11. (Wilika.) Ia mera kua ni vakawalena na nodra isausau, oya mera tisaipeli lotu vaKarisito na luvedra. Nira cakava qori, era na via veivosakitaka na taro, ‘Sa levu na ka e kila o luvequ me yalataka kina nona bula vua na Kalou qai papitaiso?’

7. Vakacava me levu sara na ka e kila e dua me qai papitaiso? Vakamacalataka.

⁷ Nira dauniveivakavulici na itubutubu, era vinakata mera rawata na luvedra na kilaka me yavutaki kina na nodra yalayala. E sega ni vinakati me levu sara na ka era kila mera qai yalataka na nodra bula, ra papitaiso tale ga. Ni oti mada ga na papitaiso, e bibi vei ira kece na tisaipeli mera vakalevutaka tiko ga na nodra kilaka dodonu. (Wilika Kolosa 1:9, 10.) Me vakacava gona na levu ni ka mera kila?

8, 9. Na cava eda vulica ena itukutuku me baleti Paula kei na ovisa ni valeniveivesu?

⁸ Era na vuli na itubutubu ena nodratou ivakaraitaki e dua na vuvale ena imatai ni senitiuri. (Caka. 16:25-33) A sikovi Filipai o Paula ena ikarua ni nona ilakolako vakadaukaulotu ena rauta na 50 G.V. Rau mani vesu kei na nona itokani o Sailasa ni rau beitaki, rau biu sara e valeniveivesu. Ena lomalomanibogi, e yavalata na yavu ni valeniveivesu na uneune qai tadola kece na katuba. E nanuma na ovisa ni valeniveivesu nira sa dro na kaivesu, mani via vakamatei koya qai kaila yani o Paula. Erau vakamacala sara vakavinaka o Paula kei Sailasa vua na ovisa kei na nona vuvale. Ni ratou taleitaka vakalevu na ka dina me baleti Jisu, na cava ratou qai cakava? Sega ni bera nodratou papitaiso. Na cava eda vulica kina?

⁹ Me vaka na kena ivakarau, e rairai cegu mai na mataivalu na ovisa ni valeniveivesu qo. E sega sara ga ni kila na iVolatabu. Me kila na yavu vakaivolatabu, e vinakati me vulica na ivakavuvuli rawarawa ni ka dina, kila na ibalebale ni nona qarava na Kalou qai vakadeitaka me muria na ivakavuvuli i Jisu. Ena gauna lekaleka ga qori, e uqeti koya me papitaiso na nona kila na ivakavuvuli rawarawa ni ka dina kei na nona taleitaka. E macala ga ni a vakalevutaka na ka e kila ni sa papitaiso oti. Ni o vakasamataka tiko na ivakaraitaki qo, na cava mo cakava ni sa taleitaka o luvemu na ivakavuvuli rawarawa qori, okati kina na ibalebale ni nona yalayala kei na papitaiso vaka kina na kena bibi? Ni o itubutubu o na rairai vakatututaka me lai raici ratou na qase ni ivavakoso me kila ke sa rawata na kena ivakatagedegede. * Me vakataki ira na vo ni tisaipeli era sa papitaiso, ena vakalevutaka tiko ga na nona kila na inaki i Jiova ena nona bula taucoko me tawamudu.—Roma 11:33, 34.

10, 11. (a) Na cava era nanuma eso na itubutubu? (b) Cava me rau kauaitaka vakalevu?

¹⁰ Era nanuma eso na itubutubu ni na vinaka mera qai papitaiso malua na luvedra me rawa nira vuli mada me dua na nodra cakacaka. De dua e donu na nodra inaki, ia era na rawaka vakavinaka kina na gone? Koya e bibi, e salavata kei na ka e tukuni ena iVolatabu? Na cava e vakamacalataka na Vosa i Jiova?—Wilika Dauvunau 12:1.

¹¹ E bibi meda nanuma tiko ni vuravura qo kei na kena gagadre e veisaqasaqa kei na nanuma se ka e vinakata o Jiova. (Jeme. 4:7, 8; 1 Joni 2:15-17; 5:19) Nona veiwekani vinaka o  luvemu kei Jiova ena taqomaki koya ena vuravura i Setani kei na kena vakasama. Ni rau vinakata na itubutubu me vakaliuca o luvedrau na sasaga vakayago ena rawa ga ni veilecayaki kina, ena vakaleqa tale ga na ka e dodonu me vakaliuca. Vakacava e vinakata dina na itubutubu dauloloma me lewa o vuravura na ka e sasagataka o luvena? Macala ga nida rawaka se marau dina nida vakaliuci Jiova ena noda bula.—Wilika Same 1:2, 3.

12. Na cava era sega ni uqeti luvedra kina eso na itubutubu mera papitaiso?

¹² E vakamacalataka e dua na tina lotu vaKarisito na vuna e sega ni uqeti luvena yalewa kina me papitaiso. E kaya: “Au madua meu tukuna ni vuna levu sara ga na ituvatuva ni veivakasivoi.” Me vaka na tacida yalewa ya, era nanuma eso na itubutubu mera se kua mada ni papitaiso na luvedra mera sivita rawa na yabaki ni bula vagone nira se yalowai. (Vkte. 8:21; Vkai. 22:15) Era na rairai nanuma, ‘Ena sega ni vakasivoi o luvequ ni se bera ni papitaiso.’ Na cava e veivakacalai kina na nanuma qori?—Jeme. 1:22.

13. Vakacava ena sega ni saumitaro vei Jiova o koya se bera ni papitaiso? Vakamacalataka.

¹³ E macala nira vinakata na itubutubu lotu vaKarisito mera yalomatuataka na luvedra na nodra yalayala. Ia e cala nodra nanuma ni na sega ni saumitaro o luvedra vei Jiova nira se bera ni papitaiso. Na vuna? Ni sega ni yavutaki ena papitaiso na noda saumitaro vei Jiova. E kena veibasai ga, ena saumitaro vua na Kalou na gone ni sa kila na ka e donu kei na ka e cala. (Wilika Jemesa 4:17.) Koya gona, na itubutubu yalomatua ena saga me ivakaraitaki vinaka vei luvena, me kua ga ni tarova na nona via papitaiso. Era na vinakata mera tugana e loma i luvedra nira se gone dramidrami mera taleitaka na ivakatagedegede cecere i Jiova. (Luke 6:40) Qori ena taqomaki luvedra, ena uqeti ira mera muria na ivakatagedegede dodonu i Jiova.—Aisea 35:8.

14. Era na tokona vakacava na qase na nodra sasaga na itubutubu era vukei luvedra tiko mera papitaiso?

¹⁴ Nira ivakatawa vakayalo na qase ni ivavakoso, era na tokona nodra sasaga na itubutubu nira tukuna na vinaka ni isausau vakayalo. E dua na tacida yalewa e painia tiko me 70 vakacaca na yabaki, e nanuma lesu ni se qai yabaki ono na yaga ni nodrau veitalanoa kei na tacida o Charles T. Russell. E kaya, “E 15 na miniti neirau veivosakitaka tiko na noqu isausau vakayalo.” Io, na vosa vinaka kei na veivakayaloqaqataki ena yaga tawamudu. (Vkai. 25:11) Rawa tale ga nira raica na qase mera vakaitavi na itubutubu kei luvedra ena tara Vale ni Soqoni, era na lesia na itavi vei ira na itabagone me salavata kei na nodra yabaki kei na ka era rawa ni cakava.

15. Eda na vakayaloqaqataki ira vakacava na gone ena ivavakoso?

¹⁵ Eda rawa tale ga ni veitokoni na lewe ni ivavakoso ena nodra kauaitaki na lalai. Qo e okati kina noda kauaitaka nodra toso vakayalo. Vakacava o bau rogoca na nona ivakamacala veiuqeti e dua na itabagone, se vakaitavi ena soqoni ena lomanimacawa? Vakacava a yalodina ena gauna e vakatovolei kina, se vunautaka rawa na itukutuku  vinaka e koronivuli? Meda totolo ni vakavinavinakataki ira. Ni bera se ni suka na soqoni, vakacava o dau vosa vua e dua na itabagone mo vakaraitaka nomu kauaitaki koya? Nida cakava qori, era na kila kina na gone nira lewe tale ga ni dua na “ivavakoso levu.”—Same 35:18.

16, 17. (a) E veisemati vakacava na papitaiso kei na noda veigauna se bera mai? (b) Na marau cava mera saga na itubutubu lotu vaKarisito? (Raica na imatai ni iyaloyalo.)

¹⁶ E dua na itavi levu e vakacolati vei ira na itubutubu lotu vaKarisito oya mera tuberi luvedra ena “ivakavuvuli kei na ivakasala i Jiova.” (Efeso 6:4; Same 127:3) Era duatani na gone ena matanitu makawa o Isireli nira sa yalataki oti tu vei Jiova ena gauna era sucu kina, ia era sega ni va qori na gone nikua. Na noda lomana tale ga na Kalou kei na ka dina eda sega ni sucu kaya mai. Ena siga e sucu kina na gone, mera nakita na itubutubu me vakavulici me dua na tisaipeli, nira vukei luvedra mera yalataka nodra bula vei Jiova ra qai papitaiso. Vakasamataka mada: Nira yalataka nodra bula, papitaiso ra qai yalodina ni qarava na Kalou, era na vakatakilakilataki kina mera bula ena veivakararawataki levu sa voleka.—Maciu 24:13.

¹⁷ Ni vakatulewataka o Blossom Brandt me papitaiso, rau via vakadeitaka na nona itubutubu lotu vaKarisito ni sa rawa ni muria na ikalawa bibi qori. Ni rau vakadeitaka oti, rau tokona na nona vakatulewa. Ena bogi ni bera na nona papitaiso, e cakava o tamana e dua na ka vakasakiti. E kaya o Blossom: “Keitou tekiduru kece qai masu o Ta. E kaya vei Jiova ni marautaka vakalevu ni sa vakatulewataka na luvena goneyalewa me yalataki koya vua.” Oti tale e 60 na yabaki, e kaya o Blossom: “Au sega vakadua ni guilecava na bogi ya!” Ra itubutubu, moni vakadinadinataka mada ga na lomavakacegu kei na marau nira yalataka nodra bula na luvemuni ra qai papitaiso mera qaravi Jiova.