1. Me vaka e tukuni ena 1 Pita 3:8, na cava eda taleitaki ira kina na dau kauaitaki keda kei na ivakarau ni lomada?

EDA taleitaki ira na dau kauaitaki keda kei na ivakarau ni lomada. Era saga mera biuti ira ena keda ituvaki, oya mera kila na lomada kei na noda rai. Era kila na ka eda vinakata ra qai veivuke, ena so na gauna ni bera mada ga nida kerea. Eda vakavinavinakataka nira “kauaitaki” * keda.—Wilika 1 Pita 3:8.

2. Na cava e ka ni sasaga kina meda dau veikauaitaki?

² Nida lotu vaKarisito, eda vinakata kece meda dau veikauaitaki. Ia e ka ni sasaga toka. Na vuna? Oya nida sega ni uasivi. (Roma 3:23) Eda dau nanumi keda ga, e ka ni sasaga gona meda kauaitaki ira eso tale. Eso tale ga vei keda e ka ni sasaga meda dau veikauaitaki ena vuku ni noda isususu kei na ka eda sotava ena gauna sa oti. Kena ilutua, e rawa nida rawai ena nodra ivakarau o ira eda bula vata e veisiga. Ena iotioti ni veisiga qo, era na sega ni dau veikauaitaki e levu. Era na “dau lomani ira ga.” (2 Tim. 3:1, 2) Na cava meda cakava meda dau veikauaitaki kina?

3. (a) Na cava meda cakava meda veikauaitaki kina vakalevu? (b) Cava eda na veivosakitaka ena ulutaga qo?

³ Eda na veikauaitaki vakalevu nida muria na ivakaraitaki i Jiova kei na Luvena o Jisu Karisito. E Kalou dauloloma o Jiova, e ivakaraitaki vinaka ena nona veikauaitaki. (1 Joni 4:8) E ucui Tamana vinaka o Jisu ena nona itovo. (Joni 14:9) Ni bula e vuravura, e vakaraitaka na  sala meda dau veinanumi kina. Eda na veivosakitaka e liu ena ulutaga qo na nodrau kauaitaka o Jiova kei Jisu na lomadra eso tale. Oti eda na qai veivosakitaka na sala meda vakatotomuri rau kina.

4. Me vaka e tukuni ena Aisea 63:7-9, eda kila vakacava ni dau kauaitaka o Jiova na ivakarau ni lomadra na nona tamata?

⁴ E vakavulica na iVolatabu ni o Jiova e dau kauaitaka na ivakarau ni lomadra na nona dauveiqaravi. Kena ivakaraitaki, dikeva mada na ivakarau ni lomana ena gauna era vakatovolei kina na Isireli ena gauna makawa. E kaya nona Vosa: “Ena gauna kece era rarawa kina e rarawa o koya.” (Wilika Aisea 63:7-9.) Toso na gauna, e vakamacalataka tale ga na parofita o Sakaraia na ka e tukuna o Jiova nira vakalolomataki na nona tamata, ni vaka sara ga e caka tiko vua. E kaya o Jiova vei ira nona tamata: “O koya e tarai kemuni e tara na loa ni mataqu.” (Saka. 2:8) E vakasakiti dina nona kauaitaki ira na nona tamata o Jiova!

5. Tukuna e dua na ivakaraitaki ni nona yavala o Jiova me vukei ira na nona tamata nira rarawa.

⁵ O Jiova e dau nanumi ira na nona tamata nira rarawa, e dau yavala tale ga me vukei ira. Kena ivakaraitaki, nira rarawa na Isireli ena nodra vakabobulataki tu mai Ijipita, e kila vinaka o Jiova na nodra rarawa mani vakacegui ira. E kaya vei Mosese o Jiova: “Au sa raica dina na nodra vakaloloma na noqu tamata . . . , au sa rogoca tale ga na nodra tagi . . . niu kila vinaka na ka mosimosi era vakila tiko. Ia qo au na lako sobu meu vakabulai ira mai na ligadra na kai Ijipita.” (Lako 3:7, 8) Ni nanumi ira na nona tamata o Jiova, e sereki ira kina mai na veivakabobulataki. Oti tale e vica na drau na yabaki, era valuti ira na Isireli na meca ena Vanua Yalataki. Na cava e cakava o Jiova? “E lomani ira . . . nira vutugu baleti ira na dau vakasaurarataki ira kei ira na vakararawataki ira.” Eda raica tale eke ni kauaitaki ira na nona tamata o Jiova, mani vukei ira. Oya ni talai ira na  turaganilewa mera vakabulai ira na Isireli.—Dvei. 2:16, 18.

6. Tukuna na ivakaraitaki ni nona kauaitaka o Jiova na ivakarau ni lomana e dua e cala na nona rai.

⁶ E dau kauaitaka o Jiova na lomadra na nona tamata ena gauna mada ga e cala kina na nodra rai. Kena ivakaraitaki o Jona. E talai na parofita qo me kacivaka na itukutuku ni veilewai e Ninive. Nira veivutuni, e vakabulai ira na Kalou. Ia e rarawataka o Jona na vakatulewa qori. Ni sega ni vakarusai o Ninive, “dua na ka na nona cudru katakata.” Ia e vosoti Jona o Jiova, e vukei koya me veisautaka na nona rai. (Jona 3:10–4:11) Toso na gauna, sa qai kila o Jona na ka e vakavulica o Jiova, mani lesi me vola na itukutuku qori me yaga vei keda.—Roma 15:4. *

7. Na cava eda vakadeitaka ena ka e cakava o Jiova vei ira na nona tamata?

⁷ Na ka e cakava o Jiova vei ira na nona tamata e vakadeitaka vei keda ni dau kauaitaki ira. E kila vinaka na noda rarawa kei na ka mosimosi eda vakila. O Jiova ga e “kila na loma ni tamata.” (2 Vei. 6:30) E kila vinaka na noda rai, noda vakanananu titobu, kei na ka eda sega ni rawata. Ena “sega ni vakalaiva [meda] sotava na ka ni veivakatovolei [eda] na sega ni taqea rawa.” (1 Kor. 10:13) E veivakacegui dina na vosa ni yalayala qori!

8-10. Na cava e uqeti Jisu me dau veikauaitaki?

⁸ E dau veikauaitaki vakalevu o Jisu ni bula tiko e vuravura. E tolu na ka e uqeti koya. Kena imatai me vaka sa cavuti oti, e ucui Tamana vinaka ena nona itovo. E lomani ira na lewenivanua me vakataki Tamana. E marautaka o Jisu na ka kece erau cakava vata kei Jiova, ia e “taleitaki ira vakalevu na luve ni tamata.” (Vkai. 8:31) Na nona loloma e uqeti koya me kauaitaka na ivakarau ni lomadra eso tale.

⁹ Kena ikarua, e kila o Jisu na lomada me vakataki Jiova. E rawa ni kila na noda inaki kei na ivakarau ni lomada. (Maciu 9:4; Joni 13:10, 11) Ni kila gona o Jisu ni vusolo na lomadra na lewenivanua, e vakacegui ira ni kauaitaki ira dina.—Aisea 61:1, 2; Luke 4:17-21.

¹⁰ Kena ikatolu, e vakila tale ga o Jisu eso na veika dredre eda dau sotava. Kena ivakaraitaki, a susu ena dua na vuvale dravudravua. Ni cakacaka vata kei Josefa na tamana vakacabecabe, e kila kina o Jisu na cakacaka kaukaua. (Maciu 13:55; Mari. 6:3) Kena irairai tale ga ni mate o Josefa ena dua na gauna ni bera ni tekivu na cakacaka vakaitalatala i Jisu. A rawa gona ni vakila na mosimosi ni nona takali e dua eda lomana. E kila tale ga ni sega ni rawarawa na tiko ena vuvale duidui lotu. (Joni 7:5) Na vica na ituvaki qori kei na so tale e kila kina o Jisu na ivakarau ni lomadra eso kei na veika dredre era sotava.

11. E kilai vakacava ni dau veikauaitaki o Jisu? Vakamacalataka. (Raica na iyaloyalo ena waqana.)

¹¹ E kilai ni dau veikauaitaki o Jisu ena gauna e cakamana kina. A sega ni cakava tu ga me rawa. E ‘lomani’ ira na rarawa tu. (Maciu 20:29-34; Mari. 1:40-42) Kena ivakaraitaki, vakasamataka na ivakarau ni lomana ni kauta vakatikitiki  na tagane didivara qai vakabulai koya, se nona vakatura na luvena duadua ga na yada. (Mari. 7:32-35; Luke 7:12-15) E kila vinaka o Jisu na nodrau rarawa, e vinakata tale ga me vukei rau.

12. Me vaka e tukuni ena Joni 11:32-35, e vakaraitaka vakacava o Jisu ni kauaitaki Marica kei Meri?

¹² O Jisu e kauaitaki Marica kei Meri. Ni raica nodrau tagicaki ganedrau o Lasarusa, e “tagi” tale ga. (Wilika Joni 11:32-35.) E sega ni rarawataka ga ni sa yali na nona itokani dredre. E kila ni sa vakarau vakaturi Lasarusa. Ia e tagi o Jisu ni kila vinaka na nodrau rarawa na nona itokani voleka, e tarai koya tale ga.

13. E uqeti keda vakacava na veikauaitaki i Jisu?

¹³ E uqeti keda dina nida kila na veikauaitaki i Jisu. Eda sega ni uasivi me vakataki koya. Ia eda lomani koya ena vuku ni ka e dau cakava vei ira eso tale. (1 Pita 1:8) Eda vakayaloqaqataki nida kila ni sa veiliutaki tiko vakatui ena Matanitu ni Kalou. Sa voleka ni vakaotia vakadua na noda rarawa kece. Ni a bula vakatamata e vuravura o Jisu, ena vakabulai keda gona mai na rarawa kei na veika mosimosi e vakavuna o Setani. Io, eda kalougata ni dua na noda iLiuliu e kila na “noda malumalumu.”—Iper. 2:17, 18; 4:15, 16.

14. Me vaka e tukuni ena Efeso 5:1, 2, na cava eda uqeti meda cakava?

¹⁴ Nida vakasamataka vakatitobu na ivakaraitaki i Jiova kei Jisu, e uqeti keda meda veikauaitaki vakalevu. (Wilika Efeso 5:1, 2.) Eda sega ni kila na loma ni tamata me vakataki rau. Ia meda saga meda kila na ivakarau ni lomadra eso tale kei na ka era gadreva. (2 Kor. 11:29) Eda na sega ni nanumi keda ga me vakataki ira na tamata ni vuravura, ia eda na saga meda “kauaitaka . . . na ka e baleti ira tale eso.”—Fpai. 2:4.

15. O cei mera dau veikauaitaki?

¹⁵ E bibi mera dau veikauaitaki na qase ni ivavakoso. Era kila nira na saumitaro ena ivakarau ni nodra karona na qelenisipi e lesi vei ira. (Iper. 13:17) Me rawa nira veivuke na qase, e bibi mera dau veikauaitaki. Era na vakaraitaka vakacava qori?

16. Na cava ena cakava na qase dauloloma? Cava e bibi kina qori?

¹⁶ Na qase ni ivavakoso dauloloma ena vakayagataka nona gauna vei ira na tacina lotu vaKarisito. Ena dau taro, vakarorogo vinaka, vosovoso tale ga. E bibi sara qori ke via talaucaka na lomana e dua na sipi, ia e dredre me digia vinaka na vosa me cavuta. (Vkai. 20:5) Ni vakayagataka gona na qase na nona gauna vei ira na tacina, era na veinuitaki kina, veitokani, era na veilomani tale ga.—Caka. 20:37.

17. Na itovo cava era taleitaka vei ira na qase e levu na tacida? Tukuna e dua na ivakaraitaki.

¹⁷ Era tukuna e levu na mataveitacini ni dua na itovo era taleitaka vakalevu vei ira na qase ni ivavakoso, oya nira kauaitaka na ivakarau ni lomadra. Na vuna? E kaya e dua na tacida yalewa o Adelaide: “E rawarawa nomu vosa vei ira ni o kila nira kauaitaki iko.” E kuria: “O na kila nira kauaitaki iko ena itautau ni nodra vosa.” E kaya ena vakavinavinaka e dua na tacida tagane: “Au raica ni tonawanawa na matana e dua na qase niu tukuna vua na kequ ituvaki. Au na sega vakadua ni guilecava.”—Roma 12:15.

18. Eda na kauaitaki ira vakacava eso tale?

 ¹⁸ Era na sega ni vakaraitaka ga na qase ni ivavakoso na veikauaitaki. E vinakati meda vakaraitaka kece na itovo qo. Ena sala cava? Eda na saga meda kila na veika dredre era sotava tiko na lewe ni noda vuvale kei ira na tacida. Meda kauaitaki ira na itabagone ena ivavakoso, ira na tautauvimate, itabaqase, kei ira na takali na wekadra lomani. Meda taroga se ra vakacava tiko. Vakarorogo vinaka nira talaucaka na lomadra. Meda vakaraitaka ni tarai keda tale ga na veika era vakila tiko. Meda tu vakarau ni veivuke ena sala cava ga e rawa. Nida cakava qori, eda vakaraitaka ni dina na noda loloma.—1 Joni 3:18.

19. Na cava e bibi kina na yalorawarawa nida via veivuke?

¹⁹ E bibi meda yalorawarawa nida via veivuke. Na vuna? E duidui na ka era cakava eso ni dredre na ituvaki era sotava. Eso era na via veivosakitaka nodra leqa, eso tale e sega. Eda dau vinakata meda veivuke, ia eda na sega ni taroga eso na ka ena vakavu madua. (1 Ces. 4:11) Nira talaucaka na lomadra, eda na rairai sega ni duavata kei na ka era tukuna. Ia e bibi meda kila ni qori sara ga na ivakarau ni lomadra. E vinakati meda totolo ni vakarorogo, meda berabera ni vosa.​—Maciu 7:1; Jeme. 1:19.

20. Na cava eda na veivosakitaka ena ulutaga e tarava?

²⁰ Me ikuri ni noda veikauaitaki ena ivavakoso, eda na via vakaraitaka na itovo talei qo ena cakacaka vakaitalatala. Eda na vakaraitaka vakacava na veikauaitaki nida veivakatisaipelitaki? Eda na veivosakitaka qori ena ulutaga e tarava.