1-2. (a) Sala cava e vosa kina vei keda o Jiova? (b) Na cava eda na dikeva ena ulutaga qo?

E DAU marautaka o Jiova me vosa vei keda. Ena veigauna sa oti, a vakayagataki ira na parofita, agilosi kei na Luvena o Jisu Karisito mera vakasavuya vei keda na nona itukutuku. (Emosi 3:7; Kala. 3:19; Vkta. 1:1) Nikua, e vosa vei keda o Jiova ena nona Vosa na iVolatabu. E vakarautaka qori meda kila kina na nona rai kei na nona itovo.

² Ni se bula e vuravura o Jisu, a vosa mai lomalagi o Jiova ena tolu na gauna. Eda na dikeva na ka e tukuna o Jiova, na ka eda vulica kina, kei na kena yaga.

3. Me vaka eda wilika ena Marika 1:9-11, na cava e kaya o Jiova ni papitaiso o Jisu? Na ka dina cava eda vulica kina?

³ E volai ena Marika 1:9-11 na imatai ni gauna e vosa mai kina e lomalagi o Jiova. (Wilika.) E kaya: “O iko na Luvequ lomani; au vakadonui iko.” Ena uqeti Jisu sara ga ni rogoca ni kaya o Tamana ni lomani koya, e nuitaki koya tale ga! Eda vulica ena vosa i Jiova e tolu na ka dina me baleti Jisu. Kena imatai, o Jisu e luvei Jiova. Kena ikarua, o Jiova e lomani Luvena. Kena ikatolu, o Jiova e vakadonui Luvena. Meda dikeva yadua mada.

4. Sala cava e mai dua kina na nodrau veiwekani vou o Jisu kei Tamana?

⁴ “O iko na Luvequ.” Na ka e tukuna qo o Jiova, e dusia ni sa dua nodrau veiwekani vou kei na Luvena  lomani. Ni se tu mai lomalagi o Jisu, sa okati tu me luve ni Kalou. Ia ena gauna e papitaiso kina, e mai dua nodrau veiwekani vou. Ena sala cava? Oya ni sa lumuti ena yalo tabu qai nona inuinui me lesu i lomalagi, ni lesi koya na Kalou me Tui, me Bete Levu tale ga. (Luke 1:31-33; Iper. 1:8, 9; 2:17) Qori na vuna e kaya kina o Jiova ni papitaiso o Jisu: “O iko na Luvequ.”—Luke 3:22.

5. Eda na vakatotomuria vakacava na loloma i Jiova kei na nona veivakayaloqaqataki?

⁵ ‘O iko au lomana.’ Na cava eda vulica ena nona vakaraitaka o Jiova ni lomani luvena qai vakadonui koya? Oya ni bibi meda dau tu vakarau ni veivakayaloqaqataki. (Joni 5:20) Eda dau vakayaloqaqataki ni dua eda lomana e vakaraitaka ni lomani keda qai vakacaucautaki keda ena ka vinaka eda cakava. E bibi tale ga mera lomani qai vakayaloqaqataki na tacida ena ivavakoso kei ira na lewe ni noda vuvale. Nida vakacaucautaki ira eso tale, ena dei nodra vakabauta, ena uqeti ira tale ga mera qaravi Jiova ena yalodina. E bibi sara mera vakacaucautaki luvedra na itubutubu. Nira cakava qori qai lomani ira, era na vakayaloqaqataki.

6. Na cava meda nuitaki Jisu Karisito kina?

⁶ “Au vakadonui iko.” Na ka e tukuna qo o Jiova e dusia ni nuidei tu ni na qarava ena yalodina o Luvena na ka e vinakata. Ke sa nuitaki Luvena o Jiova, eda nuidei tale ga ni na vakayacora kece ena yalodina o Jisu na vosa ni yalayala i Jiova. (2 Kor. 1:20) Nida vakasamataka na ivakaraitaki i Jisu, eda na via vakatotomuri koya sara ga. Me vaka ga nona nuitaki Luvena o  Jiova, e nuidei tale ga nira na muria tiko ga vakailawalawa na nona tamata na ivakaraitaki i Luvena.—1 Pita 2:21.

7. Me vaka e tukuni ena Maciu 17:1-5, gauna cava e vosa kina o Jiova mai lomalagi? Na cava e kaya?

⁷ Wilika Maciu 17:1-5. Na ikarua ni gauna e vosa kina mai lomalagi o Jiova, oya ni “matalia na kena irairai” o Jisu. E sureti Pita, Jemesa kei Joni o Jisu me ratou tomani koya ina dua na ulunivanua cere. Ratou qai raica e keri e dua na raivotu vakatubuqoroqoro. E serau na mata i Jisu qai ramase na nona isulu. E laurai tale ga o Mosese kei Ilaija ni rau veitalanoataka kei Jisu na nona vakarau mate kei na nona vakaturi. Eratou a “sosovu toka” na yapositolo ia eratou raica na raivotu qori ni ratou yadra mai. (Luke 9:29-32) Oti e vakaruguti ratou e dua na o ramase, ratou rogoca sara na domo ni Kalou ena o! Me vaka ga na gauna e papitaiso kina o Jisu, e vakaraitaka o Jiova ni lomani Luvena qai vakadonui koya ni kaya: “Qo na Luvequ lomani, au vakadonuya.” Ia ena gauna qo e kuria: “Dou rogoci koya.”

8. E uqeti Jisu vakacava kei ratou nona tisaipeli na raivotu?

⁸ E laurai vakalekaleka ena raivotu qori na lagilagi kei na kaukaua i Jisu ni veiliutaki vakatui ena Matanitu ni Kalou. E vakayaloqaqataki Jisu sara ga na raivotu qori qai vakaukauataki koya ni sa vakarau vakararawataki me yacova ni mate. E vaqaqacotaka tale ga nodratou vakabauta na tisaipeli, ratou vakayaloqaqataki me ratou yalodina ena veivakatovolei, kei na cakacaka levu me ratou qarava ena veiyabaki tarava. Ni oti e rauta ni 30 na yabaki, e vakamacalataka o Pita na raivotu ni nona matalia o Jisu, e dusia ni se matata vinaka tu vua.—2 Pita 1:16-18.

9. Na ivakasala yaga cava e tukuna o Jisu vei ratou na nona imuri?

⁹ “Dou rogoci koya.” E vakamatatataka o Jiova ni vinakata meda rogoci Luvena, meda talairawarawa tale ga vua. Na cava e dau tukuna o Jisu ni se bula e vuravura? E vakamacalataka e levu na ka bibi! Kena ivakaraitaki, e vakavulici ratou vakayalololoma na nona imuri ena iwalewale me ratou vunautaka kina na itukutuku vinaka, e dau vakasalataki ratou tale ga me ratou yadra tiko. (Maciu 24:42; 28:19, 20) E uqeti ratou me ratou dau sasaga vagumatua, me ratou kua tale ga ni soro. (Luke 13:24) E vakabibitaka me ratou dau veilomani, duavata, me ratou muria tale ga na nona ivakaro. (Joni 15:10, 12, 13) E bibi dina na ivakasala i Jisu! Se yaga tiko ga me yacova mai nikua.

10-11. Eda na vakaraitaka vakacava nida rogoci Jisu tiko?

¹⁰ E kaya o Jisu: “O ira kece era totaka na dina era rogoca na noqu vosa.” (Joni 18:37) Eda vakaraitaka nida rogoci koya nida “yalorawarawa, [eda] veivosoti tale ga vakarawarawa.” (Kolo. 3:13; Luke 17:3, 4) Eda rogoci koya tale ga nida gumatua ni vunautaka na itukutuku vinaka “ena gauna vinaka kei na gauna ca.”—2 Tim. 4:2.

¹¹ E kaya o Jisu: “Era rogoca na domoqu na noqu sipi.” (Joni 10:27) Era vakaraitaka na imuri i Jisu nira rogoci koya nira vakarorogo ina ka e tukuna, era muria tale ga. Era sega ni vakawelei ena “lomaocaocataki ni bula.” (Luke  21:34) Ia e bibi duadua ena nodra bula mera talairawarawa ina ivakaro i Jisu ke mani dredre mada ga. Levu na tacida era vosota na veivakatovolei mosimosi, veitusaqati, na bula dravudravua kei na leqa tubukoso. Era yalodina tiko ga vei Jiova ena ituvaki kece qori se mani cava era vakayalia. E vakadeitaka vei ira o Jisu: “O koya e vakabauta na noqu ivakaro qai muria, e lomani au. Ia o koya e lomani au ena lomani koya o Tamaqu.”—Joni 14:21.

12. Na cava e dua tale na sala eda vakaraitaka kina nida rogoci Jisu?

¹² Qo e dua tale na sala eda vakarorogo kina vei Jisu: nida tokoni ira na lesi mera liutaki keda. (Iper. 13:7, 17) E levu na veisau ena isoqosoqo i Jiova ena veiyabaki sa sivi, okati kina na ivukevuke kei na iwalewale vovou ni cakacaka vakaitalatala, na ituvatuva ni soqoni ena lomanimacawa, na itaratara ni Vale ni Soqoni, kena maroroi kei na kena vakavinakataki. Eda marautaka dina nida dusimaki vakayalololoma, eda nuidei ni sa dikevi vinaka mai! Eda kila ni na vakalougatataki keda o Jiova nida muria na veidusimaki ni nona isoqosoqo.

13. Ena yaga vakacava nida rogoci Jisu?

¹³ E yaga dina nida rogoca na ka kece e vakavulica o Jisu. E yalataka ni na vakacegui ira na nona tisaipeli na nona ivakavuvuli. E kaya: “Oni na kunea kina na vakacegu. E veivakacegui na noqu ivua, e mamada tale ga na noqu icolacola.” (Maciu 11:28-30) E okati me Vosa ni Kalou na va na Kosipeli, e volai kina na bula i Jisu kei na nona cakacaka vakaitalatala. Qori e veivakaukauataki vakayalo, veivakacegui, e veivakavukui tale ga. (Same 19:7; 23:3) E tukuna o Jisu: “Era marau o ira na rogoca na vosa ni Kalou ra qai muria tiko ga!”—Luke 11:28.

14-15. (a) Me vaka e volai ena Joni 12:27, 28, gauna cava a vosa kina mai lomalagi o Jiova ena ikatolu ni gauna? (b) E vakacegui qai vakayaloqaqataki Jisu vakacava na vosa i Jiova?

¹⁴ Wilika Joni 12:27, 28. E volai ena Kosipeli i Joni na ikatolu ni gauna e vosa kina mai lomalagi o Jiova. A tiko o Jisu ena soqo ni Lakosivia e Jerusalemi ni vo e vica na siga me mate. E kaya: “Au sa  rarawa sara ga,” e qai masuta: “Tamaqu, moni vakalagilagia na yacamuni.” E rogoca sara ni tukuna mai lomalagi o Tamana: “Au sa vakalagilagia oti, au na vakalagilagia tale.”

¹⁵ Na cava e rarawa kina o Jisu? Ni bibi sara ga me yalodina tiko ga vei Jiova. E kila ni na kuitalaki vakaca qai mosimosi nona mate. (Maciu 26:38) E bibi duadua vei Jisu me vakalagilagia na yaca i Tamana. E beitaki ni vosavakacacataka na Kalou, e leqataka gona ni na vakarogorogocataki na yaca i Tamana ena nona mate. E vakadeitaki Jisu sara ga na vosa i Jiova! E nuidei ni na vakalagilagi ga na yacana. E vakacegui koya qai vakayaloqaqataki koya sara ga na vosa i Tamana me vosota na veika dredre ena sotava. O Jisu duadua ga a rairai kila na ibalebale ni ka e tukuna o Tamana ena gauna qori, ia e raica o Jiova me volai me yaga tale ga vei keda kece.—Joni 12:29, 30.

16. Na cava eda na rairai leqataka kina ena so na gauna na vakarogorogocataki ni yaca i Jiova?

¹⁶ Me vakataki Jisu, eda na rairai leqataka tale ga na vakarogorogocataki ni yaca i Jiova. De dua e caka vei keda eso na ka tawadodonu me vakataki Jisu. Se da rarawataka na itukutuku lasu era vakatetea na dau veitusaqati. Eda na rairai rarawataka ni  na vakarogorogocataki kina na yaca i Jiova kei na nona isoqosoqo. Ena vakacegui keda ena gauna va qori na ka e tukuna o Jiova vei Jisu. Meda kua ni lomaocaocataka vakasivia. Eda nuidei ni na ‘taqomaka na lomada kei na noda vakasama na vakacegu ni Kalou e uasivia na vakasama kece.’ (Fpai. 4:6, 7) O Jiova ena vakalagilagia ga na yacana. Ena vakayagataka nona Matanitu me vakaotia nodra leqa na nona tamata e vakavuna o Setani kei na vuravura e lewa tu.—Same 94:22, 23; Aisea 65:17.

17. Me vaka e tukuni ena Aisea 30:21, sala cava e vosa kina vei keda o Jiova nikua?

¹⁷ E se vosa tiko vei keda nikua o Jiova. (Wilika Aisea 30:21.) Eda na sega ni rogoca na domona mai lomalagi, ia e vakarautaka nona Vosa na iVolatabu me dusimaki keda. Na nona yalo tabu tale ga e uqeta na “dauniyau yalodina” me vakarautaka tiko ga na keda ena kena gauna donu. (Luke 12:42) Eda sautu ena kakana vakayalo, qori e okati kina na kena e tabaki, kena e biu ena noda website, vidio kei na katokatoni!

18. Ena vakaukauataka vakacava nomu vakabauta na vosa e cavuta o Jiova? Ena vakayaloqaqataki iko vakacava?

¹⁸ Meda nanuma dei na vosa e cavuta o Jiova ni se bula e vuravura o Luvena! E volai tu qori ena iVolatabu, ena vakanuideitaki keda ni kila vinaka tu o koya na ka e cakava, ena vakaotia tale ga na noda leqa kece e vakavuna o Setani kei na nona vuravura. Meda vakadeitaka mada ga meda rogoca vinaka na domo i Jiova, nida na vosota kina na leqa kece ena gauna qo kei na gauna se bera mai. E vakasalataki keda na iVolatabu: “[E] yaga me tiko vei kemuni na vosota, moni cakava rawa kina na loma ni Kalou, ena qai nomuni na ka e yalataki.”—Iper. 10:36.