Eso era lomatarotarotaka na imatai ni gauna era wilika kina na italanoa qo. Ia e talanoataki tiko eke e rua na tagane na yacadrau o Mefiposeci. Eda na kila na ka e yaco nida veivosakitaka na italanoa qo.

E vitu na luvena tagane o Tui Saula e Isireli, e rua na luvena yalewa. Na nona ulumatua o Jonacani. E qai dua tale na luvena tagane o Saula vua na watina lailai o Risipa, na yacana o Mefiposeci. O Jonacani tale ga e dua na luvena tagane na yacana o Mefiposeci. O Saula gona e dua na luvena e yacana o Mefiposeci, e dua tale ga na makubuna e yacana qori.

Dua na gauna e cati ira na lewe i Kipioni era tiko maliwai ira na Isireli o Saula, e vinakata sara ga me vakamatei ira kece. Kena irairai ni dua na wiliwili levu era vakamatei. Qori e cala. Na vuna? Ena gauna i Josua, a dua nodra veiyalayalati ni veiyaloni na turaga ni Isireli kei ira na lewe i Kipioni.—Josua 9:3-27.

Se dei tiko ga na veiyalayalati qori ena gauna i Tui Saula. Ia qai sega ni muri ni saga na Tui me vakamatei ira kece na kai Kipioni. Na ka e cakava qori “e cala kina o Saula kei na nona vuvale nira vakadavedra.” (2 Sam. 21:1) Ni sa tui o Tevita era qai tukuna vua na kai Kipioni era se bula tiko na cala bibi a vakayacori. E mani tarogi ira o Tevita me sorovaki vakacava na ka e cakava o Saula me rawa ni vakalougatataka o Jiova na vanua. Era sega ni vinakata na ilavo, era kaya ga me soli vei ira e vitu na luvena tagane o koya e “nakita me vakarusai ira” me ratou vakamatei. (Tiko 35:30, 31) E vakadonuya o Tevita.—2 Sam. 21:2-6.

Ena gauna qori sa mate kina o Saula kei Jonacani ena ivalu, ia se bula tiko na luve i Jonacani o Mefiposeci. A lutu ni se gone mani lokiloki kina, ia a sega ni vakaitavi ena nona valuti ira na kai Kipioni o tukana. E dua nodrau veiyalayalati ni veitokoni o Tevita kei Jonacani, ena yaga vei ira na nona kawa, wili kina na luve i Jonacani o Mefiposeci. (1 Sam. 18:1; 20:42) E tukuni: “Na tui [ya o Tevita] e lomani Mefiposeci na luvei Jonacani na luvei Saula ena vuku ni bubului erau cakava ena mata i Jiova o Tevita kei Jonacani na luvei Saula.”—2 Sam. 21:7.

E vakayacora o Tevita na ka era kerea na kai Kipioni. E mani solia e rua na luvena tagane o Saula, e dua vei rau o Mefiposeci, kei na lima na makubuna tagane. (2 Sam. 21:8, 9) Na ka e cakava qori o Tevita e mudu kina na vakadavedra ena vanua.

Na italanoa qo e sega ni itukutuku makawa ga. E matata vinaka na lawa ni Kalou. E kaya: “Mera kua . . . ni vakamatei na gone ena cala i tamadra.” (Vkru. 24:16) Ena sega sara ga ni vakadonuya o Jiova na ka e caka vei rau na luvei Saula kei na lima na makubuna ke ratou a sega ni vakaitavi ena sasaga ca qori. E kuria na lawa: “Me vakamatei na tamata ena cala ga e cakava.” De dua eratou vakaitavi na vitu na kawa i Saula ena nona sasaga me vakawabokotaki ira na kai Kipioni. Oya na vuna eratou vakamatei kina na vitu qori ena nodratou cala.

Eda vulica ena italanoa qo ni sega ni dua me na vakaiulubaletaka na nona cakacala ni nanuma se tukuna ni muria tiko ga na ka e vakaroti kina. E tukuna e dua na vosa vakaibalebale: “Mo vakatautauvatataka na vanua o butuka, ena vakataudeitaki na nomu sala kece.”—Vkai. 4:24-27; Efeso 5:15.