1-2. Na cava mo kua ni yalolailai kina ke o se bera ni tu vakarau mo papitaiso? (Raica na iyaloyalo ena waqana.)

 E DUA dina na isausau totoka ke o sa taleitaka tiko mo papitaiso. Vakacava o sa tu vakarau mo cakava qori? Ke o sa vakarau tu, ratou vakadonuya tale ga na qase ni ivavakoso, kua ni lomalomarua mo papitaiso. Ni o cakava qori mo qaravi Jiova kina, o na marautaka e dua na bula vinaka.

² Vakacava ke tukuni vei iko mo cakacaka tale ena so na ka ni bera ni o papitaiso? Se o kila vakataki iko ni tiko eso na ka mo vakavinakataka? Kua ni yalolailai. Ke o gone se qase, se rawa tiko ga ni o toso vakayalo me yacova ni o lai papitaiso sara.

3. Na cava e taroga na turaga ni Iciopea vei Filipi? Na taro cava e basika kina? (Caka. 8:36, 38)

³ Wilika Cakacaka 8:36, 38. E dua na vakailesilesi ni Iciopea e tarogi Filipi na dauvunau: “Na cava e tarova na noqu papitaiso?” E via papitaiso na turaga ni Iciopea qori. Vakacava ena rawa sara ga ni papitaiso ena gauna ya?

4. E vakaraitaka vakacava na turaga ni Iciopea ni via vulica e levu tale na ka?

⁴ Na turaga ni Iciopea qori e “lako . . . i Jerusalemi me lai sokalou.” (Caka. 8:27) Kena ibalebale ni sa tavuki ina lotu vakaJiu. Macala ga ni sa vulica na veika me baleti Jiova ena iVolatabu vakaIperiu. Ia se via kila e levu tale na ka. Ni sotavi koya o Filipi e gaunisala, na cava a cakava tiko? A wilika tiko na ivolavivigi e vola na parofita o Aisea. (Caka. 8:28) Qori na kakana dina vakayalo. E sega ni vinakata na vakailesilesi ni Iciopea qo me kila tu ga na ivakavuvuli rawarawa, e via vulica e levu tale na ka.

5. Na cava e cakava na turaga ni Iciopea ena ka e vulica?

 ⁵ Na turaga qori e nona vakailesilesi liu o Ranadi Kadasi e Iciopea, e “nona dauniyau.” (Caka. 8:27) E macala ni turaga osooso, e levu na itavi e qarava. Ia se tiko ga na gauna me sokaloutaki Jiova kina. E sega ni via vulica wale ga na ka dina, e muria sara ga na ka e vulica. Qori na vuna e biuti Iciopea kina me gole ina valenisoro e Jerusalemi me sokalou vei Jiova. E vakayagataka kina e levu na gauna kei na ilavo, ia e tu vakarau me cakava na ka kece e vinakati ena nona qaravi Jiova.

6-7. E vakaraitaka vakacava na turaga ni Iciopea ni lomani Jiova tiko ga vakalevu?

⁶ E vulica vei Filipi na turaga ni Iciopea qori eso na ka dina e bibi me kila, okati kina nona kila na Mesaia. (Caka. 8:34, 35) E uqeti koya nona kila na veika e cakava ena vukuna o Jisu. Na cava gona ena cakava? Sa rawa ni lomavakacegu tu ga ni tavuki ina lotu vakaJiu, e turaga dokai tale ga. Ia sa qai lomani Jiova ga vakalevu kei Luvena. E uqeti koya me vakatulewataka e dua na ka bibi, ya me papitaiso me muri Jisu Karisito. E raica o Filipi ni sa tu vakarau, mani papitaisotaki koya.

⁷ Ke o muria na ivakaraitaki ni turaga ni Iciopea qori, o sa rawa ni papitaiso. O rawa tale ga ni kaya ena nuidei, “Na cava e tarova na noqu papitaiso?” Meda raica mada qo na sala o rawa ni muria kina na ka e cakava: E vulica tiko ga e levu na ka, e muria sara, e lomana tiko ga vakalevu na Kalou.

8. Na cava e tukuni ena Joni 17:3 mo cakava?

⁸ Wilika Joni 17:3. Vakacava e uqeti iko na vosa qori i Jisu mo vulica na iVolatabu? Levu e uqeti ira qori. Vakacava e tukuni tale ga kina meda vuli tiko ga? Io. Eda na “vulica tiko ga na veika me [baleta] na Kalou dina duadua ga.” (Dauv. 3:11) Ena sega ni mudu na noda vuli tiko. Na levu ga ni noda vuli, na noda toro volekati Jiova.—Same 73:28.

9. Na cava meda cakava nida sa kila na veika rawarawa me baleta na ka dina?

⁹ Na noda vulica na veika me baleti Jiova e itekitekivu ni noda vuli iVolatabu. Ena nona ivola na yapositolo o Paula vei ira na Iperiu, e kaya ni vuli va qori e vulici kina na “ivakavuvuli rawarawa.” E sega ni beca o koya na “ivakavuvuli rawarawa,” e vakatauvatana ga kei na sucu era gunuva tiko na gone dramidrami. (Iper. 5:12;  6:1) Ia e uqeti ira kece na lotu vaKarisito me kua ni yalani ga na nodra vuli ena ka rawarawa, mera vulica na veika titobu ena Vosa ni Kalou. Vakacava o bau vinakata tu mo kila na veika titobu ena iVolatabu? O vinakata mo vulica e levu tale na ka, mo vulica tiko ga na veika me baleti Jiova kei na nona inaki?

10. Na cava ena ka ni sasaga kina na vuli vei ira eso?

¹⁰ E ka ni sasaga na vuli vei ira e levu. Vakacava o iko? O vulica e koronivuli mo dau wili vola vinaka, mo vulica vinaka na ka? O marautaka na vuli, e levu tale ga na ka o vulica? Se o nanuma ni sega ni vinaka na ivakarau ni nomu vulica na ka? Ke dina qori, e levu tale ga e dau va qori nodra rai. Ia e rawa ni vukei iko o Jiova. E uasivi o koya, e Qasenivuli vinaka duadua tale ga.

11. E vakaraitaka vakacava o Jiova ni “Dauniveivakavulici Levu”?

¹¹ E tukuna o Jiova ni nomu “Dauniveivakavulici Levu.” (Aisea 30:20, 21) E Qasenivuli yalovosovoso, e yalovinaka, e dauveinanumi. E kauaitaka ga na ka era vinaka kina na nona gonevuli. (Same 130:3) E sega tale ga ni namaka vakasivia vei keda na ka. Mo nanuma tiko ni bulia na nomu mona, qori e dua na isolisoli talei. (Same 139:14) Eda na dau vinakata ga meda vulica na ka. E vinakata na Dauveibuli meda vuli tiko ga me tawamudu, meda marautaka tale ga. E ka vakayalomatua gona meda ‘saga meda vinakata’ na ka dina vakaivolatabu ena gauna qo. (1 Pita 2:2) Mo saga eso na isausau o rawa ni sauva, me dei tale ga na nomu ituvatuva ni wili iVolatabu kei na vuli. (Josua 1:8) Ena veivuke i Jiova, o na marautaka na wili ivola, o na vulica tale ga e levu na ka me baleti koya.

12. Na cava e bibi kina meda kauaitaka vakalevu na bula i Jisu ena noda vuli vakataki keda?

¹² Me dau tiko na gauna mo vakasamataka kina vakatitobu na bula i Jisu kei na nona cakacaka vakaitalatala. Nomu muria voleka na weniyava i Jisu e bibi duadua ena nomu qaravi Jiova, vakauasivi ena gauna dredre qo. (1 Pita 2:21) E kaya vakamatata o Jisu na veika dredre era na sotava nona imuri. (Luke 14:27, 28) Ia e nuidei ni o ira na nona imuri era na yalodina tiko me vakataki koya. (Joni 16:33) Mo vulica vinaka sara na ivakarau ni bula i Jisu, me so tale ga nomu isausau mo vakatotomuri koya ena nomu bula e veisiga.

13. Na cava mo kerea tiko ga vei Jiova? Na vuna?

¹³ E sega ni vinakati ga na kilaka. Ia e yaga na kilaka ena noda vulica e levu tale na ka me baleti Jiova, meda vakaraitaka tale ga eso na itovo me vaka na noda lomani koya kei na noda vakabauti koya. (1 Kor. 8:1-3) Ni o vuli tiko, kerei Jiova me vakalevutaka nomu vakabauta. (Luke 17:5) E marautaka me sauma na masu va qori. Ni yavutaki nomu vakabauta dina ena kilaka dodonu me baleta na Kalou, ena uqeti iko mo toso tiko ga vakayalo.—Jeme. 2:26.

14. E vakabibitaka vakacava o Pita na noda muria na ka eda vulica? (Raica na iyaloyalo.)

¹⁴ E tukuna na yapositolo o Pita ni bibi vei ira na imuri i Karisito mera muria tiko ga na ka era vulica. E vakamacalataka na itukutuku vakaivolatabu kei Noa. E kaya o Jiova vei Noa ni na vakarusai ira na tamata ca kece era bula tiko ena nona gauna ena dua na Waluvu. Nona kila wale ga o Noa ni na dua na waluvu ena sega ni vakabulai koya kei na nona  vuvale. Dikeva ni vakamacalataka tiko o Pita na gauna e “ta tiko [kina] na waqa” ni bera na Waluvu. (1 Pita 3:20) Io, eratou muria o Noa kei na nona vuvale na ka e vakavulici ratou kina na Kalou, ni ratou taya na waqa levu. (Iper. 11:7) Oti e vakatauvatana o Pita na ka e cakava o Noa ina papitaiso, ni vola: “Na ka e yaco ya e tiko na kena ivakatakarakara ena vakabulai kemuni tale ga, ya na papitaiso.” (1 Pita 3:21) E rawa gona ni vakatauvatani na ka o cakava tiko qo mo vakarautaki iko ena papitaiso, kei na ka eratou cakava o Noa kei na nona vuvale ena vica vata na yabaki me ratou taya na waqa. Na cava mo cakava mo vakarautaki iko kina mo papitaiso?

15. Na cava e okati ena veivutuni dina?

¹⁵ Na imatai ni ka meda cakava ya meda veivutunitaka na noda ivalavala ca. (Caka. 2:37, 38) Nona veivutuni dina e dua ena uqeti koya me veisautaka na nona bula. Vakacava o sa muduka na itovo e vakararawataki Jiova, me vaka na ivalavala vakasisila, vakatavako, na vakayagataki ni vosa ca se veibeci? (1 Kor. 6:9, 10; 2 Kor. 7:1; Efeso 4:29) Ke o se bera ni cakava qori, sasaga tiko ga mo veisau. Mo drau veivosaki kei koya drau vuli iVolatabu tiko, se kerea nodratou veivuke kei na veidusimaki na qase ni ivavakoso. Ke o se gone, o tiko tale ga e vale, kerea tiko ga nodrau veivuke na nomu itubutubu mo muduka na itovo ca e rairai tarova tiko nomu papitaiso.

16. Na cava e okati ena noda muria e dua na ituvatuva vinaka vakayalo?

¹⁶ E bibi tale ga me muri e dua na ituvatuva vinaka vakayalo. E okati kina nomu dau tiko ena soqoni vaKarisito, o vakaitavi tale ga. (Iper. 10:24, 25) Ni o sa rawata na ivakatagedegede mo vakaitavi ena cakacaka vakaitalatala, mo okata sara qori ena nomu ituvatuva. Na levu ga ni nomu vakaitavi ena cakacaka ni veivakabulai qo, o na marautaka vakalevu. (2 Tim. 4:5) Ke o se gone o tiko tale ga e vale, o rawa ni taroga qo: ‘Rau na vuki tukuna tiko ga vei au na noqu itubutubu na gauna ni soqoni se meu lako ena cakacaka vakavunau? Seu dau vakaliuliu  kina?’ Ni o cakava ga qori vakataki iko, o sa vakaraitaka tiko nomu vakabauta, loloma kei na nomu vakavinavinakataka na Kalou o Jiova. Qori na ‘ivalavala ni qaravi Kalou’ e nomu isoro vei Jiova. (2 Pita 3:11; Iper. 13:15) Na isoro kece eda cabora mai vu ni lomada, e sega ni caka ena voraki e taleitaka na noda Kalou. (Vakatauvatana 2 Korinica 9:7.) Eda cakava qori nida marautaka meda solia vei Jiova na ka vinaka duadua.

17-18. Na itovo bibi cava mo vakaraitaka mo rawa ni papitaiso? Na vuna? (Vosa Vakaibalebale 3:3-6)

¹⁷ Ni o toso tiko ga vakayalo mo lai papitaiso sara, o na sotava eso na ituvaki dredre. Eso era na vakalialiai iko me baleta nomu vakabauta vou, era na tusaqati iko mada ga se vakacacani iko. (2 Tim. 3:12) Ni o saga tale tiko ga mo muduka e dua na itovo ca, o na rawa ni cakava tale na itovo qori ena so na gauna. Se o rawa ni yalototolo, o rarawa tale ga ni sa vaka me dede nomu rawata nomu isausau. Na cava mo cakava mo vosota? Mo vakaraitaka e dua na itovo bibi, qori nomu lomani Jiova.

¹⁸ E itovo vinaka nomu lomani Jiova, qori na kena vinaka duadua o rawa ni vakaraitaka. (Wilika Vosa Vakaibalebale 3:3-6.) Nomu lomani Jiova vakalevu ena uqeti iko mo vosota na ituvaki dredre. E dau tukuna na iVolatabu ni dei tu ga na loloma i Jiova vei ira na nona dauveiqaravi. Ena sega ni biuti ira, se yalana nona lomani ira. (Same 100:5) O buli sara ga mo ucuya na Kalou. (Vkte. 1:26) O na vakaraitaka gona vakacava na loloma qori?

19. Sala cava o na vakavinavinakataki Jiova kina vakalevu ena ka e cakava ena vukumu? (Kalatia 2:20)

¹⁹ Mo tekivu sara ga ena nomu dau vakavinavinaka. (1 Ces. 5:18) Mo taroga qo e veisiga, ‘Sala cava e vakaraitaka kina o Jiova nona lomani au?’ Oti mo vakavinavinakataki Jiova ena nomu masu ni o cavuta na ka e cakava ena vukumu. Mo raica na ka e cakava ena loloma ni baleti iko sara ga, me vaka nona qai kila qori na yapositolo o Paula me baleti Jiova. (Wilika Kalatia 2:20.) Mo taroga, ‘Au via vakaraitaka lesu vua noqu lomani koya? Nomu lomani Jiova ena vukei iko mo kua ni rawai ena veitemaki, mo vosota tale ga na ituvaki dredre. Ena uqeti iko  mo dei ena nomu ituvatuva vakayalo, kei na nomu lomana tiko ga na Tamamu vakalomalagi ena veisiga.

20. Na cava e okati ena nomu yalataki iko vei Jiova? E bibi vakacava na vakatulewa qori?

²⁰ Toso na gauna, ena uqeti iko nomu lomani Jiova mo cavuta kina e dua na masu bibi. Qori nomu yalataki iko vua na Kalou. Mo nanuma tiko ni o yalataki iko vei Jiova, ena nomu na inuinui totoka qo: O sa rawa ni nona me tawamudu. Nomu yalataki iko vei Jiova, o yalataka mo qaravi koya ena gauna vinaka se gauna ca. O na sega tale ga ni tokaruataka na yalayala qori. Io, ni gauna eda yalataki keda kina, qori e dua na vakatulewa bibi ena noda bula. Vakasamataka qo: E levu na ka o na vakatulewataka me baleta nomu bula, eso era na vinaka sara, ia na kena qo e totoka sara. (Same 50:14) Ena saga o Setani mo kua ni lomana vakalevu na Tamada vakalomalagi, e nuitaka tiko mo kua ni yalodina. Ia kua sara ni soro vua! (Jope 27:5) Na nomu lomani Jiova vakalevu ena uqeti iko mo dina ena nomu yalayala, o na veivolekati tale ga kei na Tamada vakalomalagi.

21. Na cava eda kaya kina ni papitaiso e sega ni itinitini ni nomu veiqaravi, e kena itekitekivu ga?

²¹ Ni o sa yalataki iko oti vei Jiova, mo veitalanoa sara kei ratou na qase ena nomu ivavakoso me baleta na veika bibi mo cakava tarava. Nanuma tiko ni nomu papitaiso e sega ni itinitini ni nomu qaravi Jiova, e kena itekitekivu ga. O na tekivutaka e dua na ilakolako balavu ni veiqaravi. Saga mo lomana tiko ga vakalevu na Tamamu vakalomalagi ena gauna qo. Me tiko nomu isausau mo rawa kina ni lomani koya tiko ga vakalevu ena veisiga. Na nomu cakava qori o na rawa ni papitaiso kina. Ena dua dina na siga totoka qori vei iko. Ia se qai kena itekitekivu ga. Mo lomani Jiova tiko ga kei Luvena vakalevu me tawamudu!