1-2. Na cava e dau yaco ena gauna ni papitaiso? Cava mo dikeva?

 O SA bau raica eso era vakarau papitaiso? O rogoca nodra vosa ena nuidei nira sauma e rua na taro ni bera nodra papitaiso. O raica nira matamamarau na lewe ni nodra vuvale kei ira na itokani. Nira papitaiso, o rogoca na vakasausau, o raica tale ga na nodra matamamarau. Kena ivakatautauvata, e veimacawa e vica vata na udolu era vakayacora qori, nira yalataki ira qai papitaiso mera iVakadinadina i Jiova.

² Vakacava o iko? Ke o vakasamataka tiko mo papitaiso, o dua na ka talei ena vuravura ca qo ni o “vakasaqarai Jiova tiko.” (Same 14:1, 2) E volai na ulutaga qo me baleti iko, ke o gone se qase. Ia vei keda sa papitaiso oti, eda vinakata meda gumatua tiko ga ena noda qaravi Jiova me tawamudu. E levu tu na vuna eda via qaravi Jiova kina, ia eda na dikeva mada e tolu.

3. Na cava era vinakata kina na ka dina kei na ka dodonu na tamata i Jiova? (Same 119:128, 163)

³ E vakaroti ira na nona tamata o Jiova mera “vinakata . . . na ka dina.” (Saka. 8:19) E uqeti ira nona imuri o Jisu mera muria na ivalavala dodonu. (Maciu 5:6) Kena ibalebale me vu sara ga mai lomada noda via cakava na ka e donu, e vinaka, e savasava ena mata ni Kalou. Vakacava o vinakata na ka dina kei na ka dodonu? Macala ni o vinakata sara ga. O cata na lasu, na ka kece e sega ni dodonu, kei na ka ca. (Wilika Same 119:128, 163.) Na lasu e nona itovo o Setani, na turaga ni vuravura qo. (Joni 8:44; 12:31) E dua na isausau nei Setani me vakaucacataka na yaca savasava ni Kalou o Jiova. E vakatetea na veika lasutaki me  baleta na noda Kalou me tekivu mai na veivorati e Iteni. E tukuna ni o Jiova e iLiuliu dau nanumi koya ga, e lasulasu tale ga ni bureitaka na ka vinaka vei keda kece. (Vkte. 3:1, 4, 5) Na ka lasutaki e tukuna o Setani me baleti Jiova e vakaleqa tiko na nodra vakasama kei na lomadra e levu. Nira digia e levu mera kua ni “vinakata . . . na ka dina,” e rawa kina ni rawai ira o Setani mera cakava na veika tawadodonu kei na veika ca.—Roma 1:25-31.

4. E vakaraitaka vakacava o Jiova ni “Kalou daudina”? (Raica na iyaloyalo.)

⁴ O Jiova e “Kalou daudina,” e lomasavu me vakavulica na ka dina vei ira na lomani koya. (Same 31:5) Ni cakava qori, e vukei ira mera kua ni vakacalai ena lasu i Setani. O Jiova e vakavulici ira tale ga na nona dauveiqaravi mera dau dina, mera cakadodonu. E yaga qori mera kua ni beci ira, mera vakila na vakacegu. (Vkai. 13:5, 6) Vakacava o vakila qori ni o vulica na iVolatabu? O vulica ni vinaka duadua vua na kawatamata na sala i Jiova, e vinaka tale ga vei iko. (Same 77:13) Koya gona, o vinakata mo cakava na ka e tukuna na Kalou ni donu. (Maciu 6:33) O vinakata mo tukuna na dina, mo rawa ni vakacala na ka e tukuna o Setani me baleta na Kalou o Jiova. O na cakava vakacava qori?

5. O na vakaraitaka vakacava ni o tokona na ka dina kei na ka dodonu?

⁵ O rawa ni digia na ivakarau ni bula era na kila kina eso tale ni o cata na lasu i Setani qai tokona na ka dina. O na vakaraitaka qori ni o vinakata me nomu iLiuliu o Jiova, o na via cakava tale ga na ka e tukuna ni donu. O na cakava vakacava qori? Mo torovi Jiova ena masu, o yalataki iko vua, oti qai vakaraitaka e matanalevu ena nomu papitaiso. Nomu vinakata na ka dina kei na ka dodonu ena uqeti iko mo vakatulewataka mo papitaiso.

6. Me vaka e tukuni ena Same 45:4, na cava eso na vuna eda lomani Jisu Karisito kina?

⁶ Na cava o lomani Jisu Karisito kina? Dikeva e vica na vuna vinaka ena Same 45:4. (Wilika.) E tokona o Jisu na dina, na yalomalumalumu kei na yalododonu. Ke o dau vinakata na ka e dina kei na ka e dodonu, e macala ga ni o lomani Jisu Karisito tale ga. Vakasamataka mada nona  yaloqaqa o Jisu me tukuna na ka dina kei na ka dodonu. (Joni 18:37) Ia e uqeta vakacava o Jisu na yalomalumalumu?

7. Na cava o taleitaka ena yalomalumalumu i Jisu?

⁷ Na ivakaraitaki i Jisu e uqeta na yalomalumalumu. Kena ivakaraitaki, e vinakata me vakacaucautaki duadua ga o Tamana, sega ni o koya. (Mari. 10:17, 18; Joni 5:19) E uqeti iko vakacava nona yalomalumalumu? E macala ni na uqeti iko mo lomana na Luve ni Kalou qai muri koya. Na cava e yalomalumalumu kina o Jisu? Ni lomani Tamana, e vakatotomuria tale ga na nona yalomalumalumu. (Same 18:35; Iper. 1:3) E macala ni o na vinakata sara ga mo toro voleka vei Jisu, ni dau vakatotomuria vinaka na itovo i Jiova.

8. Na cava eda vinakata kina me noda Tui o Jisu?

⁸ Eda vinakata me noda Tui o Jisu baleta ni iLiuliu vinaka sara. O Jiova ga e vakavulici Luvena qai lesi koya me veiliutaki. (Aisea 50:4, 5) Vakasamataka tale ga na loloma levu e vakaraitaka o Jisu. (Joni 13:1) Ni noda Tui, e bibi meda lomani koya mai vu ni lomada. E vakamacalataka ni o ira na lomani koya dina, ya o ira e tukuna mera nona itokani, era vakaraitaka na nodra loloma nira muria na nona ivakaro. (Joni 14:15; 15:14, 15) E ka dokai dina meda veitokani kei na Luvei Jiova!

9. E tautauvata vakacava na nodra papitaiso na lotu vaKarisito kei na nona papitaiso o Jisu?

⁹ Dua na ivakaro i Jisu ya mera papitaiso na nona imuri. (Maciu 28:19, 20) E ivakaraitaki sara ga kina o koya. E vica na ka e duidui kina na nona papitaiso vei ira na nona imuri. (Raica na kato “ Duidui Nona Papitaiso o Jisu Vei Ira Nona iMuri.”) Ia e tautauvata ena so tale na ka. Ni papitaiso o Jisu, e soli koya me vakayacora na loma i Tamana. (Iper. 10:7) Nira papitaiso tale ga na imuri i Jisu, era vakaraitaka e matanalevu nira sa yalataki ira oti vua na Kalou o Jiova. Era sa na vakaliuca na loma ni Kalou, sega ni lomadra. Era muria gona nona ivakaraitaki na nodra Turaga.

10. Na cava me uqeti iko kina nomu lomani Jisu mo papitaiso?

¹⁰ O vakabauta ni o Jisu e Luvei Jiova duabau ga, e lesi tale ga me Tui me liutaki keda. O kila ni o Jisu e ucui Tamana vinaka ena nona yalomalumalumu. O vulica ni vakani ira na viakana, e vakacegui ira na yalolailai, e vakabulai ira mada ga na tauvimate. (Maciu 14:14-21) O raica na sala e liutaka tiko kina na nona ivavakoso nikua. (Maciu 23:10) O kila tale ga ni levu sara na ka ena cakava ena gauna se bera mai ni Tui ni Matanitu ni Kalou. O na vakaraitaka vakacava ni o lomani koya? Ni o muria na nona ivakaraitaki. (Joni 14:21) O na tekivu cakava qori ni o yalataki iko vei Jiova, oti mo papitaiso.

11. Na cava na vuna levu duadua mo papitaiso kina? Cava o tukuna kina qori?

¹¹ Na cava na vuna levu duadua mo papitaiso kina? E vakaraitaka o Jisu na ivunau levu duadua ni Kalou, e kaya: “Mo lomani Jiova na nomu Kalou ena lomamu taucoko, ena nomu vinaka taucoko, ena nomu vakasama taucoko, kei na nomu kaukaua taucoko.” (Mari. 12:30) Vakacava e va qori na levu ni nomu lomana na Kalou?

12. Na cava o lomani Jiova kina? (Raica na iyaloyalo.)

¹² E levu sara na vuna meda lomani Jiova kina. Kena ivakaraitaki, o kila ni o koya “na ivurevure ni bula,” e solia tale ga  na “iloloma vinaka kece kei na isolisoli uasivi kece.” (Same 36:9; Jeme. 1:17) Na ka vinaka kece eda marautaka ena gauna qo e vakarautaka na Kalou dauloloma, e lomasavu tale ga.

13. Na cava e iloloma totoka kina na ivoli?

¹³ Na ivoli e iloloma totoka nei Jiova vei keda. Na cava eda kaya kina qori? Vakasamataka mada na nodrau veivolekati o Jiova kei na Luvena. E kaya o Jisu: “E lomani au . . . o Tamaqu,” e kaya tale ga “[Au] lomani Tamaqu.” (Joni 10:17; 14:31) Erau veivolekati na veitamani qo ni rau veimaliwai me vica vata na bilioni na yabaki. (Vkai. 8:22, 23, 30) Vakasamataka mada na levu ni nona rarawa o Jiova ni raica nona vakararawataki o Luvena qai mate. E lomana vakalevu na kawatamata o Jiova, wili kina o iko, ni yalorawarawa me soli Luvena lomani me isoro mo rawa kina ni bula tawamudu kei ira e levu tale. (Joni 3:16; Kala. 2:20) Qori na vuna levu duadua meda lomani Jiova kina.

14. Na cava na isausau vinaka duadua mo sauva?

¹⁴ O na lomani Jiova vakalevu ni o vulica e levu na ka me baleti koya. E macala ni o via toro volekati koya ena gauna qo me tawamudu. O rawa sara ga ni cakava qori. E uqeti iko mo vakamarautaka na  lomana. (Vkai. 23:15, 16) O na cakava qori ena ka o tukuna kei na ka o cakava. Na ivakarau ni nomu bula ena vakaraitaka ni o lomani Jiova dina. (1 Joni 5:3) Qori na isausau vinaka duadua o rawa ni sauva.

15. O na vakaraitaka vakacava na nomu lomani Jiova?

¹⁵ O na vakaraitaka vakacava ni o lomani Jiova? Kena imatai, o na masu mo yalataki iko vua na Kalou dina duadua ga. (Same 40:8) Oti, o na vakaraitaka e matanalevu nomu sa yalataki iko oti ni o papitaiso. Me vaka eda veivosakitaka mai na ulutaga qo, qori na gauna bibi duadua ena nomu bula. O sa tekivuna e dua na bula vou mo vakaliuci Jiova, sega ni o iko. (Roma 14:8; 1 Pita 4:1, 2) Qori e vakatulewa bibi ena nomu bula, o na marautaka kina na bula vinaka duadua. Ena sala cava?

16. Me vaka e tukuni ena Same 41:12, ena vakalougatataki ira vakacava na nona dausokalou o Jiova?

¹⁶ O Jiova e dau lomasavu. Se mani vakacava na levu ni ka o solia vua, ena levu tale na ka ena solia vei iko. (Mari. 10:29, 30) Ena solia vei iko ena vuravura ca qo na bula vinaka duadua, e marautaki, e vakainaki tale ga. E itekitekivu ga ni nomu ilakolako na nomu papitaiso, e rawa ni tomani tiko ga. O rawa ni qarava na Tamamu vakalomalagi me tawamudu. Ni o lomani Jiova vakalevu, ena lomani iko tale ga vakalevu. O na qai bula tu ga me tawamudu me vakataki koya.—Wilika Same 41:12.

17. Na cava o rawa ni solia vei Jiova e sega tu vua?

¹⁷ Ni o yalataki iko qai papitaiso, o sa solia tiko e dua na ka talei vua na Tamamu vakalomalagi. E solia vei iko na ka vinaka kece mo marautaka na bula. O na rawa ni sauma lesu ni o solia vua na iTaukei ni lomalagi kei na vuravura e dua na ka e sega tu vua, oya nomu veiqaravi ena yalodina. (Jope 1:8; 41:11; Vkai. 27:11) Qori e dua dina na ivakarau ni bula vinaka. E macala ga ni vuna bibi duadua mo papitaiso kina, ya nomu lomani Jiova.

18. Na cava mo taroga?

¹⁸ O na sauma vakacava na taro, O na papitaiso? O rawa ni sauma qori vakataki iko. Ia ena yaga ke o taroga, ‘Na cava au waraka tiko?’ (Caka. 8:36) Vakasamataka e tolu na vuna eda veivosakitaka mai. Kena imatai, o vinakata na ka dina kei na ka dodonu. Mo taroga, ‘Au via raica na gauna era na tukuna kina na ka dina kei na ka dodonu na tamata kece?’ Kena ikarua, o lomani Jisu Karisito. Mo taroga, ‘Au vinakata me noqu Tui na Luve ni Kalou, au via muria tale ga na nona ivakaraitaki?’ Kena ikatolu e bibi sara, ya ni o lomani Jiova. Mo taroga, ‘Au via vakamarautaki Jiova meu qaravi koya me noqu Kalou?’ Ke o sauma qori ena io, cava o se bera ni papitaiso kina? Cava tale o waraka?—Caka. 16:33.

19. Na cava mo kua ni lomalomaruataka kina na papitaiso? Vakatauvatana. (Joni 4:34)

¹⁹ Ke o lomalomarua mo papitaiso, dikeva mada na vosa vakatautauvata i Jisu. (Wilika Joni 4:34.) E vakatauvatana o Jisu na nona cakava na loma ni Kalou kei na kakana. Na vuna? E yaga vei keda na kakana. E kila o Jisu ni yaga vei keda na ka kece e tukuna o Jiova meda cakava. E sega ni vinakata o Jiova meda cakava e dua na ka eda na vakaleqai kina. Vakacava e okati tiko ena loma i Jiova nomu papitaiso? Io. (Caka. 2:38) Mo nuidei gona ni na yaga vei iko nomu muria na ivakaro mo papitaiso. Ke o sega ni dau lomalomaruataka mo kania na kakana kana vinaka duadua, cava mo lomalomaruataka kina nomu papitaiso?

20. Na cava eda na veivosakitaka ena ulutaga e tarava?

²⁰ Na cava era sega ni via papitaiso kina eso? Era na rairai kaya e levu, “Au se bera ni vakarau.” Na nomu yalataki iko vei Jiova kei na nomu papitaiso, e vakatulewa bibi duadua ena nomu bula. Mo vakasamataka sara vakavinaka qori, ni vinakati na gauna kei na sasaga mo qai papitaiso. Ia ke o vinakata dina, o na vakarautaki iko vakacava? Eda na veivosakitaka na taro qori ena ulutaga e tarava.