1. Na cava era raica e levu na tataleitaki nira tiko ena noda soqoni? (Raica na iyaloyalo.)

 RAITAYALOYALOTAKA mada ni rau se qai tiko vakadua ena noda soqoni e dua na veiwatini. E uqeti rau sara ga na noda veikauaitaki kei na noda loloma na lewe ni ivavakoso. Ni rau sa lesu tiko i vale, e kaya sara o yalewa vei watina, ‘Era duatani na iVakadinadina i Jiova, au taleitaka na veimaliwai kei ira.’

2. Na cava era tarabe kina eso?

² E talei dina na nodra veilomani na lotu vaKarisito ena ivavakoso. Ia era sega ni uasivi na iVakadinadina i Jiova. (1 Joni 1:8) Na levu gona ni noda kilai ira ena ivavakoso eda na raica tale ga eso na nodra malumalumu. (Roma 3:23) Ka ni rarawa, eso na tacida era kauaitaka vakasivia na nodra malumalumu eso tale, ra mani tarabe kina.

3. Na cava na kedra ivakatakilakila na imuri dina i Jisu? (Joni 13:34, 35)

³ Raica tale mada na tikinivolatabu e yavutaki kina na ulutaga qo. (Wilika Joni 13:34, 35.) Na cava na kedra ivakatakilakila na imuri dina i Karisito? E tukuna na iVolatabu na nodra veilomani, e sega ni tukuna nira na uasivi. Raica tale ga ni sega ni tukuna o Jisu: ‘Na ka qo dou na kila kina ni dou noqu tisaipeli.’ E kaya ga: “Na ka qo era na kila kece kina ni dou noqu tisaipeli.” E tukuna o Jisu nira na kila tale ga ena taudaku ni ivavakoso nira dau veilomani na nona imuri, sega ni o ira ga na nona imuri dina.

4. Na cava era na rairai via kila eso me baleti ira na lotu vaKarisito dina?

 ⁴ Era na rairai taroga eso era sega ni iVakadinadina i Jiova: ‘Era na vakaraitaka vakacava na loloma na imuri dina i Jisu? E vakaraitaka vakacava o Jisu ni lomani ratou na nona yapositolo? Eda na vakatotomuri Jisu vakacava nikua?’ Ena vinakati meda dau vakasamataka na isaunitaro qori na iVakadinadina i Jiova. Nida cakava qori, eda na vakaraitaka vakalevu na loloma, vakabibi nida vosota tiko na nodra malumalumu eso tale.—Efeso 5:2.

5. Vakamacalataka na ka e tukuna o Jisu ena Joni 15:12, 13?

⁵ E vakamatatataka o Jisu ni na duatani sara na nodratou veilomani na nona imuri. (Wilika Joni 15:12, 13.) E vakaroti ratou: “Mo dou veilomani me vaka ga na noqu lomani kemudou.” Na cava e vakaibalebaletaka? E tukuna o Jisu ni mataqali loloma qo, ena lailai na nomu lomani iko, ena levu nomu lomani ira eso tale. Ena tu vakarau tale ga na lotu vaKarisito me mate ena vukuna na tacina, ke vinakati. b

6. E vakabibitaki vakacava ena Vosa ni Kalou na loloma?

⁶ E vakavulica na Vosa ni Kalou ni bibi sara na loloma. Levu era okata na vica na tikinivolatabu qo me nodra tikinivolatabu taleitaki: “Ni Kalou ga na loloma.” (1 Joni 4:8) “Mo lomana na kainomu me vaka nomu lomani iko.” (Maciu 22:39) “Ni ubia e levu na ivalavala ca na loloma.” (1 Pita 4:8) “E sega vakadua ni seavu na loloma.” (1 Kor. 13:8) E vakamatatataka na vica na tikinivolatabu qori kei na so tale ni bibi meda vakaraitaka na itovo totoka qo.

7. Na cava e sega ni rawa kina ni vakavulica o Setani mera veilomani e levu?

 ⁷ Levu era taroga: ‘Ena kilai vakacava na lotu dina? Era tukuna kece na lotu nira vakavulica na ka dina, ia e duidui na ka era vakavulica me baleta na Kalou.’ O Setani e vakavuna mera veilecayaki e levu ni tauyavutaka e levu na lotu lasu. Ia ena sega tu ga ni rawa me kumuni ira vata mai e levu e veiyasa i vuravura mera veilomani. O Jiova ga e rawa ni cakava qori. Eda kila qo ni ivurevure ni loloma na Kalou, o ira ga e sobuti ira na yalo tabu i Jiova kei na nona veivakalougatataki era na veilomani. (1 Joni 4:7) Sa rauta me tukuna o Jisu, ni o ira ga na nona imuri dina era na veilomani.

8-9. E uqeti ira vakacava e levu na loloma era vakaraitaka na iVakadinadina i Jiova?

⁸ Me vaka e tukuna o Jisu, levu era na kilai ira na nona imuri ena nodra veilomani dina. Me kena ivakaraitaki, e nanuma lesu e dua na tacida tagane o Ian na imatai ni gauna e tiko kina ena soqo ni veiwasewase, a vakayacori ena rara ni qito volekata na nona vale. A lai sara qito ena vanua qori ena vica na vula yani e liu. E kaya: “Era duidui vakalevu na tiko ena soqo qo ni vakatauvatani kei ira na dau mai sara qito. Era veidokai na iVakadinadina i Jiova, rakorako nodra isulusulu, e vinaka tale ga na nodra itovo na gone. Koya e bibi sara ni laurai vei ira na marau kei na lomavakacegu, qori na ka au dau diva tu. Dina niu sega ni nanuma rawa e dua na ivunau ena siga ya, ia na nodra itovo vinaka na iVakadinadina i Jiova au na sega ni guilecava rawa.” c E macala ni nodra itovo vinaka qori, e rawati ga ena nodra veilomani dina. Nida lomani ira na mataveitacini, eda na caka vinaka vei ira, eda dokai ira tale ga.

⁹ E va tale ga qori na ka e tukuna e dua na tacida o John ni tekivu lako ena soqoni ni ivavakoso: “Au qoroya nodra veikauaitaki . . . na tiko e kea, au taleitaka nira rerevaka na Kalou. Au vakadeitaka niu sa kunea na lotu dina ena loloma dina era vakaraitaka.” d Na ivakaraitaki qori kei na levu tale, e dusia ni o ira na tamata i Jiova era lotu vaKarisito dina.

10. Na gauna cava meda vakaraitaka kina na noda loloma vaKarisito? (Raica tale ga na ivakamacala e ra.)

¹⁰ Me vaka sa tukuni oti mai, e sega ni dua na tacida e uasivi. Ena so na gauna era tukuna se cakava na ka ena vakararawataki keda. e (Jeme. 3:2) E gauna vinaka sara ga qori meda vakaraitaka kina na noda loloma vaKarisito. Na cava gona eda rawa ni vulica ena ivakaraitaki i Jisu?—Joni 13:15.

11. Na itovo cava erau vakaraitaka o Jemesa kei Joni? (Raica na iyaloyalo.)

¹¹ E sega ni namaka o Jisu me ratou uasivi na nona imuri. Ia e vukei ratou vakayalololoma me ratou veisautaka na nodratou itovo ca me rawa ni vakadonui ratou o Jiova. Kena ivakaraitaki, dua na gauna rau lai tukuna vei tinadrau na yapositolo o Jemesa kei Joni me lai kerei Jisu me solia vei rau na itutu dokai ena Matanitu vakalomalagi. (Maciu 20: 20, 21) Na ka erau cakava o Jemesa kei Joni e vakaraitaka ni rau dokadoka, erau vakalevulevui rau vei ratou na kena vo.—Vkai. 16:18.

12. Vakacava erau vakaraitaka ga na itovo ca o Jemesa kei Joni? Vakamacalataka.

¹² Erau sega ni vakaraitaka ga na itovo ca o Jemesa kei Joni ena gauna qori. Rogoca mada na ka eratou kaya na vo ni yapositolo: “Ni ratou rogoca na vo ni le tini, eratou sevaki rau sara ga na veitacini.” (Maciu 20:24) Vakasamataka mada na katakata ni nodratou veivosaki o Jemesa, Joni kei ratou na vo ni yapositolo. De dua ratou na tukuna qo na vo ni yapositolo: ‘Sa dua na ka o kemudrau mo drau kerea na itutu qori ena Matanitu vakalomalagi. O keitou tale ga keitou cakacaka vakaukaua kei Jisu, sega ni o kemudrau ga. E rawa tale ga ni soli vei keitou na itutu dokai qori!’ Se mani cava eratou vakasamataka se tukuna ena gauna qori, eratou guilecava me ratou vakaraitaka tiko ga na loloma kei na yalovinaka.

13. Na cava e cakava o Jisu ena nodratou malumalumu na yapositolo? (Maciu 20:25-28)

¹³ Na cava e cakava o Jisu ena ituvaki qori? E sega ni cudru, e sega ni tukuna ni na vaqara eso tale na tagane era yalomalumalumu vakalevu, era dau veilomani tale ga mera nona yapositolo.  Sega, e vosa ga vakamalua o Jisu vei ratou na tagane lomadina qori. (Wilika Maciu 20:25-28.) E lomani ratou tiko ga ni levu mada ga na gauna eratou dau veibataka se o cei e levu duadua vei ratou.—Mari. 9:34; Luke 22:24.

14. Na cava e dau vakabibitaki ena vanua ratou susugi kina na yapositolo i Jisu?

¹⁴ E kila vinaka o Jisu na nodratou isususu na yapositolo. (Joni 2:24, 25) Era dau vakabibitaka na iliuliu ni lotu ena gauna ya na rogo kei na itutu. (Maciu 23:6; vakatauvatana na vidio Na iDabedabe e Liu ena Valenilotu, ena jw.org.) Era dau vakadonui ira ga na iliuliu ni lotu vakaJiu. f (Luke 18:9-12) E kila o Jisu ni rai qori e rawa ni vakaleqai ratou na yapositolo, vaka kina eso tale. (Vkai. 19:11) E sega ni namaka vakasivia na ka o Jisu vei ratou na nona tisaipeli, e yalovosovoso ga vei ratou. E kila ni ratou via cakava na ka vinaka, e vosovoso kina me vakavulici ratou me ratou yalomalumalumu vakalevu, me ratou dau veilomani tale ga, ia me ratou kua ni dokadoka se viavia rogo.

15. Na cava eda vulica ena ka e yacovi Jemesa kei Joni?

¹⁵ Eda vuli vakalevu ena ka e yacovi Jemesa kei Joni. E cala sara ga nodrau kerea me rau vakaitutu ena Matanitu vakalomalagi. Eratou cala tale ga na vo ni yapositolo ni mai vakaleqa na nodratou duavata na ituvaki qori. Ia e yalovinaka tiko ga o Jisu vei ratou kece na 12 na yapositolo, e lomani ratou tale ga. Na cava eda vulica? E sega ni bibi ga na ka era cakava eso tale, e bibi tale ga na ka eda cakava ena nodra malumalumu kei na nodra cala. Na cava meda cakava ni vakararawataki keda e dua na tacida? Meda taroga: Na cava au rarawataka kina vakalevu na ka e cakava na taciqu qo? Vakacava e vinakati meu veisautaka e dua na noqu itovo ca? Vakacava e sotava tiko e dua na ituvaki na taciqu e vakararawataki au? Ke tiko mada ga na yavu vinaka meu rarawa kina, vakacava au na rawa ni lomani koya tiko ga qai vosoti koya?’ Nida dau veilomani vakalevu, eda vakaraitaka tiko nida imuri dina i Jisu.

16. Na cava tale eda vulica vei Jisu?

¹⁶ Eda vulica tale ga ena ivakaraitaki i Jisu oya meda kilai ira vinaka na tacida. (Vkai. 20:5) O Jisu e rawa ni kila na loma ni tamata. Eda sega ni cakava rawa qori. Ia eda rawa ni vosota na nodra malumalumu na tacida. (Efeso 4:1, 2; 1 Pita 3:8) Ena rawarawa meda cakava qori nida kila vinaka na nodra isususu. Dikeva mada e dua na ivakaraitaki.

17. E yaga vakacava na ka e cakava e dua na ivakatawa ni tabacakacaka?

¹⁷ E nanuma e dua na ivakatawa ni tabacakacaka e veiqaravi tiko ena Tokalau kei Aferika ni sega ni dauloloma e dua na tacida tagane. Na cava e cakava na ivakatawa ni tabacakacaka? E kaya: “Au saga sara ga meu kila vinaka na tacida qori.” Ni veimaliwai kei na tacida qori, e vulica kina na nona isususu, kei na vuna e va kina ya na nona itovo. E kuria: “Au qoroi koya sara ga niu kila na nona sasaga me veisautaka na nona bula, kei na veisau  sa cakava rawa. Qo keirau sa veitokani vinaka.” Io, nida saga meda kilai ira vinaka na tacida, ena rawarawa meda lomani ira.

18. Ni vakararawataki keda e dua na tacida, na cava eda rawa ni taroga? (Vosa Vakaibalebale 26:20)

¹⁸ Eso na gauna eda nanuma meda lai raica na tacida e vakararawataki keda. Ia qo e vica na taro meda vakasamataka rawa: ‘Au kila na dina ni itukutuku kece?’ (Vkai. 18:13) ‘E nakita na cala qori se sega?’ (Dauv. 7:20) ‘Au a cakava tale ga na cala qori ena dua na gauna?’ (Dauv. 7:21, 22) ‘Niu lai vosa vua na tacida qo, ena rawa ni wali na leqa se na vakalevutaka ga?’ (Wilika Vosa Vakaibalebale 26:20.) Nida vakasamataka rawa na taro qori, de dua eda na vakadeitaka ni noda lomana na tacida qori, ena vinaka ga meda guilecava na ka e yaco.

19. Na cava mo vakadeitaka mo cakava?

¹⁹ Eda vakaraitaka vakailawalawa na iVakadinadina i Jiova nida tisaipeli dina i Jisu. E tiko nodra malumalumu na tacida, ia eda vakaraitaka yadudua nida imuri i Jisu nida lomani ira tiko ga. Nida cakava qori, eda sa vukea tiko e levu mera kila na lotu dina, mera tomani keda tale ga ena noda sokaloutaki Jiova, na Kalou dauloloma. Meda vakadeitaka mada ga meda vakaraitaka tiko ga na loloma era kilai tani kina na lotu vaKarisito dina.