Na cava e tukuna kina na wekai Elimeleki ni na “vakacacana” na nona ivotavota ke vakawatitaki Ruci? (Ruci 4:1, 6)

Ena gauna vakaivolatabu, ke sega ni vakaluveni e dua na tagane vakawati mani mate, qo e vica na taro me saumi: Ena vakacava na nona qele? Ena bokoci vakadua na yaca ni nona vuvale? Ena saumi qori ena Lawa e soli vei Mosese.

Ena vakacava na nona qele na tagane e mate, se dravudravua qai volitaka na nona qele? E rawa ni volia lesu o tacina, se dua na wekana voleka. Ni caka qori ena taukena tiko ga na vuvale na qele.—Vunau 25:23-28; Tiko 27:8-11.

Sala cava ena vakabulai kina na yaca ni nona vuvale na tagane sa mate? Oya ena vakawati vakaveidakuni, me vaka e cakava o Ruci. Ena vakawatitaka o tagane na yada nei tacina me rawa ni rau vakaluveni. Na gone qori ena vakabula na yaca i tagane sa mate, ena nona na ivotavota. Na ituvatuva qori e karoni tale ga kina na yada.—Vkru. 25:5-7; Maciu 22:23-28.

Dikeva mada na ivakaraitaki nei Neomai. E watina e dua na turaga o Elimeleki. Ni sa mate o Elimeleki kei rau na luvena tagane, sa sega ni dua me qaravi Neomai. (Ruci 1:1-5) Ni lesu tale i Juta o Neomai, e tukuna vei vugona o Ruci me kerei Poasa me volia lesu na qele. O Poasa erau veiwekani voleka kei Elimeleki. (Ruci 2:1, 19, 20; 3:1-4) Ia e kila o Poasa ni tiko e dua tale na wekai Elimeleki voleka sara. E rawa sara ga ni volia lesu na turaga qori na qele.—Ruci 3:9, 12, 13.

A tu vakarau na turaga qori me veivuke. (Ruci 4:1-4) E kila ni tiko na ka me saumi, e kila tale ga ni sa qase sara o Neomai me vakaluveni me rawa ni taukena na gone qori na qele nei Elimeleki. Kena ibalebale sa rawa sara ga ni nona na ivotavota qele ya, ena vinaka ga vua.

Ia e qai veisautaka na nona vakatulewa na turaga qori, ni tukuni vua me vakawatitaki Ruci. E kaya: “Au sa sega ni volia lesu rawa, deu na vakacacana na noqu ivotavota.” (Ruci 4:5, 6) Na cava e veisautaka kina na nona vakatulewa?

Ke vakawatitaki Ruci na turaga qori se dua tale na tagane, oti qai vakasucuma o Ruci e dua na gonetagane, ena taukena na gone na qele nei Elimeleki. Ena rawa ni ‘vakacacani’ vakacava na “ivotavota” nei wekai Elimeleki? E sega ni tukuna na iVolatabu, ia qo eso na ka e rawa ni vakavuna.

• Kena imatai, ena maumau wale na ilavo e vakayagataka, ni na sega ni nona na qele nei Elimeleki. Ena taukena na luvena tagane o Ruci.

• Kena ikarua, ena qarava na veika me baleti Neomai kei Ruci.

• Kena ikatolu, ke so tale na luvedrau kei Ruci era na wasea na gone qori na nona ivotavota, vaka kina o ira na luvena sa tiko rawa.

• Kena ikava, ke sega ni vakaluveni na wekai Elimeleki, na gonetagane e vakasucuma o Ruci ena taukena na ivotavota nei Elimeleki, vaka kina na nona ivotavota. Kena ibalebale ke mate na turaga qori, na nona qele sa na taukena na gone e tiko vua na yaca i Elimeleki. A sega gona ni via vukei Neomai na turaga e wekai Elimeleki ni na vakacacana na nona ivotavota. E solia na galala vei Poasa, o koya ena veivoli tarava me qarava na itavi qori. Ia e veivoli lesu o Poasa ni vinakata “me maroroi . . . na yaca ni tagane sa mate ena nona ivotavota.”—Ruci 4:10.

Kena irairai ni kauaitaka vakabibi na wekai Elimeleki me maroroi na yacana ena nona ivotavota. E nanumi koya ga. A saga me vakabulai na yacana, ia e sega ni tiko na yacana ena itukutuku makawa. E sega tale ga ni vinakata na ka e vakalougatataki kina o Poasa, ya me volai na yacana ena iyatukawa e basika kina na Mesaia o Jisu Karisito. (Maciu 1:5; Luke 3:23, 32) Qori na itinitini ca ni nona nanumi koya ga na wekai Elimeleki, ni sega ni via vukea e dua e leqa tu!—Maciu 1:5; Luke 3:23, 32.